Nëntëdhjetë e dy emigrantë u gjetën pothuajse të zhveshur dhe të mavijosur pasi dyshohet se u detyruan të kalonin lumin Evros nga Turqia në Greqi, tha Athina të dielën, një akuzë e mohuar ashpër nga Ankaraja.

Agjencia kufitare e BE-së Frontex konfirmoi për AFP mbërritjen e grupit në rrethana për të cilat ministria greke për mbrojtjen civile tha se dërgoi një “imazh çnjerëzor”.

“Oficerët e Frontex raportuan se migrantët u gjetën pothuajse të zhveshur dhe disa prej tyre me lëndime të dukshme”, tha Paulina Bakula, zëdhënëse e organizatës.

Agjencia e OKB-së për refugjatët, UNHCR, tha në një postim në Twitter se ishte“thellësisht e shqetësuar nga raportet tronditëse dhe imazhet e 92 personave, të cilët u raportuan se ishin gjetur në kufirin tokësor greko-turk, të zhveshur nga rrobat”.

Bakula, duke folur nga selia e Frontex në Varshavë, tha se oficerët e Frontex-it punuan me autoritetet greke për t’u ofruar migrantëve – kryesisht afganë dhe sirianë – ndihmë të menjëhershme.

Ajo shtoi se organizata kishte informuar zyrtarin e të drejtave themelore të agjencisë për një shkelje të mundshme të të drejtave.

Ministri grek për mbrojtjen civile, Takis Theodorikakos, akuzoi Turqinë për “instrumentalizimin e emigracionit të paligjshëm”.

Duke folur në televizionin Skai, Theodorikakos tha se shumë nga emigrantët i thanë Frontex se“tre automjete të ushtrisë turke i kishin transferuar” në lumë që vepron si një kufi natyror.

Në një sërë komentesh ashpra në Twitter, presidenca turke mohoi çdo përgjegjësi për emigrantët dhe fajësoi Greqinë për situatën “çnjerëzore”.

“Ne i bëjmë thirrje Greqisë që të heqë dorë nga trajtimi i ashpër ndaj refugjatëve sa më shpejt të jetë e mundur, të pushojë akuzat e pabaza dhe të rreme kundër Turqisë”, shkroi ndihmësi kryesor i shtypit i presidentit Recep Tayyip Erdogan, Fahrettin Altun.

“Me këto përpjekje të kota dhe qesharake, Greqia i ka treguar edhe një herë mbarë botës se nuk respekton dinjitetin e refugjatëve duke postuar fotot e këtyre njerëzve të shtypur që ka deportuar pas zhvatjes së pasurisë së tyre personale”, shtoi ai në tweetet në turqisht, greqisht dhe anglisht.

Zëvendësministri i Brendshëm i Turqisë, Ismail Catakli i bëri thirrje Greqisë që të ndalojë atë që në një postim në Twitter i quajti “manipulimet dhe pandershmërinë e saj”.

Ministri grek për migracionin dhe azilin, Notis Mitarachi, e kishte përshkruar incidentin të shtunën si një “turp për qytetërimin”.

Athina përballet rregullisht dhe mohon akuzat nga OJQ-të dhe mediat se në shumë raste ka kërkuar të shtyjë migrantët në Turqi ilegalisht, ndonjëherë duke përdorur forcë.

Muajin e kaluar, Erdogan përdori një fjalim në OKB për të akuzuar Greqinë për transformimin e Detit Egje në një “varrezë” me “politika shtypëse” mbi emigracionin./UBTNews/