Lufta në Ukrainë e ka pozicionuar me shpejtësi TikTok-un si burimin numër një të dezinformatave falë numrit gjigant të përdoruesve dhe filtrimit minimal të përmbajtjes, thonë ekspertët.

“TikTok me të vërtetë nuk po kalon një luftë të mirë”, tha Shayan Sardarizadeh, një gazetar në ekipin e dezinformimit të BBC-së për AFP.

“Nuk kam parë një platformë tjetër me kaq shumë përmbajtje false”, shtoi ai.

“Ne i kemi parë të gjitha: video nga konfliktet e kaluara të ricikluara, pamje të vërteta të paraqitura në një mënyrë mashtruese, gjëra që janë shumë të rreme, por ende marrin dhjetëra miliona shikime”.

Ai tha se më shqetësueset ishin transmetimet e drejtpërdrejta të rreme ku përdoruesit pretendonin se ishin në Ukrainë, por në fakt po përdornin pamje nga konflikte të tjera apo edhe video lojëra – dhe më pas kërkonin para për të mbështetur “raportimin” e tyre.

Anastasiya Zhyrmont e Access Now, një grup avokues, tha se nuk ishte justifikim për të thënë se lufta erdhi si një surprizë.

“Ky konflikt është përshkallëzuar që nga viti 2014 dhe këto probleme të propagandës dhe dezinformimit të Kremlinit janë ngritur me TikTok shumë kohë përpara pushtimit”, tha ajo për AFP.

“Ata kanë premtuar se do të dyfishojnë përpjekjet e tyre dhe do të bashkëpunojnë me kontrolluesit e përmbajtjes, por nuk jam e sigurt se po e marrin seriozisht këtë”, shtoi ajo.

Zhyrmont tha se problemi mund të qëndrojë në mungesën e moderatorëve të përmbajtjes në gjuhën ukrainase, duke e bërë më të ndërlikuar për TikTok-un që të dallojë informacione të rreme.

NewsGuard zhvilloi një eksperiment për të parë se sa kohë do t’u duhej përdoruesve të rinj që të fillonin të merrnin informacione të rreme nëse do të qëndronin në video për luftën. Përgjigja ishte 40 minuta.

Të gjithë të intervistuarit theksuan se dezinformimi është i përhapur në të gjitha mediat sociale, por se TikTok kishte bërë edhe më pak se Facebook, Instagram ose Twitter për ta luftuar atë./UBTNews/