Një prej emrave më të mëdhenj të sportit kosovar, Distria Krasniqi, ka shënuar një tjetër sukses të rëndësishëm në rrugëtimin e saj profesional, kësaj radhe në aspektin akademik. Kampionja olimpike është diplomuar në Fakultetin e Shkencave të Sportit dhe të Lëvizjes në UBT, duke dëshmuar se përkushtimi dhe disiplina e saj shtrihen përtej arenës sportive.

Screenshot

Nën mentorimin e Dekanit të Fakultetit të Shkencave të Sportit dhe të Lëvizjes, Agron Thaqi, Distria përfundoi me sukses studimet Bachelor në programin Shkencat e Sportit dhe të Lëvizjes, duke dëshmuar edhe një herë se suksesi në sportin elitar mund të shoqërohet me arritje të larta akademike.

Ky sukses pasqyron filozofinë e UBT-së për ndërtimin e profesionistëve të kompletuar, ku talenti, disiplina dhe edukimi bashkohen në një rrugëtim drejt ekselencës.

Programi Shkencat e Sportit dhe të Lëvizjes në UBT u ofron studentëve njohuri të avancuara në fushën e performancës sportive, aktivitetit fizik, menaxhimit sportiv dhe shkencave të lëvizjes, duke krijuar mundësi të shumta për zhvillim profesional në industrinë moderne të sportit dhe shëndetit.

Përveç medaljeve olimpike, titujve evropianë dhe sukseseve ndërkombëtare që kanë ngritur lart emrin e Kosovës në arenën botërore, Distria tashmë vjen edhe si model i përkushtimit ndaj edukimit universitar.

Nga UBT u vlerësua se historia e saj mbetet frymëzim për studentët, sportistët dhe të rinjtë, duke dëshmuar se përkushtimi ndaj dijes dhe sportit mund të sjellë rezultate të jashtëzakonshme në çdo fushë. 

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

(Përmasa shkatërruese të luftës në fshatrat e Klinës)

23 maj 1993

Edhe sot gjendje e tensionuar në Gllogovc

Pas incidentit të parmbrëmshëm në Gllogovc, në këtë qytezë dhe fshatrat përreth gjendja ende është e tensionuar. Nëpër shumë vendkalime dhe rrugë patrullojnë policët serbë.

Sipas informatave të sotshme mbrëmë u liruan të gjithë të arrestuarit, përveç dy vetave.

Anëtarët e Kryesisë së Degës së LDK-së në Gllogovc vizituan fshatrat që i bastisi dhe i keqtrajtoi policia serbe gjatë dy netëve të kaluara. Shumë persona janë të rrahur dhe të keqtrajtuar. Janë bërë edhe dëme të konsiderueshme nëpër shtëpitë e bastisura.

Gjendja më e vështirë ishte në fshatrat Çikatovë e Re, Shtrubullovë dhe Krajkovë, ku edhe u organizuan ekspeditat më të ashpëra të policisë serbe. Krahas dëmeve të shkaktuara gjatë bastisjes së shtëpive të shqiptarëve u bënë edhe plaçkitje të ndryshme posaçërisht mjeteve devizore.

Gjatë natës së kaluar policia mjaft ashpër sillej ndaj udhëtarëve të cilët kalonin në rrugën Prishtinë-Pejë, pasi kishin një posbllok në Komoran.

Sipas informatave më të reja në stacionin e policisë në Gllogovc që nga parmbrëmë u arrestuan mbi 100 shqiptarë, mbi 100 të tjerë u rrahën, nga të cilët 14 morën lëndime trupore dhe kërkuan ndihmën mjekësore. Ndër të rrahur ishin edhe dy gra dhe dy fëmijë nën moshën 14 vjeçare. Ndër të arrestuarit kishte edhe fëmijë, gra dhe pleq.

Përkundër dhunës së madhe, ndër qytetarët e komunës së Gllogovcit nuk ka pasur panik. Policia serbe përkundër provokimeve të shumta nuk arriti që të nxisë veprime të cilat do të çonin në ashpërsimin e mëtejmë të gjendjes.

Dy të vrarë dhe pesë policë serbë të plagosur

Siç është bërë e ditur parmbrëmë rreth orës 23 në Gllogovc ka pasur të shtëna nga armët. Ndërkohë, janë vërejtur disa autoambulanca, të cilat kanë udhëtuar nga Gllogovci për në Prishtinë. Pas të shtënave të shumta, të cilat qytetarët i dëgjuan thuaja në qendër të Gllogovcit, në këtë qytezë arritën forca të mëdha të policisë që bllokuan hyrjet-daljet e Gllogovcit dhe filluan keqtrajtimet e qytetarëve.

Gllogovci dje ishte nënshtuar një represioni të madh të policisë serbe, si hakmarrje për gjoja vrasjen e dy dhe plagosjen e pesë policëve serbë, siç thonë burimet serbe, që u bë nga një pusi në periferi të Gllogovcit.

Incidenti i cili ndodhi në rrethana ende të pandriçuara, u mor si pretekst nga policia serbe për të terrorizuar Gllogovcin dhe fshatrat përreth.

Dje në drejtim të Gllogovcit shkuan edhe njësi të ushtrisë serbe, të cilat u stacionuan në fshatrat përreth e veçanërisht afër fshatit Shtrubullovë.

Po ashtu dje në Skënderaj u bënë kontrollime të mëdha të qytetarëve nga policët serbë, të cilët ishin vendosur në të gjitha hyrjet-daljet e kësaj qyteze.

Burimet nga Gllogovci theksojnë se disa nga qytetarët, të cilët ishin marrë në stacionin e policisë në Gllogovc u rrahën rëndë. Ndërkohë atyre po iu jipet ndihma shëndetësore.

Ndërkohë po tubohen fakte për represionin dhe pasojat e dhunës së djeshme në komunë e Gllogovcit.

23 maj 1994

Represioni në Kosovë

Podujevë: – Më 18 maj, policia serbe bastisi shtëpinë e Sylejman Latifit, anëtar i Kryesisë së Nëndegës së LDK-së në Pollatë të Podujevës. Sylejman Latifit iu la thirrja që të paraqitet në stacionin e policisë në Podujevë.

Më 19 maj, Xhafer Hoti, kryetar i Aktivit të LDK-së në Bradash të Podujevës u paraqit sipas thirrjes në stacionin e policisë në Podujevë, me ç’rast u mbajt rreth dy orë dhe është rrahur brutalisht.

Më 20 maj, nën pretekst të kërkimit të armëve, policia bastisi shtëpinë e Muhamet Latifit, kryetar i Nëndegës së LDK-së në Pollatë. Muhamet Latifit iu la thirrja që të paraqitet sot në stacionin e policisë në Podujevë.

Më 19 maj, policia nën pretekst të kërkimit të armëve bastisi shtëpinë e Ismet Hysenit, anëtar i Kryesisë së Nëndegës së LDK-së në Gllamnik.

Po këtë ditë në fshatin Konushevc, policia bastisi shtëpinë e Zeqir Berishës, i cili nuk gjendej në shtëpi.

Më 19 maj, policia bastisi shtëpinë e Abdullah Muçollit në Hërticë. Gjatë bastisjes, policia gjeti një pushkë dhe një revole.

Mitrovicë: – Më 19 maj rreth orës 7 të mëngjesit, policia nën pretekst të kërkimit të armëve, bastisi shtëpinë e Ramadan Selimit në Mitrovicë, tek i cili u gjet një revole. Policia pas bastisjes, mori me vete djalin e Ramadanit, Ismail Selimin, i cili u mbajt në polici deri rreth orës 14.

Më 20 maj, rreth orës 8 të mëngjesit, policia ishte në fshatin Shipol stë Mitrovicës dhe kërkoi Behram, Lah dhe Nezir Miftarin. Meqë personat e lartëshënuar nuk gjendeshin në shtëpi, policia ua la thirrjet që të paraqiten nesër dhe pasnesër në stacionin e policisë në Stantërg.

Skënderaj: – Sot rreth orës 4 të mëngjesit, një ekspeditë e policisë, nën pretekst të kërkimit të armëve, bastisi shtëpinë e Zenun Rexhepit në Izbicë të Skënderajt. Pas bastisjes, policia mori me vete djalin e Rexhepit, Enver Rexhepin, i cili ende po mbahet në arrest.

Gjithashtu sot, forca të mëdha të policisë serbe me autoblinda dhe mjete të tjera bllokun të gjitha hyrje-daljet në Skënderaj dhe po i legjitimojnë qytetarët.

Istog: – Më 19 maj, policia mori në pyetje Ejup Kamberajn, kryetar i Degës së KMDLNJ në Istog. Ai u lirua me kusht që të lajmërohet sërish në stacionin e policisë në Istog.

Vushtrri: – Më 21 maj, policia nën pretekst të kërkimit të armëve, bastisi shtëpinë e Lutfi Shutit në Oshlan të Vushtrrisë. Pas bastisjes, policia mori me vet Lutfiun, i cili në stacionin e policisë në Vushtri u rrah brutalisht. Lutfi Shuti u lirua me kusht që të paraqitet sërish më 22 maj.

Po këtë ditë, e njëjta ekspeditë e policisë, në fshatin Oshlan bastisi edhe shtëpinë e Ali Shutit, tek i cili gjet një revole, si dhe iu la ftesa që të paraqitet më 23 maj në stacionin e policisë në Vushtrri.

Më 19 maj, rreth orës 9 të mëngjesit, policia nën pretekst të kërkimit të armëve, bastisi shtëpitë e Fadil, Nazmi, Abdullah dhe Mustafë Maxhunit në fshatin Maxhunaj të Vushtrrisë. Policia gjatë bastisjes keqtrajtoi fizikisht Fadil, Fikret dhe Mustafë Maxhunin, të cilët nga rrahjet morën lëndime trupore.

Gjilan: -Më 21 maj rreth orës 14, policia arrestoi Abdyl Hasanin, kryetar i Nëndegës së LDK-së në Cërnicë të Gjilanit. Bëhet me dije se Abdyl Hasani ende po mbahet në arrest.

Malishevë: – Më 19 maj rreth orës 14, policia nën pretekst të kërkimit të armëve, bastisi shtëpitë e vëllezërve Ali, Izahir, dhe Shaqir Paçarizit në Dragobil të Malishevës.

Prishtinë: – Pardje, policia bastisi shtëpinë e Haki Abazit në lagjen Kodra e Trimave në Prishtinë. Bëhet me dije se policia shtëpinë e Haki Abazit e bastisi për herë të tretë, ndërsa shkaku i bastisjes ende nuk dihet.

Suharekë: – Më 19 maj rreth orës 9 të mëngjesit, policia nën pretekst të kërkimit të armëve bastisi shtëpitë e Azem, Vesel dhe Rrahim Kadriajt në Krushicë të Epërme të Suharekës. Pas bastisjes, policia mori me vete Azem e Vesel Kadriajn, të cilët u mbajtën disa orë në polici.

Klinë: – Më 19 maj, policia nën pretekst të kërkimit të armëve thirri për t’u lajmëruar në stacionin e policisë në Klinë, gjashtë anëtarë të Aktivit të LDK-së në Jagodë të Klinës: Zef e Gjon Saliçunin, Ndue e Pashk Mirditën, Anton Lleshin (17), i cili u ftua katër herë në polici), Mark Berishën dhe Mikel Lleshin, i cili punon përkohësisht në Zvicër.

23 maj 1995

Serbia harxhoi 13 milionë dollarë për destabilizimin e Shqipërisë

Gazeta serbe “Nasha Borba” citonte dje gazetën shqiptare “Dita”, e cila kishte shkruar ditë më parë se shërbimet sekrete të Jugosllavisë së vetëshpallur kanë shpenzuar 13 milionë dollarë për destabilizimin e Republikës së Shqipërisë.

Ky informacion publikohej në kontekst të njoftimeve serbe për një shpërthim në shtëpinë e kryetarit të shoqatës së ashtuquajtur serbo-malazeze në Shqipëri.

Javëve të fundit Beogradi është përpjekur të krijoj problemin e paqenë të gjoja pakicës sllave në Republikën e Shqipërisë.

Bastisje në Prishtinë dhe Vushtrri

 Prishtinë: – Mbrëmë, rreth orës 22, policia ndali në rrugë dhe rrahu plakun Asllan Hasimi (1934) nga Prishtina.

Sipas njoftimit që e dha djali i tij, Florimi, Asllan Hasimi është rrahur rëndë nga dy policë dhe për shkak të lëndimeve të rënda që ka pësuar është detyruar të kërkojë ndihmë mjekësore.

Vushtrri: – Më 19 maj, me pretekst të kërkimit të armëve, policia ishte në shtëpinë e Lutfi Manit nga Vushtrria, ndërsa në familjen e Fetah Ramës kërkuan vëllaun e tij, i cili para katër vjetësh është larguar nga vendi.

Më 20 maj, një patrullë e policisë, po me pretekst të armës, ishte në shtëpinë e Nebih Jonuzit në fshatin Pasomë.

Policët armë kërkuan edhe nga Latif, Sejdi, Izet e Arif Vatovci, njofton Komisioni për Informim i Degës së LDK-së në Vushtrri.

23 maj 1997

Dhuna e përditshme në Kosovë

Prishtinë, 23 maj (QIK)

Viti: – Më 19 maj, një patrullë e policisë serbe, me pretekst të kërkimit të armëve ishte në shtëpinë e Jonuz Ahmetit në Drobesh.

Njoftohet se z. Ahmeti u dërgua në stacionin e policisë serbe në Viti dhe u mbajt disa orë. Meqë Jonuzi nuk pranojë se ka armë, policia serbe me të njëjtin pretekst mori edhe djalin e tij Rrahim Ahmetin (17), të cilin e keqtrajtuan rëndë. Jonuz Ahmeti u lirua me kusht që të dorëzojë armën.

Malishevë: – Këto ditë, policia serbe ia la thirrjen Alush O. Krasniqit, drejtor i shkollës fillore “Bajram Curri” në Drenoc të Malishevës, që të paraqitet në stacionin e policisë serbe në Pejë.

Shkaku i thirrjes në polici të Alush Krasniqit nuk dihet.

Këto ditë, në stacionin e policisë serbe në Rahovec dhe në Prizren u morën në pyetje vëllezërit Tahir, Brahim e Qerim Berisha nga Gurbardhi.

Dëbohen shqiptarët – punësohen kolonët

Që nga vendosja e masave të dhunshme në vitin 1992, nga Shtëpia e Shëndetit në Lipjan janë larguar nga puna 16 punëtorë shqiptarë. Kohët e fundit nga ky institucion u përjashtua edhe Isuf Marevci, pneumoftiziolog i vetëm në këtë trevë, njofton KI i Degës së LDK-së në Lipjan.

Punëtorët shqiptarë të larguar nga puna janë zëvendësuar me individë pa përgatitje të duhur profesionale, kryesisht serb të ikur nga Kroacia dhe Bosnja, të cilët jo vetëm që punojnë në këtë institucion por edhe kanë adaptuar një kat të Shtëpisë së Shëndetit dhe banojnë në të.

23 maj 1998

Përmasa shkatërruese të sulmit të djeshëm serb në fshatrat e Klinës

Prishtinë, 23 maj (QIK)

Shumë shtëpi të rrënuara, të demoluara e të plaçkitura, dy persona të zhdukur dhe mijëra të tjerë të ikur nga shtëpitë e tyre, paraqesin pamjen e sulmit të djeshëm serb mbi fshatrat Grabanicë, Dellovë e Zajm të Klinës.

KI i Degës së LDK-së në Klinë njofton se tash për tash nuk ka informacione për të plagosur a viktima eventuale, përveç faktit se nuk dihet për fatin e Brahim Ukajt (75) dhe të Bajram Kastratit.

I njëjti burim bën me dije se në Zajm u dogjën shtëpitë e Haxhi, Abdyl e Miftar Dragidellës, shtëpia e Haki Veselajt, e Rrustem Salihajt, si dhe një shtallë e Sali Dragidellës.

Po në këtë fshat është demoluara tërësisht shtëpia e Beqir Dragidellës, si dhe janë dëmtuar shumë shtëpi të tjera.

Gjatë gjithë kohës sa zgjati sulmi, fshati ishte në shënjestër të snajperistëve të shumtë, të cilët shinin në çdo gjë që lëvizte.

Banorët e Zajmit, përmes plumbave dhe në kohë me shi, arritën të largohen nga shtëpitë e tyre dhe u strehuan në Klinë.

Njoftohet se sot një numër i banorëve të Zajmit kanë filluar të kthehen në fshat.

Gjendje e rëndë ishte gjatë ditës së djeshme edhe në Grabanicë. Në lagjen e Mullirit të këtin fshati, forcat serbe dogjën së paku 8 shtëpi. Dëmtime të rënda ka edhe në shumë shtëpi të tjera të këtij fshati.

Thuhet se shumë shtëpi janë djegur edhe në Dellovë.

Por, për përmasat e sulmit në Grabanicë e Dellovë tash për tash nuk mund të dihet, pasi këto dy fshatra ende vazhdojnë të mbahen të kontrolluara e të rrethuara nga forcat serbe.

Policia konfiskoi 35 tonë ndihma

23 maj 1998

 Forcat serbe dhe civilët po u vënë zjarrin shtëpive të shqiptarëve në Dollovë e në Zajm

Sot prej orës 12:00 policia me fshatarët serbë po u vejnë zjarrin shtëpive të shqiptarëve në fshatin Zajm e Dollovë.

Dollova po digjet flakë! – i tha QIK-ut një dëshmitar që po vështronte fshatin nga një distancë 1 km.

Nga Klina mirret vesh se forcat policore ushtarake po qëndrojnë në mes fshatit Këpuz e Dollovë. Pjesëtarë të forcave serbe po qëndrojnë aty të gatshëm për sulm me autoblinda, kamion me top, tre kombi dhe shumë picgauerë.

Forcat serbe granatuan Gexhën e Malësinë e Vogël të Rahovecit

Sot në orët e para të mëngjesit, në anën e fshatrave të Anëdrinit, Gexhë e Malësi e Vogël ka pasur granatime dhe shpërthime të fuqishme, njofton KI i Degës së LDK-së në Gjakovë.

Granatimet kanë zgjatur disa orë por për pasojat e tyre nuk dihet.

 Klinë: Fshati Grabanicë i përngjan gërmadhave të Vukovarit

Pasojat e sulmeve të djeshme (më 22 maj) barbare të makinerisë ushtarako-policore serbe në disa fshatra të komunës së Klinës janë tepër të rënda. Njësitë speciale dhe civilë të armatosur serbë, në fshatin Zajm, që është vetëm tri kilometa larg nga qyteti i Klinës, ia vunë zjarrin dhe dogjën shtëpitë e Haxhi Dragidellës, Avdyl Dragidellës, Miftar Dragidellës, Haki Veselajt, shtallën e Sali Dragidellës si dhe demoluan totalisht shtëpinë e Beqir Dragidellës.

Banorët e fshatit Zajm gjatë ditës së djeshme, që nga ora 12 e gjer në orën 15, u gjendën nën dhunën e terrorin e vërtetë.

I tërë fshati mbahej në shënjestër të snajperistëve dhe shtihej në çdo gjë që lëvizte. Përkundër gjendjes dramatike, nëpër breshëri plumbash, popullata doli nga shtëpitë e veta, kush si diti e mundi për t’u strehuar në qytetin e Klinës.

Në Zajm nuk dihet për fatin e plakut 75-vjeçar Brahim Ukaj dhe të Bajram Kastratit.

Po ashtu edhe Grabanica, Dellova, Bokshiqi, Kpuzi e Qeskova qe disa ditë rresht gejnden nën sulmet e granatimet e parreshtura nga artileria serbe. Pas sulmeve fillon dhe djegia ose demolimimi i shtëpive. Në njoftimet e Komisionit për Infiormim të Degës së LDK-së në Klinë thuhet se në bazë të informatave të pakta, por të sigurta gjer më tani dihet që në Grabanicë, përveç vrasjes së Isuf Rexhë Morinës dhe plagosjes së katër të tjerëve, u dogjën 8 – 9 shtëpi të Krasniqëve në lagjen e mullirit. U dogj shtëpia e Rrustem Salihajt, depoja e Ramë Sejdiut, u thyen dhe u plaçkitën shitorja e Rexhë Sejdiut dhe ajo e Demë Sejdiut. U demoluan dhe u plaçkitën shtëpitë e Ukë Sahitit, Ramë Sejdiut. Në lagjen Sejdijaj, sidomos në shtëpinë e Enver Sejdiut dhe Hajdin Sejdiut tani janë vendosur forcat ushtarako-policore me tërë arsenalin e armatimit të rëndë e të lehtë. Policia është vendosur edhe në shtëpi tjera të boshatisura të shqiptarëve. Në Grabanicë është granatuar edhe shkolla fillore “Azem Bejta” dhe shumë shtëpi të tjera.

Nga dëshmitarë okularë ka njoftime se qendra e fshatit Grabanicë i përngjan gërmadhave të Vukovarit.

Po ashtu në fshatin Dellovë pothuaj se nuk ka shtëpi shqiptare që nuk është përfshirë nga flaka.

Njoftohet se dje, në fshatin Bokshiq, nga granatimet e ushtrisë jugosllave është vrarë Haxhi Sut Fazlija (62-vjeçar) nga Bokshiqi e mund të ketë edhe shumë të tjerë të vrarë apo të plagosur, por tash për tash vështirë të konfiromohet kjo.

Në tërë këtë zonë ka njoftime se djegiet e shtëpive dhe demolimet e tyre po vazhdojnë edhe sot dhe kjo si duket nuk ka të ndalur.

Këto fshatrat janë plotësisht të bllokuarasepse forcag serbe nuk lejojnë që të hyjë askush në ato zona, prandaj nuk dihet për pasojat dhe viktimat eventuale. Nuk dihet as ç’është bërë me të vrarin e para dy ditëve në Grabanicë, as për fatin e katër të plagosurve.

Sot rreth orës 0,30 është gjuajtur me breshëri armësh automatike shtëpia e Selim Rugovës dhe Brahim e Selim Dallaverit nga fshati Shtupel.

 Dy të vrarë në Zajm

Pleqt Brahim Ukaj e Bajram Kastrati janë gjetur sot të vrarë në shtëpitë e veta në fshatin Zajm të komunës së Klinës. Të dy pleqt konsideroheshin të humbur prej ditës së djeshme kur kishte filluar një sulm masiv i forcave serbe. Mirëpo ata u gjetën sot të varrë e të masakruar në shtëpitë e veta.

Këtë lajm ia dha Komisionit për Informim të Degës së LDK-së në Klinë një dëshmitar nga fshati Zajm. Ai kishte thënë se trupat e dy pleqve ishin masakruar.

Fshati Zajm bashk me fshatrat Grabanicë, Dollovë e Bokshiq kanë qenë në shënjestër të sulmeve të forcave serbe në ditët e fundit.

UBT mirëpriti në Parkun Shkencor, Inovativ dhe Teknologjik arkitektin e njohur austriak Prof. Dipl.-Ing. Architect, Heinz Neumann, një nga emrat e njohur ndërkombëtarë në fushën e arkitekturës, urbanizmit dhe dizajnit bashkëkohor, i cili mbajti ligjëratën tematike “Competitions, Building Constructions and Design” për studentët, stafin akademik dhe profesionistët e fushës.

Në kuadër të këtij aktiviteti, Rektori i UBT-së, Prof. Dr. Edmond Hajrizi, ndau një mirënjohje për Heinz Neumann, në shenjë vlerësimi për kontributin e tij profesional në arkitekturë, dizajn dhe zhvillim urban, si dhe për ndikimin e tij në zhvillimin e arkitekturës bashkëkohore dhe edukimin e gjeneratave të reja.

Në motivacionin e mirënjohjes u theksua ekspertiza profesionale, lidershipi vizionar dhe përkushtimi i vazhdueshëm i Neumann në zhvillimin e projekteve moderne arkitektonike dhe urbane në nivel ndërkombëtar.

Rektori Hajrizi vlerësoi praninë e arkitektit austriak në UBT, duke theksuar se figura të tilla përfaqësojnë një inspirim të rëndësishëm për studentët dhe komunitetin akademik.

“Është një moment i veçantë për UBT-në që të kemi mes nesh një personalitet si Heinz Neumann, me një karrierë të jashtëzakonshme në arkitekturën dhe dizajnin bashkëkohor. Kontributi i tij në projekte të shumta ndërkombëtare dhe ndikimi në zhvillimin urban modern janë një vlerë e madhe për studentët tanë dhe për gjithë komunitetin profesional”, u shpreh Rektori Hajrizi.

Gjatë ligjëratës, Heinz Neumann ndau me pjesëmarrësit përvoja nga projektet e tij ndërkombëtare, duke trajtuar tema që lidhen me konkurset arkitektonike, ndërtimin modern, dizajnin inovativ dhe sfidat bashkëkohore të urbanizmit.

Ai ndau gjithashtu përvoja nga angazhimet e tij në projektet e banimit social dhe dizajnit të interierit, duke diskutuar me studentët mbi rëndësinë e arkitekturës funksionale dhe ndikimin e dizajnit në jetën urbane bashkëkohore.

Ky aktivitet krijoi një hapësirë të rëndësishme dialogu profesional dhe akademik ndërmjet studentëve, arkitektëve dhe ekspertëve ndërkombëtarë, duke fuqizuar më tej dimensionin ndërkombëtar dhe inovativ të UBT-së.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 (Foto: Prishtina e viteve nëntëdhjetë)

 22 maj 1993

 Fatmir Makolli kampion evropian në full-kontakt

Dje, në Tetovë u organizua një turne evropian i kategorisë së parë në full-kontakt. Fatmir Makolli, sportist nga Kosova, i cili para do kohësh fitoi titullin e kampionit të Evropës në këtë sport në turneun e mbajtur në Varne të Bullgarisë, dje e mbrojti këtë titull në kategorinë deri në 71 kg. Fatmir Makolli u ndesh me Andria Dimitrovin, sportist nga Bullgaria. Pas një lufte të fortë, Fatmir Makolli fitoi këtë duel duke e nokautuar kundërshtarin në rundin e pestë. Dueli duhej të zgjaste shtatë runde. Ndërkaq, Fatmir Sopi, në kategorinë deri në 60 kg., fitoi titullin e kampionit ballkanik në rundin e pestë në ndeshjen që pati me Petrov Petrovin.

Krahas këtyre dueleve, në turnirin e djeshëm në Tetovë u mbajtën edhe disa takime përcjellëse. Fidair Berisha pësoi humbje nga Geogir Haçkovi, kurse Bashkim Berisha nga Mirosllav Georgievi. Esat Grajçevci (amator) mundi Dejan Dimitrovin.

Duelet i përcolli një numër i madh shikuesish.

 22 maj 1995

 Dhuna e përditshme në Kosovë

 Kaçanik: – Pas bastisjeve dhe arrestimeve që ndodhën në fshatin Dobravë të Kaçanikut në orët e hershme të mëngjesit më 15 maj, të njëjtën ditë rreth mesditës në Prishtinë, policia arrestoi Sami H. Vishin nga fshati Dubravë, i cili gjendet në studime. Polica arrestoi edhe Nijazi B. Vishin nga i njëjti fshat, i cili po ashtu është student në Prishtinë. Ai pasi u mor në pyetje njoftohet se është keqtrajtuar brutalisht dhe është urdhëruar që të paraqitet të nesërmen në stacionin e policisë në Ferizaj. Të nesërmen Samiu i shoqëruar me 6 policë serbë arriti në fshatin e tij në Dubravë me ç’rast iu bastis shtëpia. Sami Vishit, policia pas bastisjes ia mori pasaportën, si dhe vazhdon ta mbajë në arrest.

Më 18 maj, policia bastisi shtëpinë e Mustaf Malësiut në fshatin Dubravë të Kaçanikut. Shtëpia e tij u bastis me pretetekst të kërkimit të armëve, ndërsa policia pas bastisjes mori me vete djalin e tij Veli Malësiun, i cili u dërgua në stacionin e policisë në Ferizaj dhe u keqtrajtua rëndë.

Më 20 maj, gjashtë policë serbë bastisën shtëpinë e Hamit Vishit në fshatin Dubravë, i cili tash një kohë gjendet në botën e jashtme. Në mugesë të tij policia mori Asllan Vishin, vëllain e Hamitit, të cilit po ashtu iu bastis shtëpia. Pas bastisjes, policia mori një makinë shkrimi dhe një kompjutor me disa disketa.

Malishevë: – Edhe më tej në shënjestër të policisë serbe janë fshatrat Mirushë, Gurbardh, Damanek e Çupevë të Malishevës, njofton Komisioni për Informim i Degës së LDK-së në Malishevë.

Të premten pasdite, pas përfundimit të mbledhjes së Kryesisë së Degës së LDK-së në Malishevë, derisa po ecnin rrugës, kuislingu Shukri Krasniqi nga Ostrozubi dhe një person tjetër i paidentifikuar me veturën e markës “Askona”, tentoi t’i shkelë Hysni Kilajn, kryetar, Cen Deskun, nënkryetar, Sokol Kryeziun, anëtar i Kryesisë së Degës së LDK-së në Malishevë dhe Isuf Bytyçin, kryetar i KI të Degës së LDK-së në Malishevë.

Podujevë: – Më 19 maj, me arsyetimin se nuk është marrë leja përkatëse, policët ndërprenë një turnir në futboll të vogël në fshatin Gllamnik.

Suharekë: – Më 19 maj, me pretekst të kërkimit të një revoleje, u mor në pyetje dhe u rrah dy herë brenda ditës Sherif Veli Muharremaj (38).

Po këtë ditë u mor në polici dhe u rrah Xhelal Muharremaj (26). Prej tij kërkohej një pushkë gjuetie.

Më 20 maj, në bazë të thirrjes, u paraqit në polici Nuhi Asllanaj (61). Ai e dorëzoi vërtetimin se kishte dorëzuar një pushkë të gjuetisë dhe një revole. Duke kërkuar edhe armë të tjera prej tij, Nuhiu u rrah nga policia.

Ndërsa dje në polici u paraqit edhe djali i Nuhiut, Brahimi, i cili u keqtrajtua me pretekst se babai i tij nuk i ka dorëzuar armët e kërkuara prej tij.

Më 20 maj u mor në polici Milaim Sallahaj nga Gjinoci. Ai u mbajt në stacion tërë ditën. Prej tij është kërkuar të paraqitet sërish në polici.

21 maj 1997

Të akuzuarit në procesin e montuar mohuan aktakuzën

Procesi gjyqësor kundër njëzet shqitparëve, gjashtë të parët prej të cilëve akuzohen edhe për “terrorizëm”, vazhdoi edhe dje në gjykatën e instaluar serbe të qarkut në Prishtinë. Dje, para trupit gjykues të të treve, kryeson Dragolub Zdravkoviq, u morën në pyetje edhe nëntë të akuzuar të tjerë, kështu që përfundoi marrja në pyetje e “grupit” të parë që përfshihen sipas aktakuzës së parë të prokurorit Jovica Jovanoviq. Sot do të merren në pyetje edhe dy të akuzuarit e tjerë, Arsim e Beton Ratkoceri, të cilët përfshihen në aktakuzë të veçantë, aktakuzë kjo, siç dihet, që u bashkua, u “shkri” me të parën.

Gjatë seancës së djeshme, të dytës me radhë u morën në pyetje Hajzer Bejtullahu, Enver Dugolli, Emin Sallahu, Shukrie Rexha, Naser Tahiri, Dulah Sallahu, Ragip Berisha, Burhan Hasani dhe Majlinda Sinani.

Po kështu edhe dje ndërtesa ku po u bëhet gjyq këtyre të akuzuarve ishte e bllokuar nga masat e jashtëzakonshme të sigurisë policore. Përreth kësaj “shtëpie të drejtësisë” binin në sy shiritat me etiketën “stop-milicia”. Në çastin kur përfundoi marrja në pyetje e të akuzuarve, kur ata duarlidhur e lëshuan gjykatoren, ngjau një “incident”. Ata që bënin sigurimin brenda në sallë të gjykimit disa minuta i lanë brenda gazetarët, nuk i lejuan ata që të dalin menjëherë edhe pse doli trupi gjykues. Bile, njëri nga ta reagoi për këtë sjellje të pamirë.

Jashtë ndërtesës së kësaj gjykate pritnin shumë anëtarë të familjeve të të akuzaurve, të afërmit, por edhe shumë kurreshtarë që prisnin së paku t’i shohin të dashurit e tyre duarlidhur kur i hypën në një autobus me targë të milicisë për t’i transferuar në burg. Qytetarët e tubuar, nja 1. 000 sish, përshpërisnin se ç’dëshiron regjimi serb me këtë “spektakël”, të bëjë farë “efekti” për t’i treguar botës se ja këtu, në Prishtinë, po u bëka gjyq “terroristëve” shqiptarë.

Gjatë rrjedhës së këtij procesi askush nga të akuzuarit nuk tha se është marrë me këtë apo atë “akt terrorist”, siç bie fjala, ngarkohen gjashtë të parët, dy prej të cilëve, siç dihet, “gjenden në arrati”. Të gjithë të pandehurit i mohuan veprimet inkriminuese sipas neneve 136, 116 e 125 të ligjit penal të “federatës” serbe-malazeze. Askush nga ta nuk tha se i është gjetur ndonjë armë. Bile, që në fillim të seancës së djeshme, i akuzuari i parë Avni Klinaku reagoi zëshëm në shtypin e huaj, se si për këtë “grup” është shkruar se janë furnizuar me 55 mijë armë. Prej nga kjo gënjeshtër, a i përmbahen ata gazetarë kodit gazetar, përse orvaten ta mashtrojnë botën, ç’ju duhet të veprojnë kësisoj. Përkitazi me këtë gjykatësi Zdravkoviq tha: “Mos u bazoni në ato çka shkruan shtypi, por ç’thuhet në aktakuzë”.

Shumica e të akuzuarve edhe gjatë ditës së djeshme pohuan se inspektorët e të ashtuquajturit sigurim shtetëror serb ua kanë nxjerrë deklaratat me dhunë. Ndaj tyre, siç tha njëri nga të akuzuarit, Emin Sallahu, është përdorur edhe elektroshoku. Prandaj, thanë të akuzuarit, kemi qenë të detyruar ta akuzojmë vetveten, të bëjmë deklarata vetakuzuese, metodë kjo e njohur e atyre që i inskenojnë proceset policoro-gjyqësore, pavarësisht nga fakti se madje edhe vetë ligji serb i procedurës penale, ndalon përdorimin e dhunës apo kërcënimit për të nxjerrë deklaratë nga i pandehuri. Por, kjo shkelje “në flagrancë” e nenit 218 nuk ka rëndësi për ata që i bënë hetimet, nuk ka rëndësi as për prokurorin Jovica Jovanoviq që i ngarkoi të pandehurit për veprën më të rëndë penale – “terrorizmin”.

Edhe dje në sallën e gjykimit ishte i pranishëm Nikollas Hill, sekretar i dytë i Ambasadës amerikane në Beograd, si dhe Yvonne Terlingen, komisare e lartë e OKB-së për mbrojtjen e të drejtave të njeriut, si dhe Ivanka Kostiq, përfaqësuese e Fondit për të drejtat humanitare në Beograd.

Për dallim nga dita e parë, kur thuaja të gjithë të akuzuarit refuzuan të përgjigjen në pyetjet e parashtruara, gjatë ditës së djeshme nnë pjesë e mirë e tyre pranoi të përgjigjen. I akuzuari Hajzer Bejtullahu tha se aktiviteti i tij ishte i përqendruar vetëm në shpërndarjen e disa numrave të revistës “Çlirimi”, se këtë revistë nuk e ka lexuar me përjashtim të numrit të dytë të saj. Për organizatën Lëvizja Kombëtare për Çlirimin e Kosovës ai thekson se ka qenë anëtar i saj prej periudhës së viteve 1993-1995, dhe se që atëherë i ka braktisur radhët e saj.

I akuzuari Enver Dugolli nuk pranoi të përgjigjet në pyetjet e trupit gjykues. Ndërkaq në fjalën e tij mbrojtëse ai theksoi se disa ditë rresht e torturuan në lokalet e sigurimit shtetëror vetëm e vetëm që t’i pranojë gjërat që me çdo kusht u duheshin skenaristëve. Ai përmendi se i qe ndaluar të komunikojë me avokatin përkitazi me veprën për të cilën ngarkohej dhe tha se roli i mbrojtësve në këtë proces sipas të gjitha gjasëve ishte vetëm një rol i pranisë formale të tyre. “Unë jam anëtar i Partisë Parlamentare dhe atë i Kryesisë së Degës në Gllogoc. Nuk kam qenë anëtar i LKÇK-ë. Unë vetëm ndava disa numra të revistës “Çlirimi”, dhe atë e bëra ngase e pashë se përmbajtja e saj nuk ishte aspak më e rrezikshme se përmbajtja e asaj që shkruanin gazetat e tjera.

Emin Sallahu theksoi se nuk dëshiron të paraqesë mbrojtjen për arsye se gjykata mori parasysh deklaratën e tij të dhënë para organeve të sigurimit shtetëror, dhe se deklaratat e dhëna para këtij organi dihet se ishin deklarata të dhunës, e cila ndaj tij është përdorur që nga momenti i parë i arrestimit. Ai përkujtoi se nga torturat pësoi dëmtime shëndetësore, se ndaj tij qe përdorur edhe shufra elektrike, dhe se përkundër kësaj, atij nuk i qe ofruar ndihma mjekësore.

Shukrie Rexha, ndërkaq, dha mbrojtjen dhe iu përgjigj pyetjeve të shumta. Ajo tha se ndaj saj u aplikua terror i paparë fizik e psikik, se edhe pas marrjes në pyetje tek gjyqtari hetues, ajo sërish u mor në pyetje nga punëtorët e sigurimit shtetëror, dhe atë tri herë rresht. Sa i përket aktakuzës, ajo përgënjeshtroi pjesët dërrmuese të saj. “Mohoj pjesën e cila thotë se jam anëtarësuar më 1994 dhe se jam anëtare e LKÇK-së. Unë isha vetëm bashkëpunëtore e redaksisë së “Çlirimit”, kurse bashkëpunimin me këtë revistë e fillova në mars të vitit 1996 e jo më 1993 si qëndron në aktakuzë. Nuk është e vërtetë se kam shkruar vazhdimisht dhe se kam marrë pjesë në përpunimin e konceptit të revistës. Unë kam shkruar gjithsej tre artikuj, prej të cilëve njëri mbante titullin “Të gjithë për liri”, tjetri “Ndërrim vitesh, vazhdimishtnë robëri”, ndërkaq titulli i të tretit nuk më kujtohet. Përndryshe jam anëtare e LDK-së, ku dy herë radhazi isha nënkryetare e Degës së parë në Prishtinë, kurse prej vitit 1994 jam edhe anëtare e këshillit të Përgjithshëm të LDK-së, tha ajo. Në vazhdim Shukrie Rexha iu përgjigj pyetjeve të shumta provokative. Me një rast ajo luti prokurorin Jovica Jovanoviq që të jetë më korrekt në pyetje dhe njoftoi trupin gjykues se “prokurori ishte po kaq i papërgjegjshëm dhe jokorrekt edhe gjatë dhënies së deklaratës së saj para gjyqtarit hetues”.

– Mbetem pranë asaj që kam pohuar në hetuesi, këmbënguli i akuzuari Naser Tahiri, i cili para gjykatëses hetuese Danica Marinkoviq ka pohuar se nuk ka marrë pjesë në mbledhjen e organizatës Lëvizja Kombëtare për Çlirimin e Kosovës.

Dulah Sallahu mohoi pjesën e parë të aktakuzës, e cila, siç tha ai, ka të bëjë me të. Unë, tha ai, jam anëtar i LDK-së që prej themelimit të saj, ndërsa prej vitit 1993 kryetar i nëndegës së kësaj partie politike në fshatin Orlloviq.

Nuk kam pranuar, vazhdoi ai, të bëhem anëtar i LKÇK-së. Ai shpjegoi se gjatë marrjes në pyetje para gjykatëses Danica Marinkoviq ishte i dërmuar nga plagët në kokë dhe fytyrë, të cilat ia shkaktuan në hetuesi.

– Nuk bëra atë që më mvishet në aktakuzë. Jam i pafajshëm, tha Dulahu Kryetari i trupit gjykues këtij të akuzuari i tha se në fçarë afërsie të gjakut është me Emin Sallahun. Pasi u mor vesh se këta janë djem të axhallarëve, u shtrua edhe pyetja tjetër: “Ç’deklaroi në hetuesi Emini”. Duke e kuptuar këtë pyetje Dulahu menjëherë u përgjigj: “Eminin e kanë detyruar të trillojë. . . ”

Për shpërndarje të revistës “Çlirimi” akuzohet edhe Ragip Berisha. Ky pasi i njoftoi të pranishmit se është anëtar i LDK-së që nga viti 1995, tha se e ka shpërndarë revistën “Çlirimi”.

I pyetur për Avni Klinakun, Ragipi tha se e njeh por me të nuk ka biseduar asgjë për atë çfarë e ngarkon gjykata. Ai gjithashtu mohoi të ketë dhënë betimin sikundër e ngarkon aktakuza. I pyetur nga gjykatësi përse ka deklaruar ndryshe në hetuesi, ai tha: “Veprova kësisoj për shkak se më janë kërcënuar ata të sigurimit”.

Pas një “intermeco” të shkurtër gjykatësi prapë iu drejtua avokatit dr. Hysni Bytyçi me fjalët “pse po heshtni, nuk po u dëgjohet zëri”. Ky avokat me ironi ia ktheu: “Pikërisht tash po e lexoj revistën “Çlirimi”.

Unë e kam shpërndarë revistën, por nuk e dija se çfarë është ajo, tha i akuzuari Burhan Hasani. Në pyetjen se kush ia ka dhënë këtë revistë (“Çlirimi”) ky i akuzuar tha se atë ia ka dhënë Qemal Hasani dhe atë bashkë me Hajzerin e ka shpërndarë në fshatin Dobërllukë. Më vonë, tha ky i akuzuar, nuk kam dashur ta shpërndajë këtë revistë dhe për këtë e kam njoftuar Hajzerin (nuk u tha mbiemri i tij).

Në vazhdim u mor në pyetje Majlinda Sinani, absolvente e gjuhës dhe e letërsisë shqipe, e cila që në start të mbrojtjes së vet tha se nuk e ndien veten fajtore për veprën penale që i vehet në barrë. Në aktakuzë, për mua thuhet, vazhdoi ajo, se kam shpërndarë revistën “Çlirimi”. Këtë e kam thënë edhe para gjykatëses hetuese (Danica Marinkoviq) dhe nuk do ta shihja të udhës “as të shtoj diçka tjetër, e as të plotësoj atë çka kam pohuar më herët”. Por, nëse ju insistoni të “përsëris” deklaratën, atëherë këtë mund ta bëjë, tha Majlinda.

Në pyetjen e prokurorit se kush ia ka dhënë revistën “Çlirimi”, Majlinda tha se e njeh atë person. Dhe, duke u kthyer kah të akuzuarit, bëri me dorë kah i akuzuari Avni Klinaku. Majlinda e tha troç se nuk është anëtare e LKÇK. Majlinda theksoi edhe këtë hollësi: “Pas deklaratës para gjykatëses hetuese, inspektorët sërish më morën në pyetje 12 herë”.

Gjykatësi Dragolub Zdravkoviq tha se ky proces “ishte i shpejtuar”. Sot pas dy të akuzuarve të fundit që do të merren në pyetje, do të shqyrtohen provat, të prokurorit dhe ato të mbrojtësve, thuhet në njoftimin e gazetës “Bujku”.

22 maj 1997

Vazhdoi gjykimi kundër 20 shqiptarëve në gjyqin serb të qarkut në Prishtinë

Pas tri ditësh të gjykimit, dje në Prishtinë përfundoi marrja në pyetje e të gjithë të akuzuarve, pos dy vetave, të cilët “gjenden në arrati”. Edhe senaca e djeshme rrodhi sipas dinamikës së “shpejtuar”. Gjatë seancës së djeshme u morën në pyetje dy të akuzuarit e fundit, Arsim e Beton Retkoceri, që të dy njëzetetrevjeçar nga Prishtina, studentë të fakultetit ekonomik, të cilët i mbrojnë avokatët Aziz Rexha e mr. Hazër Susuri. Emrat e këtyre dy të akuzuarve figurojnë në një aktakuzë të veçantë, e cila është “shkrirë” në aktakuzën e “grupit” të parë të 18-ve.

Që në fillim të mbrojtjes së vet i akuzuari Arsim Retkoceri rrëfeu para trupit gjykues se ka shpërndarë revistën “Çlirimi” gjatë verës së vitit 1995 dhe gjatë vitit të kaluar. E, pastaj foli për “trajtmin” policor që i është bërë. “Më arrestuan në një minimarket, këtu në Prishtinë më 23 prill, rreth ors 8 e 30 minuta. Në stacionin policor menjëherë më rrahën me kërbaç, më qëlluan duarve, në kokë, më grushtuan dhe shqelmuan edhe në organet gjenitale. Kisha trauma të mëdha, 48 orë nuk ngrëna e nuk piva asgjë. Kisha shtrëngime të mëdha psikike. Nuk mund ta përshkruaj maltretimin që m’u bë”, tha Arsim Retkoceri.

Kryetari i trupit gjykues Dragolub Zdravkovqi të akuzuarit Arsim i shtroi një sërë pyetjesh. E pyeti se prej kujt i ka marrë revistat, ku i ka shpërndarë, me kë etj. Përgjigjja ishte: “Revista i mora nga Liburn Aliu (absolvent i arkitekturës). Liburnin, tha ai, e njoh më herët, ngase me të njihem nga shkolla e mesme. Po ashtu Arsimi tregoi se me Liburnin nuk kanë biseduar për kurrfarë organizate”.

– Unë pranova të shpërndaj revistën “Çlirimi”. Me Arsim Retkocerin shpërndave këtë revistë njëherë në lagjen Dardania të Prishtinës. Jam takuar edhe me Agim Kuletën dhe me të kemi biseduar për fizionominë dhe përmbajtjen e kësaj reviste. Për shpërndarjen e “Çlirimit” kam biseduar edhe me dy shokët e mi Bujar Gashin dhe Burim Prestreshin. Kështu pohoi i akuzuari Beton Retkoceri i cili Arsimin e ka djalë axhe.

Gjatë procedurs së provave gjykatësi Dragolub Zdravkovqi i lexoi një sërë vërejtjesh të lëshuara nga organet policore përkitazi me bastisjen e shtëpive të të akuzuarve. Nga tërë ajo që u dërgjua u konfiskua vetëm një mitraloz dhe një revole. Të pranishmit u bënë me dije se si janë marrë nga të akuzuarit shumë libra, dorëshkrime të ndryshme (poezi), videokaseta, indeksa e pasaporta, madje edhe të anëtarëve të familjeve të tyre, makina të shkrimit, albume fotografish, aparate fotografike etj. etj.

I akuzuari i parë përkitazi me këtë dje disa herë reagoi para këtij trupi gjykues, shprehu habinë e vet se si prokurori i konsideron gjërat e këtilla prova, “argumente” për të na ngarkuar edhe për veprën penale të “terrorizmit”. Kërkoi nga gjykatësi që kjo vërejtje e tij të hyjë në procesverbal të seancës kryesore. Mbrojtësit përgënjeshtruan tezën e prokurorit, thanë se dihet çka është provë në kuptimin juridik. “Provat” e prokurorit janë memece, ato nuk flasin asgjë, e aq më pak kur është fjala për akuzën e rëndë që u vishen klientëve të tyre, akuzën se qenkan marrë edhe me “terrorizëm”!

Një kapitull i posaçëm iu kushtua edhe leximit, siç tha gjykatësi, të Programit dhe Statutit të Lëvizjes Kombëtare për Çlirimin e Kosovës. “Programi” ishte i përkthyer në serbisht. Dhe, në çastin kur gjykatësi Dragolub Zdravkoviq lexoi ca fjali, kontekstin e fjalëve “shiptarski narod”, avokatët reaguan zëshëm; pyetën se kush është përkthyes, përse nuk thuhet “albanci” duke tërhequr vëmendjen se kemi të bëjmë me një zhargon të rrugës, zhargon të rrugaçëve etj. Shprehja “shiptar” nuk figuron as në kushtetutën më të re serbe. Pas një të ashtuquajture polemike, gjykatësi tha se kjo është “njësoj”, deshi të thoshte se është sinonim, të përdoret kjo apo ajo shprehje, e që nuk është kështu.

Avokatja Nekibe Kelmendi insistoi që të lexohet pikë për pikë njëri nga artikujt e klienntes së saj Shukrie Rexha, anëtare e KP të Lidhjes Demokratike të Kosovës. Fjala është për artikullin “Të gjithë për liri” të botuar në njërin nga numrat e revistës “Çlirimi”. Autorja e këtij artikulli, siç u dëgjua, flet për gjendjen e rëndë në Kosovë, terrorin institucional seb mbi popullin shqiptar, traumat e të tjerëve që i përjetuan me rastin e vrasjeve, plagosjeve, burgosjeve të më të dashurve të tyre. Një po këtë artikull autorja Shukrie Rexha përmendi edhe vrasjen e arsimtarit prishtinas Feriz Blakçori, krim këtë, siç është kumtuar më herët, që e bëri policia serbe. Askund në artkullin e diskutueshëm nuk u dëgjua ndonjë fjalë, nxitje për ndonjë kryengritje të armatosur.

“Unë nuk e përkrahu terrorizmin”, tha Liburn Aliu, i cili bëri vërejtje se përse akuzohen ky dhe të tjerët për veprën penale të terrorizmit. Mbrojtësi i Luburnit, avokati Fazli Balaj tërhoqi vëmendjen se si në vërtetimin përkatës shkruan se klinetit të tij iu mor një makinë shkrimi, një negativ i filmit dhe ca fotografi për të cilat shpreh dyshimin. Më pastaj, ky mbrojtës shpjegoi se marrja e pasaprotave, fotografive etj. nuk është material deponues, e që kjo, tha ai, ka të bëjë edhe me marrjen e gjësendeve nga klienti tjetër i tij Dulah Sallah.

Avokati Destan Rukiqi (mbron Enver Dugollin dhe Emin Sallahun) pasi tregoi se gjësendet e përmendura nuk janë prova, kërkoi që ato t’u kthehen të akuzuarve.

“Përse këtu u lexua fotokopja e Programit të LKÇK. Unë nuk e pashë këtë dokument në origjinal”, tha avokati Hysni Bytyçi. Në vërejtjen e këtij mbrojtëis ndërhyri prokurori Jovica Jovanoviq duke thënë “Të gjihta materialet, pra edhe revista “Çlirimi” janë fotokopje”. Ndërkaq pas insistimit të këtij mbrojtësi ky konstatim i prokurorit hyri në procesverbal. Më tej, përkitazi me këtë avokati Mahmut Halimi vuri në pah se në këtë Program përshkruhet gjendja e përgjithshme në Kosovë.

Nekibe Kelmendi, e cila mbron Shukrie Rexhën, bëri vërejtjen se a janë shikuar videokasetat e diskutueshme, çfarë janë ato, a mos është fjala për ndonjë incizim gazmendi familjar etj. Avokati Xhafer Maliqi kërkoi që trupi gjykues të mos e mbështesë aktgjykimin e vet pikërisht në këto “prova” të prokurorit.

Së këtejmi u bë fjalë edhe për ca raprote mjekësore përkitazi me gjendjen shëndetësore të të akuzuarëve Gani Baliu, Enver Dugoli, Dulah Sallahu dhe të tjerëve. Vërtetimet përkatëse, madje edhe raport mjekësor i mjekut të burgut flet për torturën fizike që u bë mbi të akuzuarit, nxjerrjen me dhunë të deklaratave të tyre në fazën e hetuesisë.

Kryetari i trupit Gjykues në procesverbal konstatoi edhe parashtresat e avokatëve drejtuar kësaj gjykate dhe organeve të tjera, telegramet, në të cilat bëhet me dije që gjykatësja hetuese Danica Marinkoviq të urdhërojë që të ndërpriten torturat fizike mbi të pandehurit. Këto janë dëshmi, thanë avokatët për përdorimin e dhuëns mbi klientët e tyre.

Prokurori Jovica Jovanoviq tha se është i gatshëm ta paraqesë fjalën e vet menjëherë nesër (22 maj), por dha një arsyetim se ditën e premte është i zënë me ca “punë familjare”!

Gjykatësi kumtoi se faza e procedurës do të shtyhet për ca ditë, me qëllim, siç tha ai, që të përgatiten prokurori dhe të tjerët. Pra, fjala përfundimtare do të jepet të hënën, më 26 maj, shkruan “Bujku”.

22 maj 1998

Një i vdekur në rrugë në afërsi të Duhlës

Qytetarët që kanë udhëtuar sot në mëngjes në rrugën Prizren-Prishtinë kanë parë në afërsi të fshatit Duhël trupin e pajetë të një personi.

KI i Degës së LDK-së në Suharekë njofton se i vdekuri ndodhet në anën e majtë të rrugës, ka të veshura pantollona xhins.

Identiteti dhe rrethanat e vdekjes së tij nuk dihen.

Në Grabanicë të Klinës serbët vendës po djegin shtëpitë e shqiptarëve

Sipas një burimi të FR të LDK-së në Klinë, që u paraqit nga afërsia e fshatit Grabanicë serbët lokalë po i djegin shtëpitë e shqiptarëve që janë larguar nga shtëpitë e veta. Deri tash flaka dhe tymi po duken në shtatë shtëpi.

Gjendja në komunën e Klinës po bëhet më dramatike. Qe disa ditë forcat serbe kanë sulmuar fshatrat Grabanicë, Çeskovë, Këpuz, Dellovë e Volljakë.

Gjatë një sulmi që u bë parmbrëmë në Grabanicë, një shqiptar u vra kurse katër u plagosën.

Një sulm i ri filloi dje rreth orës 18:30. Sulmi ka vazhduar deri kah mesnata. Këto fshatra po mbahen edhe nën bllokadë të plotë nga forcat e shumta ushtarako-policore serbe.

KI i Degës së LDK-së në Klinë njofton se forca të mëdha serbe janë stacionuar në afërsi të fshatit Grabanicë, buzë magjistrales Prishtinë-Pejë.

Për shkak të gjendjes së rëndë në këtë komunë, KKA i Klinës mori vendim që në të gjitha shkollat fillore dhe të mesme mësimi të ndërpritet përkohësisht, derisa të krijohen kushtet për vazhdimin e mësimit.

Forcat serbe vranë dje Arben Halilajn nga Jashanica e Epërme e Klinës

 Arben Aziz Halilaj (22) nga Jashanica e Epërme e Klinës u vra dje gjatë sulmit serb kundër fshatrave të Klinës.

KI i Degës së LDK-së në Klinë njofton se Arbeni u vra në mes fshatrave Budisalc e Krushevë e Madhe.

Varrimi i tij do të bëhet sot.

Forca serbe po vazhdojnë të shtijnë me armë drejt shtëpive të Llaushës

Sot rreth orës 11. 30 forcat serbe kanë filluar një sulm kundër fshatit Llaushë në Skënderaj.

Forcat serbe po qëllojnë pandërprerë në drejtim të shtëpive të lagjes Gecaj. Është qëlluar disa herë e Halil Gecit, anëtar i KP të LDK-së. I vëllai i tij, Fadil Geci, kryetar i Nëndegës së LDK-së në LLaushë tha në orën 15:00 se sulmi i forcave serbe po vazhdonte ende.

Llausha mbahet e rrethuar nga forca të mëdha serbe që nga 5 marsi. Që nga kjo kohë, në Llaushë janë vrarë gjashtë veta, disa banorë të moshuar kanë vdekur për mungesë ilaçesh e ushqimesh. Nga sulmet e parreshtura janë dëmtuar shumë shtëpi.

Forcat serbe po djegin shtëpitë e shqiptarëve në Zajm të Klinës

Pas orës 15 forcat serbe filluan sulmin mbi fshatin Zajm të Klinës.

KI i Degës së LDK-së në Klinë njofton se forcat serbe kanë hyrë në fshat dhe po i djegin shtëpitë nga të cilat po del tym e flakë.

Banorët e fshatit, kryesisht gra, fëmijë dhe pleq kanë ikur nga fshati dhe nëpër shi e kohë të keqe kanë arritur në Klinë.

Njëkohësisht rreth fshatit Zajm janë vendosur snajperë të shumtë serbë.

Është e pamundur të mësohet për pasojat e sulmit, pasi Zajmi dhe fshatrat tjera vazhdojnë të mbahen në rrethim të plotë nga forcat ushtarako-policore serbe.