Përzgjedhësi i Portugalisë, Roberto Martinez, është shprehur i kënaqur me reagimin e ekipit të tij pas barazimit befasues 1:1 ndaj Kongos në ndeshjen hapëse.

Portugalia u rikthye fuqishëm të martën, duke mposhtur Uzbekistanin me rezultat bindës 5:0. Ylli portugez Cristiano Ronaldo realizoi dy gola dhe vendosi një rekord historik në Kupën e Botës.

“Ky ishte reagimi që dëshironim të shihnim. Ndonjëherë të duhet një ndeshje si e para për t’u rritur gjatë një turneu. Sot pamë një ekip me të njëjtin përkushtim dhe qëndrim, por me më shumë pjekuri, pasi nuk ishte më ndeshja hapëse. Jam shumë i kënaqur me rezultatin”, deklaroi Martinez pas ndeshjes.

Ronaldo bëri histori që në minutën e gjashtë, kur shënoi golin e epërsisë pas asistimit të Joao Cancelos, duke u bërë lojtari i parë që realizon gol në gjashtë turne të ndryshëm të Kupës së Botës. Ai festoi golin së bashku me bashkëlojtarët pranë stolit portugez.

Sulmuesi portugez realizoi sërish në minutën e 39-të, pas një pasimi të Bruno Fernandesit, duke çuar rezultatin në 3:0.

Golin e dytë për Portugalinë e shënoi Nuno Mendes në minutën e 17-të, ndërsa rezultati u thellua në 4:0 pas një autogoli të portierit uzbek, Abduvakhid Nematov, në minutën e 60-të. Golin e pestë dhe të fundit e realizoi Rafael Leao në minutën e 87-të, duke vulosur fitoren e thellë të portugezëve.

Dy golat e Ronaldos e bëjnë atë lojtarin e dytë më të vjetër që shënon në një Kupë Bote, pas kamerunasit Roger Milla, i cili realizoi në moshën 42-vjeçare në Botërorin e vitit 1994.

Paraqitja e Ronaldos erdhi pas kritikave që mori për mosrealizimin e golit në ndeshjen e parë ndaj Kongos. Ai dhe Lionel Messi mbeten të vetmit futbollistë në histori që kanë luajtur në gjashtë turne të Kupës së Botës.

Megjithatë, Ronaldo është i vetmi futbollist që ka shënuar gol në secilin prej gjashtë Botërorëve ku ka marrë pjesë, pasi Messi nuk arriti të realizonte në Botërorin e vitit 2010 në Afrikën e Jugut.

Me dy golat e shënuar ndaj Uzbekistanit, Ronaldo u bë edhe golashënuesi më i mirë në historinë e Portugalisë në Kupat e Botës, duke kaluar rekordin e legjendës Eusebio.

Ndeshja ndaj Uzbekistanit ishte paraqitja e 230-të ndërkombëtare në karrierën e Ronaldos, rekord absolut në futbollin ndërkombëtar. Në moshën 41-vjeçare, ai numëron 975 gola në karrierën e tij të jashtëzakonshme.

Ky pritet të jetë Botërori i fundit për Ronaldon, i cili gjatë karrierës ka fituar Kampionatin Evropian me Portugalinë në vitin 2016 dhe pesë trofe të Ligës së Kampionëve me Manchester United dhe Real Madrid.

D.L

Foto: Associated Press

Kroacia kishte ndërtuar një seri mbresëlënëse pa humbje nga mesi i qershorit 2025 deri në mars, duke regjistruar tetë fitore dhe një barazim. Megjithatë, kjo ecuri pozitive u ndërpre javën e kaluar pas humbjes 4:2 ndaj Anglisë.

Nënkampionia e botës e vitit 2018 dhe gjysmëfinalistja e edicionit 2022 synon të rikthehet te fitorja në përballjen me Panamanë, për të shmangur një eliminim të parakohshëm nga Kupa e Botës 2026.

Ndeshja do të zhvillohet në Toronto dhe nis në orën 01:00 të mëngjesit të së mërkurës, sipas kohës lokale në Kosovë.

Kroacia konsiderohet favorite përballë Panamasë, e cila në ndeshjen e parë u mposht nga Gana me një gol të pësuar në minutat shtesë.

Vëmendja kryesore do të jetë sërish te Luka Modriq, i cili pritet të udhëheqë mesfushën kroate. Pavarësisht humbjes ndaj Anglisë, paraqitja e veteranit kroat u vlerësua pozitivisht.

Në moshën 40-vjeçare, Modriq po merr pjesë në Kupën e tij të pestë të Botës. Ky pritet të jetë Botërori i fundit në karrierën e tij të jashtëzakonshme, duke i dhënë legjendës kroate një mundësi të fundit për të shkruar histori me kombëtaren.

D.L

Foto: Associated Press

Algjeria ka shënuar fitore të rëndësishme ndaj Jordanisë me rezultat 2:1, duke mbetur në garë për një vend në fazën eliminatore të Kupës së Botës 2026. Në anën tjetër, Jordania, pas humbjes së pësuar të martën në Santa Clara, është shumë pranë eliminimit nga turneu.

Pas dy xhirove në Grupin J, Argjentina kryeson me gjashtë pikë dhe e ka siguruar tashmë kualifikimin. Austria dhe Algjeria kanë nga tri pikë, ndërsa Jordania mbetet pa asnjë pikë.

Jordania kaloi e para në epërsi në minutën e 36-të, kur Nizar Al-Rashdan realizoi për 1:0. Megjithatë, algjerianët reaguan në pjesën e dytë dhe përmbysën rezultatin.

Nadhir Benbouali barazoi shifrat në minutën e 69-të, ndërsa Amine Gouiri shënoi golin e fitores në minutën e 82-të, duke i siguruar Algjerisë tri pikë tejet të rëndësishme.

Ndeshja e fundit e grupit pritet të jetë vendimtare për kualifikimin. Më 27 qershor, Algjeria dhe Austria do të përballen në një duel direkt për vendin e dytë në grup, ndërsa Jordaninë e pret një sfidë shumë e vështirë ndaj Argjentinës, që tashmë e ka siguruar kalimin në fazën nokaut.

D.L

Shënimi i golave dhe thyerja e rekordeve janë bërë sinonim i Lionel Messit, dhe superylli argjentinas e dëshmoi këtë edhe një herë të hënën në Kupën e Botës 2026.

Kapiteni i Argjentinës, të cilin shumë e konsiderojnë futbollistin më të mirë të të gjitha kohërave, realizoi dy gola në fitoren 2:0 ndaj Austrisë, duke e çuar në 18 numrin e golave të shënuar në historinë e Kupës së Botës dhe duke vendosur një rekord të ri në turneun më prestigjioz të futbollit.

“Përtej gjithçkaje, jam shumë i lumtur për fitoren. Ishte një ndeshje e vështirë dhe shumë e luftuar. Kjo fitore na jep qetësi për sfidat që na presin. Të gjitha ndeshjet në këtë Kupë Bote janë të barabarta dhe shumë intensive. Po e shijoj këtë moment dhe dua ta ndaj me shokët e ekipit”, tha Messi pas ndeshjes.

Golin e parë ndaj Austrisë, Messi e realizoi në minutën e 38-të, vetëm dy ditë para se të festojë ditëlindjen e 39-të. Me këtë gol, ai shënoi në ndeshjen e gjashtë radhazi në Kupën e Botës, duke iu bashkuar francezit Just Fontaine dhe legjendës braziliane Jairzinho si futbollistët e vetëm që kanë arritur këtë sukses.

Messi kishte barazuar rekordin e gjermanit Miroslav Klose me “hat-trickun” e realizuar në fitoren 3:0 ndaj Algjerisë në ndeshjen hapëse të Grupit J. Kundër Austrisë pati mundësinë ta thyente rekordin që në minutën e nëntë, por humbi një penallti, duke e dërguar topin jashtë portës.

“Pati momente kur isha shumë i zemëruar që humba penalltinë, por arrita ta kompensoja më vonë”, u shpreh ai.

Argjentina siguroi kualifikimin në fazën eliminatore pas dy fitoreve në po aq ndeshje në grup, ndërsa Messi ka realizuar të pesë golat e skuadrës deri tani në Botërorin e tij të gjashtë.

Rekordi historik u vendos me golin e tij të parë ndaj Austrisë, të shënuar në minutën e 38-të pas asistimit të Facundo Medina. Më pas, në kohën shtesë, Messi realizoi edhe golin e dytë personal dhe të 18-tin në Kupat e Botës.

Austria, e cila e nisi turneun me fitore 3:1 ndaj Jordanisë, do ta kërkojë kualifikimin në ndeshjen e fundit të grupit kundër Algjerisë në Kansas City.

Ndërkohë, Argjentina do të rikthehet në stadiumin AT&T për t’u përballur me Jordaninë në sfidën e fundit të fazës grupore.

D.L