Në kuadër të angazhimeve akademike për ofrimin e njohurive bashkëkohore dhe përfshirjes së ekspertëve ndërkombëtarë në procesin mësimor, u realizua me sukses një ligjëratë online me Dr. Tanja Tamminen, eksperte e njohur në fushën e politikës së jashtme dhe sigurisë evropiane.

Ligjërata u mbajt me ftesë të posaçme për studentët e Studimeve të Sigurisë dhe ishte përqendruar në temën: “Misionet Civile të Politikës së Përbashkët të Sigurisë dhe Mbrojtjes së Bashkimit Evropian (CSDP)”. Ky aktivitet u mundësua falë angazhimit të Profesor Naim Dedushaj, i cili realizoi kontaktin me Dr. Tamminen dhe krijoi hapësirë për bashkëpunime të mundshme në të ardhmen, përfshirë diskutimet për praktika studentore në institucionet e BE-së në Bruksel.

Gjatë ligjëratës, Dr. Tamminen solli një analizë të thelluar mbi rolin dhe funksionin e misioneve civile të Bashkimit Evropian, me fokus të veçantë në menaxhimin e krizave, forcimin e sundimit të ligjit, si dhe mbështetjen institucionale në vendet që përballen me sfida të sigurisë. Ajo ndau përvojat e saj konkrete nga misionet EUAM Ukrainë dhe EULEX Kosovë, duke ofruar një perspektivë të drejtpërdrejtë për dinamikën dhe sfidat në terren.

Kjo temë u vlerësua si shumë e rëndësishme dhe aktuale për studentët, veçanërisht në një kohë kur roli i Bashkimit Evropian në ruajtjen e paqes dhe stabilitetit global po bëhet gjithnjë e më i rëndësishëm. Studentët patën mundësinë të angazhohen në diskutim interaktiv me pyetje dhe komente, duke përfituar nga përvoja dhe ekspertiza e një profesionisteje të kalibrit ndërkombëtar.

Kush është Dr. Tanja Tamminen?

Dr. Tanja Tamminen është doktore e shkencave politike nga Sciences Po Paris, dhe aktualisht udhëheq projektin e Bashkimit Evropian EU4Dialogue. Me një përvojë të pasur në politikën e jashtme të BE-së, sigurinë evropiane dhe zhvillimet në Ballkan, ajo ka shërbyer në disa prej misioneve më të rëndësishme të BE-së dhe ka kontribuar në hulumtime të nivelit të lartë në institutet më të njohura të Evropës.

Aktualisht, ajo është edhe profesoreshë e jashtme në Universitetin e Turku në Finlandë, dhe vazhdon të jetë një zë i rëndësishëm në fushën e analizës politike dhe ndërtimit të paqes në rajonet e tensionuara.

Ky aktivitet shënon një hap tjetër të rëndësishëm drejt ndërkombëtarizimit të arsimit në fushën e sigurisë dhe është dëshmi e përkushtimit për të ofruar arsim të cilësisë së lartë me standarde evropiane.

Rektori i UBT-së, Prof. Dr. Edmond Hajrizi, ka vizituar panairin ndërkombëtar “Cosmofarma Exhibition” që u mbajt në Bolonja të Italisë – një nga ngjarjet më të rëndësishme në Evropë në fushën e farmacisë, kozmetikës dhe mirëqenies.

Ky panair shërben si platformë për prezantimin e risive dhe praktikave më të avancuara në kujdesin farmaceutik dhe estetik, me fokus në shëndetin holistik të qytetarëve.

Pjesëmarrja e UBT-së në këtë aktivitet prestigjioz është dëshmi e angazhimit të saj për të qëndruar në hap me zhvillimet globale dhe për të promovuar standardet më të larta akademike e shkencore, sidomos në Fakultetin e Farmacisë, por edhe në njësitë tjera brenda ekosistemit inovativ të UBT-së.

Gjatë vizitës, Rektori Hajrizi zhvilloi takime me përfaqësues të kompanive farmaceutike dhe kozmetike, duke shprehur gatishmërinë për bashkëpunim në fushat e teknologjisë farmaceutike, kërkimit shkencor dhe zhvillimit të produkteve të reja.

UBT tashmë ka ndërtuar eksperiencë të konsiderueshme në sektorin e farmacisë dhe shëndetësisë, jo vetëm në arsimim, por edhe përmes prodhimeve të veta, me synimin për të zgjeruar më tej bashkëpunimet ndërkombëtare në këtë fushë me ndikim të madh shoqëror.

Në një epokë ku teknologjia po e dikton ritmin e zhvillimit global, mijëra vajza dhe gra në Kosovë dhe më gjerë kanë zgjedhur që rrugëtimin e tyre profesional ta ndërtojnë në UBT – institucionin lider të arsimit në vend, i njohur për standardet e tij të larta akademike dhe inovacionin në fusha kyçe si teknologjia informative, shkencat kompjuterike dhe inxhinieria.

Me një ekosistem arsimor që fillon nga arsimi fillor dhe shtrihet deri në nivelet më të avancuara të studimeve bachelor dhe master, UBT ka krijuar hapësirë të barabartë për të gjithë, duke u bërë kështu një model i fuqizimit të grave dhe vajzave në fushat që tradicionalisht kanë qenë të dominuara nga burrat.

Mbi 2,500 vajza dhe gra kanë zgjedhur UBT-në për studime në ICT, një numër që sa vjen e rritet, duke reflektuar jo vetëm një ndryshim kulturor, por edhe besimin që UBT i jep potencialit dhe talentit të gjinisë femërore në këtë sektor strategjik.

Në zemër të këtij vizioni qëndron Rektori i UBT-së, Prof. Dr. Edmond Hajrizi, i cili thekson se:

“Çfarë na motivon dhe na bën krenar është rritja e vazhdueshme e numrit të studenteve në sektorin e ICT-së. Ne besojmë se vajzat dhe gratë do të jenë lideret e inovacionit të së ardhmes. UBT u ofron mbështetje të plotë për të qenë jo vetëm të përgatitura për tregun vendor, por edhe për atë ndërkombëtar – për të konkurruar, për të udhëhequr dhe për të frymëzuar”.

Ky angazhim nuk është vetëm teorik: UBT ofron bursa studimi, praktika profesionale, akses në laboratorë të teknologjisë së avancuar, si dhe mentoring të dedikuar, për t’i mbështetur studentet në çdo hap të rrugëtimit të tyre akademik e profesional.

Përmes Gjimnazit TIK, vajzat kanë mundësi të fillojnë herët me përgatitjen e tyre për një karrierë në teknologji. Më pas, ato mund të vazhdojnë studimet në Fakultetin e Shkencave Kompjuterike dhe Inxhinierisë – shkollën më të madhe të teknologjisë në vend – apo në programe si Sistemet e Informacionit dhe Menaxhim i Mekatronikës.

UBT është më shumë se një universitet – është një platformë për fuqizim, inovacion dhe përfaqësim. Në Ditën Ndërkombëtare të Vajzave në ICT, por edhe çdo ditë të vitit, UBT promovon rolin e grave në teknologji përmes aktiviteteve, kampanjave vetëdijesuese dhe projekteve që synojnë ndryshimin afatgjatë.

Sot, qindra vajza dhe gra të diplomuara nga UBT janë në pozita udhëheqëse në kompani të teknologjisë, kanë nisur biznese të suksesshme, janë pjesë e institucioneve vendore e ndërkombëtare, si dhe kontribuojnë në zhvillimin e komunitetit përmes njohurive dhe përvojës së tyre.

Kjo nuk është vetëm histori suksesi, por një transformim i vazhdueshëm që UBT po e udhëheq me përkushtim. Me synimin që Kosova të ketë më shumë shkencëtare, programere, inxhiniere dhe udhëheqëse teknologjike, UBT do të vazhdojë të jetë një dritare mundësish për vajzat dhe gratë që ëndërrojnë më shumë dhe që synojnë të arrijnë gjithçka.