I dërguari i posaçëm i SHBA-së, Steve Witkoff, ka mbërritur sot në Moskë për bisedime të mëtejshme mbi një marrëveshje paqeje në Ukrainë.

Si SHBA-ja ashtu edhe Rusia kishin njoftuar më parë bisedime të mëtejshme pa dhënë një datë specifike.

Sipas Ministrit të Jashtëm rus, Sergei Lavrov, disa pika të një marrëveshjeje të mundshme për t’i dhënë fund luftës në Ukrainë ende duhet të “përmirësohen”, megjithëse ai i tha transmetuesit amerikan CBS se beson që procesi po ecën në drejtimin e duhur.

Witkoff është takuar disa herë me presidentin rus Vladimir Putin dhe gjithmonë ka folur pozitivisht për udhëheqësin e Kremlinit.

Takimi i tyre i fundit në Shën Peterburg zgjati më shumë se katër orë.

Ai pritet të takohet sërish sot me Putinin, ndërsa bisedimet shihen si një hapje e rrugës për një takim të mundshëm midis udhëheqësit të Kremlinit dhe presidentit të SHBA-së Donald Trump.

Pasi administrata Trump mori detyrën në janar, Uashingtoni e ndryshoi në mënyrë drastike politikën e vendit ndaj Ukrainës, duke kërcënuar se do të ndalonte mbështetjen për Kievin – për të ushtruar presion mbi Ukrainën që të rënë dakord për një marrëveshje paqeje.

Trump tha gjithashtu se anëtarësimi i Ukrainës në NATO nuk ishte temë e diskutimit, ndërsa ka sinjalizuar se Kievi mund të duhet të bëjë lëshime territoriale për Rusinë për të ndaluar luftën./ATSH/

Sekretari i përgjithshëm i NATO-s, Mark Rutte, tha dje në mbrëmje se Rusia mbetej një kërcënim afatgjatë për aleancën, pas bisedimeve me presidentin e SHBA-së Donald Trump dhe anëtarë të lartë të administratës amerikane në Uashington.

“Ne të gjithë pajtohemi në NATO se Rusia është një kërcënim afatgjatë për territorin e NATO-s – për të gjithë territorin euroatlantik”, u tha Rutte gazetarëve pas takimit në Shtëpinë e Bardhë.

Kur u pyet për mundësinë e një marrëveshjeje paqeje midis Rusisë dhe Ukrainës, Rutte tha se kishte ende “diçka” për të diskutuar në tavolinën e bisedimeve, duke shtuar se i takonte Rusisë te vendoste.

Rutte shprehu besimin se Shtetet e Bashkuara të Amerikës do të vazhdonin të luanin një rol qendror në përpjekjet për t’i dhënë fund luftës.

“Nuk po shoh një situatë ku SHBA-ja po ecin përpara. Po shoh një situatë ku nën udhëheqjen e presidentit Trump, kjo mund të përfundojë pozitivisht dhe kjo është shumë e rëndësishme”, tha Rutte.

Trump tha të mërkurën se një marrëveshje me Rusinë ishte e arritshme, ndërsa pretendoi se marrëveshja me presidentin ukrainas Volodymyr Zelensky kishte qenë “më e vështirë” sesa me presidentin rus Vladimir Putin.

Presidenti amerikan ka kërkuar që Kievi të lëshojë gadishullin e Krimesë të pushtuar nga Rusia dhe të heqë dorë nga përpjekja e tij për anëtarësim në NATO në të ardhmen.

Udhëheqësit e NATO-s do të mblidhen më 24-25 qershor në një samit në Hagë./ATSH/

Sekretari i Këshillit të Sigurimit të Federatës Ruse, Sergei Shoigu, ka lëshuar një paralajmërim të ashpër ndaj Perëndimit, duke deklaruar se Rusia është e gatshme të përdorë armë bërthamore në rast agresioni. Në një intervistë për agjencinë ruse të lajmeve TASS, Shoigu theksoi se çdo sulm ndaj Rusisë ose aleatit të saj, Bjellorusisë, mund të provokojë një kundërpërgjigje bërthamore.

“Nëse na sulmojnë, ne do të përdorim bombën atomike”, tha Shoigu, duke theksuar seriozitetin e pozicionit të ri të Kremlinit në politikën e parandalimit bërthamor.

Ai iu referua ndryshimeve të bëra në nëntor të vitit 2024 në Bazat e Politikës Shtetërore të Federatës Ruse në fushën e parandalimit bërthamor. Sipas Shoigut, këto ndryshime i japin Moskës të drejtën për të përdorur armë bërthamore jo vetëm në rast të një sulmi bërthamor, por edhe përballë një sulmi konvencional që paraqet një kërcënim ekzistencial për sovranitetin dhe integritetin territorial të Rusisë ose Bjellorusisë.

“Rusia po monitoron nga afër përgatitjet ushtarake të vendeve evropiane”, deklaroi Shoigu, duke shtuar se çdo veprim armiqësor nga shtetet e huaja që perceptohet si kërcënim do të trajtohet me “masa simetrike dhe asimetrike për të shtypur dhe parandaluar veprime të mëtejshme”.

Shoigu, i cili ka shërbyer për më shumë se një dekadë si ministër i Mbrojtjes përpara se të emërohej në krye të Këshillit të Sigurimit, e konsideroi këtë rishikim të doktrinës bërthamore si një hap strategjik për të forcuar sigurinë kombëtare të Rusisë në një klimë të tensionuar ndërkombëtare.

Të paktën 10 njerëz vdiqën në rrënojat e një miniere ari në pjesën lindore të Republikës Demokratike të Kongos, tha sot guvernatori i provincës së Kivu-së Jugore, Douglas Dunia Masumbuko, i cili u emërua nga grupi rebel M23.

Ai i tha Reuters se numri i të vdekurve në minierën Luhihi kishte arritur në 10 dhe mund të rritet duke pasur parasysh numrin e të plagosurve.

Ai fajësoi për incidentin “ndërtimet e pakontrolluara dhe mirëmbajtjen e dobët të puseve të arit” në zonë.

Aksidentet e minierave janë të zakonshme në këtë vend të Afrikës Qendrore, veçanërisht në vendet e vogla artizanale.

Guvernatori Jean-Jacques Pouroussi, i cili ishte guvernator i Kivusë së Jugut përpara se grupi M23 të merrte pushtetin, konfirmoi se miniera ishte shembur, por nuk dha një numër të viktimave.

Rebelët M23 kanë kapur dy qytetet më të mëdha të Kongos lindore që nga janari në një përshkallëzim të një konflikti të gjatë dhe një betejë për kontrollin e burimeve të mëdha minerale të Kongos, tha agjencia.