Lajmet

Hoti: Kosova është ndër vendet me menaxhimin më të mirë të pandemisë

Published

5 years ago

December 24, 2020

Betim Gashi

Kryeministri i Kosovës, Avdullah Hoti, bashkë me vartësin e tij, Armend Zemaj i cili drejton Ministrinë e Shëndetësisë, kanë vizituar sot menaxhmentin e Shërbimit Spitalor dhe Klinik Universitar të Kosovës, të cilët i ka falënderuar për punë e bërë gjatë pandemisë me Covid-19. Hoti ka thënë se Kosova është ndër vendet që më së miri e ka menaxhuar pandeminë, duke shtuar se po vazhdon përballja me betejën e fundit në luftën me COVID-19.

Shefi i ekzekutivit ka thënë se numri i personave me COVID-19, të shtrirë në spitale është në rënie e sipër.

“Por nuk është përmbyllur ende kjo pandemia, andaj kemi nevojë për vëmendje të plotë, për kujdes maksimal, në veçanti tash në kohë të festash kur lëvizjet e qytetarëve janë më të mëdha, e kemi diasporën tonë që masivisht është kthyer në Kosovë te familjet e tyre. Jemi në betejën e fundit të kësaj lufte, betejat paraprake i kemi fituar, duhet ta fitojmë edhe këtë betejë të fundit për ta fituar komplet luftën. Është lajm i mirë që edhe sot i informatat janë që numri i njerëzve të shtrirë nëpër klinika COVID është në rënie e sipër”, ka thënë Hoti.

Ai ka shtuar se ministri i Shëndetësisë është duke punuar në sigurimin e vaksinës kundër Covid-19, duke shtuar se planet janë që të sëmurët kronikë do të jenë ndër të parët që do të marrin vaksinën.

“Kosova absolutisht renditet në mesin e vendeve që më së miri e kanë menaxhuar pandeminë, besoj që në tre-katër muajt e ardhshëm ta përmbyllim plotësisht, ministri Zemaj është duke punuar shumë në sigurimin e vaksinës, edhe përmes Covax, edhe përmes Komisionit Evropian dhe disa vendeve partnere”, ka thënë ai.

Në takimin falënderues me menaxhmentin e ShSKUK-së, Hoti ka thënë se mënyra e menaxhimit të pandemisë nga mjekët është model. Ai ka bërë thirrje për respektim të masave duke shtuar se nevojiten edhe tre apo katër muaj vëmendje për të dalë nga pandemia.

Lajmet

Sekuestrohen armë dhe narkotikë në aksione policore në Kosovë

Published

34 minutes ago

June 4, 2026

UBTNews

Policia e Kosovës ka sekuestruar armë dhe substanca narkotike në disa aksione të zhvilluara në Graqanicë, Ferizaj dhe Vushtrri.

Në Graqanicë, gjatë një tentimi për kontroll policor, një i dyshuar është larguar duke ikur nëpër oborre shtëpish dhe duke hedhur sende gjatë arratisjes. Në vendngjarje, policia ka gjetur dhe sekuestruar një pistoletë me një fishek, si dhe një sasi të vogël të substancës së dyshuar narkotike. I dyshuari është arrestuar dhe më pas është liruar në procedurë të rregullt me vendim të prokurorit.

Në Ferizaj, njësitë policore kanë identifikuar një person të dyshuar për shitblerje të narkotikëve, i cili është larguar me veturë sapo ka vërejtur policinë. Në afërsi të vendit të ngjarjes është gjetur dhe sekuestruar 188.9 gramë substancë e dyshuar narkotike e llojit marihuanë, me vlerë rreth 2 mijë euro. I dyshuari është në kërkim policor dhe hetimet po vazhdojnë.

Në Vushtrri, është arrestuar një person tek i cili është gjetur një armë e gjatë M48 me tre fishekë. Arma është sekuestruar, ndërsa pas intervistimit, me vendim të prokurorit i dyshuari është liruar në procedurë të rregullt.

Lajmet

Dy të arratisur nga Qendra Edukuese Korrektuese kapen dhe kthehen në qendër

Published

35 minutes ago

June 4, 2026

UBT News

Në Lipjan, më 03.06.2026 rreth orës 21:28, është raportuar arratisja e dy personave nga Qendra Edukuese Korrektuese në Lipjan, pasi zyrtarët korrektues kanë njoftuar për largimin e tyre nga institucioni.

Pas pranimit të informatës, janë ndërmarrë menjëherë veprime taktiko-operative nga autoritetet përkatëse me qëllim lokalizimin dhe kapjen e të dyshuarve.

Si rezultat i veprimeve në terren, të dy personat janë identifikuar, janë kapur dhe më pas janë kthyer sërish në Qendrën Edukuese Korrektuese në Lipjan.

Rasti është menaxhuar nga institucionet përgjegjëse, ndërsa rrethanat e arratisjes mbeten nën trajtim.

Lajmet

Një polic u vra dhe një tjetër u plagos në Maliq të Shqipërisë

Published

45 minutes ago

June 4, 2026

UBTNews

Një ngjarje e rëndë është regjistruar në zonën e Lozhanit, në Bashkinë e Maliqit, në Shqipëri, ku një efektiv policie ka humbur jetën dhe një tjetër ka mbetur i plagosur gjatë një operacioni të forcave të rendit.

Sipas informacioneve paraprake, autori i dyshuar i sulmit është kapur i plagosur. Në vendngjarje kanë mbërritur forca të shumta policore dhe grupet hetimore, të cilat po punojnë për zbardhjen e plotë të rrethanave të ngjarjes.

Autoritetet pritet të japin detaje shtesë lidhur me dinamikën e incidentit dhe identitetin e personave të përfshirë.

Kryeministri i Shqipërisë, Edi Rama, ka reaguar pas ngjarjes së rëndë në Maliq.

Rama njoftoi se polici i vrarë në krye të detyrës, Enea Mekolli, do të shpallet “Dëshmor i Atdheut”, ndërsa shprehu ngushëllimet për familjen e tij dhe uroi shërim të shpejtë për efektivin tjetër të plagosur gjatë aksionit.

“Gjatë një operacioni kurajoz për kapjen e një të shumëkërkuari, që prej vitesh i fshihej ligjit në malet e Korçës, ka humbur jetën një efektiv policie dhe është plagosur një i dytë. Ndërkohë, pasi hapi zjarr ndaj tyre, u plagos dhe u kap edhe krimineli”, ka shkruar Rama.

Kryeministri theksoi se autori duhet të përballet me ndëshkimin maksimal të parashikuar nga ligji dhe vlerësoi angazhimin e Policisë së Shtetit në luftën kundër kriminalitetit.

“Nderim përjetë dëshmorit të atdheut, ngushëllime familjes dhe shërim të shpejtë efektivit tjetër. Ndëshkim maksimal për të shumëkërkuarin dhe respekt maksimal për Policinë e Shtetit, që nuk do të ndalet asnjëherë në misionin e saj”, u shpreh Rama.

Foto: Balkanweb.com

Lajmet

Dyshime për 338 euro të falsifikuara në Prishtinë

Published

49 minutes ago

June 4, 2026

UBT News

Sipas raportit të fundit të Policisë së Kosovës, është iniciuar një rast për falsifikim të parasë në Prishtinë, pas ekspertizës së kryer nga Agjencia e Kosovës për Forenzikë.

Në konsultim me prokurorin, më 3 qershor 2026 është hapur rasti pasi ekspertiza ka konstatuar se 338 euro në monedha dhe kartëmonedha të ndryshme dyshohet se janë të falsifikuara.

Paratë e dyshuara ishin dorëzuar në polici më 8 gusht 2024 nga një zyrtare e një banke private.

Autoritetet kanë bërë të ditur se hetimet po vazhdojnë nga ekipet përkatëse me qëllim të zbardhjes së plotë të rrethanave të rastit.