Filmi “Odyssey” i regjisorit Christopher Nolan ka ngjallur interes të madh në Greqi, duke u shndërruar në një nga temat më të diskutuara të momentit.

Sipas një sondazhi të Kapa Research, rreth 90 për qind e grekëve kanë dëgjuar për filmin, ndërsa 48 për qind janë përfshirë tashmë në diskutime rreth tij. Në mesin e atyre që e kanë parë, 71 për qind e kanë vlerësuar pozitivisht filmin.

Edhe Christopher Nolan gëzon mbështetje të lartë në Greqi, me 64 për qind të të anketuarve që kanë opinion pozitiv për regjisorin. Efektet vizuale janë vlerësuar më së shumti, me 86 për qind vlerësime pozitive, ndërsa interpretimet e Matt Damon dhe Anne Hathaway kanë marrë nga 85 për qind.

Një tjetër pikë që ka marrë vlerësim të lartë është regjia e Nolan, me 81 për qind të të anketuarve që e kanë vlerësuar pozitivisht. Ndërkohë, më të ndara janë opinionet për mënyrën se si filmi e përshtat veprën e Homerit, ku 48 për qind kanë dhënë vlerësim pozitiv.

Filmi shihet si mundësi për turizmin

“Odyssey” duket se mund të ketë ndikim edhe përtej kinemasë. Sipas sondazhit, 79 për qind e personave që e kanë parë filmin besojnë se ai do të ndihmojë në promovimin e Greqisë, ndërsa 75 për qind mendojnë se mund të ndikojë në rritjen e turizmit.

Debat ka shkaktuar edhe përzgjedhja e Lupita Nyong’o në rolin e Helenës së Trojës. Në total, 46 për qind e të anketuarve e shohin pozitivisht ose në mënyrë neutrale këtë zgjedhje, ndërsa po 46 për qind janë kundër saj. Në mesin e atyre që e kanë parë filmin, mbështetja për aktoren rritet në 62 për qind.

Publiku grek është ndarë gjithashtu mes lirisë artistike të regjisorit dhe besnikërisë ndaj veprës së Homerit. Rreth 40 për qind preferojnë lirinë krijuese, ndërsa 39 për qind do të donin një përshtatje më besnike të veprës origjinale.

Sondazhi i Kapa Research është zhvilluar nga 31 korriku deri më 2 gusht 2026, me 1 mijë e 575 persona në 13 rajone të Greqisë. Prej tyre, 238 kishin parë tashmë filmin./A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Vlorë, 1997

13 gusht 1993

Një helikopter serb shkeli hapësirën ajrore të Shqipërisë

Agjencitë e huaja dje bënë me dije se zëdhënësi i Ministrisë së Mbrojtjes së Shqipërisë lëshoi një kumtesë lidhur me shkeljen ajrore të Shqipërisë nga ana e një helikopteri të armatës serbo-malazeze në afërsi të Shkodrës.

Në këtë kumtesë thuhet:

“Ky helikopter hyri 10 kilometra në thellësi të territorit shqiptar në zonën e Shkodrës, duke fluturuar në një lartësi prej 300 metrash. Gjatë ditës së djeshme kur ndodhi kjo shkelje, aeroplanët ushtarakë shqiptarë bllokuan helikopterin dhe e detyruan që të largohej menjëherë nga territori shqiptar. Këtë informatë e dhanë sot të gjitha agjencitë botërore, duke theksuar fjalët e përfaqësuesit të armatës shqiptare se kjo shkelje e hapësirës ajrore shqiptare është një provokim i rëndë, në vargun e provokimeve të ndryshme në kufi dhe kjo tregon se Beogradi është i interesuar të provokojë konflikte mes dy shteteve. Në këtë kumtesë njëkohësisht i tërhiqet vërejtja Beogradit që të mos vazhdojë me këtë taktikë, ndërsa opinionit botëror i bëhet thirrje që sa më parë të ndërpresë këto qëllime tashmë të njohura agresive të Beogradit”.

13 gusht 1994

Kosova edhe sot pa gazetë në gjuhën shqipe

Gazeta e vetme e përditshme në gjuhën shqipe në Kosovë Bujku sot nuk u botua.

Shkaset e mosbotimit të numrit të sotëm të gazetës reviale nuk dihen, pasi deri më tash redaksia nuk ka dhënë ndonjë njoftim.

Në ish-shtypshkronjën e Rilindjes, tash me emrin Graçanica shtypet edhe gazeta e përditshme serbe Jedinstvo, e cila edhe sot doli në shitje normalisht.

13 gusht 1997

Policia shqiptare në aksion për kapjen e kriminelëve në Vlorë

Krimineli i njohur me emrin Zan Çaushi, nuk ndodhet më në Shqipëri. Forcat speciale filluan të hënën një operacion në shkallë të gjerë në Vlorë, nën drejtimin e zëvendësministrit të Brendshëm, Sokol Bare, thekson në një njoftim nga Shqipëria “Bujku” i sotëm.

Burime policore thanë se trupat speciale të përforcuara me 5 autoblinda, në bashkëpunim me policinë vendëse, kanë kryer arrestime dhe ndalime personash të kërkuar, të cilët janë nisur

menjëherë për në Tiranë me helikopter të Ministrisë së Brendshme. Çfarë ka ndodhur, si u bë e mundur që forcat speciale të kapin për vesh tre nga bashkëpunëtorët kryesorë të bandës së tij, pikërisht Afrim Romi 26 vjeç i njohur me pseudonimin Luçiano, Gjikë Gërdhyuli 30 vjeç dhe Kastriot Gërdhuli 25 vjeç, të bien në duart e forcave speciale dhe Zanit nuk i gjenden gjurmët.

E vërteta është se tri viktimat “ranë” në duart e policisë me dëshirën e tyre. Sipas marrëveshjes së bërë më parë, ata do të shërbenin si ndërmjetës në bisedimet për normalizimin e gjendjes në Vlorë. Zv. ministri Bare me të cilin ata do të takoheshin, i arrestoi ata sapo i shtrinë dorën dhe sipas burimeve nga rajoni i policisë nr. 3, viktimat kanë ardhur në gjendje kome në Tiranë për të mos dëshmuar dot as mënyrën se si janë kapur.

Ndërkohë televizioni reklamon kapjen e bashkëpunëtorëve, sipas skenarit të porositur. Por, ku iku Zani, ai që mbronte Cekën e Gjinushin kur shkonte në Vlorë, ai që shoqëronte, madje, edhe Prodin? “Enigmën ia zbuloi gazetës “Albania” e motra e Zanit. Mjaftoi një telefonatë dhe ajo përgjigjet:

“Ai, xhaxhai e shiti atë tek Nano për 500 mijë dollarë. Ai ka ikur”.

Ç’kish ndodhur, kush ishte xhaxhai që e kishte shitur.

Xhaxhai i Zanit për dy ditë rresht është takuar në hotel “Rogner” me kokat e qeverisë. Ai kishte pasur dy ditë bisedime me Nanon dhe Cekën, ku ishte rënë dakord për kushtet. . . Përndryshe. . .

Kishte mbi dhjetë ditë që krimineli i Vlorës Zan Çaushi, i liruar pas dënimit me burgim të përjetshëm në Greqi, i kish kërkuar Nanos 500 mijë dollarë dhe 20 viza për shokët e tij. Përndryshe, ai do t’i dorëzonte kasetat me bisedimet e tyre me Berishën.

Dhe Nano e pagoi. . .

Zani nuk ishte më, ai kish ikur për në Korfuz, ai me tetë trima dhe me tetë viza përtej oqeanit tok me 500 mijë dollarët.

Ndërkohë alarmi kalon kufijtë shqiptarë. Media greke reagoi menjëherë ndaj deklaratës së ashpër të Ministrisë së Brendshme, duke mbrojtur bashkëpunëtorët e Zanit të arrestuar. Sipas disa stacioneve televizive greke, Afrim Romi nuk është kriminel i dënuar me 101 vjet në Greqi, dhe se i cilësoi ata si “luftëtarë antiberishë”. Reagimi i shtypit grek dhe sidomos atij shtypi që është afër qeverisë greke, shton dyshimet për marrëveshjen e Zanit, jo më me zyrtarët e Tiranës, por dhe me diplomatë që do të sigurojnë edhe më tej jetën e tij, thuhet në njoftim.

13 gusht 1998

Shkrehje armësh të një intensiteti më të ulët në Rekë të Keqe e në Junik

Sot në fshatrat e Rekës së Keqe dhe në Junik kanë vazhduar shkrehjet e armëve, por të një intensiteti më të ulët, krahasuar me ditët e kaluara, njofton KI i Degës së LDK-së në Gjakovë.

Në njoftim thuhet se dje pasdite, deri në orët e mbrëmjes ka vazhduar me intensitet të fuqishëm ofensiva serbe në fshatrat e Gjakovës, si në Hereq, Dobrigjë e Firajë, ndërsa front kryesor i kësaj ofansive ishin gjithnjë fshatrat e Deçanit.

Njoftohet se në këto fshatra, në orët e mbrëmjes dhe gjatë ditës së sotme shihet tym e flakë. Sipas intensitetit të luftës, nuk përjashtohet mundësia e viktimave të shumta dhe dëmeve materiale e luftarake si nga forcat serbe, ashtu edhe nga forcat shqiptare.

Mbi qytetin e Gjakovës dhe në drejtim të kësaj zone të luftës, dje dhe mbrëmë, forcat serbe kanë operuar edhe me helikopterë.

Bëhet e ditur se në orët e mbrëmjes, kolona të motorizuara dhe paramilitare serbe kanë defiluar në qytetin e Gjakovës, duke i ekspozuar si trofe të luftës uniformat dhe emblemat e UÇK-së, por edhe duke i fshehur shumë të vrarë nga radhët e tyre. Të njëjta forca i provokuan kalimtarët shqiptarë me të shtëna armësh, sharje dhe çjerrje, sjellje kjo karakteristike e histerisë nacionaliste serbe, e cila mbështetej me ovacione nga popullata serbe.

Si pasojë e ofensivës serbe, mbi 30 fshatra shqiptare të komunës së Gjakovës janë zbrazur nga banorët, ndërsa një numër i konsiderueshëm i këtyre fshatrave është shndërruar në tokë të djegur.

Gjendja humanitare është keqësuar së tepërmi. Përveç urisë, tashmë kanë filluar të ëkrcënojnë edhe me epidemi të ndryshme.

Gjendjen në qytet e kanë tensionuar së tepërmi edhe informatat se në Kodrën e Çabratit, ditët e fundit njësitë xheniere të ushtrisë serbe janë duke punuar vazhdimisht dhe gjatë netëve kamionët ushtarakë serbë po bartin material të ndryshëm në lokacionin e kësaj kodre mbi qytetin e Gjakovës.

Paris Saint-Germain ka triumfuar ndaj Aston Villës me rezultatin 2-1 në finalen e Superkupës së Evropës, një sukses ky që po e dërgon trajnerin Luis Enrique drejt rekordeve të reja në futbollin botëror.

Në këtë përballje, Khvicha Kvaratskhelia hapi serinë e golave për parisienët, Brian Madjo barazoi përkohësisht shifrat për Aston Villën, ndërsa goditja e saktë nga Désiré Doué siguroi fitoren 2-1 dhe trofeun për kampionët në fuqi.

Për timonierin e PSG-së, ky është trofeu i 13-të në krye të gjigantit francez që prej marrjes së drejtimit në verën e vitit 2023. Gjatë kësaj periudhe, spanjolli ka fituar nga tri herë kampionatin dhe Superkupën e Francës, nga dy herë Kupën e Francës, Ligën e Kampionëve dhe Superkupën e Evropës, si dhe një herë Kupën Ndërkontinentale.

Me triumfin e fundit, Enrique arrin kuotën e gjashtë trofeve evropianë në karrierën e tij si trajner (tri Superkupa Evropiane dhe tri Liga të Kampionëve).

Sipas rrjetit të statistikave Opta, me gjashtë trofe evropianë, Luis Enrique u është afruar vetëm dy emrave që qëndrojnë mbi të në historinë e futbollit evropian: Pep Guardiolës me 7 trofe dhe Carlo Ancelottit me 10 sosh. /E.A/

Partia Demokratike e Kosovës (PDK) ka dorëzuar zyrtarisht kërkesën që vazhdimi i seancës konstituive të Kuvendit të Kosovës të mbahet më 14 gusht 2026, në orën 11:00.

Kërkesa u dorëzua në Zyrën e Sekretarit nga anëtari i PDK-së, Përparim Gruda, dhe i është adresuar kryesuesit të seancës, deputetit më të vjetër në moshë, Avni Dehari.

“Në emër të partisë i bëj thirrje deputetit Kurti ta lejojë Deharin ta thërrasë seancën. Deharit nuk i takon ta japë asnjë vlerësim politik, ka rol teknik për ta thirrur seancën dhe për ta realizuar atë”, deklaroi Gruda pas dorëzimit të kërkesës.

Në letrën e protokolluar, PDK thekson se moskonstituimi i Kuvendit brenda afatit të përcaktuar ka krijuar një situatë të rëndë të shkeljes së Kushtetutës dhe të mosrespektimit të aktgjykimeve të Gjykatës Kushtetuese.

Subjekti politik sqaron se, sipas jurisprudencës kushtetuese, tejkalimi i afatit nuk e shuan detyrimin për konstituimin e institucionit legjislativ, prandaj vonesat e mëtejshme vetëm sa e thellojnë bllokadën politike.

Po ashtu, PDK i rikujton kryesuesit se roli i tij si deputeti më i vjetër është i kufizuar nga Kushtetuta dhe Rregullorja e Kuvendit vetëm në lehtësimin e ecurisë së seancës. Në letër potencohet se ai nuk ka kompetencë të vendosë mbi bazën e vlerësimeve apo konsideratave politike se kur duhet të vazhdojë ky proces.

“Vlerësimet dhe negociatat politike u takojnë forcave politike dhe ato mund e duhet të zhvillohen vetëm brenda kornizës kushtetuese të Republikës së Kosovës, të cilën të gjithë jemi të obliguar ta respektojmë”, nënfundohet në letrën e PDK-së. /E.A/