Ueb-faqe të ndryshme të institucioneve shtetërore e private të Shqipërisë kanë rënë pre e një sulmi kibernetik, që dyshohet të jetë bërë nga hakerë pro-rusë. Kjo informatë ka dalë nga një kanal në Telegram.

Sulmi, sipas njoftimit të bërë nga grupi me emrin “NoName057(16)”, një grup hakerësh pro-rusë, thuhet se ka ndodhur për shkak të rreshtimit të Shqipërisë përkrah Ukrainës në luftën e saj për të dëbuar pushtuesit rusë nga territori i vet.

“Shqipëria është bërë një tjetër vend që ka vendosur t’i bashkohet deklaratës së vendeve të G7 për sigurinë e neonazistëve ukrainas. Autoritetet shqiptare i kanë dorëzuar tashmë Ukrainës 22 transportues të blinduar dhe predha mortajash”, thuhet ndër të tjera në mesazhin e këtij grupi.

Ata po ashtu lanë edhe një mesazh tjetër në lidhje me Kosovën.

“Ju kujtojmë se Kosova është Serbi dhe ne do të shkatërrojmë infrastrukturën shqiptare të internetit”.

Në fund, grupi ka kërkuar “vëllezër serbë” për t’u dalë në ndihmë në misionin e tyre.

Deri tani, sipas grupit, faqet e sulmuara dhe që janë jashtë funksionit, janë këto:

• Parlamenti Shqiptar
• Autoriteti Portual Durrës
• Uebfaqja e qytetit të Tiranës
• Dega shqiptare e Raiffeisen Bank Albania
• Banka e Bashkuar e Shqipërisë.

Kush është grupi NoName057(16)?

NoName057(16) është një grup hakerësh pro-rusë që u deklarua fillimisht në mars 2022 dhe mori përgjegjësinë për sulmet kibernetike në uebsajtet ukrainase, amerikane dhe evropiane të agjencive qeveritare, mediave dhe kompanive private. Ai konsiderohet si një grup aktivist i paorganizuar dhe i lirë pro-rus që kërkon të tërheqë vëmendjen në vendet perëndimore, sipas “Wikipedia”.

Sulmet e para të pretenduara nga grupi në mars 2022 ishin sulmet DDoS të cilat synonin faqet e internetit të lajmeve dhe mediave të Ukrainës “Zaxid”, “Fakty UA” dhe të tjerë. Në përgjithësi, motivimet përqendrohen për të heshtur atë që grupi e konsideron si anti-ruse.

NoName057(16) funksionon duke përdorur kanale në rrjetin social rus Telegram ku ata marrin përgjegjësinë për sulmet e tyre, tallen me objektivat, bëjnë kërcënime dhe ndajnë përmbajtje edukative. Ata kanë përdorur GitHub për të “host”-uar uebsajtin e tyre të veglave DDoS dhe pjesët tjera të lidhura. Grupi ka zhvilluar një mjet DDoS të quajtur DDOSIA, i cili kryen sulme që vë jashtë funksionit ueb-faqet e synuara./Klankosova.tv

Një grua muslimane është dënuar me dy vjet burg sipas ligjit të blasfemisë në Indonezi për një video që ajo shpërndau në TikTok, ku shihej ajo tek recitonte një lutje islame përpara se të provonte mishin e derrit ndërsa vizitonte ishullin turistik të Balit.

Lina Lutfiawati u gjykua të martën në gjykatën e qarkut Palembang në ishullin Sumatra.

33-vjeçari u shpall fajtor për “përhapjen e informacionit që synon nxitjen e urrejtjes kundër individëve fetarë dhe grupeve specifike”, thuhet në dokumentet e gjykatës.

Përveç dënimit me dy vjet burg, gjykata e gjobiti atë me 16,245 dollarë. Afati i saj i burgut mund të zgjatet me tre muaj nëse ajo nuk paguan gjobën, shtoi gjykata./UBTNews/

Dyqanet franceze të Apple kanë bërë thirrje për protesta të premten dhe të shtunën – kur pritet të lansohet iPhone 15 – pas kërkesave për paga.

“Derisa menaxhmenti ka vendosur të injorojë kërkesat dhe shqetësimet tona, pavarësisht nga fakti se ato janë krejtësisht legjitime, katër sindikatat e Apple Retail France (si dhe përfaqësuesit e Barcelonës dhe ekipeve të korporatave) po bëjnë thirrje për protesta më 22 dhe 23 shtator”, njoftoi sindikata CGT Apple Retail në X.

Kjo thirrje për grevë, e cila pritet të prekë shumicën e 20 dyqaneve të Apple në Francë, do të shënohet edhe jashtë Opéra Apple Store në Paris, një nga dyqanet kryesore të markës Apple./UBTNews/

Një rregullator i madh i teknologjisë evropiane ka urdhëruar TikTok-un të paguajë një gjobë prej 345 milionë eurosh pasi vendosi se aplikacioni nuk bëri mjaftueshëm për të mbrojtur fëmijët.

Komisioni Irlandez i Mbrojtjes së të Dhënave tha se kompania kishte shkelur ligjin e privatësisë.

Një hetim nga DPC zbuloi se në gjysmën e dytë të vitit 2020, TikTok nuk bëri mjaftueshëm për të mbrojtur llogaritë e fëmijëve. Për shembull, tha ai, profilet e fëmijëve të sapokrijuar u vendosën në publik në atë mënyrë që kushdo në internet të mund t’i shikojë ato./UBTNews/