Ky vit pritet të mbyllet me rritje ekonomike prej 4.3 për qind. Derisa në vitet 2025 dhe 2026 parashikohet rritje ekonomike prej 4.2 për qind, përkatësisht 4.4 për qind mbështetur nga kërkesa e brendshme dhe eksporti. Kështu ka bërë të ditur, guvernatori i Bankës Qendrore të Kosovës, Ahmet Ismaili.

Ismaili në një konferencë për media derisa ka prezantuar aktivitet e këtij institucioni për vitin 2024 ka theksuar se ka stabilizim të inflacionit, duke shtuar se shkalla mesatare ka arritur 1.7 për qind derisa deri në fund të vitit pritet që të mbyllet me 1.6 për qind.

Po ashtu ai nënvizoi se remitencat e pranuara deri në fund të vitit pritet të arrijnë vlerën prej 1.36 miliard euro duke shënuar rritje vjetore prej 1.9 për qind.

“Sa i përket aktivitetit ekonomik ose makro-ekonomik ne presim që viti 2024 të mbyllet me një rritje prej 4.3 për qind. Nivelin e rritjes prej 4.2 për qind deri ne 4.4 e parashohim të ndodh në vitet 2025 dhe 2026. Aktiviteti ekonomik deri në shtator ka arritur 4.6 për qind rritje, e cila është sipas të dhënave të ASK-së, sigurisht zhvillimet gjeo-politike dhe pasiguritë tjera ekonomike janë ata faktorë që ne do ti marrim në konsideratë që të bëjmë ri-shikimin e projeksioneve tona. Sa i përket inflacionit, shkalla mesatare e inflacionit në Kosovë arriti në nëntor në 1.7 për qind. Inflacioni bazë u ngadalësua në mesatare prej 3.3 për qind nga 4.4 për qind. Pritjet tona janë që inflacioni të mbyllet me 1.6 për qind dhe ngjashëm presim që të jetë edhe në vitin 2025… Remitencat arritën vlerën deri në tetor prej 1.1 miliardë euro dhe ne presim që ashtu të mbyllet me rreth 1.3 miliardë euro viti”, tha Ismaili.

Ndërsa, tha se gjithsej kreditë në nëntor të këtij viti kanë arritur shumën prej 5.668 miliardë euro, duke shënuar rritje prej 768.9 milionë euro ose 15.7 për qind krahasuar me dhjetorin e vitit 2023. Ai shtoi se depozitat vazhdojnë të jenë burimi kryesor i financimit të kredive.

“Sa i përket kredive, shihet një normë rritjeje, totali prej vitit ka mbërri rreth 5.7 miliardë me një rritje prej 15.7 për qind e cila është një rritje e kënaqshme që tregon se bankat po e mbështesin ekonominë. Në depozita vazhdon rritja, pra depozitat kanë mbërri rreth 6.6 miliardë euro me një rritje prej 11.9 ose rreth 12 për qind. Kreditë janë rritur më shpejt sesa depozitat, më shumë se depozitat me përqindje rritjeje që i bie që bankat kanë vazhduar të jenë më “dorë shlirë” në kuptimin e kreditimit. Gjithsej depozitat në nëntor të këtij viti kanë arritur në 6.586 miliarda euro, duke shënuar rritje prej 448.5 milionë euro ose 7.3 për qind krahasuar me dhjetorin e vitit 2023. Kjo rritje i atribuohet rritjes së normave të interesit në depozita dhe konkurrenca me intensive midis bankave për tërheqje të depozitueseve”, tha ai.

Ismaili tregoi se edhe norma e interesit është zvogëluar gjatë këtij viti në dallim prej vitit 2023. Sipas tij norma mesatare e interesit në kredi në sektorin bankar në nëntor 2024 është 6.02 për qind, ndërsa në dhjetor 2023 kjo normë ishte 6.35 për qind. Derisa tha se norma mesatare e interesit më depozita në sektorin bankar në nëntor 2024 ishte 2.87.

Me këtë rast BQK-ja ka ndarë edhe çmimin për ekonomistë të rinj, ku vendin e parë e ka marrë Valmir Zogaj, për studimin me titull: “Inovacionet Teknologjike Financiare dhe Ndikimi i Tyre në Qasjen në Financa dhe Gjithë përfshirjen Financiare-Rast Studimi për Kosovën”

Policia e Kosovës sot pak para orës 11:00 ka asistuar zyrtarët komunal të Mitrovicës së Veriut në lidhje me verifikimin e pronës së tyre tek “Tre rrokaqiejt”.

Kështu e ka bërë të ditur zëvendësdrejtori i Policisë së Kosovës për rajonin e veriut Veton Elshani.

Elshani shtoi se është mbyllur kati i parë i kësaj ndërtese nën dyshimin për falsifikim të dokumenteve.

“Në momentin e hyrjes në këtë objekt (kati i parë i ndërtesës), Policia ka biseduar me disa persona të cilët na kanë treguar se aty janë punonjës të një institucioni që në pamje të parë duket të jetë ilegal. Pas verifikimit të disa dokumenteve ne e kemi njoftu Prokurorin e Mitrovicës dhe kemi hap rast për dyshimin Falsifikim të Dokumenteve. Punëtorët janë leju me i marr gjërat personale dhe me u largu nga aty, ndërsa janë vendos edhe shiritat. Nuk ka persona të arrestuar, ndërsa policia do të verifikoj dokumentacionin që gjendet aty në detaje”, shtoi ai.

Elshani shtoi se gjatë këtij veprimi policor, nuk ka pas ndonjë incident.

Guvernatori i Bankës Qendrore të Kosovës, Ahmet Ismaili deklaroi se rregullorja e BQK-së e cila përcakton që euroja të jetë valuta e vetme që mund të përdoret për pagesa me para të gatshme në gjithë vendin ka krijuar efekte pozitive.

Në një konferencë për media të enjten, derisa ka prezantuar aktivitet e këtij institucioni për vitin 2024, ka theksuar se unifikimi i sektorit dhe ndërprerja e financimeve të paligjshme ka kontribuar dukshëm në këtë drejtim.

“Rregullorja është në fuqi, i ka krijuar efektet e veta pozitive për krejt sektorin. Besoj që i kemi përafruar vlerësimet e ardhshme të pritshme sa i përket Kosovës, të mos harrojmë se me anëtarësim në Këshill të Evropës do t’i nënshtrohemi vlerësimit i cili është një vlerësim që i vendos shtetet në lista të zezë ose jo. Dhe unifikimi i sektorit dhe ndërprerja e financimeve të pa ligjshme ka kontribuar dukshëm, substancialisht në këtë drejtim”, tha ai.

BQK-ja kishte fuqizuar rregulloren e re më 1 shkurt të viti. Ajo e përcakton euron si valutë të vetme për kryerjen e pagesave me para të gatshme.

Disa komuna të vendit po ballafaqohen me reduktime të energjisë elektrike ditëve të fundit. Nga kompania Kosovare për Distribuim me Energji Elektrike në Kosovë (KEDS) kanë thënë se për shkak të konsumit të lartë të rrymës, po shkaktohen ngarkesa në rrjetin elektroenergjetik të KEDS-it në disa vende në Kosovë, duke çuar në djegie të tyre në disa raste.

Zëdhënësi i KEDS-it, Lulzim Krasniqi thekson për KosovaPress se aktualisht rajoni i Ferizajt po përballet me reduktime të energjisë elektrike. Ai thekson se për shkak të këtyre sfidave në rrjet dhe ngarkesave, furnizimi me energji elektrike është i kufizuar. Sipas tij, konsumi këto ditë ka shkuar deri në 1.500 megavat orë energji elektrike.

Krasniqi ka thënë po ashtu se rrjeti shpërndarës i KEDS-it është për furnizim me energji elektrike shtëpitë dhe bizneset, por për ngrohje.

“Aktualisht po vazhdon të mbetet sfidë rajoni i Ferizajt, për shkak të këtyre mbi ngarkesave, ku furnizimi i energjisë elektrike në disa lokacione është i kufizuar. Megjithatë, sipas informatave së shpejti atje do të vihet në funksion, nënstacioni i ri, me të cilin besojmë se do të zgjidhet kjo sfidë për rajonin e Ferizajt. KEDS, apelon për mbështetje të konsumatorëve dhe i fton ata që të kursejnë sa më shumë energjinë elektrike… Po shkon deri në 800 MË në orë, por kërkesa është tepër e lartë dhe diferenca në mes të prodhimit dhe konsumit po importohet…00:49 Një numër i konsumatorëve i caktuar i tyre e përdorin energjinë elektrike si të vetmin burim për ngrohje e çka po qon tek ngarkesat e mëdha në rrjet. Në fakt rrjeti jonë shpërndarës nuk është i paraparë për ngrohje, është i projektuar për të furnizuar me energji elektrike shtëpitë, bizneset, në bazë të kërkesave, por jo edhe për ngrohje… Konsumi ka shkuar deri në 1 mijë e 500 megavat për orë”, ka thënë Krasniqi.

Anëtari i Kryesisë së LDK-së Visar Azemi ka kritikuar Qeverinë e vendit se nuk ka vizion dhe as plan për zgjedhjen e problemit për furnizim me energji elektrike.

“Çdo hapësirë tjetër që lejohet nga qeveria, që ka të bëjë me tregti me Serbinë përmes Martinit dhe Nagipit është një dështim i plotë. Qeveria për katër vite ka treguar se nuk ka as vizion dhe as plan të zgjidhjes së problemit të energjisë elektrike. Madje, ka vendosur njerëzit më jo profesional në udhëheqjen e institucioneve të sektorit të energjisë për t’i dështuar ato dhe për ta degraduar tërë këtë sektor”, thotë ai.

Edhe Naim Bujupi ekspert i energjisë ka thënë se reduktimet e energjisë elektrike vijnë kryesisht nga rritja e kërkesës për furnizim me energji elektrike, kryesisht për ngrohje.

“Arsyet për ndërprerje janë rritja e kërkesës për furnizim me energjie elektrike në rrjetin e distribucionit, kryesisht janë të mbingarkuara linjat dhe konsumatorët në rrjetin distributiv dhe kjo ka shkaktuar ndërprerje të furnizimit me energji elektrike në shumë pjesë të Republikës së Kosovës. Kjo ndodh për shkak se shumë qytetarë e shfrytëzojnë energjinë elektrike për ngrohje, tashmë jemi dëshmitarë që edhe shumë mërgimtarë vijnë në Kosovë dhe shumica e tyre përdorin energjinë elektrike për ngrohje. Arsyeja tjetër është se viteve të fundit kemi një tendencë rritëse të përdorimit të pompave termike dhe klimave inverter që shfrytëzohen për ftohje dhe ngrohje dhe kjo ka bërë që të mbingarkohet rrjeti tejmase në nivelin distributiv”, thekson ai.

Me uljen e temperaturave në ditët e fundit janë shtuar edhe reduktimet e energjisë elektrike në vend, sidomos në Fushë-Kosovë, Rahovec dhe në Pejë.