Microsoft ka përditësuar dokumentacionin zyrtar të Windows 11, duke dhënë informacion mbi procesorët që janë të pajtueshëm me sistemin operativ.

Ky përditësim u mundëson përdoruesve të kontrollojnë në mënyrë të sigurt nëse procesori i tyre mund të drejtojë Windows 11, pa pasur nevojë për metoda jozyrtare për të kaluar kërkesat e sistemit.

Megjithatë, përditësimi ka sjellë pak konfuzion. Në vend që të listohen modelet konkrete të procesorëve, dokumentacioni i ri tregon vetëm seritë e procesorëve – për shembull, “Intel Core i7 (gjenerata 14)” ose “Intel Core 7000X Series”.

Kjo do të thotë se disa procesorë të njohur si të mbështetur më parë mund të mos shfaqen qartë, ndërsa disa të tjerë mund të përfshihen, edhe pse nuk janë zyrtarisht të pajtueshëm.

Interesante, ky format i ri i listës aplikohet vetëm për procesorët Intel, ndërsa për procesorët AMD dhe Qualcomm, lista vazhdon të tregojë çdo model të mbështetur, si më parë. /A.Z/UBT News/

Mbikëqyrësi shtetëror i komunikimeve në Rusi ka intensifikuar presionin ndaj platformave të huaja të komunikimit, duke bllokuar të enjten aksesin në Snapchat, vetëm pak orë pasi vendosi kufizime për shërbimin FaceTime të Apple.

Sipas Roskomnadzor, Snapchat po përdorej “për organizimin dhe kryerjen e aktiviteteve terroriste në vend”, si dhe për mashtrime dhe vepra të tjera penale, sipas deklaratave të publikuara nga media shtetërore.

Aplikacioni, i njohur për mesazhet me foto e video që zhduken, kishte rreth 7.6 milionë përdorues në Rusi në vitin 2022.

Autoritetet dhanë arsyetim të ngjashëm edhe për kufizimet e vendosura ndaj thirrjeve zanore dhe video në FaceTime, një nga platformat e fundit të përhapura të komunikimit video që mbeteshin të qasshme në Rusi pas kufizimeve të mëparshme ndaj WhatsApp dhe Telegram.

Këto masa vijnë në një kohë kur Roskomnadzor po shton presionin edhe ndaj WhatsApp, i cili është aplikacioni më i përdorur në vend me gati 100 milionë përdorues.

Javën e kaluar, institucioni paralajmëroi se mund të bllokojë plotësisht shërbimin, duke e akuzuar kompaninë në pronësi të Meta-s se nuk po i përmbahet ligjeve ruse për lokalizimin e të dhënave dhe se ka kryer shkelje të përsëritura të lidhura me aktivitet të dyshuar terrorist.

Kufizimet ndaj FaceTime dhe Snapchat u ndërmorën një ditë pasi Roskomnadzor bllokoi aksesin në platformën amerikane të lojërave Roblox, duke e akuzuar për shpërndarje materialesh ekstremiste, “propagandë LGBT” dhe ndikim negativ në zhvillimin moral të fëmijëve.

Roblox ishte loja mobile më e shkarkuar në Rusi gjatë vitit 2023. /A.Z/UBT News/

Netflix ka hequr në heshtje opsionin “Cast” nga aplikacioni mobil për shumicën dërrmuese të televizorëve inteligjentë.

Tani, në vend që të transmetoni direkt nga telefoni, duhet të hapni aplikacionin Netflix në vetë televizorin dhe të përdorni telekomandën për të nisur shfaqjet dhe filmat.

Ndryshimi u bë pa asnjë njoftim zyrtar, dhe përdorues të shumtë kanë vënë re zhdukjen graduale të “Cast” gjatë javëve të fundit.

Një përdorues në Reddit raportoi se funksioni u zhduk më 10 nëntor, kjo përputhet me përvojën e shumë pajisjeve tjera.

Pas rritjes së ankesave dhe konfuzionit, Netflix përditësoi faqen e mbështetjes duke sqaruar se “Cast” nuk ofrohet më për shumicën e smart TV-ve dhe pajisjeve moderne të transmetimit.

Vetëm disa pajisje të vjetra ende e mbështesin “Cast” nga aplikacioni mobil.

Madje, një përfaqësues i shërbimit për klientë thuhet se i ka thënë një përdoruesi se nëse pajisja ka telekomandë, atëherë nuk mund të përdoret “Cast”.

Edhe pse Netflix pretendon se kjo do të përmirësojë përvojën e përdoruesve, shumë prej tyre janë të pakënaqur, pasi preferonin ta kontrollonin aplikacionin drejtpërdrejt nga telefoni. /A.Z/UBT News/