Shtetet e QUINT-it dhe zyra e BE-së janë shprehur të shqetësuara me vendimin e Qeverisë së Kosovës për t’ia ndaluar hyrjen në Kosovë, partiakut të Kishës Ortodokse Serbe, Profirije.

Në një deklaratë të lëshuar sot QUINT-i thekson se vendimi i Qeverisë është në kundërshtim me dispozitat e Planit të Ahtisaarit dhe nuk është në përputhje me obligimet e Kosovës në dialogun e lehtësuar nga BE.

“Ambasadat e Francës, Gjermanisë, Italisë, Mbretërisë së Bashkuar, Shteteve të Bashkuara të Amerikës dhe Zyra e Bashkimit Evropian në Kosovë janë të shqetësuara me vendimin e qeverisë së Kosovës për të mos lejuar patriarkun Porfirije të Kishës ortodokse serbe dhe peshkopët që e shoqëronin atë për të hyrë në Kosovë për të marrë pjesë në ngjarjen e fillimit ceremonial të kuvendit të rregullt vjetor të Sinodit në Patriarkanën e Pejës. Vendimi i qeverisë është në kundërshtim me dispozitat e Planit të Ahtisarit, i cili i përshkruan qartazi të drejtat, privilegjet dhe imunitetet për klerin e Kishës ortodokse serbe, si dhe nuk është në përputhje me detyrimet e Kosovës në dialogun e BE-së”, thuhet në komunikatë.

QUINT thotë se pret nga Qeveria e Kosovës të aplikojë standarde më të larta drejt përmbushjes së kornizës ligjore për të drejtat e njeriut, dhe të përmbahet nga çdo veprim që mund të rrisë tensionet.

“Presim që qeveria e Kosovës të përmbushë standardet më të larta për të drejtat e njeriut si në kornizën e saj ligjore ashtu edhe në veprimet e saj, të veprojë në interes të të gjithë qytetarëve të saj dhe t’i respektojë vlerat dhe përgjegjësitë thelbësore ndaj stabilitetit rajonal. Vazhdojmë t’ju bëjmë thirrje të dy palëve që të përmbahen nga çdo veprim dhe retorikë që mund të rrisë tensionet dhe të çojë në incidente”, thuhet në komunikatë.

Ministria e Punëve të Jashtme dhe Diasporës të hënën ka konfirmuar se ka refuzuar kërkesën e patriarkut të Kishës Ortodokse Serbe, Porfirije, për të vizituar Patriarkanën e Pejës.

Përmes një komunikate për media, MPJD tha  se derisa Serbia të vazhdojë të shkel Marrëveshjen e Brukselit, të mos lejojë vizitat e zyrtarëve shtetërorë të Kosovës në Serbi dhe të mos ndalet me fushata kundër Kosovës në arenën ndërkombëtare, të vazhdojë të përdorë gjuhë të urrejtjes dhe kërcënime kundër Kosovës dhe përfaqësuesve të saj, nuk do të lejohen vizitat as nga ana e Kosovës.

Mbështetësit e Aleancës për Mbrojtjen e Teatrit, së bashku me grupimin e Rithemelimit të PD dhe Partisë së Lirisë zhvilluan sot protestën e radhës përpara bashkisë së Tiranës duke kërkuar dorëheqjen e kryebashkiakut Erion Veliaj.

Edhe gjatë kësaj proteste ka pasur incidente ku është hedhur tymuese e motolov drejt godinës së Bashkisë së Tiranës si dhe përplasje me efektivët e policisë.

Punonjësit e policisë kanë ndërhyrë duke marrë masa në mënyrë që situata të mos përshkallëzojë.

Disa nga protestuesit mes të cilëve edhe Argita Malltezi, vajza e ish-kryeministrit Sali Berisha kishin veshur bluzën “Lironi liderin e opozitës”.

Nënkryetari i Këshillit Bashkiak të Tiranës, Dorjan Teliti, në fjalën e tij përpara protestuesve përpara Bashkisë së Tiranës deklaroi se, Tirana sot është kthyer në kryeqytet të kullave dhe betonit, shkruan ATSh, trasmeton KosovaPress.

“Sot Tirana është kthyer në kryeqytet të kullave dhe të betonit. Kjo bashki duhet të ishte transparente, por mbyllet me zinxhir. Mbyllet me zinxhir, sepse është e zhytur në punë të pista”, tha ai.

“Të ndalojmë abuzimin me të ardhmen e fëmijëve tanë”, theksoi Teliti.

Ish-kandidati për kryetar Bashkie në Tiranë, Belind Këlliçi tha se kjo protestë po bëhet për të ardhmen, që çdokush që vjedh buxhetin e shtetit, duhet të shkojë përpara drejtësisë.

Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri ka deklaruar se shpërbërja e parlamentit për këtë parti mund të ndodhë vetëm atëherë kur kryeministri i vendit, Albin Kurti shkarkohet ose dorë hiqet.

Deputeti Besnik Tahiri po ashtu ka komentuar edhe takimin e mbrëmshëm mes kryeministrit Albin Kurti dhe kryetarit të Partisë Demokratike të Kosovës (PDK), Memli Krasniqi, duke thënë se në atë takim nuk është diskutuar për agjendën legjislative.

“Takimi i mbrëmshëm i ka shpërfaq dy të vërteta të mëdha. Vërteta e parë është që në këtë takim nuk ka pasur diskutim për temën, pra për agjendën legjislative… Siç shihet nuk është problem votimi i 300 milion eurove të marrëveshjeve ndërkombëtare, por problemi është se si Kurti ta gjejë një dalje, të cilën mund të ja mundësoj opozita në mënyrë që atij t’i mundësohet një amnisti e keqqeverisjes, e dështimit në politikën e brendshme si dhe të jashtme si dhe mbi të gjitha të anëtarësimit të Kosovës në KiE. Ne sot jemi në ditën kur ne Strasburg ambasadorët diskutojnë a me hy a po jo Kosova në agjendën e Komiteteve të Ministrave. Kryeministri i vendit një ditë para se të vendoset për anëtarësimin e Kosovës, ai merret me zgjedhje. Me të vetmen arsye të mbulojë një marre, të mbulojë një dështim total që ja ka dhënë Kosovës. Sa i përket çështjes që u bë pastaj teme mediale të shpërbërjes së Parlamentit, në shpërbërjen e Parlamentit nuk e kemi diskutuar as një moment në Kuvendin e Kosovës. Ne si Aleancë e kemi propozuar një mocion të votëbesimit në Kuvend. Shpërbërja e Parlamentit për AAK-në mund të ndodhë vetëm atëherë kur kryeministri shkarkohet ose dorëhiqet”, ka deklaruar Tahiri.

I pyetur nëse kjo parti do të takohet me Kurtin, ai ka thënë se nuk kanë arsyeje te mos takohen, mirëpo siç tha ai duhet të dihet tema e diskutimit.

“Aleanca nuk ka as një arsye pse mos me u takua me Kurtin, por duhet me ditë për çka me u takua. Ne duhet me ditë temën, në qoftë se ka të bëjë një temë të interesit nacional ne këtë e kemi konfirmuar edhe me letër… Për marrëveshje ndërkombëtare dhe për ligje nuk kemi se çka takohemi, Aleanca ja ka dhënë votën. Për gjatë gjithë këtij mandati veç tre muaj ditë nuk kemi votuar, gjithmonë i kemi votuar marrëveshjet ndërkombëtare. Ndërsa për t’u takuar sa për të mbuluar një çasje të tij arrogante, arbitrare e shumë nënçmuese që e ka pasur për opozitën nuk kemi çka”, ka shtuar Tahiri.

Ndërsa ka thënë se AAK është e gatshme të shkojë në zgjedhje. Sipas tij, organizmi strukturor i Aleancës kur nuk ka qenë më i fuqishëm, as në Kosovës e as në diasporë.

“PDK është deklaruar, PDK ka pasur pozicion të shpërbërjes edhe me herët, të LDK nuk e di. Mirëpo ajo që dua të them në qoftë se ka një parti që i konvenojnë zgjedhjet, parti që është në këtë Kuvend të Kosovës është aleanca. Po e them pa modesti për shkak se organizmi strukturor i Aleancës kur nuk ka qenë më i fuqishëm, as në Kosovës e as në diasporë. Edhe unë mendoj qe rezultati jonë do të jetë befasia e zgjedhjeve. Mirëpo shkuarja në zgjedhje përmes një marrëveshje kërkon më shumë korrektësi”, ka përfunduar Tahiri.

AAK ka refuzuar ftesën për të marr pjesë në takimin e mbrëmshëm me kryeministrin Albin Kurti, në të cilën kryeministri Kurti kishte bërë ftesë për të diskutuar për agjendën legjislative.

Pas takimit me kryetarin e PDK-së, Memli Krasniqi, Kurti është shprehur i gatshëm për zgjedhje të parakohshme, por ka theksuar nevojën e një konsensusi më të gjerë edhe me partitë opozitare për shpërndarjen e Kuvendit.

Presidentja e Republikës së Kosovës, Vjosa Osmani tha në Samitin e Kopenhagës për Demokraci se për Kosovën e ardhmja në familjen euroatlantike është vetë realiteti. Ajo tha se Bashkimi Evropian dhe NATO mbeten ndër aleancat më të njohura në historinë moderne.

“Jemi dëshmitar të një sulmi të pandalshëm ndaj vlerave demokratike nga autokratët që e shohin demokracinë si kërcënim të drejtpërdrejtë ndaj ambicieve të tyre. Sa më e madhe të jetë dëshira e tyre për ta minuar demokracinë aq më e fortë duhet të jetë vendosmëria jonë për ta luftuar. Jam krenare që qëndroj në këtë podium të sotëm për të ndarë me juve një këndvështrim në historinë e Kosovës si tregim i shpresës si tregim I demokracisë që jep rezultat”, tha Osmani mes tjerash.

Sipas saj, demokracia më e gjallë në rajonin tonë është testament i vërtetë i asaj se si fati i një populli mund të transformohet kur jepet një rrugëtim drejtë pavarësisë, lirisë e demokracisë duke dalë nga hiri i një lufte gjenocidale.

“Siç e dini Kosova kufizohet me Serbinë vend që është dëshmuar të jetë dorë e zgjatur shumë lojale e Rusisë që përpiqet të luaj me ato lojërat e Putinit në Ballkan Perëndimor duke hapur një front të ri ndaj perëndimit sepse ky efekti shpërndarës me të cilin Rusia do të arrinte shpërqendrimin e vëmendjes nga Ukraina, kjo do të ishte shumë e nevojshme për ta. Puna që mbajmë bashkë me aleatët tanë, NATO-n, për të siguruar që Kosova të mbetet e sigurtë e stabile, është një gjë që bëjmë çdo dite çdo orë”, tha ajo.

E para e vendit tha se kemi rritur bashkëpunimin me aleatët tanë për tu siguruar që çdo qëllim destabilizues në kufirin verior të Kosovës të kthehet mbrapshtë.

“Vitin e kaluar patëm një sulm paramilitar që shkoi deri në akt të agresionit nga Serbia, por që arritëm ta kthenim mbrapshtë përkundër madhësisë së sulmit, sepse bashkëpunuam me aleatët tanë. Kjo nuk do të thotë që nuk do të përpiqen prapë në të ardhmen, ajo që nënkuptohet këtu është që ne do të jemi të suksesshëm për t’i ndalur që në orët e para”, tha Osmani.