Sekretari amerikan i Shtetit, Marco Rubio, bisedoi të enjten me Kryeministrin e Qeverisë Rajonale të Kurdistanit, Masrour Barzani, njoftoi Departamenti i Shtetit, duke shtuar se ai shprehu “mirënjohje” ndaj Qeverisë Rajonale të Kurdistanit (KRG) për mundësimin e arritjes së naftës nga Iraku, përfshirë atë nga Kurdistani irakian, në tregjet globale.

“Sekretari gjithashtu shprehu mirënjohjen e tij për Qeverinë Rajonale të Kurdistanit për mundësimin e naftës nga Iraku, përfshirë Rajonin e Kurdistanit të Irakut, që të arrijë në tregjet globale,” tha Departamenti i Shtetit në një deklaratë.

Lufta me Iranin ka rritur çmimet e naftës dhe ka tronditur tregjet globale. Departamenti i Shtetit tha se Rubio “u shprehu ngushëllime familjeve të anëtarëve të Peshmerga-ve të vrarë në një sulm me raketa iraniane më 24 mars dhe u uroi shërim të shpejtë të lënduarve.”

Të paktën gjashtë luftëtarë kurdë Peshmerga u vranë dhe 30 u plagosën në një sulm me raketa në bazën e tyre në veri të Erbilit, në Kurdistanit irakian, thuhej në një deklaratë të Peshmerga-ve të martën.

Deklarata e Peshmerga-ve thoshte se Irani kreu një “sulm tradhtar,” duke shtuar se gjashtë raketa balistike iraniane goditën një selitë ushtarake të Peshmerga-ve në veri të Erbilit herët të martën.

Lufta me Iranin filloi më 28 shkurt, kur SHBA-ja dhe Izraeli sulmuan Iranin. Teherani u përgjigj më pas duke lëshuar sulmet e veta mbi Izraelin dhe shtetet e Gjirit ku gjenden baza amerikane. Sulmet e përbashkëta SHBA-Izrael në Iran dhe sulmet izraelite në Liban kanë vrarë mijëra njerëz.

Presidenti i SHBA-së, Donald Trump, ka ofruar objektiva dhe afate kohore të ndryshueshme për luftën, që variojnë nga përmbysja e qeverisë së Iranit deri te shkatërrimi i aftësive të tij ushtarake dhe raketore. Të enjten, ai tha edhe një herë se mendon se ana e tij e ka fituar luftën. /Reuters/

Në Policin e Kosovës brenda 24 orëve të fundit janë regjistruar dy raste të dhunës në familje.

Rasti i parë është shënuar në Obiliq, me ç’rast është arrestuar një burrë nën dyshimin se ka shkaktuar dhunë fizike ndaj dy viktimave një burri dhe një gruaje.

Ndërsa, me vendim të prokurorit i dyshuari është dërguar në mbajtje për 48 orë.

Rasti tjetër ka ndodhur në Istog, ku dyshohet së një burrë është intervistuar nga prokurori nën dyshimin se ka kryer veprën penale- dhunë në familje.

“Në lidhje me rastin i dyshuari mashkull kosovar i cili dyshohet për kryerje të veprës së lartcekur  në konsultim me prokurorin kompetent pas procedurave është liruar në procedurë të rregullt”, thuhet në raport.

Në raportin njëditor të Policisë së Kosovës bëhet e ditur se një grua shtetas e huaj ka ndërruar jetë në shtëpinë e saj.

Sipas raportit, në vendin e ngjarjes kanë dalë njësitë policore dhe ekipi mjekësor të cilët kanë konstatuar vdekjen e saj.

Ndërkaq me vendim të të prokurorit trupi i pajetë është dërguar në IML për obduksion dhe rasti po vazhdon te hetohet.

Fitorja spektakolare e Kosovës ndaj Sllovakisë me rezultat 4-3 nuk ka kaluar pa u vënë re as në skenën ndërkombëtare, teksa edhe vetë FIFA ka reaguar pas ndeshjes, duke e cilësuar Kombëtaren e Kosovës vetëm një hap larg kualifikimit për Kupën e Botës.
Në një postim zyrtar, FIFA theksoi se “është vetëm edhe një hap për Kosovën drejt Botërorit”, duke e shoqëruar mesazhin me imazhe nga festa e lojtarëve pas një ndeshjeje dramatike.

Kosova arriti këtë fitore pas një përballjeje të vështirë, ku Sllovakia e nisi më mirë dhe mori epërsinë, duke e vendosur në presion ekipin kosovar. Megjithatë, “Dardanët” reaguan me karakter, duke barazuar dhe më pas duke përmbysur rezultatin në pjesën e dytë me një lojë të organizuar dhe efikase në sulm. Edhe pse vendasit tentuan të rikthehen në fund dhe e bënë rezultatin të ngushtë, Kosova arriti ta menaxhojë avantazhin dhe të sigurojë një fitore shumë të rëndësishme.

Ky triumf jo vetëm që i mban gjallë shpresat për kualifikim, por e vendos Kosovën shumë pranë një arritjeje historike në arenën ndërkombëtare. Tashmë, gjithë vëmendja është te sfida e radhës ndaj Turqisë, një ndeshje që mund të vulosë fatin e Kosovës dhe ta dërgojë drejt Botërorit, aty ku do të ishte një moment historik për futbollin kosovar.