Aktualitet

Do të blejë sërish armatime nga Rusia, Erdogan paralajmëron SHBA: Askush nuk mund të ndërhyjë te vendimet tona

Dhjetorin e kaluar, Shtetet e Bashkuara vendosën sanksione kundër Drejtorisë së Industrisë Turke të Mbrojtjes.

Published

5 years ago

September 27, 2021

Betim Gashi

Presidenti turk, Recep Tayyip Erdogan, tha se vendi i tij do të bëjë një porosi të dytë të sistemit mbrojtës rus S-400, edhe pse vendimi për të marrë pajisje ushtarake nga Rusia rrezikon të acarojë marrëdhëniet me Shtetet e Bashkuara, që kanë kërcënuar me sanksione.

Uashingtoni thotë se ky sistem rus përbën kërcënim për avionët amerikanë F-35, si edhe për sistemin mbrojtës të NATO-s, pjesë e të cilës është edhe Turqia. Por Ankaraja pretendon se po e bën këtë porosi për shkak se nuk ka arritur të gjejë një marrëveshje të kënaqshme me ndonjë vend të NATO-s.

“Në të ardhmen, askush nuk do të jetë në gjendje të ndërhyjë për të caktuar çfarë sistemi mbrojtës do të marrim dhe nga cili shtet”, tha Erdogan në një intervistë për televizionin amerikan CBS të dielën. “Askush nuk mund të ndërhyjë te kjo. Vetëm ne mund të marrim vendime të tilla”.

Dhjetorin e kaluar, Shtetet e Bashkuara vendosën sanksione kundër Drejtorisë së Industrisë Turke të Mbrojtjes, shefit të saj Ismail Demir dhe tre nëpunësve të tjerë pas vendimit për të blerë sistemin rus të mbrojtjes S-400. Bisedimet mes Turqisë dhe Rusisë për porosinë e dytë vijojnë, ndërsa amerikanët sërish kanë paralajmëruar për sanksione.

Erdogan do të vizitojë Rusinë javën e ardhshme, për t’u takuar me Vladimir Putin me të cilin do të diskutohet edhe dhuna në veriperëndim të Sirisë.

Lajmet

Kuvendi i Kosovës voton unanimisht: FSK dërgohet në mision paqeruajtës në Gaza

Published

54 seconds ago

April 17, 2026

UBTNews

Me 89 vota pro dhe asnjë kundër, Kuvendi i Kosovës ka miratuar sot vendimin për dërgimin e pjesëtarëve të Forcës së Sigurisë së Kosovës në kuadër të Forcës Ndërkombëtare Stabilizuese në Gaza.

Ky mision vjen si mbështetje për zbatimin e planit gjithëpërfshirës për përfundimin e konfliktit në këtë rajon.

Ministri i Mbrojtjes, Ejup Maqedonci, theksoi se ky hap konfirmon besueshmërinë e lartë që FSK-ja ka krijuar te aleatët ndërkombëtarë.

Sipas tij, personeli i FSK-së do të operojë nën një komandë të unifikuar ndërkombëtare, duke kontribuar drejtpërdrejt në stabilitetin dhe paqen në përputhje me mandatin e dhënë.

Lajmet

Përmbyllet gara “Ushtari më i mirë 2026”: Elvis Qitaku i FSK-së dhe Hil Mala nga Shqipëria shpallen fitues

Published

20 minutes ago

April 17, 2026

UBTNews

Në një ceremoni solemne, Forca e Sigurisë së Kosovës ka shpallur sot fituesit e garës ndërkombëtare “Ushtari më i mirë 2026”, pas një sfide intensive dyjavore.

Gara, e cila u zhvillua nga 13 deri më 17 prill, bëri bashkë 44 konkurrentë, ku gjysma ishin pjesëtarë të FSK-së dhe pjesa tjetër ushtarakë nga vendet partnere si SHBA-të (Ajova dhe Corps V), Mbretëria e Bashkuar, Italia, Kroacia, Shqipëria dhe Maqedonia e Veriut.

Në kategorinë e FSK-së, titullin e më të mirit e rrëmbeu Elvis Qitaku nga Regjimenti i Dytë i Këmbësorisë, i ndjekur nga Ismail Ahmeti në vendin e dytë dhe Sead Veseli në vendin e tretë. Ndërkohë, te radhët e ndërkombëtarëve, ushtarakët e Republikës së Shqipërisë dominuan plotësisht podiumin. Hil Mala u shpall “Ushtari më i mirë ndërkombëtar 2026”, ndërsa vendi i dytë dhe i tretë u takuan kolegëve të tij, Hambel Peçi dhe Marjus Cauli.

Gjatë kësaj gare, ushtarakët u sfiduan në disiplina të rënda si testi fizik, navigimi tokësor, gjuajtja me armë, kalimi i poligonit të besueshmërisë dhe marshimi.

Pjesëmarrja e ushtrive të NATO-s në këtë aktivitet u vlerësua si një dëshmi e qartë e profesionalizmit të FSK-së dhe ndërveprueshmërisë së lartë me partnerët euroatlantikë.

Aktualitet

Irani hap Ngushticën e Hormuzit: Bie çmimi i naftës në tregjet botërore

Published

54 minutes ago

April 17, 2026

UBTNews

Gjatë ditës së premte, ministri i Jashtëm i Iranit, Abbas Araghchi, njoftoi se Ngushtica e Hormuzit është plotësisht e hapur për kalimin e të gjitha anijeve tregtare. Sipas tij, ky vendim vjen si rrjedhojë e armëpushimit në Liban dhe do të mbetet në fuqi gjatë gjithë periudhës sa zgjat ky akord. Transporti detar do të zhvillohet sipas itinerarit të koordinuar nga autoritetet detare iraniane.

Ky lajm u mirëprit menjëherë nga presidenti amerikan, Donald Trump, i cili përmes një postimi në rrjetet sociale falënderoi Iranin për hapjen e kësaj pike kyçe strategjike.

Rihapja e Ngushticës së Hormuzit ka dhënë efekte të menjëhershme në ekonominë globale. Duke qenë se përmes kësaj rruge transportohet rreth 20% e naftës dhe gazit botëror, çmimi i naftës ka pësuar një rënie të lartë prej 10% menjëherë pas njoftimit.

Lajmet

Deklarimi i pasurisë, Haxhiu blen banesë me kredi

Published

2 hours ago

April 17, 2026

UBTNews

Ushtruesja e detyrës së Presidentes dhe njëherësh kryeparlamentarja, Albulena Haxhiu, ka bërë publike pasurinë e saj në Agjencinë për Parandalimin e Korrupsionit.

Sipas formularit të dorëzuar, gjatë vitit 2026 ajo ka blerë një banesë me sipërfaqe 128.74 metra katrorë, në vlerë prej 128,740 euro, e cila figuron si pronë e përbashkët. Kjo pasuri është siguruar përmes kredie bankare.

Në deklarim përfshihen edhe pasuri në emër të bashkëshortit: një banesë me vlerë 60 mijë euro dhe një parcelë toke prej 15 mijë euro.

Sa i përket pasurive të luajtshme, Haxhiu ka raportuar një veturë në vlerë 9,700 euro, gjithashtu në pronësi të përbashkët, si dhe para të gatshme në shumën prej 1,531 euro.

Në pjesën e detyrimeve financiare, ajo ka deklaruar një kredi prej 160 mijë euro, e marrë për blerjen e banesës. Po ashtu, figuron edhe një obligim financiar prej 1,100 euro në emër të bashkëshortit.

Të hyrat vjetore të saj përfshijnë pagën nga Kuvendi i Kosovës dhe Ministria e Drejtësisë në shumën 22,658 euro, mëditje prej 234 euro dhe 1,140 euro nga shtesa dhe kompensime të tjera.

Ndërkohë, bashkëshorti i saj ka deklaruar të ardhura prej 16,739 euro nga Komisioni Qendror i Zgjedhjeve, si dhe 1,747 euro mëditje nga udhëtimet jashtë vendit.

Pas përfundimit të mandatit të Vjosa Osmani më 4 prill 2026, Haxhiu mori përkohësisht detyrën e Presidentes. Ajo ishte zgjedhur kryetare e Kuvendit të Kosovës më 11 shkurt 2026.