Këngëtarja spanjolle Rosalía ka rikthyer vëmendjen e botës së muzikës me publikimin e albumit e katërt, “LUX”, që doli disa ditë më parë dhe po përjeton një sukses të jashtëzakonshëm në platformat muzikore.

Vetëm brenda pak orësh nga publikimi, albumi është bërë fenomen global në Spotify, duke renditur 12 nga 15 këngët e tij në listën e Top 50 këngëve më të dëgjuara në botë.

Kjo arritje e ka pozicionuar atë ndër tre artistet më të dëgjuara në nivel botëror, duke i sjellë gjithashtu të ardhura të konsiderueshme.

“La Perla” – kënga më e dëgjuar e albumit

Kënga që po dominon është “La Perla”, me 4.5 milionë dëgjime, e renditur e pesta në Global Top 50 të Spotify. Pas saj vijnë “Berghain” me 4 milionë dëgjime, dhe “Reliquia”, me afro 3.7 milionë, të dyja ndër dhjetë këngët më të dëgjuara në botë gjatë javës.

Suksesi i plotë i albumit “LUX” në renditje:

“Sexo, Violencia y Llantas”, kënga hapëse, renditet në vendin e 11-të me 3.6 milionë dëgjime.

“Divinize” ndodhet në vendin e 14-të me 3.1 milionë dëgjime.

“Porcelana”, në vendin e 20-të me afro 3 milionë dëgjime.

“Mio Cristo Piange Diamanti” (2.7 milionë dëgjime) – vendi i 23-të.

“Dios Es un Stalker” (2.5 milionë) – vendi i 26-të.

“De Madruga” (2.4 milionë) – vendi i 27-të.

“Mundo Nuevo” (2.3 milionë) – vendi i 31-të.

Në fundin e Top 50-shit ndodhen “La Yugular”, në vendin e 36-të me 2.3 milionë dëgjime, “La Rumba del Perdón”, në vendin e 42-të me mbi 2 milionë dëgjime. “Sauvignon Blanc”, “Memoria” dhe “Magnolias” mbeten jashtë renditjes, me më shumë se 1.8 milionë dëgjime secila.

Fitime të mëdha nga dëgjimet në platforma

Sipas portalit të specializuar, Spotify paguan mesatarisht 3,300 deri 4,400 euro për çdo milion dëgjime. Duke llogaritur 42 milionë dëgjime në ditët e para të publikimit, Rosalía mund të ketë fituar mes 138,000 dhe 185,000 eurove vetëm nga dëgjimet, një shifër që rritet, në varësi të marrëveshjeve me shtëpinë diskografike, botuesit e muzikës dhe llojin e riprodhimit.

Një tjetër sukses ndërkombëtar për yllin katalanas

Me “LUX”, Rosalía ka treguar aftësinë e saj për të përzier zhanre moderne me ndikime tradicionale, duke ruajtur identitet të veçantë muzikor që e ka bërë një nga artistet më novatore të dekadës. Ky album konfirmon statusin e saj si një nga zërat më të rëndësishëm të skenës ndërkombëtare, me një bazë të gjerë fansash që rritet çdo ditë. /A.Z/UBT News/

Është publikuar traileri i parë i filmit biografik “Michael”, i cili tregon jetën e mbretit të popit dhe ka ngjallur debat që nga fillimi i projektit.

Në rolin kryesor do të jetë nipi i tij, Jaafar Jackson, ndërsa Colman Domingo, i nominuar për Oscar, luan babanë e tij, Joe Jackson. Në kast përfshihen edhe aktorë si Miles Teller, Nia Long dhe Laura Harrier.

Filmi është realizuar nga regjisori Antoine Fuqua, i njohur për aksionet Training Day dhe The Equalizer, me skenar nga John Logan, i nominuar për Oscar për Gladiator dhe The Aviator.

Xhirimet përfunduan në maj 2024, dhe publikimi, i planifikuar fillimisht për prill 2025, u shty për prill 2026 pas rixhirimeve. Traileri tregon se filmi do të shfaqet si një tërësi dhe jo në dy pjesë, siç ishte raportuar më parë.

Producenti Graham King ka deklaruar se qëllimi është të tregojë jetën e Michael pa paragjykime, por edhe duke ruajtur kompleksitetin e tij:

“Dua ta humanizoj, por jo ta pastroj. Historia më bindëse dhe e paanshme duhet t’i lejojë shikuesit të vendosin vetë si të ndihen”.

Megjithatë, projekti ka marrë kritika. Dokumentari i vitit 2019 Leaving Neverland risolli në fokus akuzat për sulme seksuale ndaj Jackson, dhe regjisori Dan Reed ka kritikuar filmin “Michael” si të pasinqertë, duke thënë se skenari minimizon pretendimet e dy akuzuesve.

Colman Domingo ka deklaruar se familja e Jacksonit e ka përqafuar projektin, por Paris Jackson ka mohuar këtë në Instagram, duke thënë se nuk ka pasur përfshirje në xhirime dhe ka dhënë vërejtjet e saj për skenarin.

Ajo shtoi se filmi i drejtohet një pjese të fansave që ende jetojnë në fantazi.

Filmi “Michael”, me buxhet prej 155 milionë dollarësh, pritet të dalë në kinema në prill 2026, pas dështimit të filmit biografik të Bruce Springsteen, i cili ka fituar vetëm 31 milionë dollarë muajin e kaluar. /A.Z/UBT News/