Lajmet

Divergjencat mes partnerëve politike, e dërguan Preshevën në zgjedhje

Published

5 years ago

April 19, 2021

Betim Gashi

Mosmarrëveshjet në mes koalicionit qeverisës Alternativa për Ndryshim (APN), Lëvizja për Reforma (LR) dhe Lista Srpska (LS) kanë bërë që në kohë pandemie të ketë zgjedhje të parakohshme komunale në Preshevë. Zgjedhjet nxorën fituesin, ndërsa ende është e paqartë se kush nga partitë politike do të arrijë të krijoj shumicën e re në Kuvendin Komunal të Preshevës.

Lirigzona Nuredini

Preshevë, 17 prill – Më 28 mars, qytetarët në komunën e Preshevës u janë drejtuar kutive të votimit për të zgjedhur pushtetin e ri komunal. Këto zgjedhje janë organizuar për të tretën herë me radhë brenda 5 vitesh, për arsye të mosmarrëveshjeve në mes partive politike, për qeverisje komunale.

Në gusht të vitit të kaluar, partitë opozitare Partia Demokratike Shqiptare dhe Partia për Veprim Demokratik, pas dorëheqjes së Sami Saliut, Kryetarit të Kuvendit Komunal nga radhët e partisë Lëvizja për Reforma, kishin mbledhur nënshkrime nga këshilltarët për të mbajtur seancë të jashtëzakonshme
komunale për shkarkimin edhe të kryetarit të Komunës, Shqiprim Arifi. Ata nuk i arritën votat e nevojshme, kjo pasi vota e një këshilltari doli të jetë e pavlefshme. E gjithë kjo, dyshohet të ketë qenë një “kurth” i organizuar nga partia Alternativa për Ndryshim e kryesuar nga Shqiprim Arifi.

Mustafë Shaqiri, nënkryetar i opozitares Partia Demokratike Shqiptare, këto zgjedhje i sheh si një mundësi që qeverisja e ardhshme të bëhet më mirë.

“Partia Demokratike Shqiptare i ka mirëpritur këto zgjedhje. Që nga viti 2016 ishim në opozitë dhe duke pasur parasysh keqmenaxhimin dhe keqpërdorimin e buxhetit komunal nga ana e pushtetit në ikje, PDSH vazhdimisht trumbetoi në opozitë dhe e bëri opozitën për të shkuar në zgjedhje që Presheva të qeveriset më mirë”, deklaroi ai.

Koalicioni në mes partive politike, Alternativa për Ndryshim, Lëvizja për Reforma dhe Lista Srpska, ka qeverisur komunën tre vite, dhe nga viti 2016 del të jetë koalicioni i pestë që u shpërbë e që ndodhi në mesin e dhjetorit të vitit të kaluar.

Hasan Hasani, kandidat për këshilltar nga radhët e partisë Lëvizja për Reforma, paraqet qëndrimet e partisë që i takon.

“Zgjedhjet e jashtëzakonshme në Preshevë pasuan si rezultat i shkëputjes së marrëveshjes me partnerin e koalicionit Alternativa për Ndryshim (APN), pasi më u shteruan të gjitha mundësitë e bashkëpunimit për qeverisje. Lëvizja për Reforma (LR), gjatë kohës që ishte në qeverisje ka qenë konstruktive, por Alternativa për Ndryshim (APN), ishte treguar mospërfillëse, dhe duke e parë Lëvizjen për Reforma numra në Kuvend”, deklaroi Hasani për UBTNews.

Me shpresë për një të ardhme më të mirë për të rinjtë, zhvillim ekonomik e siguri të shtuar, qytetarët kanë përdorur të drejtën për votim. Kështu thotë për UBTNews, 40-vjeçari B.N, që doli nga qendra e votimit.

“Unë votova duke shpresuar për një të ardhme më të mirë fillimisht për rininë tonë dhe për mbarë vendin”, deklaroi ai.

Mirëpo Shkodran Ismaili, njohës i çështjeve politike, thotë se këto zgjedhje paraqesin jo stabilitet politik, pasi që është e vështirë të qeveriset një komunë kur nuk ka kompromis.

“Mendoj se jemi në një situatë jostabile i cili buron nga numri i këshilltarëve në Kuvendin Komunal,
sepse në çfarëdo situate dhe pozicioni që ta vështirësosh, edhe po të ketë një kompromis, e që do të
jetë vështirë i arritshëm, ai përsëri pas një kohe të shkurtër do të prodhojë zgjidhje të parakohshme ose
ndonjë situatë të palakmueshme. Stabilitet jam i bindur se nuk do të ketë edhe për një kohë të gjatë në
Komunë të Preshevës”, thotë ai.

Në këto zgjedhje kanë marrë pjesë gjashtë parti politike, Alternativa për Ndryshim, Lëvizja për Reforma, Partia Demokratike Shqiptare, Partia për Veprim Demokratik, Alternativa Demokratike Shqiptare dhe Unioni Demokratik Shqiptar, dhe një parti e serbëve e cila është koordinuar në një listë të përbashkët në mes tetë partive politike të serbëve.

Nga rezultatet e këtyre zgjedhjeve të çertifikuara tashmë, Alternativa për Ndryshim renditet fituese me 6 mijë e 21 vota, e dyta doli Partia Demokratike Shqiptare me 4 mijë e 173 vota, partia e tretë rezultoi të jetë Partia për Veprim Demokratik me 3 mijë e 368 vota, partia Lëvizja për Reforma si e katërta me 2 mijë e 545 vota, Lista Srpska ka marrë 1 mijë e 222 vota, ndërsa partitë Unioni Demokratik Shqiptar si dhe Alternativa Demokratike Shqiptare morën 483 respektivisht 441 vota. Tani opsioni mbetet i hapur se kush nga partitë politike do të arrijë të krijojë shumicën e re në Kuvendin Komunal të Preshevës./UBTNews

Lajmet

Ndahet nga jeta profesori Naim Krasniqi: UBT shpreh ngushëllime për familjen dhe komunitetin akademik

Published

9 hours ago

February 19, 2026

ubtnews

Me pikëllim të thellë njoftojmë se ka ndërruar jetë profesori dhe kolegu ynë i nderuar, Naim Krasniqi. Ai ishte pjesë e stafit akademik të UBT, ku dha kontribut të çmuar në procesin mësimor, duke u dalluar për profesionalizëm, përkushtim dhe korrektësi në punë.

Gjatë angazhimit të tij akademik, ai ishte i përkushtuar ndaj studentëve dhe kolegëve, duke ndarë me ta dijen, përvojën dhe vlerat profesionale. Ndarja e tij nga jeta është humbje të madhe për familjen, miqtë, kolegët dhe gjithë komunitetin akademik.

Kontributi i tij në arsim dhe angazhimi i tij profesional do të mbeten pjesë e rëndësishme e kujtesës institucionale. Rektori, menaxhmenti dhe stafi akademik e administrativ i UBT-së shprehin ngushëllimet më të sinqerta për familjen Krasniqi dhe për të gjithë ata që patën nderin ta njohin dhe të bashkëpunojnë me të.

Kujtimi për të do të mbetet i paharruar, ndërsa vepra dhe përkushtimi i tij do të vazhdojnë të jetojnë përmes gjeneratave që ai kontribuoi në formimin e tyre.

Lajmet

Arrestohen katër persona për mashtrim milionësh me prona në Prishtinë

Published

14 hours ago

February 19, 2026

UBTNews

Katër persona janë arrestuar nën dyshimin për përfshirje në një skemë mashtrimi dhe falsifikimi dokumentesh që dyshohet se ka rezultuar me përfitim të kundërligjshëm mbi 1.5 milion euro, ka njoftuar Policia e Kosovës.

Sipas Policisë, më 19 shkurt 2026, hetuesit nga Drejtoria për Hetimin e Krimeve Ekonomike dhe Korrupsionit (DHKEK), pas një pune të gjatë operative dhe hetimore, kanë siguruar prova që implikojnë të dyshuarit me inicialet M.M., Sh.B., D.R. dhe B.Zh. në veprat penale të mashtrimit, falsifikimit të dokumenteve dhe legalizimit të përmbajtjes së rreme.

“Përmes veprimeve të kundërligjshme, përfshirë falsifikimin e dokumenteve si pasaportë e Serbisë dhe dokumente të tjera dhe duke i përdorur ato si të vërteta, si dhe duke prezantuar një person të rrejshëm si person real, të dyshuarit kanë arritur të tjetërsojnë-shesin përmes noterit pronën e ankuesit M.T., në sipërfaqe prej 36.28 ari”, thuhet në njoftimin e Policisë.

Sipas të dhënave zyrtare, prona dyshohet se është shitur tek blerësi H.M. me pretendimin se dokumentacioni ishte i rregullt dhe ligjor. Në këmbim të kësaj shitjeje, të dyshuarit dyshohet se kanë përfituar shumën prej 1,578,180.00 euro.

Me urdhër verbal të prokurorit të rastit janë realizuar kontrolle në pesë lokacione të ndryshme, ku janë gjetur dhe sekuestruar 9,000 euro para të gatshme, të cilat do të shërbejnë si provë materiale në procedurat e mëtejme.

Të dyshuarit po hetohen për veprat penale “mashtrimi” , “falsifikimi i dokumenteve” dhe “legalizimi i përmbajtjes së rreme”.

Pas intervistimit në prani të avokatëve mbrojtës dhe konsultimit me prokurorin nga Prokuroria Themelore në Prishtinë – Departamenti i Përgjithshëm, të dyshuarve u është caktuar masa e ndalimit prej 48 orësh, raportoi Policia.

Lajmet

Kancelari gjerman Merz, uron Kurtin për mandatin e ri

Published

14 hours ago

February 19, 2026

UBTNEWS

Kancelari i Gjermanisë, Friedrich Merz, ka uruar kryeministrin e Kosovës, Albin Kurti, për rizgjedhjen e tij në krye të Qeverisë së Kosovës. Në letrën drejtuar Kurtit, Merz shprehu gatishmërinë për të vazhduar thellimin e marrëdhënieve ndërmjet dy vendeve.

“Jam i bindur se me përvojën tuaj do të merrni vendimet e duhura dhe të nevojshme për integrimin e mëtejmë euroatlantik të Kosovës”, shkruan kancelari gjerman, duke theksuar se Kosova ka një partner të fortë dhe të besueshëm në Gjermani gjatë këtyre proceseve.

Merz gjithashtu përmendi sfidat përpara Qeverisë së Kosovës, duke përfshirë avancimin e dialogut të normalizimit me Serbinë, të ndërmjetësuar nga Bashkimi Evropian.

“Gëzohem që do të vazhdojmë së bashku të thellojmë marrëdhëniet e ngushta dhe miqësore ndërmjet vendeve tona”, përfundon kancelari në mesazhin e tij drejtuar Kurtit.

Lajmet

Hapet Konsullata e Lituanisë në Kosovë

Published

14 hours ago

February 19, 2026

UBTNEWS

Lituania ka hapur zyrtarisht Konsullatën e saj në Kosovë, një ngjarje kjo që po konsiderohet si një hap historik drejt thellimit të raporteve diplomatike dhe bashkëpunimit mes dy shteteve. Në ceremoninë zyrtare të organizuar me këtë rast, ambasadori jorezident i Lituanisë për Kosovën, Eduardas Borisovas, deklaroi se hapja e kësaj konsullate përfaqëson një angazhim konkret për forcimin e bashkëpunimit në sferën institucionale, ekonomike dhe atë kulturore. Borisovas nënvizoi se vendi i tij mbetet një mbështetës i palëkundur i integrimit evropian të Kosovës dhe konsolidimit të shtetësisë së saj në arenën ndërkombëtare, raporton RTK.

Në këtë ngjarje mori pjesë edhe nënkryetari i Kuvendit të Kosovës, Ardian Gola, i cili e vlerësoi këtë akt si një dëshmi të besimit të ndërsjellë dhe partneritetit strategjik. Sipas tij, prioritet mbetet shkëmbimi i përvojave në reformat demokratike dhe fuqizimi i raporteve parlamentare. Rëndësinë e kësaj pranie diplomatike e theksoi edhe Ministri i Punëve të Brendshme, Xhelal Sveçla, i cili u fokusua te bashkëpunimi në fushën e sigurisë dhe sundimit të ligjit, duke u shprehur se konsullata do të jetë një urë e rëndësishme për koordinimin e çështjeve me interes të përbashkët.

Nga ana tjetër, Konsulli i Nderit, Bashkim Zeqiri, u zotua se do të punojë intensivisht për promovimin e interesave të dyanshme, duke krijuar mundësi të reja në fushën e ekonomisë, arsimit dhe investimeve. Hapja e kësaj konsullate shihet si një sinjal i fuqishëm i përkushtimit të Lituanisë dhe Kosovës për një partneritet afatgjatë, të bazuar në solidaritetin dhe vizionin e përbashkët për një të ardhme brenda familjes evropiane.