Pas kërkesës së Kryeministrit Albin Kurti për të pasur një raport të detajuar me të gjitha hollësitë për rastin e vrasjes së Arlinda Zekajt nga Ministria e Punëve të Brendshme dhe ajo e Drejtësisë, sot në orën 09:00 do të mbajnë konferencë të përbashkët për media Ministrja e Drejtësisë, Donika Gërvalla-Schwarz, si dhe Ministri i Punëve të Brendshme, Xhelal Sveçla.

Konferenca do të mbahet në ndërtesën e Qeverisë së Kosovës, menjëherë pas dorëzimit të raporteve përkatëse në Zyrën e Kryeministrit. Siç është bërë e ditur nga ZKM-ja, këto raporte do të shqyrtohen me kujdes për të identifikuar të gjithë rrjedhën e ngjarjes, lëshimet e mundshme institucionale, neglizhencën dhe përgjegjësinë eventuale të të gjitha organeve kompetente në çdo fazë të trajtimit të rastit.

Kjo dalje e dy ministrave para medieve vjen në një moment mjaft kritik, pasi në Prishtinë po zhvillohen protesta të njëpasnjëshme të organizuara nga Kolektivi për Mendim dhe Veprim Feminist. Protestuesit po kërkojnë me ngulm llogaridhënie, hetimin penal të zyrtarëve që dështuan në mbrojtjen e viktimës, si dhe dorëheqjen ose shkarkimin e menjëhershëm të dy ministrave përgjegjës. /E.A/

Moti gjatë ditës së sotme në Kosovë do të karakterizohet nga vranësira të shpeshta dhe reshje të kohëpaskohshme shiu.

Temperaturat minimale do të lëvizin ndërmjet 1 dhe 4 gradë Celsius, ndërsa ato maksimale të ditës pritet të arrijnë nga 11 deri në 15 gradë Celsius.

Do të fryjë erë e lehtë nga drejtimi i verilindjes me shpejtësi prej 1 deri në 4 metra në sekondë.

Pavarësisht reshjeve të shiut, temperaturat maksimale do të vazhdojnë të mbeten relativisht të buta për këtë periudhë të vitit. /E.A/

Protestat kundër vrasjes së grave në Kosovë kanë vazhduar edhe sot, për të dytën ditë radhazi, me pankarta që kërkojnë drejtësi dhe përgjegjësi institucionale.

Protestuesit kanë mbajtur pankarta me mbishkrimet “Gjumi s’ka me ju marrë, flaka ka me ju dalë” dhe “Heshtja mbron dhunuesin, jo viktimën”, duke reaguar pas vrasjes së Arlinda Zekajt, më 25 tetor në Vitomiricë të Pejës.

Ata po kërkojnë dorëheqjen e ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla, si dhe ndjekjen penale të personave që, sipas protestuesve, kanë neglizhuar rastin e Zekajt.

Liridona Sijarina nga Kolektivi për Mendim dhe Veprim Feminist, gjatë fjalimit para ndërtesës së Qeverisë, ka deklaruar se protestat do të vazhdojnë çdo ditë deri në përmbushjen e kërkesave të organizatorëve.

Ndërkohë, Këshilli Prokurorial i Kosovës ka suspenduar nga detyra kryeprokuroren e Prokurorisë Themelore në Pejë, Lumturije Vuçetaj, dhe prokuroren e rastit të Arlinda Zekajt, Arlinda Nallbani Gacaferrin. Ndaj tyre është hapur procedurë disiplinore dhe është themeluar një panel hetimor për trajtimin e rastit.

Edhe Policia e Kosovës ka pezulluar nga puna 11 zyrtarë policorë për mënyrën e trajtimit të rastit të Zekajt, e cila u vra nga ish-kunati i saj.

Protestë kundër vrasjes së grave dhe për kërkimin e përgjegjësisë institucionale ishte mbajtur edhe një ditë më parë./A.K/

UBT hap thirrjen për studentët e nivelit Bachelor nga programet Menaxhment, Biznes dhe Ekonomi, Juridik, Psikologji, Inxhinieri e Mekatronikës, Studime të Sigurisë, Shkenca Politike, Shkenca Kompjuterike, Arkitekturë, si dhe Media dhe Komunikim, për mobilitet studentor në Sapienza University of Rome, Itali, në kuadër të programit Erasmus+ KA171, për semestrin pranveror të vitit akademik 2026/2027.

Sapienza University of Rome është një nga universitetet më të mëdha dhe më të njohura publike në Itali, me traditë të gjatë akademike dhe një gamë të gjerë programesh studimore dhe kërkimore.

Linku për aplikim

Afati i fundit për aplikim: 02.11.2026

Kujdes: Thirrja do të qëndrojë e hapur vetëm për 4 ditë!

Pas përfundimit të afatit, aplikimet do të shqyrtohen sipas kritereve të përcaktuara. Kandidatët që kalojnë fazën e parë të vlerësimit do të ftohen për intervistë, ndërsa studentët e përzgjedhur do të nominohen zyrtarisht nga UBT për mobilitet në Sapienza University of Rome.

Ftojmë të gjithë studentët nga programet përkatëse që të shfrytëzojnë këtë mundësi për të studiuar në një nga universitetet më prestigjioze të Italisë, për të fituar përvojë ndërkombëtare dhe për të zhvilluar më tej kompetencat e tyre akademike dhe profesionale.

Për informacione shtesë, mund të kontaktoni Zyrën për Marrëdhënie Ndërkombëtare në: [email protected].