Në Gjykatën Themelore në Prishtinë mbahet sot seanca e shqyrtimit fillestar në rastin penal ndaj 21 të pandehurve, të cilët akuzohen për krime lufte kundër popullsisë civile në Masakrën e Reçakut.

Sipas njoftimit zyrtar nga Departamenti Special i Gjykatës, ky proces penal do të zhvillohet në mungesë të të akuzuarve, pasi të njëjtit kanë qenë të paarritshëm për organet e drejtësisë deri në momentin e ngritjes së aktakuzës. Përmes njoftimit, Prokuroria Speciale e Republikës së Kosovës u ka bërë thirrje publike të pandehurve që të paraqiten dhe të dorëzohen para organeve të ndjekjes.

Lista e të akuzuarve përfshin: Zllatomir Peshiq, Mlladen Cirkoviq, Radomir Markoviq, Dushko Adamoviq, Obrad Stevanoviq, Zhivko Trajkoviq, Goran Radosavleviq, Bogolub Janiçqviq, Sllavisha Ivanoviq, Boshko Vukiqeviq, Sreten Popoviq, Nikolla Petroviq, Kërsman Jellliq, Lubisha Stojimiroviq, Bozhidar Deliq, Radojko Stefanoviq, Dragan Zhivanoviq, Milosh Gjoshan, Lubinko Cvetiq, Bozhidar Filiq dhe Milovan Kovaçeviq.

Sipas aktakuzës, gjatë periudhës 1998-1999, të pandehurit kanë vepruar në bashkëkryerje si pjesëtarë të Ushtrisë së ish-Jugosllavisë (veçanërisht të Brigadës së 243-të të Mekanizuar të Korpusit të Prishtinës) dhe si pjesëtarë të Ministrisë së Punëve të Brendshme (MUP). Përveç vrasjeve, ata ngarkohen edhe për trajtim çnjerëzor, shkatërrim të pasurisë, dëbim masiv dhe spastrim etnik.

Në dokumentet e Prokurorisë përshkruhet se si të pandehurit fillimisht rrethuan fshatin Reçak nga pikat strategjike si “Pishat”, “Gështenjat” dhe “Çesta”, duke e granatuar atë me mjete ushtarake. Më pas, gjatë kontrolleve shtëpi më shtëpi, ata ndanë burrat nga gratë dhe fëmijët – këta të fundit i detyruan të largoheshin, ndërsa burrat e ndaluar i ekzekutuan.

Hetimet kanë vërtetuar gjithashtu se ndaj civilëve është ushtruar dhunë e egër fizike përmes rrahjeve me kondakë armësh, shqelma, dru e zinxhirë. Si pasojë e këtyre veprimeve, rreth 20.000 banorë civilë nga Reçaku dhe fshatrat përreth si Topillë, Petrovë, Kraishtë, Mullapolc e Dremjak, u dëbuan dhunshëm nga shtëpitë e tyre. /E.A/

Forca e Sigurisë së Kosovës (FSK) ka gjetur trupin e pajetë të një shtetasi të huaj me inicialet A.A., pas një operacioni kërkim-shpëtimi në Liqenin e Batllavës.

Operacioni ka nisur menjëherë pas pranimit të informatës nga Qendra e Situatave të Republikës së Kosovës.

FSK ka angazhuar me urgjencë Ekipin e Kërkim-Shpëtimit në ujëra, i cili ka ndërhyrë në orët e vona dhe ka arritur të lokalizojë dhe të nxjerrë trupin e pajetë nga liqeni.

Pas përfundimit të operacionit, trupi i viktimës u është dorëzuar autoriteteve përkatëse për procedurat e mëtejshme ligjore dhe hetimore. /E.A/

Një rast i sulmit seksual është regjistruar gjatë ditës së djeshme në Obiliq, ka bërë të ditur Policia e Kosovës në raportin e saj 24-orësh.

Sipas njoftimit zyrtar, ngjarja ka ndodhur mesditën e së dielës, rreth orës 12:15, ku një grua ka raportuar se është sulmuar seksualisht nga një burrë.

Policia ka reaguar menjëherë duke shoqëruar të dyshuarin në stacion.

Pas intervistimit, me vendim të prokurorit kujdestar, i dyshuari është arrestuar zyrtarisht dhe është dërguar në mbajtje për procedime të mëtejshme ligjore. /E.A/

Në raportin njëditor të Policisë së Kosovës janë raportuar katër raste të dhunës në familje. Dy prej këtyre rasteve janë regjistruar në Podujevë ndërsa dy të tjera në Gjakovë.

Në rastin e parë në Podujevë është arrestuar një burrë nën dyshimin se pas një mosmarrëveshjeje ka sulmuar fizikisht një grua. Viktima ka pranuar tretman mjekësor për shkak të lëndimeve të pësuara, ndërsa i dyshuari, me vendim të prokurorit, është dërguar në mbajtje.

Rasti i dytë i lidhur me këtë rajon është regjistruar në Prishtinë, ku po ashtu një burrë dyshohet se ka ushtruar dhunë ndaj një gruaje. Për këtë rast, prokurori ka vendosur që procedura të vazhdojë në gjendje të lirë.

Ndërkaq, dy rastet e tjera kanë ndodhur në Gjakovë, ku situatat kanë qenë të ndryshme. Në njërën prej tyre, dy burra janë arrestuar pasi janë rrahur mes vete pas një zënke. Që të dy kanë marrë ndihmë mjekësore dhe më pas janë dërguar në mbajtje me urdhër të prokurorit.

Rasti i fundit në Gjakovë ka të bëjë me mospërfillje të gjykatës dhe dhunë në familje. Një burrë ka shkelur urdhrin e gjykatës duke iu afruar një gruaje dhe më pas është larguar në drejtim të panjohur. Policia e Kosovës ka bërë të ditur se i dyshuari tashmë gjendet në kërkim policor. /E.A/