Komisioni Qendror i Zgjedhjeve ka njoftuar se ka filluar periudha e votimit përmes postës për të gjithë shtetasit e Kosovës të cilët janë regjistruar për të votuar nga jashtë Kosovës dhe që kanë përzgjedhur këtë mënyrë votimi.

Sipas njoftimit të KQZ-së kjo periudhë 9 janar – 8 shkurt 2025 do të vlejë vetëm për shtetasit që kanë arritur të regjistrohen suksesshëm si votues jashtë Kosovës dhe që gjatë regjistrimit janë përcaktuar individualisht për mënyrën e votimit, duke dërguar fletëvotimin përmes postës në një nga kutitë postare të hapura nga KQZ jashtë Kosovës, apo duke dërguar fletëvotimin përmes postës në kutinë postare të KQZ-së në Kosovë.

“Shtetasit e Kosovës të cilët janë regjistruar për të votuar fizikisht në njërën nga përfaqësitë diplomatike të Republikës së Kosovës, njoftohen se procesi i votimit do të mbahet më 8 shkurt 2025. Komisioni Qendror i Zgjedhjeve ka njoftuar individualisht të gjithë votuesit e regjistruar për të votuar përmes postës për procedurën e votimit”, thuhet në njoftim.

Të gjithë shtetasit e Kosovës që janë regjistruar për të votuar sipas kësaj mënyre, adresat e kutive postare të KQZ-së jashtë Kosovës, por edhe të kutisë postare të KQZ-së në Kosovë, mund t’i gjejnë këtu: https://kqz-ks.org/keto-jane-adresat-e-kutive-postare-ne-23-shtete-per-votimin-jashte-kosoves-per-votuesit-e-regjistruar-per-te-votuar-permes-postes/

KQZ poashtu ka dhënë edhe udhëzime se di duhet të votohet:

Të gjithë shtetasit e Kosovës që janë regjistruar për të votuar përmes postës, për të dërguar pakon me fletëvotim në kutinë postare të KQZ-së në Kosovë ose në ndonjërën nga kutitë postare të KQZ-së jashtë Kosovës, duhet të ndjekin udhëzimet e KQZ-së për votimin përmes postës.

Hapi 1: Plotësoni fletëvotimin

1. Shkarkoni dhe printoni fletëvotimin.

2. Në anën e majtë të fletëvotimit janë të renditura subjektet politike. Zgjidhni vetëm një subjekt politik.

3. Në anën e djathtë, mund të votoni deri në dhjetë kandidatë.

4. Pasi të plotësoni fletëvotimin:

• Paloseni fletëvotimin, vendoseni brenda zarfit dhe mbylleni zarfin.

• Mos shkruani asgjë mbi zarf!

Hapi 2: Dërgoni fletëvotimin

1. Printoni dëftesën e regjistrimit që e keni pranuar përmes email-it gjatë periudhës së regjistrimit.

2. Brenda zarfit të dytë, vendosni:

• Zarfin e mbyllur me fletëvotimin e plotësuar.

• Dëftesën e regjistrimit.

3. Mbi zarfin e dytë:

• Shënoni adresën e kutisë postare të KQZ-së (bashkangjitur në këtë email gjeni adresat e kutive postare të KQZ-së).

• Vendosni një pullë postare.

4. Dërgojeni zarfin në postën më të afërt të shtetit ku jetoni.

Kujdes! Që fletëvotimi juaj të jetë i vlefshëm:

• Dërgesa duhet të jetë individuale (nuk mund të përfshini fletëvotime për anëtarët e familjes apo persona të tjerë).

• Zarfi duhet të ketë pullën postare dhe të dërgohet nga shteti ku jeni regjistruar.

Nga muaji shkurt i këtij viti do të nis aplikimi i vaksinës kundër HPV-së (Human Papilloma Virusit) për djemtë nga mosha 11-12 vjeç.

Ndërsa, me këtë vaksinë e cila ka nis së aplikuari në Kosovë nga viti i kaluar janë vaksinuar 10 mijë vajza.

Ministri i Shëndetësisë, Arben Vitia u shpreh se fillimi i vaksinimit edhe të djemve me kundër HPV-së është hap thelbësor për ruajtjen e shëndetit të brezave të ardhshëm.

Teksa ka bërë thirrje për vaksinim, Vitia njoftoi se me vaksinën kundër HPV janë imunizuar deri tani 10 mijë vajza.

“Një hap thelbësor në luftën tonë për parandalimin e sëmundjeve serioze që ndikojnë në ruajtjen e shëndetit të brezave të ardhshëm. Ky virus siç e dini shkakton shumë telashe dhe shumë lloje të kancereve dhe kanë qenë jashtëzakonisht problematike dhe barrë për sistemin tonë shëndetësor dhe me futjen në kalendarin e vaksinimit të kësaj vaksine kemi arritur që brezat e ardhshëm së paku të jenë të sigurt në raport me këto sëmundje… Vaksina HPV nuk është thjesht një mundësi për vajza, por edhe një mundësi edhe për djem për të parandaluar shumë sëmundje serioze që ky virus i shkakton… Deri tani janë vaksinuar rreth 10 mijë vajza nga grupi i synuar për t’u vaksinuar, për këtë arsye rekomandojmë edhe vaksinimin e djemve”, tha ai.

Duke iu bashku thirrje për vaksinimi kundër Human Papillomës, drejtoresha e Instituti Kombëtarë të Shëndetit Publik të Kosovë (IKSHPK), Ardita Baraku u shpreh se vaksinat HPV janë të sigurta dhe mjet efikas për mbrojtje nga disa lloje të kancereve.

“Vaksina kundër HPV është vaksinë e sigurt edhe është mjet efikas i mbrojtjes kundër disa llojeve të kancereve dhe sëmundjeve të tjera që prekin të dy gjinitë. Prandaj, është i rëndësishëm mbulimi i të dy gjinive…Është me rëndësi jo vetëm mbrojtja nga sëmundjet, por edhe qasja e barabartë në shërbime shëndetësore dhe barazia në shëndet. Prandaj, është bërë kjo iniciativë që prej sivjet të bëhet edhe vaksinimi i djemve po të njëjtës sëmundje”, thotë ajo.

Ndërsa, shefja e njësisë së vaksinimit në IKSHPK, Fetije Fetaj u shpreh se tashmë janë siguruar 22 mijë vaksina kundër HPV-së dhe janë bërë të gjitha përgatitjet e nevojshme për shpërndarjen e saj.

“Ne arritëm që brenda 1 viti edhe fakitikisht është disa e sotme dhe janë bërë të gjitha përgatitjet edhe janë siguruar vaksinat dhe mendojmë që në shkurt 2025 ne vetëm të fillojmë me vaksinën kundër human papillomës edhe tek djemtë… Mbulueshmëria me vaksinën për vitin 2024 84% kemi arritur këtë vit me pas përqindjen e vaksinimeve në vitin e parë“, deklaroi Fetaj.

Në Kosovë vitin e kaluar ka nisur imunizimi i vajzave me vaksinën HPV, derisa kalendari i vaksinimit është pasuruar edhe me vaksinën kundër Rotavirusit dhe atë kundër Pneumokokut.

Një platformë e re monitorimi e zhvilluar nga Agjencia Evropiane e Barnave (EMA) pritet të ndryshojë mënyrën se si raportohen dhe menaxhohen mungesat e ilaçeve në Bashkimin Evropian, duke synuar përmirësimin e efikasitetit dhe transparencës në mbledhjen dhe ndarjen e të dhënave mbi furnizimin dhe kërkesën.

BE-ja ka hasur prej kohësh vështirësi në menaxhimin e mungesave të ilaçeve, ku ndërprerjet shpesh raportohen vonë ose janë të kufizuara në informacion. Pavarësisht ndikimit të këtyre mungesave tek pacientët, raportimet e paorganizuara dhe shqetësimet për konfidencialitetin konkurrues kanë penguar rregullatorët kombëtarë dhe të BE-së të ndërhyjnë në kohë.

Platforma e re, e quajtur Platforma Evropiane për Monitorimin e Mungesave (ESMP), nisi raportimet rutinë në nëntor 2024 dhe do të bëhet plotësisht funksionale në shkurt 2025. Ajo do të sigurojë një sistem të centralizuar dhe të automatizuar për mbledhjen dhe analizimin e të dhënave, duke mundësuar veprime më të shpejta dhe të koordinuara nga të gjitha palët e interesuara.

Sipas Sofia Zastavnik, pronare e produktit të ESMP-së, platforma do të ndihmojë në përmirësimin e vendimmarrjes, veçanërisht në rastet kur shfaqen mungesa që prekin shumë vende. “Të kesh njohuri më të mira do të thotë të veprosh më shpejt, dhe kur flasim për mungesa ilaçesh, koha është jetike”, tha ajo.

Platforma do të përfshijë një ndërfaqe që i lejon prodhuesit, rregullatorët dhe agjencitë kombëtare të ndajnë të dhëna në kohë reale. Përveç kësaj, do të ketë një hapësirë të hapur për publikun për të marrë informacion mbi mungesat e ilaçeve.

ESMP është dizajnuar për të adresuar situata të ndryshme, nga raportimet rutinë deri te emergjencat shëndetësore, si mungesa e antibiotikëve gjatë dimrit të vitit 2023. Sistemi është gjithashtu fleksibël për të ofruar detaje më të thella në raste kritike, duke siguruar koordinim më të mirë midis vendeve dhe rregullatorëve.

Sipas zyrtares së Komisionit Evropian, Laura Geslin, përdorimi i platformës nuk është fakultativ. “Ka një detyrim ligjor për të dorëzuar të dhënat,” theksoi ajo, duke paralajmëruar se industria duhet të jetë e vetëdijshme për përgjegjësitë e saj të reja. Platforma është zhvilluar në partneritet me përfaqësues nga industria farmaceutike dhe agjencitë kombëtare të barnave, duke siguruar që ajo të përmbushë nevojat e sektorit të shëndetësisë. Sofia Zastavnik e përshkroi ESMP-në si “një fener për harmonizimin”, duke shprehur besimin se platforma do të forcojë menaxhimin e mungesave dhe do të rrisë besimin e qytetarëve në sistemin shëndetësor evropian.

Me implementimin e ESMP-së në vitin 2025, BE-ja shpreson të minimizojë ndikimet e mungesave të ilaçeve, duke siguruar që pacientët të mos përballen më me ndërprerje të panevojshme në trajtimin e tyre./UBTNews/