Qeveria zvicerane ka vendosur të përfundojë programet e saj të ndihmës zhvillimore për Shqipërinë, Bangladeshin dhe Zambian deri në fund të vitit 2028, pas shkurtimit të fondeve nga Parlamenti zviceran.

Ky vendim është pjesë e një uljeje të përgjithshme të buxhetit të bashkëpunimit ndërkombëtar, e cila prek edhe vendet e tjera përfituese të ndihmës zvicerane.

Sipas një deklarate zyrtare, Parlamenti zviceran ka shkurtuar 110 milionë franga zvicerane (121 milionë dollarë) nga buxheti i bashkëpunimit ndërkombëtar për vitin 2025 dhe 321 milionë franga për periudhën 2026-2028. Si pasojë, Agjencia Zvicerane për Zhvillim dhe Bashkëpunim (SDC) do të ndërpresë programet dypalëshe të zhvillimit në këto vende.

Megjithatë, pavarësisht këtyre masave, ndihma humanitare dhe mbështetja për Ukrainën nuk do të preken, duke reflektuar prioritetet strategjike të politikës së jashtme zvicerane.

Vendimi i Zvicrës vjen vetëm një ditë pas njoftimit të Ambasadës Amerikane në Tiranë, e cila informoi institucionet shqiptare për pezullimin e fondeve të mbështetjes nga SHBA.

Ky veprim është rezultat i urdhrit ekzekutiv të Presidentit Donald Trump, i cili urdhëroi rishikimin e të gjitha programeve të ndihmës së huaj dhe pezullimin e tyre deri në përshtatjen me prioritetet e reja të politikës së jashtme të administratës së tij.

Sekretari i Shtetit Marco Rubio konfirmoi zbatimin e këtij urdhri ekzekutiv, duke theksuar se “asnjë ndihmë ndërkombëtare e SHBA-së nuk do të shpërndahet nëse nuk është plotësisht në përputhje me politikën e jashtme të Presidentit të Shteteve të Bashkuara”.

Studentët serbë të nisur nga Beogradi, që kaluan natën në Ingjije, rreth 40 kilometra nga kryeqyteti serb, po vazhdojnë marshin e tyre protestues drejt Novi Sadit, ku do t’iu bashkohen kolegëve të tyre nga ky qytet për të bllokuar urat më 1 shkurt.

Kështu, ata do të shënojnë tremujorin e vdekjes së 15 personave pas shembjes së një strehe betoni në stacionin e trenave në Novi Sad.

Pritet që studentët, të cilët u nisën nga Beogradi më 30 janar, të arrijnë në stacionin e trenave të Novi Sadit rreth orës 19:00.

Studentët nisën marshin e tyre afër 80-kilometërsh të enjten, rreth orës 10:30 nga Fakulteti i Arteve Dramatike të Beogradit.

Ata u ndalën për pushim në Batajnicë, Bova dhe Stara Pazova, ku u pritën nga qytetarët dhe shkuan në Ingjije rreth orës 22:00 dhe kaluan natën në tenda në një fushë sporti.

Studentët e Beogradit planifikojnë të mbështesin kolegët e tyre në Novi Sad të cilët kanë njoftuar se do të bllokojnë urat në gjithë qytetin më 1 shkurt, kur bëhen tre muaj që nga tragjedia në stacionin e trenave të këtij qyteti.

Ministri i Brendshëm i Serbisë, Ivica Daçiq, tha të martën se pjesëtarë të kësaj ministrie do të ofrojë siguri për marshin e studentëve, duke i përcjell edhe me autoambulanca dhe kamionë me ujë të pijshëm.

Tragjedia në Novi Sad nxiti një valë të protestave masive në mbarë Serbinë, duke nxjerr në rrugë dhjetëra mijëra njerëz.

Në dy muajt e fundit, protestat janë udhëhequr nga studentët, të cilët kanë bllokuar dhjetëra universitete shtetërore. Kërkesa kryesore e tyre është që të ketë përgjegjësi penale dhe politike të autoriteteve për aksidentin në Novi Sad.

Qeveria dhe presidenti Aleksandar Vuçiq, pretendojnë se kërkesat e studentëve janë plotësuar.

Studentët protestues kanë thënë se Vuçiqi nuk është përgjegjës për përmbushjen e kërkesave të tyre, duke shtuar se kërkesat nuk janë plotësuar dhe ata do të vazhdojnë protestat./REL/

Avokati i familjes së Liridona Ademajt, Leutrim Syla pas përfundimit të shqyrtimit fillestar ndaj Naim Murselit, Granit Plavës, Kushtrim Kokallës dhe Tom Dodajt është shprehur i lumtur që njëri nga palët e përfshira në rast është shpallur fajtor.

I akuzuari, Tom Dodaj i cili pranoi fajësinë për shitjen e armës tek Naim Murseli me të cilën është vrarë Liridona Ademaj u dënua nga Gjykata Themelore në Prishtinë me 5 vite burgim dhe 5 mijë euro gjobë.

“Jemi të lumtur sepse të paktën për njërën nga pikat e dispozitivit të aktakuzës njëra nga palët u deklarua fajtor dhe e konsiderojmë si pikë të kryer të aktakuzës”, tha ai.

Gjatë shqyrtimi fillestar për vrasjes e Liridona Ademajt, bashkëshorti i saj, Naim Murseli është deklaruar plotësisht i pafajshëm për veprën penale që ngarkohet.

Lidhur me këtë, avokati i familjes së të ndjerës, Leutrin Syla tha se provat materiale janë të të qarta në aktakuzë dhe se nuk i habitë deklarimi i Murselit.

“Nuk mund të themi në asnjë rast se ka qenë e pritshme apo jo meqenëse provat materiale dhe ato që parashihen në aktakuzë janë aq të qarta sa që edhe të pranonte fajësisë nuk do të ishte diçka e re dhe risi për ne edhe mos pranimi i fajësisë është diçka e pritshme edhe sikur ta pranonte nuk do të kishte çudi ose habi që e ka pranuar”, tha ai.

Në shqyrtimin fillestar për vrasjen e Liridona Ademajt në nëntor të vitit 2023 i akuzuari Naim Murseli është deklaruar plotësisht i pafajshëm lidhur me vrasjen e bashkëshortes së tij, Liridona Ademjt.

Ndërsa, i akuzuari Granit Plava ka zgjedhur të mbrohet në heshtje, derisa Kushtrim Kokalla ka thënë se nuk deklarohet rreth fajësisë pa u konsultuar më avokatin e tij.

Ndërsa, Tom Dodaj e ka pranuar fajësinë për veprën penale shitjen e armës, për të cilën vepër penale u shpall fajtor nga Gjykata Themelore në Prishtinë duke e dënuar me 5 vite burgim dhe 5 mijë euro gjobë.