Regjisori i njohur italian Paolo Sorrentino ka bërë një batutë me humor ndaj presidentit të Italisë, Sergio Mattarella, gjatë ceremonisë së 145-vjetorit të SIAE në Pallatin Quirinale.

“Po të banohej bota vetëm nga ju dhe artistët, do të jetonim të gëzuar dhe paqësisht. Fatkeqësisht janë edhe të tjerët”, u shpreh Sorrentino, duke shkaktuar të qeshura mes të pranishmëve.

Sorrentino, fitues i çmimit Oscar për filmin “The Great Beauty”, konsiderohet një nga emrat më të rëndësishëm të kinemasë evropiane bashkëkohore.

Në të njëjtën ceremoni, presidenti Sergio Mattarella vlerësoi rolin e SIAE në mbrojtjen e autorëve dhe krijimtarisë, duke theksuar kontributin e saj në jetën kulturore dhe ekonomike të Italisë.

SIAE, Shoqata Italiane e Autorëve dhe Botuesve, administron të drejtat e autorit për mbi 126 mijë krijues dhe rreth 30 milionë vepra në Itali.

Është kompletuar lista e 25 shteteve finaliste të Eurovision Song Contest 2026, pas përfundimit të gjysmëfinales së dytë të mbajtur të enjten mbrëma.

Dhjetë shtete siguruan kualifikimin për finalen e madhe të së shtunës, ndërsa Azerbajxhani, Luksemburgu, Armenia, Zvicra dhe Letonia u eliminuan nga gara.

Mes artistëve që siguruan finalen janë Alis nga Shqipëria me këngën “Nân”, Delta Goodrem nga Australia, Dara nga Bullgaria, Daniel Žižka nga Çekia, Leléka nga Ukraina, Aidan nga Malta, Antigoni nga Qiproja, Alexandra Căpitănescu nga Rumania dhe Jonas Lovv nga Norvegjia. Në finale janë kualifikuar automatikisht edhe Mbretëria e Bashkuar, Franca, Gjermania dhe Italia si financuesit më të mëdhenj të konkursit, ndërsa Austria ka siguruar vendin si shteti mikpritës.

Ndërkohë, Spanja, Irlanda, Holanda, Sllovenia dhe Islanda kanë bojkotuar edicionin e sivjetëm të Eurovisionit për shkak të pjesëmarrjes së Izraelit.

Organizatorët kanë bërë të ditur se Eurovision 2026 ka më pak pjesëmarrësin që nga viti 2003, megjithatë festivali vazhdon të mbetet një nga ngjarjet më të mëdha muzikore në botë.

Një nga personat e përfshirë në rastin e vdekjes së aktorit të njohur amerikan Matthew Perry është dënuar me dy vjet burg, raportojnë mediat amerikane.

I dënuari, Erik Fleming, 56 vjeç, ka pranuar fajësinë në gusht të vitit 2024 për një akuzë konspiracioni për shpërndarje të ketaminës, substancë që lidhet me vdekjen e aktorit.

Sipas autoriteteve amerikane, Fleming kishte siguruar ketaminë përmes një gruaje nga Los Angeles e njohur si “Ketamine Queen” dhe më pas ia kishte shpërndarë Perry-t. Përveç dënimit me burg, gjykata federale i ka shqiptuar edhe tre vjet mbikëqyrje pas lirimit dhe një gjobë simbolike prej 200 dollarësh.

Matthew Perry u gjet i vdekur në tetor të vitit 2023 në xhakuzin e tij në Kaliforninë Jugore. Më vonë u konstatua se vdekja e tij ishte shkaktuar nga efektet akute të ketaminës. Prokuroria kishte kërkuar një dënim prej dy vjet e gjysmë burg, ndërsa mbrojtja kishte kërkuar një dënim më të lehtë, duke argumentuar rehabilitim dhe trajtim për varësinë.

Rasti ka përfshirë gjithsej pesë persona, përfshirë mjekë dhe bashkëpunëtorë të afërt të aktorit, të cilët sipas autoriteteve amerikane kanë furnizuar me ketaminë dhe kanë shfrytëzuar varësinë e tij.

Në këtë çështje, disa të pandehur të tjerë tashmë janë dënuar, përfshirë edhe një mjek dhe një shpërndarëse droge e njohur si “Ketamine Queen”.