Pas shpalljes së aktgjykimit ndaj ish-krerëve të Ushtrisë Çlirimtare të Kosovës, një grup qytetarësh është mbledhur në shenjë proteste dhe ka marshuar drejt zyrave të EULEX-it në Fushë-Kosovë, raporton Ekonomia Online. Për të garantuar rendin dhe sigurinë, pranë objektit të misionit ndërkombëtar janë vendosur forca të shtuara të Njësisë Speciale të Policisë së Kosovës.

Situata pranë objekteve të EULEX-it ka eskaluar pasi protestuesit e revoltuar me vendimin e gjykatës kanë filluar të hedhin gjësende të ndryshme në drejtim të ndërtesës. Reagimi i qytetarëve erdhi menjëherë pas vendimit ku Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet, duke çuar dënimin e tyre të përgjithshëm në 81 vjet burgim. /E.A/

Pierre-Richard Prosper, avokati mbrojtës i Hashim Thaçit, e ka reaguar ashpër ndaj aktgjykimit të sotëm të Gjykatës Speciale, duke e quajtur atë një “dështim të drejtësisë” dhe “ditë të zezë për drejtësinë ndërkombëtare”. Prosper konfirmoi se mbrojtja do ta apelojë menjëherë vendimin, ndërsa akuzoi gjykatën se ka rishkruar historinë duke injoruar dëshmitë që vërtetonin se Thaçi nuk kish përgjegjësi mbi komandat rajonale të UÇK-së.

Avokati tëhoqi vëmendjen e NATO-s dhe Departamentit Amerikan të Shtetit (DASH), duke theksuar se cilësimi i UÇK-së si ndërmarrje e përbashkët kriminale nënkupton absurditetin se vetë NATO bashkëpunoi me një strukturë të tillë. Ndër të tjera, Prosper i bëri thirrje direkte Kuvendit të Kosovës që të marrë një vendim sovran dhe t’i heqë mbështetjen kësaj gjykate duke e zhbërë atë, ndërsa përçoi mesazhin e Thaçit se ai mbetet i fortë dhe do ta vazhdojë betejën deri në lirimin e tij.

Lidhja Demokratike e Kosovës ka reaguar pas aktgjykimit të sotëm ndaj ish-udhëheqësve të Ushtrisë Çlirimtare të Kosovës, duke shprehur shqetësim të thellë për vendimin dhe përmasën e dënimeve.

Në një komunikatë për media, partia ka bërë thirrje për qetësi, maturi dhe përgjegjësi, duke theksuar se ky është një moment i ndjeshëm për qytetarët e Kosovës.

Në reagim thuhet se liria dhe pavarësia e Kosovës janë rezultat i sakrificës së brezave, rezistencës politike dhe paqësore të udhëhequr nga Presidenti Ibrahim Rugova, luftës së Ushtrisë Çlirimtare të Kosovës dhe mbështetjes vendimtare të Shteteve të Bashkuara të Amerikës dhe NATO-s.

Sipas saj, kjo trashëgimi është e përbashkët dhe përgjegjësia për ta ruajtur atë u takon të gjithëve.

“Lidhja Demokratike e Kosovës mbetet e përkushtuar ndaj shtetit të së drejtës”, thuhet në komunikatë, ndërsa mbështetet shterimi i të gjitha kanaleve ankimore, përfshirë edhe procedurat e shkallës së dytë.

Në reagim rikujtohen edhe krimet e kryera gjatë luftës në Kosovë nga regjimi i Serbisë, përfshirë vrasjet e civilëve, dëbimet me forcë, dhunën dhe shkatërrimin e vendbanimeve.

“Asnjë aktgjykim, as ky i sotmi, nuk mund ta zhbëjë të vërtetën historike të luftës në Kosovë”, thuhet në komunikatë.

Më tej, theksohet se pjesëtarët e UÇK-së “mbrojtën pragun e shtëpisë”, ndërsa qytetarëve u bëhet thirrje që të ruajnë qetësinë dhe maturinë.

Përfaqësuesve politikë u është kërkuar përgjegjësi në fjalët dhe veprimet e tyre, shmangie e tensioneve dhe kontribut në ruajtjen e unitetit qytetar. Po ashtu, është bërë thirrje që forcat politike t’i lënë mënjanë ndasitë dhe të qëndrojnë të bashkuara në këtë periudhë.

Në përfundim, LDK-ja ka theksuar se liria e Kosovës “ka kushtuar shumë” dhe ka bërë thirrje për ruajtjen e shtetit, unitetit qytetar dhe miqësive me aleatët ndërkombëtarë.

“UÇK mbetet pjesa më krenare e historisë moderne të popullit tonë; dje, sot e përjetësisht”, përfundon reagimi i LDK-së.

D.L

Partia Demokratike e Kosovës (PDK) ka shprehur indinjatë dhe kundërshtim të fuqishëm ndaj aktgjykimit të sotëm të Gjykatës Speciale ndaj Hashim Thaçit, Kadri Veselit, Jakup Krasniqit dhe Rexhep Selimit, duke e cilësuar atë si një goditje të rëndë për të drejtën e popullit të Kosovës për liri.

Përmes një komunikate për media, PDK-ja theksoi se ky vendim është një padrejtësi e madhe që mbështetet në materiale të fabrikuara nga aparati shtetëror i Serbisë për të kriminalizuar luftën e drejtë të UÇK-së. Partia nërizoi se “agresori ishte Serbia, viktima ishte Kosova, ndërsa UÇK-ja përgjigjja e popullit për liri”, duke shtuar se historia e shkruar me gjak e sakrificë nuk mund të rishkruhet nga asnjë vendim gjyqësor.

Duke rikujtuar se katër ish-drejtuesit iu përgjigjën drejtësisë vullnetarisht, PDK-ja deklaroi se do ta kundërshtojë këtë aktgjykim me të gjitha mjetet demokratike dhe në çdo forum, me bindjen se beteja për të vërtetën e luftës çlirimtare vazhdon. /E.A/