Federata e Basketbollit e Kosovës (FBK) ka shpallur zyrtarisht hapjen e aplikimit për licencimin e klubeve dhe shkollave të basketbollit për edicionin garues 2025/26. Ky proces zhvillohet në përputhje me Rregulloren për Licencim dhe Garim, dhe përfshin pesë kritere themelore që klubet duhet të përmbushin:

Sportiv

Financiar

Ligjor, Etik dhe Disiplinor

Administrativ dhe i Personelit

Infrastrukturor

Për secilën kategori licence (A, B, C apo D), janë të përcaktuara kërkesa të veçanta që klubet duhet t’i dokumentojnë.

RISITË PËR EDICIONIN 2025/26:

10% e buxhetit për gjeneratat e reja

Të gjitha klubet e Superligës së Meshkujve janë të obliguara të ndajnë minimum 10% të buxhetit vjetor për zhvillimin e gjeneratave të reja dhe të dorëzojnë një program vjetor të trajnimit për grupmoshat U10–U18, sipas udhëzimeve të FBK-së.

Zbatimi i Politikave të Mbrojtjes

Klubet duhet të caktojnë një person përgjegjës për mbrojtjen e fëmijëve dhe të marrin pjesë në trajnimet përkatëse në këtë fushë, në përputhje me politikat e miratuara nga FBK.

Klubet gjithashtu obligohen të respektojnë Politikat e Mbrojtjes të miratuara nga FBK, duke përfshirë emërimin e një personi përgjegjës për këtë fushë dhe pjesëmarrjen në trajnimet përkatëse.

Afati për dorëzimin e dokumentacionit është deri më 4 Shtator 2025.

Presidenti i FIFA-s, Gianni Infantino, ka shprehur mbështetje për gjyqtaren Katia Itzel Garcia dhe Federatën Meksikane të Futbollit (FMF), pasi gjyqtarja zbuloi se ajo ishte subjekt i abuzimit në internet pas një ndeshjeje të Kupës së Ligës.

Garcia, e cila ka arbitruar në gara të tjera të meshkujve, përfshirë Liga MX, Gold Cup dhe Lojërat Olimpike, raportoi se ka marrë kërcënime me vdekje pasi ka arbitruar ndeshjen e Kupës së Ligës midis FC Cincinnati dhe Monterrey të enjten.

Vendimi i saj për t’i dhënë një gol skuadrës së MLS-së që dukej se ishte në pozicion jashtë loje nxiti zemërim midis tifozëve të Monterrey-t pasi Cincinnati fitoi 3-2.

“Jam e tronditur dhe e trishtuar nga kërcënimet ndaj gjyqtares Katia Itzel pas performancës së saj në ndeshjet e raundit të parë të Kupës së Ligës midis Monterrey dhe Cincinnati ”, shkroi Infantino në llogarinë e tij në Instagram.

“Nuk ka vend në futboll dhe në shoqëri për abuzim, diskriminim dhe dhunë të çfarëdo lloji. Në FIFA, ne jemi në solidaritet me FMF-në dhe CONCACAF-in duke dënuar veprimet e atyre që bëjnë këto kërcënime të papranueshme. Ne ofrojmë mbështetjen tonë të pakushtëzuar për t’i mbajtur përgjegjësit para përgjegjësisë.”

FMF tha në një deklaratë se “do ta këshillojë dhe shoqërojë Garcian në procesin e ankesës para autoriteteve përkatëse”.

Po dalin më shumë detaje mbi ofertën e re të Milanit për Ardon Jasharin që bindi Club Brugge, përkatësisht 33.5 milionë euro plus 2 milionë euro bonuse për t’u arritur dhe 2.5 milionë euro që janë më të vështira për t’u aktivizuar.

I pari që raportoi një përparim në negociatat e gjata ishte eksperti belg i transferimeve Sacha Tavolieri. Ai u pasua shpejt nga Daniele Longo, i cili ka dalë me detaje më të sakta se çfarë ndryshoi në ofertë.

Duhet theksuar se nuk janë vetëm kushtet e reja të Milanit, por edhe presioni i shtuar nga Jashari, i cili kërkoi të lirohej për këtë transferim në “San Siro”. Oferta e fundit ishte refuzuar në 32.5 milionë euro plus 5.5 milionë euro bonuse, duke arritur në një total prej 38 milionë eurosh.

Sipas analistit të transferimeve të “Calciomercato”, Longo, oferta e re e paraqitur është një tarifë fikse prej 33.5 milionë eurosh. 2 milionë euro të tjera janë të garantuara për sa kohë që kuqezinjtë kualifikohen për në Ligën e Kampionëve vetëm një herë në pesë sezonet e ardhshme.

Ekzistojnë gjithashtu 2.5 milionë euro të tjera në bonuse që janë më të vështira për t’u aktivizuar.

Federata Ndërkombëtare e Basketbollit tha se e ka nisur një hetim lidhur me thirrjet antishqiptare që shpërthyen gjatë një ndeshjeje basketbolli mes Maqedonisë së Veriut dhe Rumanisë gjatë fundjavës.

“Në këtë fazë, jemi duke mbledhur raportet dhe deklaratat përkatëse, duke punuar në përputhje të ngushtë me federatat kombëtare të përfshira, si dhe me autoritetet lokale dhe forcat e rendit”, tha FIBA për REL.

Sipas politikanëve shqiptarë në Maqedoninë e Veriut, në turmën e tifozëve në ndeshjen e fazës së dytë parakualifikuese për Kupën e Botës që do të mbahet në Katar më 2027, janë dëgjuar thirrje si “Shqiptari i mirë është shqiptari i vdekur”, “Dhoma gazi për shqiptarët” dhe “Maqedoni e pastër”.

FIBA tha se e dënon pa rezerva dhe me vendosmëri gjuhën e urrejtjes dhe çdo formë diskriminimi apo gjuhe raciste.

“Ne promovojmë në mënyrë aktive krijimin e një mjedisi gjithëpërfshirës dhe me respekt për të gjithë lojtarët, ekipet dhe tifozët, si një përparësi kryesore në sport”, tha ajo.

Zyrtarë të lartë të Qeverisë së Maqedonisë së Veriut ku shqiptarët përbëjnë gati një të katërtën e popullsisë prej 1.8 milionë banorësh ndodheshin në sallë gjatë ndeshjes.

Incidenti ka shkaktuar gjithashtu reagime të ashpra në Kosovë dhe Shqipëri, vende me popullsi kryesisht shqiptare.

Kryeministri i Maqedonisë së Veriut, Hristijan Mickoski, një nga zyrtarët që morën pjesë në ndeshje, dënoi “thirrjet nacionaliste dhe ksenofobike” në një deklaratë më 4 gusht, dy ditë pas ndeshjes.

Ai tha se, ndonëse ishte i pranishëm në arenë, “nuk i kishte vënë re” thirrjet e tifozëve, duke pretenduar se ato ishin bërë nga “një grup i vogël njerëzish”.

“Dua ta shfrytëzoj këtë rast për t’iu bashkuar dënimit të nacionalizmit dhe ksenofobisë  së pari për atë që ndodhi gjatë ndeshjes së basketbollit ndërmjet Maqedonisë dhe Rumanisë, e më pas për të dërguar një mesazh te të gjitha grupet e tifozëve: të mbështesin në mënyrë sportive, ta përkrahin ekipin e tyre dhe përfaqësuesen kombëtare të Maqedonisë”, tha Mickoski.

Partia shqiptare në opozitë në Maqedoni të Veriut, Bashkimi Demokratik për Integrim (BDI), tha se në këtë ngjarje “u dëgjuan kore antishqiptare, thirrje raciste dhe gjuhë e pastër e urrejtjes etnike ndaj shqiptarëve”.

Ministri i Sportit i Maqedonisë së Veriut, Borko Ristovski, tha se kjo Ministri nuk mund të reagojë konkretisht ndaj kësaj ngjarjeje, “sepse nuk vjen nga ndonjë subjekt sportiv vjen nga tifozë në tribunë dhe nuk kemi asnjë kompetencë për të reaguar kur bëhet fjalë për tifozët”.

“Megjithatë, le ta shfrytëzoj këtë rast për të bërë një apel: në Maqedoni nuk ka nevojë për brohoritje të tilla, as nga njëra anë, as nga tjetra, nga askush, nga cilado anë që të vijë”.

Kodi Penal i Maqedonisë së Veriut parasheh dënime për thirrjet raciste dhe gjuhën e urrejtjes në disa nene, ndërsa më i rëndësishmi është neni 319, i cili parashikon se kushdo që nxit ose përhap publikisht urrejtje, përçarje apo jotolerancë mbi baza racore, fetare, etnike apo kombëtare, dënohet me burgim nga një deri në pesë vjet.