Në Parkun Shkencor, Inovativ dhe Teknologjik të UBT-së në Lipjan u promovua libri universitar “Rezistenca e Materialeve – 2”, i autorit Prof. Ass. Dr. Naser R. Morina, një botim akademik që synon të avancojë literaturën profesionale në fushën e inxhinierisë së ndërtimit në Kosovë.

Në ceremoninë e promovimit morën pjesë profesorë, studentë, kolegë të profesionit, të cilët vlerësuan kontributin shumëvjeçar të Prof. Morinës në arsim, shkencë dhe zhvillimin e literaturës universitare në gjuhën shqipe.

Rektori i UBT-së, Prof. Dr. Edmond Hajrizi, vlerësoi librin si një kontribut të rëndësishëm për studentët dhe zhvillimin e arsimit inxhinierik në vend, duke potencuar rëndësinë e krijimit të literaturës autentike universitare.

“Ky është një kontribut shumë i vlefshëm për studentët dhe për gjeneratat e reja të inxhinierëve. Fusha e teknikës dhe teknologjisë kërkon kuptim të thellë të formulave, llogaritjeve dhe bazës shkencore, prandaj literatura profesionale është esenciale”, deklaroi Rektori Hajrizi.

Ai shtoi se UBT po ndërton një kulturë të fuqishme të botimeve akademike dhe se profesorët e institucionit po krijojnë literaturë që i shërben drejtpërdrejt zhvillimit të arsimit të lartë dhe industrisë.

“Është shumë e rëndësishme që profesorët tanë të krijojnë literaturën e tyre universitare. Kjo i ndihmon studentët të kenë materiale më konkrete dhe më të orientuara drejt praktikës profesionale. Sot, UBT ka mbi 100 botime universitare dhe kjo është një ndër arritjet më të mëdha akademike në vend”, tha ai.

Dekani i Fakultetit të Inxhinierisë së Ndërtimit dhe Infrastrukturës në UBT, gjatë fjalës së tij, tha se promovimi i librave universitarë paraqet një moment të rëndësishëm për zhvillimin akademik të institucionit dhe për avancimin e edukimit në fushat teknike.

“Është nder për fakultetin dhe për institucionin tonë që të jemi pjesë e promovimit të një libri universitar në fushën e inxhinierisë. Në disiplinat teknike, krijimi i literaturës profesionale në gjuhën shqipe është një proces i domosdoshëm për studentët dhe për standardet akademike”, u shpreh ai.

Autori i librit, Prof. Ass. Dr. Naser R. Morina, falënderoi UBT-në për mbështetjen e vazhdueshme në botimin e literaturës universitare dhe tregoi se libri është ndërtuar mbi standardet dhe praktikat evropiane të inxhinierisë.

“Libri është përgatitur sipas standardeve të Bashkimit Evropian dhe trajton tema që janë të nevojshme jo vetëm për studentët, por edhe për inxhinierët profesionistë që merren me ndërtimtari dhe zhvillim infrastrukturor”, u shpreh Morina.

Libri “Rezistenca e Materialeve – 2” trajton përmbajtje teorike dhe praktike nga fusha e rezistencës së materialeve, duke ofruar njohuri të avancuara për studentët e inxhinierisë, arkitekturës dhe profesionistët e ndërtimtarisë.

Në kuadër të angazhimit të vazhdueshëm për ndërlidhjen e teorisë me praktikën dhe avancimin e përvojës profesionale të studentëve, studentët e vitit të dytë të Fakultetit Menaxhment, Biznes dhe Ekonomi në UBT realizuan një vizitë studimore në korporatën SPEEEX, në kuadër të lëndës Hyrje në Burime Njerëzore, të udhëhequr nga prof. Kujtim Zylfijaj.

Kjo vizitë kishte për qëllim t’u ofrojë studentëve mundësinë për të parë nga afër funksionimin e proceseve moderne të menaxhimit të Burimeve Njerëzore dhe aplikimin praktik të njohurive të fituara gjatë studimeve. Përmes aktiviteteve të tilla, Fakulteti Menaxhment, Biznes dhe Ekonomi vazhdon të dëshmojë përkushtimin ndaj një qasjeje bashkëkohore të mësimdhënies, e cila i përgatit studentët për tregun dinamik të punës dhe sfidat reale të biznesit.

Gjatë vizitës, studentët u pritën nga përfaqësues të Departamentit të Burimeve Njerëzore dhe Departamentit të Edukimit të korporatës SPEEEX, të cilët prezantuan praktikat më të avancuara të menaxhimit të kapitalit njerëzor në një kompani moderne. Prezantimet përfshinë tema të rëndësishme si përdorimi i inteligjencës artificiale (AI) në proceset e punës, rekrutimi dhe përzgjedhja e stafit, menaxhimi i performancës dhe shpërblimeve, zhvillimi profesional i punonjësve, motivimi në vendin e punës si dhe ndërtimi i kulturës organizative.

Studentët patën rastin të diskutojnë drejtpërdrejt me profesionistë të fushës, të shtrojnë pyetje dhe të kuptojnë më mirë sfidat dhe praktikat reale të menaxhimit të Burimeve Njerëzore në sektorin privat. Një interes të veçantë zgjuan praktikat inovative që kompania aplikon në zhvillimin dhe mbështetjen e stafit, si dhe integrimi i teknologjive moderne në proceset organizative.

Vizita studimore u karakterizua nga një organizim dhe mikpritje profesionale nga korporata SPEEEX, duke krijuar një ambient inspirues për bashkëbisedim, shkëmbim përvojash dhe orientim profesional për studentët. Pjesëmarrësit vlerësuan lartë përmbajtjen praktike të prezantimeve dhe mundësinë për të parë nga afër standardet profesionale të një korporate të suksesshme.

Fakulteti Menaxhment, Biznes dhe Ekonomi është i përkushtuar në organizimin e aktiviteteve të tilla akademike dhe profesionale, të cilat kontribuojnë në zhvillimin e kompetencave praktike të studentëve dhe në krijimin e urave të bashkëpunimit ndërmjet universitetit dhe industrisë. Vizitat studimore, trajnimet profesionale dhe bashkëpunimet me kompani vendore dhe ndërkombëtare janë pjesë e rëndësishme e misionit të fakultetit për të përgatitur kuadro të gatshme për tregun e punës dhe zhvillimin ekonomik të vendit.

Në kuadër të lëndës “Psikologji e Edukimit dhe Teoritë e të Mësuarit”, të ligjëruar nga profesoreshat Denis Celcima dhe Diana Sejdiu Shala, studentët e Fakultetit të Psikologjisë në UBT patën mundësinë të ndjekin një ligjëratë të veçantë nga ish-studentja e UBT-së, Anila Shala, e cila trajtoi temën e orientimit në karrierë.

Gjatë ligjëratës, u diskutua për rëndësinë e orientimit profesional dhe faktorët personalë, socialë dhe mjedisorë që ndikojnë në zgjedhjen e karrierës së individëve. Studentët u njohën me sfidat dhe mundësitë që lidhen me procesin e vendimmarrjes profesionale, si dhe me rolin që kanë institucionet arsimore dhe profesionistët e psikologjisë në këtë proces.

Anila Shala ndau gjithashtu me studentët e vitit të dytë të programit të Psikologjisë gjetjet e hulumtimit të saj të realizuar në bashkëpunim me profesorin Qufli Osmani, i cili fokusohet në orientimin në karrierë të nxënësve në Kosovë. Prezantimi ofroi një pasqyrë të vlefshme mbi faktorët që ndikojnë në zgjedhjet profesionale të të rinjve dhe rëndësinë e mbështetjes profesionale në këtë fazë të zhvillimit të tyre.

Aktualisht, Anila Shala është duke ndjekur studimet master në programin Psikologji Klinike, Sociale dhe Ndërkulturore në Universitetin e Padovës në Itali, duke vazhduar rrugëtimin e saj akademik dhe profesional në një nga universitetet më të njohura evropiane.

Stafi i UBT-së po merr pjesë në Javën Ndërkombëtare që po organizohet nga Technical University of Sofia, në Bullgari, ku po prezantohen zhvillimet më të fundit në teknologji, inteligjencë artificiale, inovacion dhe kërkim shkencor nga universitete dhe institucione të ndryshme ndërkombëtare.

Në kuadër të këtij aktiviteti, Rektori i UBT-së, Prof. Dr. Edmond Hajrizi, prezantoi temën “UBT AI Fully Empowered Smart Sustain Society System – Case Studies from Education, Research, Innovation, Developments and Businesses”, përmes së cilës shpalosi modelin inovativ të UBT-së në integrimin e inteligjencës artificiale në arsim, kërkim shkencor, zhvillim teknologjik dhe industri.

Gjatë prezantimit, Rektori Hajrizi prezantoi vizionin strategjik të UBT-së për ndërtimin e një ekosistemi të plotë të mbështetur nga inteligjenca artificiale, duke theksuar se UBT është institucioni që ka lansuar ekosistemin e parë plotësisht AI-powered në Evropë, një model që integron proceset akademike, kërkimore, administrative dhe shërbimet për studentët në një platformë të vetme inteligjente dhe të automatizuar.

Ai potencoi se ky ekosistem u mundëson studentëve, stafit dhe partnerëve institucionalë një përvojë të personalizuar, vendimmarrje të bazuar në të dhëna, automatizim të proceseve dhe qasje të avancuar në teknologji digjitale, duke e pozicionuar UBT-në dhe Kosovën në hartën globale të inovacionit dhe zhvillimit high-tech.

Një fokus i veçantë i konferencës po i kushtohet edhe prezantimeve të stafit akademik dhe hulumtues të UBT-së, të cilët po kontribuojnë me tema të avancuara shkencore në fushën e inteligjencës artificiale, automatizimit, rrjeteve inteligjente dhe teknologjive moderne.

Në mesin e prezantimeve të stafit të UBT-së janë:

“A Hybrid Graph-Coloring and Metaheuristic Framework for Resource Allocation in Dynamic E-Health Wireless Sensor Networks” nga Besnik Qehaja;

“AI-driven personalized timetabling at UBT, a hybrid ML + CP-SAT approach for working students” nga Naim Llumnica;

“AI in Automation Industry – Automating License Plate Recognition for Kosovar Vehicles: A Robust YOLOv8 and EasyOCR Pipeline” nga Rigon Pira.

Pjesëmarrja e gjerë e stafit të UBT-së në këtë aktivitet dëshmon angazhimin e institucionit në promovimin e kërkimit shkencor, inovacionit dhe bashkëpunimit ndërkombëtar, si dhe fuqizimin e rolit të profesorëve dhe hulumtuesve në zhvillimin e teknologjive të së ardhmes.

Java Ndërkombëtare në Technical University of Sofia ka bërë bashkë institucione të arsimit të lartë, profesorë, studiues dhe ekspertë nga vende të ndryshme të Evropës dhe më gjerë, duke krijuar një platformë për shkëmbim përvojash, bashkëpunime akademike dhe prezantim të praktikave më inovative në arsimin e lartë dhe teknologji.