Aktualitet

Erdogan: Nëse BE-ja dëshiron të forcohet, mund ta arrijë vetëm me anëtarësimin e Turqisë

Published

on

Presidenti turk Recep Tayyip Erdogan nënvizoi rëndësinë e rolit strategjik të Turqisë për Bashkimin Evropian, teksa u takua të mërkurën me kryeministrin e Polonisë në Ankara.

“Nëse Bashkimi Evropian dëshiron të parandalojë apo të ndryshojë humbjen e pushtetit dhe ndikimit të tij, mund ta arrijë këtë përmes anëtarësimit të plotë të Turqisë”, tha Erdogan në një konferencë të përbashkët shtypi pas një takimi dypalësh me kryeministrin polak Donald Tusk në Kompleksin Presidencial.“Ne theksojmë se anëtarësimi i plotë në BE mbetet objektivi ynë strategjik. Ne diskutojmë shpesh me homologët tanë dëshirën për të çuar përpara bashkëpunimin me BE bazuar në përfitimin dhe respektin reciprok”, tha Erdogan.

Ai vuri në dukje se të dy udhëheqësit patën mundësinë të diskutojnë hapat e mundshëm për t’i dhënë fund luftës në Ukrainë dhe gjithashtu shkëmbyen pikëpamje mbi të ardhmen e sigurisë evropiane dhe çështjet rajonale, duke përfshirë Sirinë dhe Palestinën.

“Ne e konsiderojmë pranimin e armëpushimit nga Ukraina si pozitive dhe të rëndësishme. Tani shpresojmë se Rusia do të përgjigjet në mënyrë konstruktive”, tha lideri turk.

Ai përsëriti gatishmërinë e Turqisë për të pritur çdo bisedim të mundshëm të paqes, duke thënë: “Nëse zhvillimet e fundit çojnë Rusinë dhe Ukrainën në tryezën e bisedimeve, ne jemi të gatshëm të lehtësojmë diskutimet”.

Bëhet e ditur se anëtari i NATO-s, Turqia, ka kërkuar të mbajë marrëdhënie të mira me fqinjët e saj në Detin e Zi, me Erdoganin duke e paraqitur veten si një ndërmjetës kyç dhe paqebërës i mundshëm midis dy vendeve në luftë.

Nga ana e tij, Tusk shprehu shpresën se Ankaraja do të luajë një rol kyç në promovimin e paqes, shkruajnë mediat e huaja, përcjell Telegrafi.

“I bëra një propozim të qartë presidentit Erdogan: që Turqia të marrë përgjegjësinë më të madhe të mundshme në procesin e paqes, duke siguruar stabilitet dhe siguri në të gjithë rajonin tonë”, tha ai.

Tusk ndër tjera vuri në dukje se Erdogan do të vizitojë Varshavën muajin e ardhshëm.

“Po bëhet e qartë se armëpushimi dhe paqja është synim për Poloninë, Turqinë dhe SHBA-në. Gjithçka jep shpresë se Turqia dhe Polonia do t’i japin ton pozitiv ngjarjeve në Ukrainë dhe Evropë”, tha Tusk.

Kryeministri polak njoftoi se Turqia dhe Polonia do të punojnë së bashku për të arritur stabilitet në Siri dhe rajon.

Tusk shprehu dëshirën e tij për ta parë Turqinë në BE, duke thënë: “Ne me të vërtetë shpresojmë që procesi i hyrjes së Turqisë në BE tani është një proces realist dhe i prekshëm. Ne gjithmonë e kemi mbështetur Turqinë në këtë drejtim dhe do të vazhdojmë ta bëjmë këtë”.

Ai tha se ata duan që vëllimi i tregtisë mes dy vendeve të arrijë në 15 miliardë dollarë dhe se ai beson se do ta arrijnë këtë, dhe se ato tashmë i kanë kaluar 12 miliardë dollarë. Duke thënë se stabilizimi i rajonit është qëllimi i Polonisë, Tusk theksoi se rindërtimi i Ukrainës është gjithashtu një nga qëllimet dhe se kjo është një mundësi si për kompanitë polake ashtu edhe për ato turke.

Tusk tha se kanë pasur mundësinë të marrin pjesë dhe në projekte të mëdha, duke shtuar se po planifikojnë të punojnë në ndërtimin e një sistemi trenash të shpejtë dhe se Turqia ka përvojë në këtë fushë. Para se të nisej nga Varshava, Tusk theksoi rëndësinë që NATO dhe vendet evropiane të punojnë së bashku në mënyrë efektive për të garantuar stabilitet përgjatë kufirit Rusi-Ukrainë pas çdo armëpushimi.

“Roli i Turqisë mund të jetë vendimtar në këtë drejtim”, shtoi ai.

 

 

 

Bota

Izraeli synon ta sundojë tërë Rripin e Gazës për kohë të papërcaktuar, sipas zyrtarëve

Published

on

By

Izraeli e ka aprovuar një plan të hënën për ta uzurpuar tërë Rripin e Gazës dhe për të qëndruar në territorin palestinez për një kohë të papërcaktuar, sipas dy zyrtarëve izraelitë.

Ky plan, nëse zbatohet, do t’i zgjerojë jashtëzakonisht shumë operacionet e Izraelit në Gazë dhe me shumë gjasë do të përballet me kundërshtime të ashpra ndërkombëtare.

Ministrat e kabinetit izraelit e miratuan planin në orët e hershme të mëngjesit, disa orë pasi shefi i ushtrisë izraelite tha se ushtria po i thërriste dhjetëra mijëra ushtarë rezervistë.

Zyrtarët thanë se me këtë Izraeli synon t’i arrijë synimet e luftës për ta mposhtur Hamasin – grupin e shpallur terrorist nga SHBA dhe BE – dhe për t’i liruar pengjet që mbahen në Gazë.

Plani gjithashtu parashikon që qindra mijëra palestinezë të zhvendosen në jug të Gazës – gjë që nënkupton se me gjasë ata do të zhvendosen me forcë dhe se kriza e rëndë humanitare veçse do të përkeqësohet.

Njëri nga zyrtarët tha se plani do të zbatohet dalëngadalë për t’u dhënë mundësi përpjekjeve për arritjen e një armëpushimi dhe marrëveshjeje për lirimin e pengjeve. Të dy zyrtarët folën në kushte anonimiteti.

Izraeli u tërhoq nga Gaza në vitin 2005 pas një okupimi disa dekadësh dhe më pas e vendosi një bllokadë ndaj territorit bashkë me Egjiptin.

Kapja dhe mbase pushtimi i territorit sërish për kohë të pacaktuar jo vetëm që do t’i shuante edhe më shumë shpresat për një shtet palestinez, por do ta vendoste Izraelin brenda një popullsie thellësisht armiqësore ndaj tij dhe do të ngrinte pyetje për mënyrën se si Izraeli synon ta qeverisë territorin, veçanërisht në një kohë kur po shqyrton zbatimin e vizionit të presidentit amerikan, Donald Trump, për të marrë nën kontroll Gazën.

Prej se i dha fund armëpushimit me grupin militant Hamas në mes të marsit, Izraeli ka kryer sulme të ashpra në territor, duke vrarë qindra njerëz. Ai ka kapur pjesë të mëdha të territorit dhe tani kontrollon rreth 50% të Gazës.

Para përfundimit të armëpushimit, Izraeli i ndaloi të gjitha ndihmat humanitare për në territor, përfshirë ushqimin, karburantin dhe ujin, duke shkaktuar atë që besohet të jetë kriza më e rëndë humanitare në gati 19 muaj luftë.

Ndalimi i ndihmave ka shkaktuar uri të madhe dhe mungesat e ushqimeve kanë nxitur plaçkitje. Lufta ka zhvendosur tashmë më shumë se 90 për qind e popullsisë së Gazës, shpeshherë disa herë, dhe ka kthyer shumë pjesë të saj në tokë të pabanueshme.

Lufta filloi kur militantë të udhëhequr nga Hamasi sulmuan Izraelin jugor, duke vrarë 1.200 njerëz dhe duke marrë rreth 250 pengje. Izraeli thotë se 59 pengje mbeten në Gaza, megjithëse besohet se rreth 35 prej tyre janë të vdekur.

Lufta e Izraelit i ka vrarë më shumë se 52.000 njerëz në Gazë, shumë prej tyre gra dhe fëmijë, sipas zyrtarëve shëndetësorë palestinezë.

Zyrtarët izraelitë thanë se plani përfshin “kapjen e Rripit dhe mbajtjen e territoreve”. Plani gjithashtu synon të mos e lejojë Hamasin t’i shpërndajë ndihmat humanitare, pasi Izraeli thotë se shpërndarja e ndihmave ndërkombëtare nga ky grup forcon sundimin e grupit në Gazë.

Izraeli gjithashtu e akuzon Hamasin se i mban ndihmat për vete, megjithëse nuk ka dhënë dëshmi për këtë. Punonjësit e ndihmës e mohojnë se ka devijime të konsiderueshme të ndihmës për militantët, duke thënë se OKB-ja e mbikëqyr rreptësishtë shpërndarjen e ndihmave.

Zyrtarët thanë se Izraeli është në kontakt me disa vende për planin e Trumpit për ta marrë nën kontroll Gazën dhe për ta zhvendosur popullsinë e saj, sipas asaj që Izraeli e quan “emigrim vullnetar”.

Ky propozim është dënuar gjerësisht, përfshirë edhe nga aleatët e Izraelit në Evropë, dhe grupet për të drejtat e njeriut kanë paralajmëruar se kjo mund të përbëjë krim lufte sipas ligjit ndërkombëtar./REL/

Continue Reading

Bota

BE synon ndalimin e plotë të gazit rus deri në fund të 2027

Published

on

By

Bashkimi Evropian pritet të propozojë zyrtarisht një plan për ndalimin e importeve të gazit nga Rusia deri në fund të vitit 2027, si pjesë e përpjekjeve për të shkëputur varësinë energjetike nga Moska, raportoi Bloomberg të hënën.

Sipas burimeve të brendshme të BE-së, Komisioni Evropian do të paraqesë muajin e ardhshëm një propozim që synon ndalimin e të gjitha marrëveshjeve të reja dhe kontratave spot për gazin rus, përfshirë si gazin përmes tubacioneve, ashtu edhe gazin natyror të lëngshëm (LNG). Këto masa, që përfshijnë kontratat e shkurtra, parashikohet të hyjnë në fuqi jo më vonë se fundi i vitit 2025.

Importet ruse të gazit në BE ranë nga mbi 40% para pushtimit të Ukrainës, në rreth 19% vitin e kaluar. Por, ndërkohë që furnizimet përmes tubacioneve janë reduktuar ndjeshëm nga Gazprom, importet e LNG-së ruse kanë arritur nivele rekord – duke u bërë sfida kryesore për pavarësinë energjetike të bllokut.

Sipas planit, kontratat afatgjata me kushte të rrepta “merr ose paguaj” do të jenë më të vështirat për t’u anuluar. Ndalimi total i tyre është planifikuar për vitin 2027, por afati mund të ndryshojë në varësi të sigurimit të burimeve alternative nga SHBA, Katari, Kanadaja dhe Afrika.

Bisedimet për furnizime të shtuara me LNG nga SHBA janë pjesë e negociatave tregtare në zhvillim me administratën e Donald Trump, sipas raportit të Bloomberg.

Plani pritet të ketë ndikim të ndjeshëm në çmimet e energjisë dhe sigurinë energjetike në Evropë, për shkak të kërkesës në rritje globale për LNG në vitet e ardhshme.

Continue Reading

Bota

Refuzoi armëpushimin nga Putin, Zelensky: E dimë se me kë kemi të bëjmë

Published

on

By

Presidenti rus Vladimir Putin ka urdhëruar një armëpushim tre-ditor gjatë përvjetorit të përfundimit të Luftës së Dytë Botërore në Evropë, duke e cilësuar si një provë për gatishmërinë e Ukrainës për një armëpushim të qëndrueshëm.

Por Presidenti ukrainas Volodymyr Zelensky e hodhi poshtë menjëherë këtë ide, duke thënë se “nuk ka besim” tek premtimet e Moskës.

Gjatë një konference të përbashkët me Presidentin çek Petr Pavel në Pragë, Zelensky tha se Rusia po flet për një armëpushim, ndërsa njëkohësisht kryen më shumë se 200 sulme në një ditë të vetme – shifra më e lartë në muajt e fundit, sipas një raporti ushtarak ukrainas.

Ne e dimë me kë kemi të bëjmë. Kjo nuk është hera e parë që Rusia premton ndalimin e zjarrit. Dhe çdo herë është një mashtrim”, tha Zelensky, i cili ndodhet në Çeki për një vizitë dy-ditore së bashku me bashkëshorten e tij.

Ai njoftoi gjithashtu se po zhvillohen diskutime për krijimin e një shkolle trajnimi për pilotë ukrainas në Çeki, për avionët amerikanë F-16, projekt që nuk mund të realizohet në Ukrainë për arsye sigurie.

Presidenti çek, një ish-gjeneral i NATO-s, theksoi se “Putini mund ta përfundojë luftën me një vendim të vetëm, por deri tani nuk ka treguar asnjë vullnet për ta bërë këtë”.

Republika Çeke mbetet një nga mbështetësit më të fuqishëm të Ukrainës, me ndihma ushtarake, humanitare dhe përpjekje të koordinuara evropiane për furnizim me municion. “Iniciativa çeke e artilerisë po funksionon shkëlqyeshëm”, deklaroi Zelensky.

Dita e hënë pritet të sjellë takime të tjera të nivelit të lartë mes Zelenskyt dhe drejtuesve politikë të Çekisë, përfshirë kryeministrin Petr Fiala dhe krerët e parlamentit.

Continue Reading

Bota

Trump pritet të takohet me Putinin në Arabinë Saudite në maj

Published

on

By

Presidenti i SHBA-së, Donald Trump, tha se do të shqyrtonte një takim të mundshëm me homologun e tij rus, Vladimir Putin, në Arabinë Saudite gjatë vizitës së tij në mbretëri në mesin e majit.

Gazetarët e pyetën udhëheqësin amerikan nëse kishte ndërmend të takohej me homologun e tij rus gjatë udhëtimit të tij të planifikuar. “Nuk e di, duhet të mendojmë për këtë. Nuk kam menduar për këtë,” u përgjigj Trump.

“Do të nisemi për në Arabinë Saudite shumë shpejt”, shtoi udhëheqësi i SHBA-së.

Më parë, zëdhënësja e Departamentit të Shtetit të SHBA-së, Tammy Bruce, tha se komunikimi midis udhëheqësve të Rusisë dhe Shteteve të Bashkuara është i nevojshëm në çështjen e zgjidhjes së krizës ukrainase. Putin dhe Trump zhvilluan një bisedë telefonike më 18 mars, gjatë së cilës diskutuan një armëpushim 30-ditor në konfliktin ukrainas, kushtet për parandalimin e përshkallëzimit dhe një numër çështjesh ndërkombëtare.

Udhëheqësi rus u pajtua me propozimin e Trump që palët në konflikt në Ukrainë të përmbahen reciprokisht nga sulmet ndaj objekteve të infrastrukturës energjetike.

Trump ka pranuar më parë se mund të zhvillojë një takim me udhëheqësin rus pas udhëtimit të tij në Lindjen e Mesme, gjatë të cilit do të vizitojë Arabinë Saudite, Katarin dhe Emiratet e Bashkuara Arabe midis 13 dhe 16 majit.

Continue Reading

Të kërkuara