Kancelari gjerman Olaf Scholz deklaroi sot se tani i takon presidentit rus Vladimir Putin të mbajë një qëndrim, pasi Ukraina pranoi një propozim të SHBA-së për një armëpushim të menjëhershëm 30-ditor me Moskën.

“Tani topi është në fushën e Putinit”, tha kancelari gjerman në një postim në platformën ‘X’. Ai e konsideroi idenë e një armëpushimi njëmujor “një hap të rëndësishëm drejt një paqeje të drejtë për Ukrainën”.

“Ne qëndrojmë me Ukrainën dhe Shtetet e Bashkuara dhe mirëpresim propozimet nga Jeddah”, shtoi Scholz.

Edhe Kina njoftoi nga ana e saj se po ndjek me kujdes qasjen e Ukrainës, e cila ka shprehur gatishmërinë të pranojë propozimin amerikan për një armëpushim të menjëhershëm 30-ditor me Rusinë dhe se shpreson për një “paqe të qëndrueshme”.

“Ne shpresojmë që të gjitha palët, përmes dialogut dhe negociatave, të gjejnë një plan për një paqe të qëndrueshme dhe të përhershme që merr parasysh shqetësimet e të gjithëve”, tha Mao Ning, një zëdhënëse e Ministrisë së Jashtme kineze, gjatë një konferencë me gazetarët.

Për më tepër, Ministri i Jashtëm polak Radoslaw Sikorski tha sot se ai mund të konfirmojë se furnizimet me armë nga SHBA në Ukrainë nëpërmjet Polonisë kanë rifilluar dhe shërbimet e internetit satelitore Starlink janë funksionale.

Duke folur për gazetarët në Varshavë së bashku me ministrin e Jashtëm ukrainas Andriy Sibiha, Sikorski tha se Polonia është e kënaqur me propozimet e reja për Ukrainën.

Ish-presidenti i Gjeorgjisë, Mikheil Saakashvili u dënua sot me nëntë vjet burg shtesë, pasi u shpall fajtor për përvetësim.

Saakashvili , i cili shërbeu si president i vendit nga viti 2004 deri në 2013, ishte dënuar më herët me gjashtë vite burg për shpërdorim detyre pasi u kthye në Gjeorgji në 2021, ndërsa një pjesë të madhe të dënimit e ka kryer në spitalin e burgut.

Televizioni gjeorgjian transmetoi pamje nga salla e gjyqit, ku mbizotëronte tensioni gjatë leximit të vendimit, me mbështetësit e Saakashvilit që e cilësojnë gjyqtarin një “skllav” të qeverisë aktuale.

Një figurë thellësisht polarizuese në Gjeorgji sot, Saakashvili erdhi në pushtet në Revolucionin e Trëndafilave të vitit 2003. Ai udhëhoqi protestat e përditshme në qendër të Tbilisit dhe së shpejti detyroi presidentin e atëhershëm Shevardnadze të jepte dorëheqjen.

Mbështetësit e tij nuk hezituan të pushtonin parlamentin gjeorgjian – dhe në vitin 2004, në zgjedhjet ku ai garoi praktikisht pa kundërshtar, fitoi me 96% të votave dhe u bë presidenti më i ri në Evropë. Teksa ishte në pushtet, ai e riorientoi Gjeorgjinë drejt Perëndimit dhe nisi një program ambicioz reformash në sektorin publik, i cili pati rezultate të shpejta në këtë vend të Kaukazit Jugor me 3.7 milionë banorë.

Megjithatë, vitet e fundit të mandatit të tij u shënuan nga autoritarizmi, brutaliteti policor dhe një luftë shkatërruese me Rusinë në vitin 2008.

Në vitin 2012, partia e Saakashvilit, Lëvizja e Bashkuar Kombëtare, humbi një betejë zgjedhore ndaj një aleance të udhëhequr nga biznesmeni miliarder Bidzina Ivanishvili, i cili mbetet lider i Gjeorgjisë deri në ditët e sotme.

Pas largimit nga pushteti, Saakashvili u vendos në Ukrainë, ku shërbeu për një kohë të shkurtër si guvernator i rajonit jugor të Ukrainës, Odessa.

Në vitin 2021, ai u kthye në Gjeorgji, pavarësisht se u dënua në mungesë për shpërdorim detyre. Ai u arrestua dhe u burgos me të mbërritur në vend.

Presidenti i SHBA-së, Donald Trump, ka deklaruar se dhuna kundër shitësve të kompanisë së automobilave Tesla do të etiketohet si një akt i terrorizmit të brendshëm, si dhe u zotua për pasoja të rënda për autorët.

Duke folur së bashku me shefin ekzekutiv të kompanisë Tesla, Elon Musk, presidenti Trump theksoi mbështetjen e tij për prodhuesin e automjeteve elektrike.

Trump e quajti Tesla-n një “produkt të shkëlqyeshëm” dhe zgjodhi personalisht një Tesla Model S të kuq nga një flotë e parkuar në Shtëpinë e Bardhë. Ai tha se shpreson se lëvizja e tij do të rrisë shitjet e Tesla-s.

Musk, i cili konfirmoi planet për të vazhduar si shef ekzekutiv i Tesla-s, njoftoi se kompania do të dyfishojë prodhimin e automjeteve të saj në SHBA në dy vitet e ardhshme.

Ngjarja në Shtëpinë e Bardhë rriti aksionet e Tesla-s, duke ofruar një pushim mes rënies së shitjeve dhe vlerës së aksioneve për shkak të vandalizmit dhe kritikave ndaj rolit të Muskut në administratën amerikane.

Tesla është përballur me një valë sulmesh ndaj tregtarëve dhe objekteve të saj, të nxitura nga pakënaqësia me aktivitetet politike të Muskut, përfshirë udhëheqjen e tij të Departamentit të Efikasitetit të Qeverisë (DOGE), që kërkon të shkurtojë fuqinë punëtore dhe programet federale.

Vandalizmi ka shkaktuar humbje të konsiderueshme financiare, duke nxitur qëndrimin e fortë të Trumpit dhe shfaqjen publike të mbështetjes për kompaninë.

Partia Demokraatit pro-pavarësisë ka fituar shumicën e votave në zgjedhjet e përgjithshme në Grenlandë, duke përmbysur partitë në pushtet.

Partia Naleraq (Pika e Orientimit), po ashtu pro-pavarësisë, doli e dyta pas numërimit të fletëvotimeve në të gjitha 72 qendrat e votimit.

Partia Demokraatit siguroi 30,3 për qind të votave, me një rritje pak më shumë se 20 për qind, ndërsa Partia Naleraq siguroi 24,8 për qind, me një rritje prej 12,5 për qind nga zgjedhjet e mëparshme.

Kreu i demokratëve, Jens-Freederik Nielsen, do të formojë qeverinë e re me Partinë Naleraq.

Partitë e koalicionit, Inuit Ataqatikiit dhe Siumut, arritën të sigurojnë 21,6 për qind dhe 14,9 për qind, duke shënuar një rënie prej mbi 30 për qind krahasuar me zgjedhjet e mëparshme. Me këto rezultate, Inuit Ataqatigiit, e udhëhequr nga kryeministri Mute Bourup Egede, ra në vendin e tretë.

Dy partitë e para në këto zgjedhje, demokratët dhe Naleraq, janë në favor të pavarësisë nga Danimarka, por kanë një qasje të ndryshme për kohën kur vendi të mbajë një votim të pavarësisë.

Së bashku, këto dy parti tani do të kontrollojnë 18 nga 31 vendet në parlamentin Inatsisartut të vendit të ishullit Arktik, që është një territor vetëqeverisës i Danimarkës.

Mes thirrjeve të presidentit të SHBA-së, Donald Trump, pavarësia ka qenë në krye të agjendës politike para zgjedhjeve, me të katër këto parti që mbështesin idenë, megjithëse nuk pajtohen për kohën.

Derisa demokratët argumentonin për një tranzicion të matur, Naleraq është në mënyrë më agresive pro-pavarësisë.