Kryetari i Komitetit për Tregti Ndërkombëtare në Parlamentin Evropian, Bernd Lange, ka deklaruar se vendosja e tarifave të reja amerikane ndaj mallrave të Bashkimit Evropian do të ishte e papranueshme dhe do të dëmtonte marrëdhëniet tregtare mes dy partnerëve kryesorë ekonomikë.

Sipas tij, Bashkimi Evropian vazhdon të mbështesë zgjidhjen e mosmarrëveshjeve përmes dialogut dhe negociatave, por është i gatshëm të reagojë nëse Shtetet e Bashkuara vendosin masa të reja tarifore ndaj produkteve evropiane, raporton Reuters.

Lange theksoi se tregtia transatlantike është një nga marrëdhëniet më të rëndësishme ekonomike në botë dhe se çdo përshkallëzim i tensioneve tregtare do të kishte pasoja për bizneset dhe konsumatorët në të dyja anët e Atlantikut. Ai shtoi se BE-ja pret që bisedimet me Uashingtonin të vazhdojnë për të shmangur një konflikt të ri tregtar.

Deklaratat vijnë në një kohë kur ekzistojnë shqetësime për mundësinë e vendosjes së tarifave të reja amerikane ndaj importeve nga Bashkimi Evropian, ndërsa Brukseli ka paralajmëruar se mund të ndërmarrë kundërmasa nëse një gjë e tillë ndodh.

BE-ja dhe SHBA-ja mbeten partnerët më të mëdhenj tregtarë në botë, me shkëmbime ekonomike që arrijnë miliarda euro çdo ditë, çka e bën ruajtjen e marrëdhënieve të qëndrueshme tregtare një prioritet për të dyja palët./Reuters/

Ushtria amerikane thotë se ka kryer sulme “në vetëmbrojtje” kundër Iranit dhe ka rrëzuar raketa balistike dhe dronë të lëshuar drejt anijeve dhe vendeve të Gjirit, sipas raportimit të BBC.

Sipas Komandës Qendrore të SHBA-së (Centcom), sulmet në Ishullin Qeshm, në Ngushticën e Hormuzit, u kryen “si përgjigje ndaj sulmeve të tentuara nga Irani në të gjithë Lindjen e Mesme”.

Irani deklaroi se kishte sulmuar baza amerikane dhe helikopterë në një “vend rajonal” me raketa dhe dronë, si hakmarrje. Centcom tha se Teherani kishte lëshuar dy raketa drejt Kuvajtit dhe tre drejt Bahreinit, të cilat ose u shpërbënë gjatë fluturimit ose u interceptuan.

Sulmet e fundit vijnë në një kohë kur negociatat për armëpushim kanë ngecur, pasi bisedimet për një marrëveshje që do t’i jepte fund luftës disa mujore nuk shënuan përparim gjatë fundjavës.

Centcom shtoi se sulmi në Ishullin Qeshm kishte në shënjestër një stacion iranian të kontrollit tokësor ushtarak dhe se ushtria amerikane rrëzoi gjithashtu tre dronë sulmues të lëshuar nga Irani drejt “marinarëve civilë që po kalonin ligjërisht në ujërat rajonale”.

Trupat e Gardës Revolucionare Islamike (IRGC) deklaruan se “prishja e sigurisë së Ngushticës së Hormuzit do të ketë një çmim të rëndë për ushtrinë agresive amerikane”.

Centcom tha gjithashtu se Irani kishte lëshuar “disa” raketa balistike drejt vendeve të rajonit. “Dy raketa iraniane të lëshuara drejt Kuvajtit ranë para objektivit ose u shpërbënë gjatë rrugës, ndërsa tre raketa të lëshuara drejt Bahreinit u interceptuan menjëherë nga forcat amerikane dhe bahrejnase të mbrojtjes ajrore.”

Irani ka sulmuar në mënyrë të përsëritur objektiva në Bahrein dhe Kuvajt, ku ndodhen baza ushtarake amerikane.

Më herët, Centcom tha se kishte goditur dhe nxjerrë jashtë funksionit një cisternë nafte pa ngarkesë që po lundronte drejt Iranit, si pjesë e bllokadës detare të Uashingtonit në Ngushticën e Hormuzit, e cila filloi më 13 prill.

Sipas Centcom, një avion amerikan lëshoi një raketë Hellfire në dhomën e motorëve të anijes M/T me flamur të Botsvanës, pasi ekuipazhi i saj “kishte injoruar paralajmërimet e përsëritura”.

Centcom publikoi gjithashtu pamje që pretendohet se tregojnë momentin kur cisterna u godit të martën.

Përshkallëzimi i situatës vjen pasi presidenti amerikan Donald Trump u tha këtë javë kritikëve të tij të “ulen dhe të qetësohen”, duke thënë se Irani “me të vërtetë dëshiron të arrijë një marrëveshje dhe ajo do të jetë e mirë për SHBA-në”.

Mediat amerikane raportuan më herët se Trump kishte kërkuar ndryshime në kushtet e një marrëveshjeje të mundshme paqeje, pas një takimi me këshilltarët e tij të lartë për të diskutuar zgjerimin e kornizës së armëpushimit.

Sipas partnerit amerikan të BBC-së, CBS News, ndryshimet kishin të bënin me Ngushticën e Hormuzit, largimin e uraniumit shumë të pasuruar nga Irani, si dhe krijimin e një kornize për rifillimin e negociatave mbi programin bërthamor iranian.

Të hënën, zëdhënësi i Ministrisë së Jashtme të Iranit, Esmail Baghaei, mohoi se kjo kishte qenë pjesë e diskutimeve, duke shtuar se Uashingtoni “po ndryshon vazhdimisht qëndrimet e tij dhe po paraqet kërkesa të reja ose kontradiktore”./BBC/

Përplasjet kanë vazhduar në jug të Libanit, edhe pse Izraeli dhe Hezbollah-u kanë pranuar një plan të mbështetur nga SHBA-ja për armëpushim të pjesshëm, raporton BBC.

Presidenti Donald Trump tha se të dyja palët janë pajtuar për ndërprerjen e luftimeve, ndërsa Libani njoftoi se Hezbollah-u ka pranuar të ndalojë sulmet ndaj Izraelit. Kryeministri izraelit Benjamin Netanyahu konfirmoi marrëveshjen, por paralajmëroi se sulmet do të vazhdojnë nëse Hezbollah-u nuk ndalon sulmet ndaj qyteteve izraelite.

Gjatë natës, Hezbollah-u raportoi se ka sulmuar tanke izraelite në jug të Libanit, ndërsa ushtria izraelite tha se ka rrëzuar dy predha të lëshuara nga territori libanez. Po ashtu, autoritetet libaneze raportuan sulme izraelite në disa zona jugore të vendit./BBC/

Presidenti amerikan, Donald Trump, tha për ABC News se ai pret që të arrihet një marrëveshje me Iranin për zgjatjen e armëpushimit dhe rihapjen e Ngushticës së Hormuzit brenda javës së ardhshme.

Duke folur përmes telefonit me korrespondentin në Uashington të ABC News, Jonathan Karl, më 1 qershor, Trump tha se një marrëveshje e paqes mund të jetë “edhe më e mirë sesa një fitore ushtarake”.

Një draft-marrëveshje, e ndërmjetësuar nga Pakistani, javët e fundit është përcjellë mes dy palëve, teksa shumë pasiguri përcjellin negociatat. Një marrëveshje e përkohshme armëpushimi është në fuqi që nga prilli, megjithëse marrëveshja është sfiduar nga sulmet sporadike.

Ka pasur, tha presidenti, “armiqësi të mëdha” nga Irani.

“Nuk është gjë e lehtë për ta. Në fakt, nuk është e lehtë as nga pikëpamja jonë. Por, ne po bëjmë aq që duhet bërë”, tha Trump.

Sa i përket afatit kohor për një marrëveshje të mundshme, presidenti Trump tha se “mendojmë se po flasim për javën e ardhshme”.

Udhëheqësi amerikan tha se një marrëveshje nuk është arritur deri më tani sepse “më duhet të siguroj edhe disa pika të tjera”.

Ditëve të fundit, Irani dhe Shtetet e Bashkuara kanë këmbyer sulme, me forcat amerikane që njoftuan për sulme “vetëmbrojtëse” ndaj caqeve iraniane dhe Irani la të kuptohet se kishte sulmuar një bazë amerikane në Kuvajt.

Përpjekjet për arritjen e një marrëveshjeje vijnë në kohën kur mbyllja e Ngushticës së Hormuzit po pengon në mënyrë të konsiderueshme furnizimet globale me naftë dhe ka bërë që çmimet e energjisë të rriten.

Lufta e Shteteve të Bashkuara dhe Izraelit me Iranin, e cila filloi më 28 shkurt, ka vrarë mijëra njerëz dhe ka destabilizuar Lindjen e Mesme.

Ngushtica e Hormuzit është një rrugë jetike detare përmes së cilës kalon pothuajse pothuajse 20 për qind e furnizimit botëror me naftë nga Gjiri drejt tregjeve ndërkombëtare./REL/