Në kuadër të Global UBT Fest, Akademia Verore e Fakultetit të Biokimisë Mjekësore dhe Bioteknologjisë vazhdoi aktivitetet e saj me ditën e tretë, e cila u karakterizua nga puna praktike dhe përvoja e drejtpërdrejtë në mjedise moderne laboratorike dhe klinike.

Gjatë këtij aktiviteti, pjesëmarrësit patën mundësinë të njihen nga afër me organizimin dhe funksionimin e laboratorëve klinikë, menaxhimin dhe ruajtjen e mostrave biologjike, përdorimin e analizatorëve bashkëkohorë, teknikat e pipetimit dhe mikroskopisë, si dhe proceset e diagnostikimit laboratorik dhe imazherik.

Përmes demonstrimeve praktike dhe punës në laborator, studentët dhe pjesëmarrësit zgjeruan njohuritë e tyre mbi standardet profesionale që udhëheqin praktikën laboratorike moderne. Vëmendje e veçantë iu kushtua saktësisë analitike, biosigurisë, kontrollit të cilësisë dhe etikës profesionale, si elemente kyçe për garantimin e rezultateve të besueshme dhe mbrojtjen e shëndetit të pacientëve.

Aktiviteti dëshmoi edhe një herë qasjen bashkëkohore të Fakultetit të Biokimisë Mjekësore dhe Bioteknologjisë, i cili ndërton një model arsimimi të bazuar në integrimin e mësimit teorik me praktikën profesionale, duke krijuar një ekosistem ku universiteti, laboratori dhe institucionet shëndetësore bashkëpunojnë për zhvillimin e dijes, kërkimit shkencor dhe inovacionit.

Përmes Akademisë Verore, UBT vazhdon të krijojë mundësi për zhvillimin profesional të studentëve dhe profesionistëve të rinj, duke i pajisur ata me kompetenca praktike dhe njohuri të avancuara, në përputhje me standardet bashkëkohore të diagnostikës laboratorike dhe shkencave biomjekësore.

Prizreni, qyteti i historisë, kulturës dhe trashëgimisë, po bëhet gjithnjë e më shumë edhe një qendër e arsimit modern dhe inovacionit teknologjik. Në këtë frymë, kanë nisur zyrtarisht regjistrimet në Gjimnazin TIK të UBT International Smart Schools në Prizren, duke u ofruar të rinjve një mundësi unike për të ndërtuar karrierën e tyre në profesionet më të kërkuara të së ardhmes.

Regjistrimet janë të hapura jo vetëm për nxënësit nga Prizreni, por edhe për të rinjtë nga e gjithë rajoni i Prizrenit, si Suhareka, Dragashi, Malisheva, Rahoveci dhe Mamusha, si dhe për nxënësit nga Kukësi dhe zonat përreth në Shqipëri, të cilët dëshirojnë të ndjekin një arsim të standardeve ndërkombëtare në një nga institucionet më moderne të vendit.

Në një kohë kur tregu global i punës kërkon gjithnjë e më shumë profesionistë të fushës së teknologjisë, programimit dhe inteligjencës artificiale, Gjimnazi TIK sjell një model bashkëkohor të arsimit, ku teoria ndërthuret me praktikën dhe inovacioni bëhet pjesë e përditshmërisë së nxënësve.

Përmes laboratorëve modernë, pajisjeve të teknologjisë së fundit dhe metodave inovative të mësimdhënies, nxënësit zhvillojnë aftësi në programim, zhvillim të aplikacioneve, inteligjencë artificiale (AI), robotikë dhe realizimin e projekteve praktike, duke u përgatitur për studime universitare dhe për një treg pune që ndryshon me ritme të shpejta.

Ajo që e bën edhe më të veçantë këtë institucion është fakti se UBT International Smart Schools është plotësisht i akredituar nga Cambridge International Education, duke ofruar standarde ndërkombëtare të cilësisë në arsim dhe një përvojë mësimore të krahasueshme me shkollat më të avancuara në botë.

Me një staf të kualifikuar, ambiente moderne, teknologji të avancuar dhe një qasje që promovon kreativitetin, mendimin kritik dhe inovacionin, Gjimnazi TIK në Prizren synon të formojë gjeneratën e ardhshme të programuesve, inxhinierëve, zhvilluesve të teknologjisë dhe liderëve në këto fusha.

Regjistrimet tashmë janë të hapura për të gjithë të rinjtë që dëshirojnë të jenë pjesë e një shkolle ku teknologjia, dijet dhe vizioni për të ardhmen ecin paralelisht, duke e shndërruar arsimin në një investim të sigurt për suksesin akademik dhe profesional.

Aplikimet mund të bëhen online: LINKU ONLINE

Në kuadër të Global UBT Fest 2026, Fakulteti i Stomatologjisë në UBT zhvilloi aktivitetet e radhës të Akademisë Verore, duke mbledhur profesorë, profesionistë dhe studentë në një program të pasur me ligjërata shkencore, prezantime profesionale dhe diskutime mbi zhvillimet më të reja në fushën e stomatologjisë.

Programi u organizua në tri sesione shkencore, të moderuara nga stafi akademik i Fakultetit të Stomatologjisë, ku u trajtuan tema që pasqyrojnë risitë më të fundit në diagnostikim, trajtim dhe kujdesin oral. Ligjëratat u mbajtën nga profesorë dhe ekspertë të fushës, të cilët ndanë përvojat dhe njohuritë e tyre me pjesëmarrësit.

Ndër temat e trajtuara ishin strategjitë rigjeneruese në kirurgjinë moderne periodontale, ndikimi i sëmundjeve periodontale në shëndetin e përgjithshëm, materialet bashkëkohore në protetikë, përdorimi i realitetit virtual në uljen e frikës nga trajtimet dentare, menaxhimi kirurgjikal i cisteve radikulare, roli i teknologjive diagnostikuese si CBCT dhe MRI në diagnostikimin e tumoreve orale, trajtimi i odontomave dhe palatoshizave, si dhe përdorimi i materialeve moderne në endodonci dhe rëndësia e ushqimit në parandalimin e kariesit te fëmijët.

Një pjesë e rëndësishme e programit iu kushtua edhe prezantimeve të studentëve të programeve Stomatologji dhe Teknik Dentar, të cilët prezantuan punime shkencore dhe studime të përgatitura në bashkëpunim me mentorët e tyre, duke dëshmuar nivel të lartë profesional, hulumtues dhe prezantues.

Në përmbyllje të aktivitetit u organizua ceremonia e ndarjes së çmimeve për prezantimet më të mira studentore.

Çmimi i Parë iu nda:

• Asja Salihu;
• Shpresa Mustafa dhe Gjeraqina Jusaj;
• Erleta Bytyqi dhe Luan Maliqi.

Çmimi i Dytë iu nda:

• Diar Kolshi dhe Luan Maliqi;
• Erblina Shabani;
• Ornela Lezi.

Çmimi i Tretë iu nda:

• Artiola Fazliu, Valëza Rukovci dhe Besmira Fazlija;
• Lis Ameti.

Akademia Verore e Fakultetit të Stomatologjisë në UBT vazhdon të shërbejë si një platformë e rëndësishme për shkëmbimin e njohurive, prezantimin e praktikave bashkëkohore dhe nxitjen e hulumtimit shkencor, duke kontribuar në përgatitjen e profesionistëve të ardhshëm të stomatologjisë sipas standardeve më të larta akademike dhe profesionale.

Në kuadër të Global UBT Fest 2026, Fakulteti Shkencat e Ushqimit dhe Bioteknologji dhe Fakulteti Agrikulturë dhe Inxhinieri e Mjedisit organizuan me sukses Akademinë Verore 2026, me temë “Shkenca dhe inovacioni në shërbim të cilësisë së ushqimit dhe prodhimit të qëndrueshëm”.

Akademia u mbajt më 7 dhe 8 korrik në Parkun Shkencor, Inovativ dhe Teknologji të UBT-së, duke bërë bashkë studentë, profesorë universitarë, ekspertë vendorë, si dhe përfaqësues të industrisë agro-ushqimore.

Gjatë dy ditëve të aktivitetit, pjesëmarrësit ndoqën dhjetë ligjërata profesionale, ku u trajtuan tema aktuale që lidhen me teknologjinë ushqimore, sigurinë dhe cilësinë e ushqimit, bujqësinë e qëndrueshme, inovacionin, përpunimin e produkteve ushqimore, si dhe bashkëpunimin ndërmjet institucioneve akademike dhe sektorit privat.

Ligjëratat u zhvilluan nga ekspertë me përvojë akademike dhe profesionale, të cilët prezantuan rezultatet e kërkimeve shkencore, përvojat praktike dhe trendet më të reja të zhvillimit në sektorin agro-ushqimor. Çdo sesion u shoqërua me diskutime interaktive, duke krijuar një mjedis të favorshëm për shkëmbimin e njohurive, ideve dhe përvojave ndërmjet pjesëmarrësve.

Akademia Verore u karakterizua nga një pjesëmarrje e lartë dhe angazhim aktiv. 37 pjesëmarrës përfunduan me sukses programin dyditor.

Përveç programit akademik, Akademia shërbeu edhe si një ngjarje e rëndësishme për forcimin e bashkëpunimit ndërmjet studentëve, profesorëve, institucioneve dhe industrisë, duke promovuar dialogun, rrjetëzimin profesional dhe shkëmbimin e praktikave më të mira.

Përmes organizimit të Akademisë Verore 2026, UBT rikonfirmoi përkushtimin e tij për ofrimin e arsimit cilësor, promovimin e kërkimit shkencor dhe inovacionit, si dhe përgatitjen e profesionistëve të rinj që do të kontribuojnë në zhvillimin e qëndrueshëm të sektorit agro-ushqimor në Kosovë dhe më gjerë.