Lajmet

Edhe “karantinë e vizave” për qytetarët e Kosovës

Published

5 years ago

May 6, 2021

Betim Gashi

Hylije Mustafa nga Prishtina nuk mund të shkojë në Gjermani për një trajnim profesional, sepse Ambasada gjermane në Kosovë, gjatë pandemisë së koronavirusit, “ka reduktuar ndjeshëm kapacitetet e pranimit të kërkesave për viza”.

Mustafa, e cila është mjeke me profesion, thotë për Radion Evropa e Lirë se qytetarët e Kosovës edhe më herët janë përballur me vështirësi në udhëtime, për shkak të regjimit të vizave.

Por, shton se gjatë vitit të fundit, udhëtimi në ndonjë vend të BE-së është pothuajse i pamundur.

“Gjatë pandemisë, udhëtimi është bërë edhe më i vështirë”, thotë Mustafa.

Kosova është i vetmi vend në rajonin e Ballkanit Perëndimor që nuk i është miratuar liberalizimi i vizave.

Viza Shengen, vetëm në disa raste

Zyra greke për Ndërlidhje me Kosovën, e cila lëshon të ashtuquajturat “viza Shengen”, konfirmon po ashtu se procesi i marrjes së vizave për qytetarët e Kosovës gjatë pandemisë është vështirësuar.

Këto viza janë të vlefshme për udhëtime në çdo vend të zonës Shengen, përveç Greqisë. Zona Shengen përfshin Gjermaninë, Francën, Austrinë, Belgjikën, Italinë, dhe vendet e tjera anëtare të BE-së.

“Departamenti konsullor i Zyrës Ndërlidhëse greke në Prishtinë kurrë nuk ka ndaluar lëshimin e vizave gjatë pandemisë, por për shkak të kufizimeve në kalimin e kufijve në të gjitha vendet, përfshirë Greqinë, vizat mund t’u lëshohen vetëm personave të angazhuar në punë të veçantë ose në raste urgjente serioze”, tha për Radion Evropa e Lirë Zyra greke në Kosovë.

Gjatë pandemisë, në agjencitë turistike në Kosovë mund të gjenden kryesisht oferta për udhëtime në vendet e rajonit, si Shqipëria apo Mali i Zi, por edhe në Turqi, sepse për hyrjen në këtë vend, nuk duhet vizë.

Disa vaksina i hapin shanset

Më 3 maj, Komisioni Evropian propozoi lehtësimin e kufizimeve të udhëtimeve për qytetarët e të ashtuquajturave vende të treta, e në të cilat bën pjesë edhe Kosova.

Por, lehtësimi i masave do të vlejë për ata që kanë marrë një vaksinë kundër koronavirusit, të miratuar nga Agjencia Evropiane e Barnave (EMA).

Kjo nënkupton që ata që kanë marrë vaksinën Pfizer/BioNTech, Moderna, Johnson&Johnson ose AstraZeneca, mund të udhëtojnë në vendet evropiane.

Hylije Mustafa, si punonjëse shëndetësore, ka marrë dozën e parë të vaksinës AstraZeneca dhe shpreson se pas marrjes së dozës së dytë, do të ketë më shumë shanse për të siguruar vizën për udhëtim.

“Nëse kam provë se e kam marrë vaksinën, mund të jetë më lehtë të marr një vizë në të ardhmen”, thotë ajo.

Nga Ministria e Shëndetësisë e Kosovës thonë se “çdo qytetar që merr vaksinën kundër koronavirusit, merr edhe një kartë që dëshmon se ka marrë një ose dy doza të vaksinës, datën e pranimit, llojin e vaksinës dhe të dhëna të tjera personale”.

Më 4 maj, në Kosovë kanë arritur mbi 4,000 doza të vaksinës Pfizer/BioNTech, si donacion nga Bashkimi Evropian.

“Pjesa tjetër, rreth 90,000 doza që i ka ndarë BE-ja për Kosovën, do të arrijnë brenda një jave”, thanë në Ministrinë e Shëndetësisë, duke vënë po ashtu në dukje se një kontingjent tjetër i vaksinave AstraZeneca duhet të arrijë në Kosovë javën e ardhshme.

Kontingjenti i parë me 24,000 doza të vaksinës AstraZeneca ka arritur në Kosovë më 28 mars, nga programi COVAX i Organizatës Botërore të Shëndetësisë.

Dozën e parë të kësaj vaksine, në kuadër të fazës së parë të imunizimit, e kanë marrë punonjësit shëndetësorë, personat mbi 80 vjeç dhe ata me sëmundje kronike. Ata duhet ta marrin dozën e dytë kur të mbërrijnë vaksinat shtesë të kompanisë AstraZeneca.

Në fazën e dytë pritet të vaksinohet njerëzit e moshës 65 deri 79 vjeç, personat e sëmurë kronikë, personeli mësimor dhe forcat e sigurisë, të cilat janë të përfshira në menaxhimin e situatës gjatë pandemisë së koronavirusit.

Në fazën e tretë do të fillojë vaksinimi masiv i qytetarëve, por Ministria e Shëndetësisë e Kosovës nuk mund të specifikojë se kur mund të fillojë.

Vendi

Kuvendi shqyrton Bordin e Paqes, opozita kundërshton Projektligjin për Byronë

Published

2 hours ago

April 24, 2026

UBTNews

Kuvendi i Kosovës sot pritet të shqyrtoje edhe Projektligjin për anëtarësimin e Kosovës në Bordin e Paqes. Kjo pasi propozimi i partisë në pushtet për futjen në rend dite u përkrah edhe nga opozita.

Ndërkohë që opozita nuk është pajtuar që në rend dite të futen disa projektligjeve të tjera, përfshirë atë për Byronë shtetërore për verifikimin dhe konfiskimin e pasurisë së pajustifikueshme, duke thënë se nuk kanë kaluar në Komisione në lexim të dytë.

“Ne jemi që marrëveshja e Bordit të paqes të futet si pikë e rendit të ditës. Ndërsa për të tjerat jemi kundër. Nuk mund ta trajtojmë byronë këtu pa kaluar në lexim të dytë në Komisionin për Legjislacion”, ka theksuar deputeti i PDK-së Përparim Gruda.

Njëjt është deklaruar edhe deputetja e LDK-së Jehona Lushaku.

“Në përkrahim pikën për Bordin e Paqes ndërkohë që nuk përkrahim futjen e projektligjeve të tjera sidomos, atyre që nuk kanë kaluar në lexim të dytë në komisione”, ka theksuar ajo.

Partia në pushtet e ka arsyetuar urgjencën më situatën në të cilën gjendet Kuvendi, i cili do të shpërndahet automatikisht, nëse presidenti nuk zgjidhet deri më 28 prill.

“Sa i përket Projektligjit për Byronë ne jemi njoftuar që dëgjimi publik është finalizuar, ndërkohë urgjenca për këtë është pasur parasysh rrethanat që ndodhemi si Kuvend. Ndërkaq dy projektligjet për energjinë, tashmë si Kuvend kemi pranuar edhe një shkresë nga Sekretariati i Komitetit të Energjisë, janë pjesë e planit të rritjes”, ka thënë shefja e Grupit Parlamentar të Vetëvendosjes, Arbërie Nagavci.

Lajmet

Profesorët e UBT-së publikojnë studim ndërkombëtar për cilësinë e ujërave nëntokësore në Kosovë

Published

2 hours ago

April 24, 2026

ubtnews

Profesorët e UBT-së, Hazir S. Çadraku, Pajtim Bytyqi dhe Osman Fetoshi, në bashkëpunim me studiues nga universitete vendore dhe ndërkombëtare, kanë publikuar një artikull shkencor në revistën ndërkombëtare Limnological Review scientific journal.

Studimi, i titulluar “Assessment of Groundwater Quality in Some Regions of Kosovo Based on Physico-Chemical and Microbiological Parameters”, analizon cilësinë e ujërave nëntokësore në disa rajone të Kosovës përmes parametrave fiziko-kimikë dhe mikrobiologjikë.

Rezultatet tregojnë se, megjithëse shumica e parametrave fiziko-kimikë janë brenda kufijve të lejuar, në shumë zona është evidentuar ndotje mikrobiologjike, përfshirë praninë e bakterit Escherichia coli, duke e bërë ujin të papërshtatshëm për konsum pa trajtim.

Studimi thekson ndikimin e faktorëve si aktivitetet bujqësore dhe mungesa e trajtimit të ujërave të zeza, si dhe nënvizon nevojën për masa urgjente në menaxhimin dhe trajtimin e burimeve ujore.

Ky publikim përfaqëson një kontribut të rëndësishëm shkencor dhe dëshmon angazhimin e UBT-së në kërkime me ndikim në nivel vendor dhe ndërkombëtar.

Vendi

Nderohet kontributi i ish-kongresmenit Engel në shtetndërtimin e Kosovës

Published

3 hours ago

April 24, 2026

UBTNews

Udhëheqësit e institucioneve kanë shprehur vlerësim të madh për rolin dhe kontributin e ish-kongresmenit amerikan, Eliot Engel, në historinë dhe procesin e shtetndërtimit të Kosovës.

Gjatë seancës së Kuvendit të mbajtur në nder të Engel, i cili ndërroi jetë më 10 prill, ushtruesja e detyrës së presidentes, Albulena Haxhiu, u shpreh se ai ka lënë gjurmë të thella në historinë e vendit.

“Në ditët më të vështira të historisë sonë të re, bëshkë edhe me shumë kongresistë e senatorë amerikanë, ngriti zërin fuqishëm kundër shkeljes së të drejtave tona, represionit, dhe persekutimit nga regjimi serbo-jugosllav”, ka theksuar Haxhiu, në seancë që ka nisur më një minutë heshtje në nderim të Engel.

Ajo ka shtuar se gjatë gjithë karrierës së tij, Engel nuk u ndal së kërkuari drejtësi për popullin e Kosovës.

“Në vitet e errëta kur shqiptarët e Kosovës po vuanin nën regjimin e Millosheviqit dhe bota ende hezitonte të vepronte, Eliot Emgel ngriti zërin”, ka theksuar Haxhiu.

Lajmet

Kuvendi mban sot seancë solemne për Eliot Engel dhe seancë të rregullt plenare

Published

5 hours ago

April 24, 2026

UBTNews

Kuvendi i Kosovës mban sot dy seanca plenare, duke nisur në orën 10:00 me një seancë solemne në nderim të ish-kongresmenit amerikan Eliot Engel, i cili vdiq më 10 prill.

Pas saj, në orën 11:00, do të vijojë seanca e rregullt me këtë rend dite:

Miratimi i procesverbalit nga seanca e mëparshme.
Deklarimet jashtë rendit të ditës.
Pyetjet parlamentare.
Shqyrtimi i Projektligjit për Ratifikimin e Amendamentit Nr. 2 të Marrëveshjes Financiare Kosovë-BE për Programin IPA 2020.
Shqyrtimi i Projektligjit për Ratifikimin e Amendamentit Nr. 1 të Marrëveshjes Financiare Kosovë-BE për programin IPA 2019 (pjesa e dytë, objektivi 1).
Zgjedhja e anëtarëve të Këshillit Gjyqësor të Kosovës.
Zgjedhja e anëtarëve të Bordit të Radiotelevizionit të Kosovës.
Zgjedhja e anëtarëve në Komisionin e Pavarur të Mediave.
Shqyrtimi i Propozim-rezolutës për avancimin e përkujdesjes institucionale ndaj komunitetit shqiptar në Preshevë, Medvegjë e Bujanoc.
Propozimi i Grupit parlamentar “Multietnik” për zëvendësimin e deputetëve në komisione parlamentare.