Charles Oliveira ka arritur një fitore të madhe ndaj Max Holloway në eventin kryesor të UFC 326 që u zhvillua në Las Vegas, duke fituar titullin BMF title me vendim unanim të gjyqtarëve.

Braziliani dominoi përballjen nga fillimi deri në fund, veçanërisht në lojën në tokë. Pavarësisht reputacionit të Holloway si një nga goditësit më të mirë në historinë e UFC-së, ai nuk arriti të gjejë zgjidhje për presionin dhe kontrollin e Oliveirës. Sipas statistikave të ndeshjes, Oliveira regjistroi mbi 20 minuta kontroll në tokë, duke neutralizuar plotësisht sulmet e kundërshtarit.

Në fund të duelit, Oliveira tregoi respekt të madh për rivalin e tij, duke theksuar se të dy janë luftëtarë të vërtetë “BMF”, që hyjnë në kafaz jo vetëm për fitore, por edhe për familjet dhe për dashurinë ndaj sportit.

Me këtë triumf, Oliveira e forcon edhe më shumë pozicionin e tij në elitën e UFC-së. Ai tashmë ka shprehur dëshirën që të rikthehet shpejt në kafaz, duke synuar të jetë pjesë e kartës së madhe të UFC-së në muajin qershor, ku pritet të mbrojë statusin e tij të ri dhe të përballet me një sfidë tjetër të madhe.

KV Drita është shpallur fituese e Turneut Mbarëkombëtar ‘Kupa Adem Jashari’ pas një finaleje të fortë dhe emocionuese ndaj KV Ferizajt, të cilën e mbylli me rezultat 3-1 në sete. Ky turne tradicional, i organizuar në nderim të Epopesë së UÇK-së, ka sjellë një konkurrencë të lartë dhe një atmosferë sportive të veçantë.

Gjilanasit nisën ndeshjen me energji të madhe, duke fituar setin e parë 25-17, ndërsa Ferizaj reagoi në setin e dytë dhe barazoi rezultatin po me 25-17. Në setin e tretë Drita riktheu kontrollin e lojës, e fitoi atë 25-17, dhe e mbylli ndeshjen në setin e katërt me 25-15, duke siguruar triumfin e merituar.

Pas finaleve, KV Drita shprehu falënderimin e saj më të sinqertë për organizatorët, KV Skenderaj, si dhe për institucionet dhe individët që kontribuan në realizimin e turneut. Ky aktivitet ka pasur një vlerë të veçantë sportive dhe kombëtare, duke bashkuar ekipe nga Kosova dhe Shqipëria dhe duke nderuar sakrificën e familjes Jashari.

Nga klubi theksojnë se volejbolli është një urë që bashkon sportistët dhe forcon miqësinë ndërmjet klubeve dhe vendeve tona, dhe falënderojnë të gjitha ekipet pjesëmarrëse për cilësinë dhe rivalitetin sportiv gjatë turneut.

“Sporti na bashkon, me respekt për historinë dhe me besim për të ardhmen,” u shpreh klubi gjilanas.

Përfaqësuesja e vajzave të Kosovës  në hendboll ka zhvilluar një ndeshje të fortë dhe të barabartë ndaj përfaqësueses së Finlandës të enjten mbrëma në Vantaa, por pavarësisht paraqitjes së mirë nuk arriti të marrë pikë.

Ndeshja e vlefshme për kualifikimet e Kampionatit Evropian përfundoi me fitoren e finlandezeve me rezultat 23:21, ndërsa përballja mbeti e hapur deri në aksionin e fundit.

Vajzat e nisën mirë takimin dhe krijuan epërsi gjatë 15 minutave të para. Megjithatë, më pas vendësit morën kontrollin e lojës dhe arritën të krijojnë epërsi deri në katër gola në pjesën e parë.

Edhe pjesa e dytë u karakterizua nga një lojë e fortë dhe e baraspeshuar. Hendbollistet kosovare ishin vazhdimisht në ndjekje të rezultatit dhe u afruan disa herë në dy gola diferencë, por nuk arritën të barazojnë.

Në këtë përballje u dallua portierja Aurora Kryeziu me 18 pritje. Ndërkohë, më efikasja për Kosovën ishte Merlinda Qorraj me 10 gola. Nga tre gola realizoi Elvina Qorraj, ndërsa nga dy gola shënuan Mirjeta Bytyqi, Yllka Shatri dhe Tina Hetemi.

Dy kombëtaret do të përballen sërish të dielën nga ora 17:15 në Pallati i Rinisë dhe Sporteve në Prishtinë.

Ministri i Rinisë dhe Sportit, Blerim Gashani, ka njoftuar se ka marrë vendim për fillimin e procesit të inventarizimit të të gjitha objekteve sportive dhe rinore në Republika e Kosovës.

Sipas njoftimit të publikuar në faqen e tij zyrtare, ky proces do të përfshijë identifikimin dhe regjistrimin e stadiumeve, fushave sportive, palestrave, palestrave shkollore si dhe qendrave rinore në gjithë vendin.

Ministri theksoi se përveç evidentimit të infrastrukturës ekzistuese, do të bëhet edhe vlerësimi teknik dhe funksional i këtyre objekteve, me qëllim që të kuptohet gjendja aktuale dhe nevojat për investime apo rehabilitim.

Po ashtu, gjatë këtij procesi do të identifikohen edhe zonat që aktualisht nuk kanë fare infrastrukturë sportive apo rinore, në mënyrë që institucionet të planifikojnë projekte dhe investime të reja në ato hapësira.

Gashani bëri të ditur se iniciativa të ngjashme që lidhen me zhvillimin e sportit dhe fuqizimin e rinisë pritet të prezantohen edhe në ditët në vazhdim.