Eksperti i transferimeve, Fabrizio Romano e ka dhënë “Here we go”-në e famshme për Edon Zhegrovën te Juventusi.

Romano ka raportuar se tashmë ylli kosovar do të jetë lojtari më i ri i Juventusit, pasi Lille e pranoi ofertën e “Zonjës së Vjetër” sonte.

Juventusi do të paguajë një pako prej 20 milionë eurosh për Zhegrovën, me këtë të fundit që tash e disa ditë e ka pranuar ofertën e klubit bardhezi nga Turini. Fabrizio ka shtuar më tej, që nëse gjithçka shkon sipas planit, Zhegrova sonte do të udhëtojë për në Turin.

Zhegrova është pjesë e Lille që nga janari i vitit 2022.

Sezonin e kaluar, ylli dardan shënoi tetë gola në pjesën e parë të sezonit, teksa në pjesën e dytë nuk u paraqit fare shkaku i një lëndimi.

26-vjeçari është pjesë e listës së Kosovës për ndeshjet e shtatorit, ndaj Zvicrës e Suedisë, ndeshje që luhen në kuadër të kualifikimeve për kampionatin botëror të vitit 2026.

Luka Modric ka dhënë asistimin e tij të parë në Serie A mbrëmjen e së premtes, duke treguar se sa sfiduese mund të jetë kampionati italian. Mesfushori kroat ishte në formacionin titullar për Milanin në fitoren 2-0 ndaj Lecces në Stadio Via del Mare, ku golat u shënuan nga Ruben Loftus-Cheek dhe Christian Pulisic.

Pas ndeshjes, Modric ka shpërndarë mendimet e tij për eksperiencën në Serie A. Ai tha për DAZN dhe Sky Sport Italia: “Ndihem shumë mirë, gjithçka është perfekte. Shkoj mirë me shokët e ekipit, ndihem i qetë. Ende duhet të gjej një shtëpi, por përveç kësaj, gjithçka është mirë! Sigurisht, gjithçka ndihet edhe më mirë kur fiton.”

Milanit i ka duhur të ndryshojë formacionin nga 4-3-3 në një 3-5-2, dhe Modric ka përmendur kërkesat e trajnerit Massimiliano Allegri: “Ne ende po njihemi me njëri-tjetrin, ai më kërkoi ta ndihmoja ekipin të lëvizte me më shumë rrjedhshmëri. Po punoj për t’u rikthyer në formë fizike dhe shpresoj të jem në 100 për qind pas pushimit ndërkombëtar.”

Një tjetër detaj interesant është kërkesa e Allegrit që Modric të komunikojë më shumë me lojtarët e rinj, për t’i dhënë atyre më shumë besim në fushë. “Trajneri më kërkon të flas shumë në fushë, pasi ka shumë lojtarë të rinj dhe ata kanë nevojë për vetëbesim,” ka thënë ai.

Modric, i cili ka qenë tifoz i Milanit gjatë fëmijërisë së tij në Kroaci, shpjegoi gjithashtu arsyet që e bënë të bëjë realitet ëndrrën e tij për të luajtur në Serie A në moshën 39 vjeçare: “Gjithmonë e kam parë futbollin italian, ka shumë lojtarë kroatë këtu dhe mbi të gjitha e vlerësoj Milanin. Kam luajtur shumë ndeshje kundër ekipeve italiane, e di sa të organizuar janë taktikisht në çdo fazë.”

Modric e ka pranuar se Serie A është një ligë shumë e vështirë për t’u përshtatur, por është gjithashtu një përvojë që po e shijon. “Ende duhet të mësohem me këtë, pasi kjo është një ligë shumë e vështirë. Duhet të jemi në gatishmëri në çdo ndeshje dhe të japim gjithçka që kemi për të fituar. Deri tani, po e shijoj shumë atë që kam parë,” ka përfunduar ylli kroat.

Fermin Lopez, mesfushori 22-vjeçar i Barcelonës, po kalon në një moment vendimtar për të ardhmen e tij te klubi katalanas. Shumë afër një transferimi të mundshëm te Chelsea këtë javë, Lopez është gjithashtu i lidhur me Newcastle United, i cili ka shprehur interes të fortë për shërbimet e tij.

Edhe pse trajneri Hansi Flick ka deklaruar më parë se dëshironte ta mbante Lopezin te Barcelona, Chelsea ka kontaktuar zyrtarisht për një transferim dhe mesfushori po shqyrton mundësinë e një largimi. Chelsea është e gatshme të dyfishojë pagën e tij për të siguruar një kalim në Stamford Bridge, por Barcelona ka vendosur një çmim të lartë prej 90 milionë eurosh, shumë që vetëm Newcastle është aktualisht në gjendje ta plotësojë.

Raportet nga Katalunia sugjerojnë se Lopez preferon të qëndrojë te Barcelona, por ka kërkuar leje për të negociuar me Chelsea. Për momentin, mbetet e paqartë nëse klubet janë të gatshme të arrijnë një marrëveshje, pasi Chelsea ka një limit prej 50 milionë eurosh për transferime.

Ish-mesfushori i Barcelonës, Sergio Busquets, ka dhënë një paralajmërim për shitjen e lojtarëve nga La Masia, duke theksuar rëndësinë e përvojës dhe mentalitetit që lojtarët e akademisë ofrojnë për klubin. Ai ka shtuar se, pavarësisht se është një vendim individual i lojtarit, Barcelona duhet të kujdeset për interesat e tij dhe të klubit.

Tifozët e Barcelonës janë të ndarë në lidhje me këtë çështje, ndërsa të gjitha palët tani presin një përditësim nga Lopez për të përcaktuar hapat e ardhshëm.

Besnik Krasniqi, autori i golit vendimtar në fitoren e Dritës kundër Differdanget, ka shprehur entuziazëm të madh pas kualifikimit historik të skuadrës nga Gjilani në fazën e grupeve të Ligës së Konferencës së UEFA-s.

Drita fitoi të dyja ndeshjet e fazës play-off – 2-1 në Prishtinë dhe 1-0 në Luksemburg – me Krasniqin që shënoi nga pika e bardhë në sfidën e kthimit, duke vulosur rezultatin e përgjithshëm 3-1.

“Jam shumë i lumtur për fitoren dhe që goli im ishte vendimtar. Ishim pak në presion, pasi e kemi ditur se është natë historike. Dhe ia arritëm. Jam shumë i lumtur për tifozët e Dritës, po ashtu për presidentët që kanë bërë punë të jashtëzakonshme dhe e kanë merituar këtë,” tha Krasniqi pas ndeshjes.

Mesfushori e cilësoi këtë si suksesin më të madh në karrierën e tij deri më tani, por theksoi se skuadra nuk do të ndalet këtu: “Ky nuk është fundi. Kemi ende punë. Në grupe do të jemi më të qetë dhe do të bëjmë lojëra shumë më të mira.”

Ai gjithashtu u ndal te presioni që kishte ndjerë skuadra si favorite, por theksoi se menaxhimi i situatës ishte çelësi i suksesit: “Si favoritë kishim një lloj presioni, por e menaxhuam mirë dhe në fund u shpërblyem. Falënderoj tifozët dhe familjen time për mbështetjen.”