Presidenti i ShBA-së, Donald Trump, gjithnjë e më shumë po mbështetet në një grup të ngushtë këshilltarësh, ndërsa është duke shqyrtuar nisjen e sulmeve ushtarake kundër objekteve bërthamore të Iranit.

Në të njëjtën kohë, thuhet se Trump po kërkon kontribut nga një grup më i gjerë aleatësh – si brenda ashtu edhe jashtë administratës – për të vlerësuar mendimet nëse ai duhet të miratojë veprime ushtarake në Iran, një veprim që ka ndarë mbështetësit e tij kryesorë, tha një zyrtar tjetër i lartë.

Edhe pse ai shpesh kërkon këshilla nga një gamë e gjerë njerëzish, Trump zakonisht merr vendime kyçe me një grup të vogël këshilltarësh të ngushtë, duke përfshirë Zëvendëspresidentin JD Vance, Shefen e Shtabit të Shtëpisë së Bardhë, Susie Wiles, Zëvendës Shefin e Shtabit Stephen Miller dhe Sekretarin e Shtetit Marco Rubio, i cili shërben gjithashtu si këshilltar i përkohshëm i sigurisë kombëtare, sipas zyrtarit të lartë.

Trump gjithashtu konsultohet me Steve Witkoff, të dërguarin e tij për çështjet e Lindjes së Mesme, për vendimet brenda fushëveprimit të tij.

Ndërsa peshon mundësinë e përfshirjes së SHBA-së në një konflikt të drejtpërdrejtë me Iranin, Trump thuhet se ka ngushtuar rrethin e tij të ngushtë, duke lënë mënjanë zyrtarë të caktuar.

Drejtori i Inteligjencës Kombëtare, Tulsi Gabbard, i cili njihet për kundërshtimin e veprimeve ushtarake, thuhet se është përjashtuar nga diskutimet kryesore, dhe Sekretari i Mbrojtjes Pete Hegseth thuhet gjithashtu se është përjashtuar kryesisht nga cikli i rregullt i vendimmarrjes së Trump, sipas zyrtarëve.

Megjithatë, zëdhënësi i Pentagonit, Sean Parnell, e ka hedhur poshtë karakterizimin.

“Ky pretendim është plotësisht i rremë. Sekretari po flet me presidentin disa herë në ditë dhe ka qenë i pranishëm në Dhomën e Situatave këtë javë. Sekretari Hegseth po ofron lidership të fortë dhe vazhdon të mbështesë qasjen e presidentit ‘paqe përmes forcës‘”, tha ai.

Burime të mbrojtjes dhe një ish-zyrtar i administratës thanë se Trump po dëgjon gjithashtu me vëmendje gjeneralin Dan Caine, kryetarin e Shtabit të Përbashkët, kreun e Komandës Qendrore të SHBA-së, gjeneralin Erik Kurilla, dhe drejtorin e CIA-s John Ratcliffe.

Të enjten, Sekretarja e Shtypit e Shtëpisë së Bardhë, Karoline Leavitt, u tha gazetarëve se Trump pritet të marrë një vendim brenda dy javëve të ardhshme në lidhje me përfshirjen e mundshme ushtarake amerikane në konfliktin e vazhdueshëm Izrael-Iran.

Ndryshe nga paraardhësit e tij pas Luftës së Dytë Botërore, Trump nuk mbështetet në informime të strukturuara mbi politikat nga zyrtarë të lartë kur bëhet fjalë për çështjet e jashtme dhe ushtarake, thanë dy burime të njohura me procesin.

Në vend të kësaj, stili i tij i vendimmarrjes është më informal, me biseda që shpesh zhvillohen me një përzierje anëtarësh të administratës, udhëheqësish të huaj dhe kontaktesh të jashtme. Ky stil më pak formal mund të kufizojë mundësitë që të tjerët të sfidojnë supozimet e tij ose të ngrenë shqetësime, shtuan burimet.

Muajin e kaluar, Trump i habiti shumë kur njoftoi heqjen e sanksioneve ndaj Sirisë pas takimit me Princin e Kurorës Saudite Mohammed bin Salman. Zyrtarët në Departamentin e Thesarit u kapën në befasi, pasi nuk ishte bërë asnjë planifikim, as nuk ishin konsultuar bankat e huaja apo zyrtarët sirianë paraprakisht, sipas atyre që kanë njohuri të drejtpërdrejta.

Që nga kthimi në detyrë në janar, Trump ka zvogëluar ndjeshëm rolin e Këshillit të Sigurisë Kombëtare, i cili tradicionalisht koordinohet me agjencitë federale për të zhvilluar opsione politike dhe për të vlerësuar pasojat e veprimeve ushtarake.

Presidenti francez Emmanuel Macron ka shpërndarë një mesazh të fortë simbolik në rrjetet sociale, duke i bërë thirrje vendeve evropiane të zgjohen përballë sfidave të sigurisë. Në një postim në Instagram, ai ka publikuar një imazh të një avioni luftarak Rafale me mesazhin provokues: “Rafale po telefonon – Siguroni Evropën”.

Postimi është i paraqitur në formën e një telefonate të simuluar në ekranin e një telefoni, me opsionin për ta pranuar thirrjen, duke e kthyer metaforën në një apel të drejtpërdrejtë për bashkëpunim dhe ndërgjegjësim të përbashkët në nivel kontinental.

Krahas fotos, Macron shkruan: “Miq evropianë, ju keni një thirrje.”

Ky mesazh vjen në një kontekst rritjeje tensionesh globale dhe shqetësimesh të shtuar për aftësinë mbrojtëse të Evropës.

Me këtë postim, Macron duket se po kërkon të mobilizojë vëmendjen dhe përgjegjësinë e liderëve evropianë për të forcuar kapacitetet e përbashkëta ushtarake dhe të sigurisë.

Ministri i Jashtëm i Iranit, Abbas Araghchi, ka deklaruar se Teherani nuk do të angazhohet në asnjë lloj dialogu me Shtetet e Bashkuara për sa kohë që sulmet izraelite vazhdojnë. Deklarata u bë publike nga agjencia shtetërore iraniane IRNA, në një kohë kur tensionet në Lindjen e Mesme po rriten ndjeshëm.

“Amerikanët duan negociata dhe kanë dërguar mesazhe disa herë, por ne e kemi thënë qartë se nuk ka vend për dialog derisa agresioni të ndalet,” u shpreh Araghchi, duke e përjashtuar çdo mundësi për bisedime në kushte aktuale. “Ne nuk kemi bisedime me Amerikën si partnere në këtë krim,” shtoi ai, duke i cilësuar SHBA-të indirekt bashkëfajtore në veprimet e Izraelit.

Deklarata vjen në prag të takimit të Araghchit me ministrat e jashtëm të Mbretërisë së Bashkuar, Francës dhe Gjermanisë në Gjenevë – bisedimet e para të drejtpërdrejta me fuqitë perëndimore që prej shpërthimit të konfliktit javën e kaluar, kur Izraeli ndërmori një ofensivë ajrore ndaj Iranit.

Ministri i Mbrojtjes i Izraelit, Israel Katz, ka paralajmëruar grupin libanez Hezbollah që të jetë i kujdesshëm, duke shtuar se durimi i Izraelit ndaj “terroristëve” që e kërcënojnë është shteruar.

Hezbollahu është shpallur grup terrorist nga Shtetet e Bashkuara. Ndërkaq, Bashkimi Evropian ka në listën e zezë krahun ushtarak të grupit libanez, por jo edhe partinë politike.

Kreu i Hezbollahut, Naim Qassemi, tha një ditë më parë se grupi libanez do të veprojë si ta vlerësojë, në dritë të asaj që e quajti “agresion brutal izraelito-amerikan” kundër Iranit.

Në një deklaratë tjetër të bërë javën e kaluar, Hezbollahu nuk bëri ndonjë zotim të qartë lidhur me bashkimin me Iranin në konfliktin kundër Izraelit.

Ky grup libanez bën pjesë në të ashtuquajturin “Bosht i Rezistencës” – një rrjet i bashkëpunëtorëve rajonalë të Iranit, ku përfshihen grupe milicie, por edhe Hamasi, grupi palestinez i shpallur organizatë terroriste nga SHBA-ja dhe BE-ja.

Hezbollahu dhe Izraeli zhvilluan një luftë njëvjeçare, që përfundoi me një armëpushim të arritur në nëntor të vitit të kaluar. Por, pavarësisht armëpushimit, Izraeli vazhdon të kryejë sulme ndaj caqeve të Hezbollahut në Liban.

Ndryshe, Izraeli nisi sulmet kundër Iranit më 13 qershor, duke rritur frikën për përhapjen e konfliktit në Lindjen e Mesme.

Izraeli ka thënë se fushata ushtarake synon ta parandalojë Iranin që të ketë armë bërthamore. Irani menjëherë është kundërpërgjigjur me sulme raketore dhe me dronë, ndërsa vazhdimisht ka hedhur poshtë pretendimet se synon të ketë armë bërthamore. Teherani ka thënë se programi i tij bërthamor është për qëllime civile.