Rusia, Ukraina dhe Shtetet e Bashkuara do të zhvillojnë bisedime paqeje trepalëshe në Abu Dabi më 10 dhe 11 nëntor, në një përpjekje të re diplomatike për t’i dhënë fund konfliktit dhe për të ulur tensionet ushtarake.

Lajmi është konfirmuar të martën nga Kremlini. Zëdhënësi Dmitry Peskov bëri të ditur gjatë një konference me gazetarët se delegacioni rus do të udhëhiqet nga Vladimir Medinsky, ndihmës i presidentit Vladimir Putin dhe kryenegociator i Moskës në këtë proces.

Nga ana e tij, i dërguari i posaçëm amerikan Steve Witkoff deklaroi se Uashingtoni po lehtëson mbledhjen e delegacioneve në Emiratet e Bashkuara Arabe. Sipas tij, fokusi kryesor i bisedimeve të javës së ardhshme do të jetë hartimi i marrëveshjeve të sigurisë për periudhën e pasluftës dhe gjetja e mekanizmave për uljen e menjëhershme të tensioneve në terren.

Kjo iniciativë vjen pasi negociatorët amerikanë po kërkojnë me ngulm një përparim konkret në tryezën e bisedimeve, duke shënuar rikthimin e palëve në dialog pas një pauze prej disa muajsh që nga takimet e fundit të mbajtura në fillim të vitit. /BBC/

Procesi i votimit për zgjedhjet e mesmandatit në Shtetet e Bashkuara të Amerikës ka hyrë në fazën më intensive, me hapjen e qendrave të votimit nga Bregu Lindor e deri në pjesën qendrore të vendit. Ndërsa miliona qytetarë po u drejtohen kutive të votimit në shtete kyçe si Pennsylvania, Florida, Georgia, Michigan dhe Ohaio, të dhënat zyrtare tregojnë se procesi ka nisur me një pjesëmarrje masive falë votimit të hershëm.

Mbi 58 milionë amerikanë e kanë ushtruar tashmë të drejtën e tyre të votës përmes postës ose personalisht ditët e fundit, duke reflektuar një interesim të lartë në këto zgjedhje përcaktuese.

Këto zgjedhje mbartin një peshë të jashtëzakonshme politike, pasi rezultati i tyre do të përcaktojë kontrollin e Kongresit Amerikan. Republikanët synojnë të mbrojnë shumicën e tyre të ngushtë në të dyja dhomat për të çuar përpara prioritetet legjislative të administratës, ndërsa Demokratët kërkojnë të përmbysin balances e forcave për të marrë në dorë Senatin dhe Dhomën e Përfaqësuesve.

Vëmendja kryesore mbetet te shtetet e ashtuquajtura “fushëbetejë”, ku gara pritet të jetë jashtëzakonisht e ngushtë dhe numërimi i votave mund të zgjasë me orë të tëra pas mbylljes së qendrave.

Prirja e garës është shoqëruar edhe me zhvillime të papritura brenda taborëve politikë, veçanërisht në shtetin e Michigan-it. Kongresmenja me përvojë nga radhët e Demokratëve, Haley Stevens, ka shkaktuar reagime të shumta brenda partisë së saj pasi doli publikisht në mbështetje të kandidatit republikan për Senat, Mike Rogers. Stevens e arsyetoi vendimin e saj duke kritikuar fushatën e rivalit demokrat El-Sayed për gjuhë përçarëse dhe qasje përjashtuese. Me qendrat e votimit që vazhdojnë të presin votuesit gjatë gjithë ditës, rezultatet e para zyrtare pritet të fillojnë të rrjedhin vetëm në orët e vona të mbrëmjes. /BBC/ – /REUTERS/ foto

Shtetet e Bashkuara kanë ndërmarrë sulme ushtarake në ishullin Qeshm të Iranit, i cili gjendet në Ngushticën e Hormuzit, kanë konfirmuar zyrtarë amerikanë për rrjetin CBS. Agjencia shtetërore e lajmeve IRNA raportoi se të hënën janë dëgjuar disa shpërthime radhazi në ishull.

Zyrtarët amerikanë i përshkruan sulmet si mbrojtëse dhe të kufizuara, duke sqaruar se ato erdhën si përgjigje ndaj veprimeve të Korpusit të Gardës Revolucionare Islamike (IRGC) të Iranit, i cili kishte shënjestruar një avion ushtarak amerikan.

Ky veprim ushtarak vjen në prag të zgjedhjeve të sotme të mesmandatit në SHBA, që do të përcaktojnë kontrollin e Kongresit. Presidenti Donald Trump është përballur me presion edhe nga brenda partisë së tij për t’i dhënë fund konfliktit të hapur që filloi në shkurt pas sulmeve të përbashkëta SHBA-Izrael ndaj Iranit.

Pavarësisht goditjes, Trump deklaroi se nuk ka nxitim për të shkallëzuar më tej sulmet.

“Në një mënyrë ose në një tjetër, ne do të bëjmë diçka, por nuk ka nxitim. Ne i gjymtuam financiarisht. Ata nuk kanë para, nuk kanë benzinë dhe populli i tyre po lodhet shumë nga kjo”, tha Trump për agjencinë Axios.

Paralelisht me veprimet ushtarake, diplomacia vazhdon pas skenës. Ministri i Jashtëm i Iranit, Abbas Araghchi, konfirmoi për IRNA-n se po zhvillohen bisedime “shumë intensive” me SHBA-në nëpërmjet ndërmjetësve. Ai theksoi se Teherani është i përgatitur si për skenarë diplomatikë ashtu edhe ushtarakë, duke i lënë në dorë Uashingtonit të zgjedhë mes rrugës së negociatave ose gabimit të agresionit. /BBC/

Më shumë se 57 milionë amerikanë kanë votuar përpara kohe, ndërsa sot hapen qendrat e votimit në të gjithë SHBA-në për zgjedhjet e mesmandatit . Këto zgjedhje konsiderohen si një votëbesim i drejtpërdrejtë për dy vitet e para të mandatit të Presidentit Donald Trump dhe për përbërjen e re të legjislaturës në Uashington.

Në garë janë të gjitha 435 ulëset e Dhomës së Përfaqësuesve dhe 35 nga 100 ulëset e Senatit. Humbja e shumicës parlamentare në ndonjërën prej dhomave nga ana e republikanëve do të kufizonte ndjeshëm hapësirën e Presidentit Trump për të kaluar reformat e tij dhe do t’u jepte demokratëve mundësi për të nisur hetime parlamentare ndaj administratës.

Tema kryesore e fushates ka qenë kostoja e jetesës, ku votuesit kanë shprehur shqetësime për rritjen e çmimeve të ushqimeve dhe karburantit. Kjo rritje është ndikuar nga politikat e tarifave tregtare si dhe konflikti me Iranin, i cili e ngriti çmimin e naftës në nivele rekord gjatë muajve të fundit.

Donald Trump zhvilloi një seri tubimesh në ditët e fundit të fushates për të mobilizuar bazën e tij elektorale, duke u fokusuar edhe në shtete konservatore si Kansas dhe Iowa, ku garat janë bërë më të ngushta se sa pritej. Rezultatet e para pritet të rrjedhin gjatë orëve të vona të mbrëmjes, ndërsa numërimi përfundimtar në disa zona mund të zgjasë disa ditë. /The New York Times/