Një incident fizik ka ndodhur sot në Klinikën e Kirurgjisë së Fëmijëve në Qendrën Klinike Universitare të Kosovës (QKUK), ku janë përfshirë dy punonjës shëndetësorë.

Lajmin e ka konfirmuar zëdhënësja e QKUK-së, Mirlinda Qyqalla, e cila ka bërë të ditur se për rastin janë njoftuar organet e rendit dhe se policia ka dalë në vendin e ngjarjes.

“Sipas informatave fillestare, në Klinikën e Kirurgjisë së Fëmijëve ka ndodhur një incident mes dy punonjësve shëndetësorë. Për rastin janë njoftuar organet e rendit, të cilat kanë dalë në vendin e ngjarjes”, ka deklaruar Qyqalla.

Ajo për Telegrafin ka shtuar se aktualisht nuk ka detaje shtesë lidhur me shkaqet e incidentit, ndërsa rasti është duke u trajtuar nga autoritetet kompetente.

Portali Dukagjini ka kontaktuar Policinë dhe QKUK-në por nuk kanë dhënë informacione nga rasti në fjalë.

Ndërkohë, mediat kanë raportuar se incidenti ka ndodhur në hyrje të ashensorit të Klinikës së Kirurgjisë së Fëmijëve, ku dy kirurgë, të identifikuar me inicialet B.K. dhe Xh.A., janë përplasur fizikisht.

Prokuroria e Specializuar e Hagës po insiston që Hashim Thaçi të mbetet në paraburgim.

Madje, në parashtresën e fundit, Prokuroria ka theksuar se një dënim i mundshëm i gjatë, bëhet më konkret kur gjykimi ka shkuar drejt fundit.

“Thaçi është në dijeni të akuzave të rënda të konfirmuara kundër tij, dënimit të mundshëm me burgim të gjatë që mund të rezultojë prej tyre, dhe tani ka njohuri të plota për provat në lidhje me ato krime. Shqiptimi i mundshëm i një dënimi të gjatë bëhet më konkret me përparimin e shpejtë të gjyqit. Përveç kësaj, Thaçi tani përballet me akuza të konfirmuara në lidhje me veprat penale të pengimit për shkak të provave që janë marrë për përpjekjet e tij për të penguar procedurat në këtë rast dhe për të kryer krime të mëtejshme. Të gjitha sa më sipër duhet të merren në konsideratë në lidhje me gjetjet e mëparshme në lidhje me mjetet e Thaçit për t’u arratisur”, thuhet në parashtresë, raporton Nacionale.

Prokuroria ka vazhduar me argumentet e fjalët e njëjta, pavarësisht se gjyqtarët e kanë kritikuar me dhjetëra herë.

Sipas Prokurorisë, Thaçi ka synim t’i pengojë procedurat.

“Thaçi vazhdon të paraqesë një rrezik jashtëzakonisht të lartë të pengimit të procedurave. Duke konstatuar së fundmi se një rrezik i tillë vazhdon të ekzistojë, ky Panel përsëriti përcaktimin e tij të mëparshëm se Thaçi ka (i) interesin dhe aftësinë për të ndërhyrë në procedura; (ii) u përpoq të minonte DHSK-në dhe ofroi përfitime për personat e thirrur nga ZPS-ja; (iii) një pozicion ndikimi në Kosovë që mund t’i lejonte atij të merrte mbështetjen e simpatizantëve; dhe (iv) njohuri më të mëdha për provat që mbështesin akuzat serioze kundër tij”, thuhet në këtë kërkesë të Prokurorisë.

“Përfundimi i paraqitjes së provave në këtë rast nuk e eliminon këtë rrezik, siç është vënë re nga Paneli, pasi dëshmitarët mbeten në rrezik pengimi edhe pas dëshmisë së tyre”, thuhet më tutje.

Prokuroria pretendon se Thaçi ka shprehur interesim të shpërndajë informacionet konfidenciale, për vizitorë, çka sipas tyre, e vështirëson edhe më tutje procedurën. Aty përmendet, si zakonisht, edhe klima e pretenduar e frikësimit të dëshmitarëve.

“Për më tepër, klima e vazhdueshme e frikësimit të dëshmitarëve dhe ndërhyrjes në procedurat penale kundër ish-anëtarëve të UÇK-së në Kosovë vazhdon, për të cilën Gjykata e Apelit ka rënë dakord se është një ‘konsideratë kontekstuale’ relevante.46 Gjetje të ngjashme u bënë në Aktgjykimin e Gjyqit Mustafës dhe në çështjen Gucati dhe Haradinaj. Trupi Gjykues në çështjen Gucati dhe Haradinaj konsideroi se “mbrojtja e dëshmitarëve ka vazhduar të jetë një çështje e gjallë dhe kritike në Kosovë”, dhe ia atribuoi dëshminë ekspertit të mbrojtjes Robert Reid, i cili vuri në dukje se, në më shumë se 20 vjet në këtë fushë, ai nuk kishte parë kurrë frikësim të dëshmitarëve në nivelin që ekziston në Kosovë”, thuhet më tutje.

Fjalët përfundimtare në procesin e krerëve të UÇK-së do të thuhen prej 9 deri më 18 shkurt.

Profesorët e Fakultetit të Medias dhe Komunikimit në UBT, dr. Votim Hanoli dhe dr.Ferid Selimi, së bashku me koautoren Elda Sinani, publikuan punimin “Hedonizmi në epokën digjitale: Një analizë e përdorimit të rrjeteve sociale si burim kënaqësie”, në revistën ndërkombëtare “Architectural Image Studies”, e indeksuar në platformën Scopus.

Ky punim trajton marrëdhënien mes hedonizmit dhe përdorimit të rrjeteve sociale në kontekstin e epokës digjitale. Në një shoqëri gjithnjë e më të ndërvarur nga teknologjia dhe komunikimi virtual, rrjetet sociale janë shndërruar në mjete të fuqishme për përmbushjen e nevojave emocionale dhe psikologjike të individëve, përfshirë kënaqësinë e menjëhershme, vëmendjen dhe vlerësimin social.

Duke u mbështetur në teori të tilla si Teoria e Kultivimit (George Gerbner), dhe Teoria e kornizimit (Framing) e (Goffman), studimi eksploron motivimet hedoniste që qëndrojnë pas sjelljes së përdoruesve në platformat digjitale.

Për të analizuar këtë fenomen, u realizua një studim empirik ku të dhënat tregojnë se shumica e të rinjve e përjetojnë përdorimin e rrjeteve sociale si një burim kënaqësie të menjëhershme, sidomos në lidhje me marrjen e pëlqimeve, ndarjen e përmbajtjeve personale dhe ndërveprimet sociale. Megjithatë, një pjesë e konsiderueshme e të anketuarve raportuan gjithashtu ndjenja boshllëku, ulje të vetëbesimit dhe varësi emocionale ndaj këtyre platformave.

Rezultatet sugjerojnë se rrjetet sociale funksionojnë si një mekanizëm i fuqishëm për përmbushjen e nevojave hedoniste, por gjithashtu ngrenë shqetësime lidhur me ndikimet afatgjata në mirëqenien psikologjike. Punimi përfundon me sugjerime për ndërgjegjësim mediatik dhe përdorim më të vetëdijshëm të teknologjisë dhe mediave sociale.

Linku i revistës: Architectural Image Studies, 2184-8645

Është ekzekutuar pagesa prej 100 eurosh për studentët. Kështu është bërë e ditur nga Ministria e Financave, Punës dhe Transfereve, duke shtuar se janë realizuar pagesat e para të bursës së mobilitetit për studentët që jetojnë në distancë dhe plotësojnë kriteret për këtë bursë.

“Ministria e Financave, Punës dhe Transfereve njofton të gjithë studentët se pagesat në vlerë prej 100 euro janë realizuar në tërësi, të ekzekutuara në disa grupe, për të gjithë studentët që kanë përmbushur kriteret dhe janë përfitues. Poashtu, janë realizuar pagesat e para të bursës së mobilitetit për studentët që jetojnë në distancë dhe plotësojnë kriteret për këtë bursë. Studentët të cilët nuk i kanë përmbushur kriteret e përcaktuara dhe, për rrjedhojë, nuk janë përfitues, janë njoftuar zyrtarisht për refuzimin përmes email-it të përdorur gjatë aplikimit në platformën e-Kosova”, njofton Ministria.

Më tej ata kanë lënë dhe e-mail ku mund të shkruajnë për cdo ankesë apo paqartësi.

“Për çdo ankesë apo paqartësi, ju mund të kontaktoni në adresat elektronike përkatëse, sipas kategorisë: • Studentët që kanë ankesë lidhur me shtesën prej 100 euro, të drejtohen në emailin: [email protected] • Studentët që kanë ankesa ose paqartësi lidhur me bursën e mobilitetit, të kontaktojnë në emailin: [email protected]”, shkruan Ministria.