Kapiteni i kombëtares zvicerane me origjinë shqiptare, Granit Xhaka, është bërë pjesë e një projekti të veçantë marketingu të rrjetit të supermarketeve zvicerane Denner, në prag të Kampionatit Botëror të Futbollit.

Projekti me titull “The Socceritos” është realizuar si një film me metrazh të shkurtër, i cili ndërthur stilin e filmave western me temën e futbollit, duke sjellë një qasje kreative në fushatën promocionale të kompanisë.

Në film, përkrah legjendës së kinemasë Terence Hill, 87 vjeç, luajnë edhe yjet e futbollit zviceran Granit Xhaka dhe Zeki Amdouni, si dhe futbollistja Ana Maria Markoviq.

Sipas skenarit, tre personazhet udhëtojnë në Perëndimin e Egër për të mësuar banorët vendas të luajnë futboll, ndërsa përballen me një kriminel lokal që përpiqet ta ndalojë përhapjen e këtij sporti. Konflikti kulmon me një bast që vendos fatin e futbollit në qytet.

Fushata e Denner synon të lidhë historinë e filmit me identitetin e kompanisë si pionere e dyqaneve me çmime të lira në Zvicër, duke bërë një paralelizëm mes zhvillimit të futbollit dhe modernizimit të rrjetit të saj tregtar.

Xhirimet janë realizuar në Spanjë, në të njëjtat lokacione ku më herët Terence Hill ka xhiruar filmat e tij klasikë western. Projekti është drejtuar nga regjisori zviceran Reto Salimbeni dhe është prezantuar premierë në kinemanë “Corso” në Zürich, para se të shpërndahet në platformat digjitale të Denner.

Këngëtarja shqiptaro-amerikane Bebe Rexha dhe DJ-i francez David Guetta kanë paralajmëruar bashkëpunimin e tyre më të ri muzikor, “Sad Girls”, i cili pritet të publikohet më 29 maj 2026.

Lajmi është bërë i ditur përmes një postimi të përbashkët në rrjetet sociale, ku dy artistët publikuan edhe një video nga përgatitjet e tyre për American Music Awards, duke ngacmuar fansat për projektin e ri.

Në video, Bebe Rexha shfaqet duke prezantuar këngën dhe duke shprehur entuziazmin për publikimin e saj, ndërsa David Guetta deklaron se është “i obsesionuar” me projektin dhe se mezi pret që ai të publikohet.

Ky bashkëpunim vjen pas suksesit global të hitit “I’m Good (Blue)”, i cili pati jehonë të madhe në toplistat ndërkombëtare dhe platformat muzikore.

Pas njoftimit, fansat kanë reaguar menjëherë në rrjete sociale, duke kërkuar madje edhe një album të përbashkët nga dy artistët në të ardhmen.

Këngëtarja fituese e çmimit Grammy, Miley Cyrus, është nderuar me një yll në Hollywood Walk of Fame, gjatë një ceremonie të mbajtur në Hollywood Boulevard në Los Angeles.

Artistja mori yllin e 2,845-të në këtë bulevard të famshëm, në një ngjarje ku morën pjesë emra të njohur të industrisë së muzikës dhe filmit.

Miley Cyrus, e cila u bë e njohur fillimisht përmes serialit të Disney Channel “Hannah Montana”, ka ndërtuar më pas një karrierë të suksesshme ndërkombëtare në muzikë. Në ceremoni ishin të pranishëm familjarët e saj, përfshirë motrën Brandi Cyrus dhe nënën Tish Cyrus, si dhe partneri i saj, këngëtari amerikan Maxx Morando.

Gjatë fjalimit të saj, Cyrus e cilësoi këtë moment si një nga më të rëndësishmit në karrierën e saj, duke falënderuar familjen, miqtë dhe bashkëpunëtorët për mbështetjen ndër vite. Ajo foli edhe për rëndësinë e përkushtimit dhe qëndrueshmërisë në art, duke e përshkruar yllin në Hollywood Walk of Fame si simbol të punës dhe rrugëtimit të saj artistik.

Në ceremoninë e organizuar në Los Angeles morën pjesë edhe figura të njohura të industrisë së modës dhe filmit, përfshirë Donatella Versace dhe aktoren Anya Taylor-Joy.

Reperi kanadez Drake ka thyer rekordin e mbajtur më parë nga Michael Jackson për numrin më të madh të këngëve në vendin e parë në Billboard Hot 100 nga një artist mashkull solo.

Arritja erdhi pasi projekti i tij “Janice STFU” debutoi në krye të listës, duke i siguruar Drake këngën e 14-të në vendin e parë. Me këtë sukses, ai barazon rekordet e Rihanna dhe Taylor Swift, ndërsa vetëm Mariah Carey dhe grupi The Beatles mbeten më lart në historinë e Billboard.

Sipas të dhënave të industrisë muzikore, Drake ka vendosur edhe një rekord të ri me 42 hyrje në një javë të vetme në Billboard Hot 100, duke tejkaluar rekordin e mëparshëm të Morgan Wallen.

Artisti ka dominuar gjithashtu top 10-shen e listës, duke zënë nëntë nga dhjetë pozicionet kryesore. Ai ka kaluar edhe shifrën prej 400 hyrjeve totale në historinë e Billboard Hot 100, një arritje historike në industrinë muzikore.

Suksesi i fundit vjen pas publikimit të tre albumeve të reja, “Iceman”, “Maid of Honour” dhe “Habibti”, të cilat debutuan njëkohësisht në tri vendet e para të listës së albumeve.