Numri i dëbimeve të emigrantëve në Shtetet e Bashkuara ka arritur në nivelin më të lartë që nga viti 2014, sipas një raporti të qeverisë amerikane të publikuar të enjten. Kjo si pjesë e një nxitje më të gjerë që po i bën këtij procesi Presidenti në largim Joe Biden, për të reduktuar imigracionin e paligjshëm.

Sipas raportit vjetor të Departamentit të Emigracionit dhe Doganave (ICE) rreth 271,000 emigrantë janë dëbuar në 192 vende në vitin fiskal 2024, i cili nis më 1 tetor të vitit 2023 dhe përfundon më 30 shtator 2024.

Sipas statistikave të qeverisë, kjo është shifra më e lartë e dëbimeve që kur Presidenti Biden mori detyrën në vitin 2021 dhe më e lartë se çdo vit i administratës së parë të Presidentit të zgjedhur Donald Trump, 2017-2021.

Presidenti demokrat Joe Biden, mori detyrën duke u zotuar të zhbënte politikat më kufizuese ndaj imigracionit të vendosura nga zoti Trump, por luftoi me nivele të larta të imigracionit të paligjshëm dhe gradualisht e ashpërsoi qasjen ndaj tij.

Republikani Donald Trump fitoi një mandat tjetër në Shtëpinë e Bardhë në nëntor duke premtuar se do të dëbonte një numër rekord emigrantësh të paligjshëm nga vendi, si pjesë e një goditjeje më të gjerë ndaj imigracionit.

Zëdhënësja e tranzicionit e zotit Trump, Karoline Leavitt, tha në një deklaratë se dëbimet e zotit Biden ishin të parëndësishme në krahasim me nivelet e larta të emigracionit të paligjshëm të shënuar gjatë presidencës së tij.

“Në ditën e parë, Presidenti Trump do të rregullojë makthin mbi emigracionin si dhe mbi sigurinë kombëtare që krijoi Joe Bideni, duke nisur operacionin më të madh të dëbimit masiv të kriminelëve të paligjshëm në historinë e Shteteve të Bashkuara”, tha ajo.

Rreth 11 milionë emigrantë nuk kishin status ligjor ose gëzonin mbrojtje të përkohshme në vitin 2022, sipas vlerësimeve të qeverisë dhe grupeve të ekspertëve, një shifër që disa analistë thonë se është 13 deri në 14 milionë.

Austria është duke rishikuar statusin e refugjatëve sirianë që kanë arritur në këtë shtet më pak se pesë vjet më parë, ka bërë të ditur kancelari Karl Nehammer të enjten, pas raportimeve në media se disa kanë pranuar letra se “nuk duhet t’i frikësohen persekutimit politik”.

Nehammer, konservator, i cili po tenton të formojë koalicionin e ri qeveritar, teksa është duke u kritikuar ashpër nga e djathta ekstreme, ka thënë qysh prej rënies së regjimit të Bashar al-Assadit, më 8 dhjetor, se duhet rivlerësuar situata e sigurisë në Siri, në aspektin nëse duhet lejuar dëbimet atje.

Që nga ai moment ai dhe qeveria e tij e përkohshme kanë sqaruar se fokusi fillestar do të jetë në dëbimet vullnetare dhe që atyre që dëshirojnë të kthehen në shtëpi vullnetarisht, do t’iu ndahen 1.000 euro.

Austria është në mesin e dhjetëra shteteve evropiane që kanë pezulluar kërkesat e sirianëve për azil.

“Austria është duke rishikuar përshtatshmërinë për mbrojtje të sirianëve që kanë qenë në shtet më pak se pesë vjet”, ka thënë Nehammer përmes një postimi në X – platformë e njohur më parë si Twitter.

Ligji austriak u mundëson autoriteteve që të revokojnë statusin e refugjatit, në disa raste, brenda pesë vjetëve të miratimit.

Sirianët përbëjnë grupin më të madh të azilkërkuesve në Austri.

Asambleja e Përgjithshme e Kombeve të Bashkuara e miratoi një rezolutë të enjten mbrëma, e cila i kërkon Gjykatës Ndërkombëtare të Drejtësisë (GJND) ta japë një opinion ligjor për detyrimet humanitare të Izraelit në Rripin e Gazës.

Rezoluta, e thirrur nga Norvegjia, i mori 137 vota pro, 12 kundër dhe 22 abstenime.

“Është e papranueshme që Izraeli ta bllokojë ndihmën humanitare për palestinezët që jetojnë nën okupim”, tha kryeministri i Norvegjisë, Jonas Gahr Store.

Duke e penguar ndihmën e nevojshme, Izraeli po “e minon paqen dhe stabilitetin në Lindjen e Mesme”, shtoi ministri i Jashtëm i Norvegjisë, Espen Barth Eide.

“Asnjë vend nuk është mbi ligjin. Izraeli nuk ka të drejtë t’i përjashtojë organizatat e OKB-së nga territori palestinez që është duke e okupuar jashtëligjshëm”, tha Edie.

Kërkesa për opinion ligjor do t’i dorëzohet tani Gjykatën Ndërkombëtare të Drejtësisë në Hagë.

Rezolutat e OKB-së nuk janë ligjërisht të detyrueshme, por ato pasqyrojnë qëndrim ndërkombëtar.

Gaza është rrënuar si pasojë e luftës tokësore dhe ajrore të Izraelit gjatë një viti, e cila, sipas Izraelit, ka për qëllim çrrënjosjen e militantëve të Hamasit.

Hamasi është i shpallur organizatë terroriste nga Shtetet e Bashkuara dhe Bashkimi Evropian.

Në tetor, Parlamenti i Izraelit ia ndaloi veprimtarinë agjencisë së OKB-së për refugjatët palestinezët (UNRWA), duke thënë se disa punonjës të UNRWA-s kishin lidhje me Hamasin.

Lufta në Gazë filloi kur militantët e Hamasit e sulmuan Izraelin jugor më 7 tetor 2023, ku i vranë rreth 1.200 njerëz, kryesisht civilë, dhe i rrëmbyen afër 250 të tjerë.

Prej atëherë, lufta hakmarrëse e Izraelit në Gazë i ka lënë të vdekur mbi 45.000 palestinezë, shumica e të cilëve gra dhe fëmijë, sipas Ministrisë së Shëndetësisë në Gazë.

Ushtria izraelite ka thënë se i ka vrarë mbi 17.000 militantë, pa dhënë dëshmi për këtë./REL/

Mëngjesin e së premtes, më 20 dhjetor 2024, Rusia kreu një sulm të madh me raketa në kryeqytetin e Ukrainës, Kiev, dhe në rajonin jugor të Hersonit, duke shkaktuar të paktën dy viktima dhe disa të plagosur. Sirena ajrore u aktivizuan në të gjithë Ukrainën për disa orë, duke paralajmëruar popullsinë për rrezikun e sulmeve ajrore.

Në Kiev, Rusia hodhi tetë raketa, përfshirë raketa hipersonike Kinzhal dhe raketa balistike Iskander/KN-23. Kryetari i administratës ushtarake të Kievit, Serhiy Popko, raportoi se një person u vra në qarkun Holosiv të qytetit, ndërsa disa shpërthime u dëgjuan në zona të ndryshme të kryeqytetit. Kryetari i Kievit, Vitaliy Klitschko, konfirmoi se dy persona u plagosën si pasojë e sulmeve në katër pjesë të tjera të qytetit.

Në Herson, një burrë 60-vjeçar humbi jetën nga një sulm rus, ndërsa dy persona të tjerë u plagosën, sipas autoriteteve rajonale. Qytetet ukrainase po përballen me sulme të vazhdueshme me raketa dhe dronë, ndërsa forcat ukrainase po hasin vështirësi në frenimin e përparimit të ushtrisë ruse në lindje të vendit.

Këto sulme vijnë një ditë pas fjalimit të Presidentit rus, Vladimir Putin, i cili sfidoi Shtetet e Bashkuara në një “duel” të raketave hipersonike, duke deklaruar se Rusia është e gatshme të  Situata mbetet e tensionuar, me sulme të përsëritura që synojnë infrastrukturën kritike dhe civilët, duke rritur shqetësimet për përshkallëzimin e mëtejshëm të konfliktit në rajon./UBTNews/