Rektori i UBT-së, Prof. Dr. Edmond Hajrizi, po merr pjesë në Simpoziumin Shkencor Ndërkombëtar me temën “Kontributi i Shkencës në Impaktin Social”, i cili po mbahet në CERN – Organizatën Evropiane për Kërkime Bërthamore (the European Organization for Nuclear Research), në Gjenevë.

Ky simpozium i nivelit të lartë mbledh shkencëtarë, akademikë dhe liderë institucionalë nga e gjithë bota, për të diskutuar rolin e shkencës dhe inovacionit në adresimin e sfidave shoqërore dhe zhvillimin e qëndrueshëm global.

Gjatë qëndrimit në CERN, Rektori Hajrizi realizoi edhe vizita në disa nga njësitë më të rëndësishme shkencore të kësaj qendre prestigjioze, përfshirë eksperimentin ATLAS dhe Synchrocyclotron, të cilat përfaqësojnë bazën e kërkimeve më të avancuara në fizikën bërthamore dhe teknologjitë e larta.

Industria kreative në Kosovë ka shënuar një moment të rëndësishëm me lansimin e magazinës “BLANK”, botimi i parë në vend i dedikuar kritikës profesionale të ekspozitave dhe ndërtimit të diskursit kritik në artin bashkëkohor. Kjo iniciativë inovative është rezultat i drejtpërdrejtë i qasjeve bashkëkohore të edukimit që aplikohen në UBT, ku teoria ndërthuret ngushtë me praktikën dhe krijimtarinë studentore.

Lansimi i kësaj magazine u prezantua në kuadër të lëndës “Mysafirë nga Industria” në UBT, një lëndë që synon lidhjen e studentëve me praktikat reale profesionale dhe zhvillimet aktuale të industrive kreative. Me këtë rast, si mysafir ishte Art Qibukqiu, student i Fakultetit të Artit dhe Mediave Digjitale (AMD) në UBT, i cili prezantoi konceptin, misionin dhe procesin e krijimit të magazinës BLANK, duke ndarë përvojën e tij me studentët dhe stafin akademik.

Magazina BLANK përfaqëson një platformë të re kritike që synon të analizojë dhe vlerësojë ekspozitat, praktikat artistike dhe kuratoriale në Kosovë dhe më gjerë, duke kontribuar në profesionalizimin e shkrimit kritik dhe debatit kulturor.

Në këtë botim janë të përfshirë edhe studentë të tjerë të Fakultetit të Artit dhe Mediave Digjitale në UBT, përkatësisht Rea Kurtaj, Bora Banishta dhe Diellza Salicana, duke reflektuar angazhimin aktiv të studentëve të UBT-së në krijimin e përmbajtjeve profesionale dhe kritike, si dhe rolin e universitetit në fuqizimin e talenteve të reja.

Presidentja e Kosovës, Vjosa Osmani, njofton se takimet intensive gjatë Samitit BE–Ballkani Perëndimor në Bruksel kanë sjellë rezultate të rëndësishme për vendin.

Përmes një postimi në Facebook, Osmani ka theksuar se më në fund është marrë vendimi për heqjen e masave të padrejta që ishin vendosur ndaj Kosovës.

“Falënderoj përzemërsisht liderët e Bashkimit Evropian, si dhe të gjithë partnerët tanë, për vlerësimin e angazhimit të palodhur të Kosovës,” ka shkruar Presidentja Osmani.

Kryeministri i Shqipërisë, Edi Rama, ka reaguar pas vizitës së tij në Hagë, ku ka takuar ish-presidentin e Kosovës, Hashim Thaçi, duke e cilësuar procesin gjyqësor ndaj tij si një “teatër turpi të drejtësisë ndërkombëtare”.

Sipas Ramës, Thaçi është “rrëmbyer pa gjyq e pa akuzë” nga posti i Presidentit të Republikës së Kosovës, duke e konsideruar gjithë procesin si një farsë që, sipas tij, e ka zanafillën në pretendime për trafik organesh të ngritura vite më parë në instanca ndërkombëtare.

Në një postim në Facebook, Rama ka shkruar se “Sapo kam dalë nga godina ku luhet teatri i turpit të drejtësisë ndërkombëtare me Hashim Thaçin, i cili u rrëmbye pa gjyq e as akuzë nga zyra e Presidentit të Republikës, ku e kishte çuar populli i Kosovës, e me Luftën Çlirimtare të Kosovës, të cilën nuk e përdhos dot një farsë e nisur për trafik organesh nga kukullat ruse të Dumës së Putinit në Strasburg dhe e vazhduar me lloj-lloj absurditetesh e dëshmitarësh groteskë të akuzës ndërkombëtare në Hagë”.

Ai ka theksuar se gjatë takimit e ka gjetur Thaçin të qetë dhe në gjendje të mirë shpirtërore, pavarësisht, siç është shprehur, kufizimeve “absurde” të të drejtave minimale që i janë vendosur kohët e fundit. Rama ka bërë të ditur se me Thaçin ka biseduar për familjen, miqtë e përbashkët, Kosovën, Shqipërinë, si dhe për libra që i ka dhuruar gjatë vizitave.

“E kam gjetur komandantin në formë, të qetë e të buzëqeshur si çdo i pafajshëm me karakter të hekurt, edhe pse me ndalime absurde të drejtash minimale që i ishin hequr krahasimisht me herën e kaluar – një turp më vete me një fjalë! Kemi folur për familjet, për miqtë e përbashkët, për Shqipërinë e për Kosovën, për “Skënderbeun” e Aurel Plasarit, që ia pata çuar më parë, për librin e fundit të Kisingerit që ia çova këtë herë, e për dy a tre libra të tjerë nga moria e leximeve të tij në këtë vend, të cilin me të qeshur Hashimi e quan “institut”, shkruan ai.

Në prill të vitit 2023 ka nisur procesi gjyqësor në Hagë ndaj ish-krerëve të UÇK-së. Katërshja e UÇK-së ndodhet në paraburgim që nga nëntori i vitit 2020. Zyra e Prokurorit të Specializuar, e cila i ngarkon ish-krerët e Ushtrisë Çlirimtare të Kosovës me përgjegjësi për krime të pretenduara të luftës, pati sjell në gjykatore rreth 125 dëshmitarë, ndërkaq është mbështetur në mbi 100 dëshmi me shkrim.

Gjatë vitit janë organizuar pesa protesta, në Prishtinë, Hagë, Tiranë, Strasburg e Shkup në mbrojtje të ish-krerëve të Ushtrisë Çlirimtare të Kosovës.