Lajmet

Fushata e vaksinimit dhe fshehja e të vdekurve në Serbi

Published

5 years ago

on

Mediat gjermane publikojnë të dhëna interesante për vaksinimin, por edhe shokuese për heshtjen e numrit të të vdekurve në Serbi. Serbia hesht për shifrën e vërtetë të viktimave nga virusi Corona.

Mirza Vranjakoviq u beson shumë pak gjëra autoriteteve në Serbi, por ka shkuar në vendlindje për shkak të vaksinimit. Ky arkitekt i ri me origjinë nga Novi Pazari, e që tani jeton në Berlin, e di se në Gjermani nuk do t’i vijë radha për vaksinim edhe për një kohë të gjatë. Ndaj ka vendosur të shkojë në Serbi dhe të vaksinohet në Beograd.

„Dua të jem imun ndaj virusit Corona dhe të mos mendoj tërë kohën për mundësinë e infektimit tim apo të dikujt tjetër në afërsinë time. Mendoj se do të jetoj më lirshëm“, thotë Mirza në filmin dokumentar me titull: “Vaksina për të gjithë” të publikuar në Televizion e Dytë Gjerman ZDF, si dhe në kanalin gjermano-francez Arte.

„Dua të vaksinohem me Biontech/Pfizser, i cili njihet në mbarë Evropën, sepse atje jetoj. Në këtë mënyrë do të evitoj edhe vështirësitë burokratike“, tha Mirza.

Serbien I Coronavirus in Belgrad

Ka vaksina, por njerëzit nuk duan të vaksinohen

Në film thuhet se Serbia ka raporte të ngushta me Rusinë dhe Kinën dhe se Serbia ka porositur vaksina nga mbarë bota. Por shumëkush refuzon të vaksinohet. Në Serbi ka shumë kundërshtarë të vaksinimit, të cilët përhapin frikë ndaj vaksinave.

Ekipi gjerman televiziv ka shoqëruar edhe një ekip mobil për vaksinim në fshatin Radenkovac afër Sokobanjës. Atje jetojnë kryesisht të moshuarit. “Të gjithë jemi vaksinuar, por goca ime nuk do të vaksinohet. Ajo ende nuk është martuar dhe nuk do të vaksinohet“, thotë një grua e moshuar. Ajo shton se vet vajza duhet të vendosë nëse do të vaksinohet apo jo!

“Të vaksinuarit nuk mund të lindin fëmijë”, kjo është një prej teorive më të shpeshta konspirative, të cilën e besojnë shumë njerëz në Serbi.

Gazetarët gjermanë kanë biseduar edhe me mjeken Jovana Stojkoviq, e cila përshkruhet si kundërshtare e vaksinimit në Serbi. “Sipas të dhënave të institutit tonë Batut, shteti nuk merr përgjegjësinë për pasojat anësore të vaksinimit. Nuk ka garanci për efikasitetin. Kjo është e papërgjegjshme. Të shantazhosh dhe të detyrosh njerëzit të vaksinohen, e të mos marrësh përgjegjësi, kjo është mënyra më e vrazhdtë e represionit.“

Pritje për vaksinimin me BioNTech Pfizer

Moszbatim i masave të Coronës

Rade Paniq, kryetari i Sindikatës së mjekëve dhe farmacistëve në Serbi kritikon kushtet në të cilat punojnë mjekët në Serbi, sepse atje kanë vdekur më shumë se 100 mjekë, për shkak të kushteve të rënda të punës. „Një problem shumë i madh është zbatimi i masave kundër Coronës, sepse ato nuk respektohen gati akund. Ndoshta kemi të bëjmë me edukimin e keq të popullatës, por edhe me faktin që qeveria serbe për një kohë të gjatë nuk ka ndërmarrë asgjë kundër lobit që kundërshton vaksinimin. Të tillë ka shumë në Serbi, ata janë të zëshëm dhe mund të bëjnë çfarë të duan“, thotë Paniq.

Në film shihen edhe skena përplot me njerëz në Beograd ku thuhet: „Covidi duket se nuk i frikëson njerëzit këtu, ndonëse vendi është goditur shumë nga pandemia. Muajt e kaluar ka pasur një shkallë të lartë të infektimeve, ndërsa njerëzit këtu janë shumë më të rrezikuar sesa në pjesët e tjera të Evropës. Por restorantet, kafenetë, butikët dhe dyqanet janë të hapura, ndërsa distancën nuk e respekton askush.“ „Jam shumë i habitur kur shoh kaq shumë njerëz pa maska, të relaksuar. Në Gjermani po vazhdon për muaj të tërë lockdown dhe ke përshtypjen se njerëzit janë të kontaminuar, ikin prej njëri-tjetrit“, thotë Mirza Vranjakoviq.

Coronavirus Serbien | Impfkampagne Präsident Vucic

Shifra shumë më të larta të vdekshmërisë nga ato zyrtare?

Gjendja e vërtetë shihet në morgje, ku çdo ditë vijnë shumë makina me të vdekur, por edhe në varreza, ku bagerët me shpejtësi hapin gropa të reja ku futen të vdekurit nga virusi Corona. „Qindra varreza të freskëta dëshmojnë për dramën për të cilën flitet në qarqet private, por jo edhe në media. Për përmasat e dramës që po zhvillohet në Serbi nuk ka të dhëna zyrtare“, thuhet në këtë film.

Për gjendjen në Serbi ka raportuar ndër të tjera edhe Sandra Petrushiq, gazetare e revistën NIN. „Në nivelin lokal fshihet diku rreth 60% e të vdekurve nga virusi Corona. Ndërkohë që edhe këto të dhëna përgjysmohen deri sa të mbërrijnë në entin e shëndetit publik  Batuta. Sipas llogaritjeve të mia, numri i vërtet i të vdekurve është të paktën dy deri në tre herë më i madh se të dhënat e paraqitura statistikore“, thotë ajo në një bisedë me ekipin e gazetarëve gjermanë.

Në film thuhet se për gjendjen e vërtet raporton vetëm një numër i vogël i mediave të pavarura. Shumica e mediave janë në pronësi të biznismenëve të afërt me pushtetin. Suksesi i fushatës së vaksinimit është për ta më i rëndësishëm sesa gjendja e vërtetë. Po pse?

„Sepse kjo është fushatë elektorale e presidentit Vuçiq“, thotë Petrushiq. „Prej fillimit është synuar që të dëshmohet se ne jemi më të mirët në Evropë dhe në botë. Vuçiqi ka vendosur se ne do ta mundim Coronën për një muaj. E kur kjo dështoi, atëherë filloi fushata se ne jemi më të suksesshëm se të gjithë të tjerët.“

Filmin „Vaksina për të gjithë – sa është e suksesshme fushata e vaksinimit në Serbi?“, mund të shikoni në mediatekën e Arte. Ndërsa filmin gjysmëorësh e kanë realizuar gazetarët Eberhard Riele dhe Natalija Miletiq.

Related Topics:
Continue Reading

Lajmet

Ndërroi jetë Ali Sadriu, ministri i parë i financave i Kosovës së pasluftës

Published

2 days ago

on

January 9, 2026

By

Ka ndërruar jetë Ali Sadriu. Ai ishte ministri i parë i financave i Kosovës së pasluftës. Në periudhën kur Kosova ndërtoi sistemin financiar të vetin.

Njoftimin për vdekjen e tij e ka bërë bashkëpunëtori i tij, Besnik Osmani.

Postimi i plotë i Osmani në Facebook:

Paska ndërruar jetë Ali Sadriu.

Aliu nuk ishte vetëm ministri i parë i financave, por edhe themeluesi i institucioneve fiskale dhe financiare të Republikës së Kosovës.

Në kohët më të vështira, Aliu ishte lis që nuk rrëzohej kurrë dhe mendje që ecte përpara, me qëllime, ide dhe bindje të qarta.

Periudha e pasluftës ishte jashtëzakonisht e vështirë – jo vetëm për t’u përgjigjur nevojave urgjente të rindërtimit, por edhe për të mbrojtur vlerat liridashëse dhe shtetndërtuese të Lidhjes Demokratike të Kosovës.

Trim i madh, burrë i vendosur, i qartë në ideale dhe në vizion.

Me drejtimin tënd dhe me ndihmën e shumë ekspertëve vendorë e ndërkombëtarë, u themelua buxheti i parë i shtetit. U siguruan rrogat e para për mësuesit dhe mjekët. U ndërtuan institucionet më të rëndësishme financiare: Thesari, Buxheti, Administrata Tatimore dhe Doganore e Kosovës.

Nuk mund të harrohet gëzimi yt – edhe pse i përmbajtur, për shkak të natyrës sate – kur vendose doganën e parë në pikën kufitare të Merdarës.

As momenti kur, mbi një filxhan porcelani kafeje, u shënua shifra e parë e buxhetit të shtetit: 213 milionë euro.

U prehsh në paqe, Ali Sadriu.

Kontributi yt do të mbetet gur themeli i shtetit të Kosovës.

Continue Reading

Lajmet

The Guardian shkruan për përmbytjet në Kosovë

Published

2 days ago

on

January 9, 2026

By

Kosova është përballur këtë javë me reshje të gjata dhe të dendura shiu, të cilat kanë shkaktuar përmbytje të gjera. Qytete, qyteza dhe fshatra u përmbytën ndërsa lumenjtë dolën nga shtrati i tyre. Komunitetet u izoluan dhe shërbimet emergjente shpëtuan persona të bllokuar në shtëpitë e tyre. Banorët humbën furnizimin me ujë, si dhe energjinë elektrike në komunat e Drenasit, Malishevës dhe Rahovecit, pasi uji i përmbytjeve depërtoi në nënstacionet elektrike, ka shkruar mediumi britanik “The Guardian” për situatën me përmbytjet në Kosovë.

Stacione individuale të motit në të gjithë jugperëndimin e vendit regjistruan më shumë se 50 mm brenda 24 orëve të martën dhe të mërkurën, me disa stacione lokale që regjistruan rreth 80 mm në komunën e Malishevës.

Kjo pasoi reshjet e dendura të mëparshme nga e shtuna deri të hënën, gjatë të cilave stacionet zyrtare të motit në Junik dhe Gllogjan në perëndim të vendit regjistruan përkatësisht 231.5 mm dhe 151.6 mm shi brenda dy ditësh. 130 mm të tjera ranë në rajonin e Junikut të martën, duke përkeqësuar përmbytjet me rrëshqitje të dheut.

The Guardian njoftoi edhe për motin e përkeqësuar në gjithë Europën, duke thënë se Zyra Meteorologjike e Mbretërisë së Bashkuar lëshoi ​​një paralajmërim të kuq për erëra të forta nga ora 16:00 deri në 23:00 të enjten në të gjithë Kornuoll dhe Ishujt Scilly, ndërsa Stuhia Goretti përshkoi Kanalin. Ndërsa jugperëndimi i largët i Anglisë pati erëra ekstreme me shpejtësi afër 100 mph, ishte Meteo-France ajo që i dha emrin stuhisë, pasi Franca veriperëndimore pritej të pësonte goditje të forta. U parashikuan erëra shkatërruese mbi 80 mph, me erëra prej 132 mph të vërejtura në Normandi dhe 94 mph në gjatë natës. Vende deri në brendësi të Parisit patën erëra shumë të forta gjatë natës, me erëra që arritën në 65 mph.

Paralajmërime për përmbytje bregdetare ishin gjithashtu në fuqi në Francën veriperëndimore; brigjet veriore të Brittany ishin nën paralajmërime për valë 6-9 metra, me valë stuhie prej 1.5 metrash gjatë baticës së lartë.

Stuhia Goretti do të vazhdojë të lëvizë drejt lindjes në Europën kontinentale gjatë fundjavës, dhe ndërsa erërat e forta do të lehtësohen disi ndërsa kjo ndodh, kushtet e stuhisë së borës mund të jenë një kërcënim. Reshje të konsiderueshme bore mund të bien në të gjithë Gjermaninë dhe rajonin e Beneluksit.

Continue Reading

Lajmet

Vërshimet në veri: Mbyllet një urë shkaku i dëmtimeve, evakuohen katër familje që iu përmbytën shtëpitë

Published

2 days ago

on

January 9, 2026

By

Policia e Kosovës ka dalë me përditësim lidhur  me situatën në veri të vendit, pas vërshimeve që u shkaktuan si pasojë e reshjeve të shiut.

Një urë në fshatin Beluçe të Leposaviqit është mbyllur përkohësisht meqë është vlerësuar se përbën rrezik për sigurinë, shkaku i dëmtimeve që ka pësuar nga vërshimet, shkruan Reporteri.net.

Policia ka bërë me dije se janë evkauuar edhe katër familje në Mitrovicë, shkaku që shtëpitë e tyre janë përmbytur.

“Vërshime janë evidentuar në qytetin e Zveçanit dhe në Mitrovicë Veri. Ndërkaq, më datë 08.01.2025, Policia e Kosovës ka pranuar informatë se në fshatin Beluçe te Leposaviqit, si pasojë e vërshimeve, një urë ka pësuar dëmtime, ku njëra këmbë e urës është dëmtuar. Lidhur me këtë rast, Policia ka njoftuar zyrtarët komunal të Leposaviqit si dhe përfaqësuesit nga Ministria e Infrastrukturës, të cilët kanë dalë në terren dhe kanë konstatuar se, për shkak të rrezikut për sigurinë, ura duhet të mbyllet. Si rezultat, ura është mbyllur përkohësisht deri në një vendim të radhës. Po ashtu, gjatë këtyre ditëve, në qytetin e Mitrovicës së Veriut janë evakuuar katër (4) familje, pasi shtëpitë e tyre janë përmbytur si pasojë e vërshimeve”, thuhet në njoftim.

Situata thuhet se aktualisht është e menaxhueshme.

“Policia e Kosovës po vazhdon monitorimin e gjendjes në terren. Qytetarët për çdo vështirësi apo rast emergjent mund të kontaktojnë Policinë e Kosovës në numrin 192. Policia e Kosovës mbetet e përkushtuar në ofrimin e shërbimeve, mbrojtjen e jetës dhe pronës së qytetarëve, veçanërisht në situata emergjente kur vendi përballet me rreziqe natyrore”, thuhet në njoftim.

Continue Reading

Lajmet

​Këta janë 120 deputetët e legjislaturës së 10-të

Published

2 days ago

on

January 9, 2026

By

Me përfundimin e numërimit të fletëvotimeve, Komisioni Qendror i Zgjedhjeve (KQZ) ka shprehur gatishmërinë që të shpallë rezultatet përfundimtare të zgjedhjeve të parakohshme parlamentare, të mbajtura më 28 dhjetor të vitit të kaluar në Kosovë.

Megjithatë, para shpalljes së rezultateve përfundimtare, duhet të përfundojë periudha e paraparë për ankesa, të cilat partitë politike mund t’i paraqesin në Panelin Zgjedhor për Ankesa dhe Parashtresa (PZAP).

Sipas rezultateve preliminare:

Lëvizja Vetëvendosje (LVV) ka marrë 51.11% të votave dhe do të ketë 57 ulëse në Kuvendin e Kosovës;

Partia Demokratike e Kosovës (PDK) ka marrë 20.19% dhe do të ketë 22 ulëse;

Lidhja Demokratike e Kosovës (LDK) ka marrë 13.23% (15 ulëse);

Aleanca për Ardhmërinë e Kosovës (AAK) ka marrë 5.5% (6 ulëse).

Deputetët e Lëvizjes Vetëvendosje (LVV): Albin Kurti; Glauk Konjufca; Albulena Haxhiu; Hekuran Murati; Donika Gërvalla-Schëarz; Xhelal Sveçla; Hajrulla Çeku; Avni Dehari; Mimoza Kusari-Lila; Ejup Maqedonci; Shqipe Mehmeti Selimi; Andin Hoti; Arben Vitia; Saranda Bogujevci; Edona Llalloshi; Alban Bajrami; Mefail Bajqinovci; Nezir Kraki; Armend Muja; Rufki Suma; Adriana Matoshi; Jeta Statovci; Ardian Gola; Haxhi Avdyli; Adelina Grainca; Blerim Gashi; Albena Reshitaj; Fatos Geci; Agim Bahtiri; Taulant Kelmendi; Artane Rizvanolli Berisha; Fitore Pacolli Dalipi; Dimal Basha; Arbër Rexhaj; Labinotë Demi Murtezi; Arbëreshë Kryeziu Hyseni; Artan Abrashi; Arjeta Fejza; Hysen Durmishi; Arbërie Nagavci; Enver Haliti; Liza Gashi; Valon Ramadani; Adnan Rrustemi; Jeton Raka; Fatmire Kollçaku; Arsim Ademi; Drita Pajaziti; Rozeta Hajdari; Salih Zyba; Fitim Haziri; Fjolla Ujkani; Ilir Kërçeli; Sylejman Meholli; Vigan Qorrolli; Valon Hoti; Naim Bardiqi.

Deputetët e PDK-së: Bedri Hamza; Arian Tahiri; Përparim Gruda; Uran Ismaili; Sala Jashari; Vlora Çitaku; Enver Hoxhaj; Arben Mustafa; Nait Hasani; Rrahman Rama; Ganimete Musliu; Eman Rrahmani; Kujtim Gashi; Elmi Reçica; Artan Behrami; Xhavit Haliti; Besa Kabashi-Ramaj; Mergim Lushtaku; Ferat Shala; Blerta Deliu-Kodra; Ariana Musliu-Shoshi; Arbnore Salihu.

Deputetët e LDK-së: Lumir Abdixhiku; Hykmete Bajrami; Ukë Rugova; Avdullah Hoti; Doarsa Kica-Xhelili; Kujtim Shala; Anton Quni; Armend Zemaj; Lutfi Haziri; Jehona Lushaku-Sadriu; Janina Ymeri; Besian Mustafa; Adelina Thaçi-Meta; Fadil Hadergjonaj; Ermal Sadiku.

Deputetët e AAK-së: Ramush Haradinaj; Daut Haradinaj; Besnik Tahiri; Bekë Berisha; Time Kadrijaj; Albana Bytyqi.

Deputetët e Listës Serbe: Slavko Simiq; Igor Simiq; Liljana Stefanoviq; Milan Kostiq; Nemanja Bishevac; Zlatan Elek; Miljana Nikoliq; Srdjan Popoviq; Verica Çeraniq.

Deputeti i partisë “Për Liri, Drejtësi dhe Mbijetesë”: Nenad Rashiq.

Deputetët e komuniteteve tjera joserbe: Fikrim Damka; Fatma Taqi; Rasim Demiri; Emilija Rexhepi; Elbert Krasniqi; Duda Balje; Veton Berisha; Artan Asllani; Adem Hoxha; Erxhan Galushi.

Continue Reading

Të kërkuara