Ministri në detyrë i Financave, Hekuran Murati, ka fajësuar Lidhjen Demokratike të Kosovës (LDK), për bllokimin e konstituimit të Kuvendit dhe vonimin e ndryshim-plotësimit të Ligjit për Buxhetin, nga i cili varen edhe financat e tri komunave që nuk i kanë miratuar buxhetet brenda afateve ligjore – përfshirë edhe Komunën e Prishtinës.

Përmes një postimi në Facebook, Murati tha se për shkak të pamundësisë për konstituim të Kuvendit, nuk është miratuar ende ndryshimi i Ligjit të Buxhetit për vitin 2025, i cili do të mundësonte futjen në fuqi të buxheteve të këtyre komunave.

“Për shkak se opozita po e bllokon konstituimin e Kuvendit, ka mbetur pezull edhe ndryshim-plotësimi i Ligjit të Buxhetit, që do të përfshinte buxhetet e tri komunave të cilat ishin vonuar në miratimin e buxheteve komunale sipas afateve ligjore – pra buxhetet komunale janë miratuar në asambletë përkatëse tek pas votimit të Ligjit të Buxhetit në Kuvend dhe kësisoj ato buxhete ende nuk janë në fuqi,” ka shkruar Murati.

Sipas tij, njëra nga këto komuna është edhe Prishtina. Murati tha se kryetari Përparim Rama po e drejton kritiken në adresë të gabuar, pasi vonesat burojnë pikërisht nga bllokimi i Kuvendit nga partia që ai përfaqëson.

“Pra kur Përparim Rama kërkon zhbllokimin e buxhetit komunal, adresa e duhur për ankesë është pikërisht partia e tij LDK, e cila duke mos votuar për konstituimin e Kuvendit, po e vonon edhe plotësimin e Ligjit të Buxhetit, për ta përfshirë edhe buxhetin e Komunës së Prishtinës si pjesë përbërëse,” tha ai.

Në vazhdim të reagimit të tij, Murati akuzoi kryetarin e Prishtinës dhe LDK-në se kanë vazhduar me nënshkrime kontratash dhe shpallje tenderësh pa buxhet të miratuar, gjë që sipas tij përbën shkelje të ligjeve në fuqi.

“Megjithatë, mos-hyrja në fuqi e Buxhetit të Komunës së Prishtinës, nuk e ka ndalur Përparim Ramën dhe LDK-në që të nënshkruajnë kontrata milionëshe e të shpallin tenderë milionësh pa kurrfarë mbulese, në stilin ‘aksham-pazar’, duke shkelur kështu Ligjin për Financa Publike dhe atë të Prokurimit Publik,” ka deklaruar Murati.

Ministri në detyrë përfundoi reagimin e tij duke thënë se për këto veprime, sipas tij të paligjshme, prokuroria do duhej të ishte aktivizuar më herët.

“Për këto shkelje, do të duhej qëmoti të ishte aktivizuar prokuroria, por deri më tani nuk kemi parë asnjë veprim nga ana e tyre,” përfundoi ai.

Ushtria izraelite ka ndërmarrë një valë të re sulmesh ajrore gjatë natës në Rripin e Gazës, duke shkaktuar vdekjen e pesë personave dhe zhvendosjen e qindra familjeve palestineze. Sipas burimeve spitalore, dhjetëra civilë të plagosur janë dërguar në Spitalin Al-Ahli në qytetin e Gazës.

Sipas dëshmitarëve, sulmet u përqendruan në lagjet lindore të qytetit – Shujaiya, Tuffah dhe Zeitoun – zona të populluara ku jetojnë mijëra banorë. Një nga goditjet ajrore ka përfshirë një shkollë në Zeitoun që shërbente si strehë për familjet e zhvendosura.

“Forcat Mbrojtëse të Izraelit na telefonuan dhe na paralajmëruan se duhet të evakuoheshim menjëherë,” tha Abeer Talba, një banore e Zeitounit me shtatë fëmijë. “Kjo është hera e shtatë që detyrohemi të largohemi. Jemi pa ushqim, pa ujë. Fëmijët e mi po vdesin urie.”

Pesë viktima të tjera u raportuan në kampin Al Shati, në perëndim të qytetit të Gazës, ku një tjetër sulm ajror ka goditur një ndërtesë banimi.

Ushtria izraelite kishte urdhëruar më herët banorët të largoheshin nga zonat veriore të Rripit, në pritje të një operacioni të gjerë. Megjithatë, shumë nga të zhvendosurit u drejtuan më në perëndim të qytetit në vend që të lëviznin drejt jugut, për shkak të pasigurisë së përgjithshme dhe mungesës së strehimit.

Banka Qendrore e Republikës së Kosovës (BQK) dhe Agjencia e Kosovës për Inteligjencë (AKI) kanë nënshkruar një Memorandum Bashkëpunimi, me qëllim të zgjerimit dhe forcimit të bashkëpunimit ndërinstitucional, në përputhje me mandatin dhe kompetencat përkatëse të përcaktuara me ligj.

Memorandumi synon të forcojë koordinimin institucional dhe përcakton kornizën për shkëmbimin e informatave të nevojshme dhe relevante, në mënyrë të sigurt dhe të kontrolluar, me qëllim të përmbushjes efektive të mandateve kushtetuese dhe ligjore të të dy institucioneve.

Ky hap përbën një dëshmi të angazhimit të përbashkët për forcimin e sigurisë, transparencës dhe qëndrueshmërisë së institucioneve të vendit, në përputhje me standardet më të avancuara të bashkëpunimit institucional.

Kryeministri në detyrë i Kosovës, Albin Kurti, dhe kryetari i Prishtinës, Përparim Rama, kanë shkëmbyer deklarata të mprehta gjatë ceremonisë së vendosjes së gurthemelit për një çerdhe në lagjen Bardhosh të Prishtinës, duke nxjerrë në pah mospajtimet mes nivelit lokal dhe atij qendror për sa i përket bashkëpunimit dhe realizimit të projekteve në kryeqytet.

Kreu i Prishtinës, Përparim Rama, përdori rastin për të kërkuar publikisht zhbllokimin e buxhetit të Komunës nga Qeveria, duke përmendur projekte të mëdha infrastrukturore që, sipas tij, kanë mbetur pezull për shkak të mungesës së bashkëpunimit ndërinstitucional.

“Është mirë kur kemi një bashkëpunim mes nivelit qendror edhe kryeqytetit. Kemi një numër të madh projektesh, përfshirë unazën e kryeqytetit me vlerë prej 206 milionë eurosh, që mund të shtyhen përpara nëse zhbllokohet buxheti. Kërkoj nga kryeministri që të takohemi dhe të punojmë bashkë për të mirën e qytetarëve”, tha Rama, duke shtuar se gjatë katër viteve të mandatit nuk ka pasur asnjë takim me Kurtin për këto çështje.

Kryeministri në detyrë, Albin Kurti, iu kundërpërgjigj duke kundërshtuar gjuhën që Rama përdori për të cilësuar projektin e çerdhes si “minore” dhe duke aluduar në fundin e mandatit të tij pas zgjedhjeve të ardhshme.

“Fëmijët janë të vegjël, por asnjë çerdhe nuk është projekt i vogël. Duhet të kemi seriozitet për çdo investim në arsim. Kryetarin Rama e kam takuar disa herë në zyrën time, dhe vetëm për fushën e arsimit në kryeqytet janë investuar mbi 12 milionë euro. Projektet madhore kërkojnë planifikim shumëvjeçar dhe këtë duhet ta bëjmë ndryshe, mbase me dikë tjetër. Kryetari Rama, pas vjeshtës, duhet të gjejë një punë tjetër”, u shpreh Kurti.