Lajmet

Escobar: Këtë vit pres që të arrihet marrëveshje përfundimtare mes Kosovës dhe Serbisë

Ai thotë se dakordimi për propozimin evropian është i nevojshëm sidomos për serbët në Kosovë.

Published

on

I dërguari special i Shteteve të Bashkuara të Amerikës për Ballkanin Perëndimor, Gabriel Escobar ka deklaruar se është e mundur që brenda këtij vitit të arrihet marrëveshja përfundimtare në mes Kosovës dhe Serbisë. Ndërsa, për takimin e 18 marsit në Ohër ai pret që të dyja palët të jetë konstruktive dhe fleksibile.

Emisari amerikan, Escobar këto komente i bëri gjatë një konference për media gjatë qëndrimit të tij në Beograd, vizitë kjo e cila po ndodh dy ditë para raundit të ri të dialogut në mes Kosovës dhe Serbisë i cili do të zhvillohet në Ohër të Maqedonisë së Veriut.

Sipas tij kjo marrëveshje nuk është diçka nga e cila duhet pasur frikë.

“Do të doja marrëveshjen këtë vit. Këtë vit kalendarik. Po, mendoj se është plotësisht e mundur… Kjo marrëveshje nuk është diçka nga e cila duhet pasur frikë. Shpresa jonë është që kjo të mos ndryshojë rrënjësisht jetën e askujt, por të sigurojë njëfarë niveli stabiliteti dhe paqeje midis njerëzve të rajonit. Nuk është qëllimi ynë të krijojmë barriera të reja, përkundrazi, ne duam që kjo marrëveshje të funksionojë, jo vetëm për Kosovën dhe Serbinë, por sepse Kosova dhe Serbia janë zemra e Ballkanit Perëndimor, kjo do të krijonte mundësi edhe për fqinjët tuaj. Ata gjithashtu duan të shohin një marrëdhënie të mirë mes Kosovës dhe Serbisë, edhe ata kanë nevojë për të”, u shpreh Escobar.

Emisari i SHBA-së për Ballkanin Perëndimor, zëvendësndihmës sekretari Gabriel Escobar u shpreh se propozimi evropian paraqet mundësitë më të mira për rajonin për të ecur përpara.

Ai u shpreh se në takimin e 18 marsit duan që pala kosovare dhe ajo serbe të jenë konstruktive dhe fleksibile për shqyrtimin e mundësive që paraqet marrëveshja e dakorduar në Bruksel.

“Ne mendojmë se kjo marrëveshje paraqet një nga mundësitë më të mira për rajonin për të ecur përpara në krijimin e kushteve paqësore për të gjithë njerëzit e rajonit, dhe ne duam që të dyja palët të jenë shumë serioze në shqyrtimin e mundësive, dhe duke kërkuar mënyra për të qenë fleksibël, konstruktiv dhe vizionar për të përfituar nga kjo mundësi që po paraqitet dhe jo vetëm nga Evropa, por nga Shtetet e Bashkuara dhe nga Komuniteti transatlantik në tërësi”, tha ai.

I dërguari special i Shteteve të Bashkuara të Amerikës për Ballkanin Perëndimor u shpreh po ashtu se propozimi evropian është një marrëveshje për normalizim e jo për njohje.

Megjithatë, ai shprehur qëndrimin e SHBA-ve se Kosova është një vend i pavarur me integritet territorial dhe sovranitet.

“Pritshmëria jonë është që do të kemi një mirëkuptim mes dy liderëve për të punuar për ta bërë realitet këtë marrëveshje për normalizimin. Me fjalë të tjera, të mendosh për të gjitha pengesat, të gjesh mënyra përtej pengesave dhe të dalësh nga takimi me mirëkuptimin se ata do të vazhdojnë të punojnë derisa t’ia dalin siç duhet. Për sa i përket Kombeve të Bashkuara, ne jemi më pak të fokusuar. Kjo është një marrëveshje për normalizimin dhe jo njohjen. Do të jem shumë i sinqertë, qëndrimi amerikan është se Kosova është një vend i pavarur me integritet territorial dhe sovranitet dhe ne besojmë se rajoni do të përfitonte nga njohja reciproke, kjo nuk ka të bëjë me këtë. Për sa i përket Kombeve të Bashkuara, mendoj se kjo është dytësore ndaj përfitimeve reale të kësaj marrëveshjeje normalizimi, e cila është një integrim më i madh dhe më i shpejtë evropian, jo vetëm për Serbinë dhe Kosovën, por për rajonin në tërësi”, u shpreh Escobar.

Sa i takon çështjes së Asociacionit të Komunave me Shumicë Serbe, Escobar u shpreh se formimi i Asociacionit është më afër sesa ishte disa javë më parë.

Sipas tij tani Asociacioni do të ndodh pavarësisht se a do të ketë marrëveshje të re apo jo, por thekson se çështja është se sa shpejt do të ndodh.

Kurse, për 15 propozimet e ofruara nga përfaqësuesi i posaçëm i Bashkimit Evropian, Miroslav Lajçak, emisari amerikan thotë se do të donim që një nga ato modele të ishte shabllon për përdorimin lidhur me asociacionin.

“Mund të them se po, mund të them se diskutimet tona me qeverinë e Kosovës kanë qenë gjithnjë e më produktive dhe realiste, sepse ata pranojnë se ky detyrim ligjërisht i detyrueshëm do të vazhdojë të ekzistojë në çdo mënyrë apo formë marrëveshjeje që do t’i afronte më shumë drejt Evropës. Kështu që shpresoj se jemi shumë më afër se sa ishim disa javë më parë… Mendoj se ajo që do të donim në Ohër është një njohje se asociacioni është një pjesë e rëndësishme e marrëdhënieve ndërmjet Kosovës dhe Serbisë. Dhe kur flas për këtë si kërkesë, nuk dua të jem konfrontues apo të nxjerrë një lloj sfide, është fakt që asociacioni ekziston në marrëveshjen e Brukselit, ekziston në këtë marrëveshje, është pjesë e konkluzioneve të këshillit evropian, është politika e Shteteve të Bashkuara, kështu që do të ndodhë, pyetja është se sa shpejt do të ndodhë”, theksoi ai.

I dërguari special i Shteteve të Bashkuara të Amerikës për Ballkanin Perëndimor, Gabriel Escobar nga Beografi ka thënë se nuk pret në Ohër që të ketë ndonjë nënshkrim, por pret bisedime e përparim në dialog.

Ai thotë se dakordimi për propozimin evropian është i nevojshëm sidomos për serbët në Kosovë.

Ndërsa, ka refuzuar të ndalet në aspektet negative në rast se nuk ndodh arritja për marrëveshjen e dakorduar më 27 shkurt në Bruksel.

“Duhet të kemi parasysh se një pjesë e asaj që do të bëjë kjo do të forcojë pozitën e serbëve në Kosovë, përmes zbatimit të asociacionit të komunave me shumicë serbe, kjo është një arsye tjetër pse e dëshirojmë këtë marrëveshje. Pra, kjo është një gjë që Evropa, Shtetet e Bashkuara dhe ne shpresojmë që të dyja palët ta kuptojnë është se kjo është një mundësi vërtet e mirë. Çfarë ndodh në rast se nuk kemi një mirëkuptim, nëse nuk kemi një marrëveshje, dhe me marrëveshje nënkuptoj kuptimin e gjerë të rrugës përpara, nuk pres domosdoshmërisht që të kemi një nënshkrim në njëfarë mënyre, por ne do të kemi një rrugë përpara. Nuk dua të ndalem në aspektet negative nëse nuk ndodh, dua të ndalem në mundësitë nëse fillojmë të ecim në atë rrugë, dhe mundësitë do të jenë jashtëzakonisht të dobishme për rajonin”, u shpreh Escobar.

I dërguar Special i SHBA-ve për Ballkanin Perëndimor, Gabriel Escobar u shpreh nga propozimi evropian përmirëson dhe investimet ekonomike për të dyja vendet dhe rajonin.

Nga konferenca në Beograd, Escobar u shpreh se në zgjedhjet e jashtëzakonshme të prillit në katër komunat në veri të Kosovës dëshirojnë të shohin pjesëmarrje të plotë të serbëve.

I dërguar Special i SHBA-ve për Ballkanin Perëndimor, Gabriel Escobar gjatë qëndrimit të tij në Beograd është takuar me kryeministrin serb, Aleksandër Vuçiq.

Kjo vizitë e Escobar në Beograd po ndodh 2 ditë para takimit të 18 marsit në Ohër ku pritet të takohen pala kosovar dhe ajo serbe.

Në këtë takim pritet të diskutohet për planin e zbatimit të propozimit evropian.

Për këtë propozim evropian kundërshtime kanë shprehur dy partitë më të mëdha opozitare në vend PDK dhe LDK.

Ndërsa, ditë më parë Kosovën dhe Serbinë e ka vizituar edhe i ngarkuari i Bashkimit Evropian për dialog, Miroslav Lajçak.

Aktualitet

UBT fton studiues dhe profesionistë për dorëzimin e abstrakteve në Konferencat e Shkencave Politike dhe Sigurisë

Published

on

UBT ka kënaqësinë të ftojë studiues, akademikë, profesionistë dhe studentë të interesuar të marrin pjesë në nënkonferencat Studime të Sigurisë dhe Shkenca Politike dhe Marrëdhënie Ndërkombëtare, pjesë e edicionit të 14-të Konferencës Ndërkombëtare të UBT-së për Biznes, Teknologji dhe Inovacion 2025.

Ky edicion i fokusuar në Qëndrueshmërinë dhe Reziliencën synon të sjellë së bashku ekspertë dhe studiues për të shkëmbyer ide, përvoja dhe rezultatet më të fundit kërkimore në fushat e sigurisë, shkencave politike dhe arsimit.

Konferenca për Studime të Sigurisë

Afatet e rëndësishme:

  • Dorëzimi i abstrakteve: 10 tetor 2025
  • Njoftimi për pranimin: 17 tetor 2025
  • Dorëzimi i punimeve të plota: 14 nëntor 2025
  • Regjistrimi i hershëm: 17 tetor 2025
  • Regjistrimi i vonshëm: 20 tetor 2025

Kjo konferencë synon të krijojë një platformë ku studiues dhe praktikues mund të japin një pasqyrë të fushës, të prezantojnë rezultatet më të fundit kërkimore dhe të shkëmbejnë ide dhe përvoja në shkencat politike dhe siguri.

Temat dhe objektivat kryesore përfshijnë:

  • Siguria njerëzore
  • Paqja dhe demokracia
  • Siguria kombëtare, rajonale dhe ndërkombëtare
  • Konfliktet pas Luftës së Ftohtë
  • Çështjet e sigurisë në Ballkanin Perëndimor
  • Konfliktet ndërshtetërore dhe etnike: shkaqet dhe zgjidhjet

Dorëzimi i punimeve:

Punimet duhet të jenë origjinale, të papublikuara më parë dhe të mos jenë në shqyrtim diku tjetër. Maksimumi i faqeve është 6. Punimet që nuk i plotësojnë kriteret e formatit nuk do të shqyrtohen.

Konferenca për Shkenca Politike dhe Marrëdhënie Ndërkombëtare

Afatet e rëndësishme:

  • Dorëzimi i abstrakteve: 10 tetor 2025
  • Njoftimi për pranimin: 17 tetor 2025
  • Dorëzimi i punimeve të plota: 14 nëntor 2025
  • Regjistrimi i hershëm: 17 tetor 2025
  • Regjistrimi i vonshëm: 20 tetor 2025

Kjo konferencë ndërkombëtare e shqyrtuar nga kolegët (peer-reviewed) ofron një mundësi për shkëmbimin e njohurive midis studiuesve inovativë, studentëve pasuniversitarë, kandidatëve doktoraturë dhe profesionistëve në arsim dhe zhvillim, si dhe në politikë dhe marrëdhënie ndërkombëtare. Edicioni i këtij viti fokusohet në ndërtimin e sistemeve arsimore të qëndrueshme për një të ardhme të qëndrueshme.

Temat kryesore përfshijnë:

  • Politikat publike dhe arsimi
  • Ekonomia politike dhe administrata publike
  • Demokracia, migracioni dhe politikat e integrimit
  • Digjitalizimi i proceseve zgjedhore dhe anti-korrupsioni në Ballkan
  • Siguria globale dhe kërcënimet ndërkombëtare
  • Terrorizmi, krimi i organizuar transnacional, lufta kibernetike
  • Arsimi në zonat e konfliktit dhe roli i tij në parandalimin e ekstremizmit të dhunshëm
  • Rikonstruksioni arsimor pas konflikteve dhe arsimi për refugjatët

Dorëzimi i punimeve:

Ashtu si për konferencën e sigurisë, punimet duhet të jenë origjinale, të papublikuara më parë dhe të mos jenë në shqyrtim diku tjetër. Maksimumi i faqeve është 6 dhe punimet që nuk i plotësojnë kriteret nuk do të konsiderohen.

Continue Reading

Aktualitet

UBT shpall thirrjen për Konferencën Ndërkombëtare të Gjuhës dhe Kulturës 2025

Published

on

UBT ka bërë hapjen e thirrjes për pjesëmarrje në Konferencën Ndërkombëtare të Gjuhës dhe Kulturës 2025 (IC-LAC), e cila këtë vit organizohet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion.

Ky aktivitet shkencor do të bashkojë studiues, akademikë, studentë të cikleve të avancuara, doktorantë, ekspertë të fushës dhe profesionistë të arsimit nga vende të ndryshme të botës, me synim shkëmbimin e njohurive, përvojave dhe praktikave më të mira mbi gjuhën, kulturën dhe ndërthurjen e tyre në sistemet bashkëkohore arsimore.

Tema kryesore e këtij edicioni është: “Ndërtimi i sistemeve arsimore reziliente për një të ardhme të qëndrueshme.”

Datat kryesore:

  • Dorëzimi i abstrakteve: 10 tetor 2025
  • Njoftimi i pranimit & rishikimi shkencor: 17 tetor 2025
  • Regjistrimi i hershëm: deri më 17 tetor 2025
  • Regjistrimi i vonuar: deri më 20 tetor 2025
  • Dorëzimi i punimit të plotë: 14 nëntor 2025

Qëllimet dhe objektivat

Konferenca IC-LAC synon të hapë një hapësirë të gjërë diskutimi mbi rolin e gjuhës dhe kulturës në shoqëritë moderne, duke nxitur qasje multidisiplinare për edukimin dhe komunikimin ndërkulturor.

Fushat e diskutimit përfshijnë:

  • Gjuha dhe kultura në arsim
  • Përdorimi i teknologjisë në mësimdhënie dhe të nxënë
  • Komunikimi ndërkulturor dhe shumëgjuhësia
  • Praktikat e qëndrueshme në edukimin gjuhësor
  • Inteligjenca artificiale dhe ndikimi i saj në të nxënit e gjuhëve
  • Përkthimi, interpretimi dhe komunikimi global
  • Rezilienca arsimore dhe dizajnimi i kurrikulave

Dorëzimi i punimeve

Punimet e paraqitura duhet të jenë origjinale, të papublikuara më parë dhe të mos jenë në proces shqyrtimi në konferenca të tjera. Gjatësia maksimale e një punimi është 6 faqe. Punimet që nuk respektojnë kriteret e formatimit nuk do të merren në konsideratë.

Organizatorët ftojnë të gjithë të interesuarit që të kontribuojnë me hulumtimet e tyre shkencore dhe praktikat profesionale, duke u bërë pjesë e një platforme ndërkombëtare shkëmbimi idesh që synon të forcojë lidhjen mes gjuhës, kulturës dhe arsimit për një të ardhme më të qëndrueshme.

Continue Reading

Lajmet

​Gjykata spanjolle liron Dani Alves-in

Published

on

Gjykata e Lartë e Katalonjës ka rrëzuar të premten dënimin për përdhunim ndaj ish-futbollistit brazilian Dani Alves, duke arsyetuar se çështja kishte mospërputhje dhe kontradikta në dëshmitë e paraqitura.

Alves, 41 vjeç, ishte dënuar vitin e kaluar me katër vjet e gjysmë burg për përdhunimin e një gruaje në një klub nate në Barcelonë në vitin 2022. Megjithatë, gjykata e apelit vendosi se dëshmia e akuzueses nuk kishte besueshmëri të mjaftueshme, duke theksuar se mungonin prova të qarta për të mbështetur akuzën.

“Dani Alves është shumë i lumtur. Ai është i pafajshëm, kjo është demonstruar. Drejtësia ka folur,” deklaroi avokatja e tij, Ines Guardiola.

Ndërkohë, avokatja e akuzueses, Ester Garcia, paralajmëroi se do ta çojë çështjen në Gjykatën Supreme të Spanjës, proces që mund të zgjasë deri në një vit./S.K/KP/Morung Express/

 

Continue Reading

Lajmet

Caktohet data, Pogba rikthehet në fushë

Published

on

Paul Pogba është shumë pranë rikthimit në futboll pas një periudhe të gjatë mungese tha trajneri i Monacos, Adi Hütter. Ai zyrtarisht ka konfirmuar se mesfushori francez po përparon ndjeshëm.

“Fizikisht dhe mendërisht po shkon mirë. Është stërvitur për tre muaj dhe është afër kthimit në skuadër,” deklaroi Hütter.

Sipas mediave franceze, Pogba pritet të jetë i disponueshëm më 5 tetor, në ndeshjen e Ligue 1 kundër Nice në Stade Louis II.

Ndërkohë, rikthimi në sfidën e së shtunës kundër Lorient shihet më pak i mundshëm.

Ish-mesfushori i Juventusit nuk ka luajtur një ndeshje zyrtare që prej 3 shtatorit 2023, kur u aktivizua ndaj Empolit.

Pak javë më vonë, ai u pezullua për doping dhe u dënua fillimisht me katër vite jashtë fushave. Megjithatë, në tetor 2024, Gjykata e Arbitrazhit Sportiv uli ndalimin në 18 muaj, që skadoi më 11 mars 2025.

Pas ndarjes me Juventusin, Pogba refuzoi një transferim në MLS dhe verën e kaluar nënshkroi një kontratë dyvjeçare me Monacon, e vlefshme deri më 30 qershor 2027.

Klubi monegask e ka regjistruar 31-vjeçarin edhe për Ligën e Kampionëve, ku pritet të rikthehet në tetor.

Ky rikthim do të shënojë një moment të rëndësishëm për kampionin e botës 2018, i cili synon të rifitojë formën dhe të lërë pas periudhën më të vështirë të karrierës së tij./S.K/KP/CNN/

Continue Reading

Të kërkuara