Lajmet

Ditari: Lajmet kryesore që shënuan datën 24 maj – 1993-1998?

Published

2 months ago

on

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 (Foto: Ukshin Hoti)

 24 maj 1994

Mr. Ukshin Hotit iu caktua paraburgimi

Mr. Ukshin Hotit, profesor i Universitetit të Kosovës dhe anëtar i Kryesisë së UNIKOMB-it, që u arrestua nga policia serbe, po mbahet nën hetime në Burgun e Prizrenit, pasi iu ka caktuar oaraburgimi prej 30 ditësh, njofton “Bujku”.

Ndërsa, Muhamet Malsori që u arrestua bashkë me z. Hoti, u lirua nga burgu.

 

Pas dy vjetësh Xhevat Makolli u lirua nga burgu

Pas burgut prej gati dy vjetësh, Xhevat Makolli nga Prishtina dje u lirua, njofton Komisioni për Informim i Degës së LDK-së në Kodrën e Trimave.

Xhevati Makolli u burgos dhe u dënua nën pretekst të mbajtjes së armëve pa leje në kohën kur ishte anëtar i Kryesisë së Degës së LDK-së në Kodrën e Trimave në Prishtinë dhe veprimtar në Lidhjes Demokratike të Kosovës në Prishtinë.

Xhevat Makolli ishte njëri ndër karatistët më të njohur dhe kampion i Republikës së Kosovës në këtë degë sportive.

 

 

24 maj 1995

Familja pesanëtarëshe e Xhavit Gorçajt u dëbua nga banesa

Sot, rreth orës 10:00, disa policë të armatosur serbë nxorrën me dhunë nga banesa e tij Xhavit Gorçajn nga Prishtina në lagjen Bregu i Diellit II, objekti I, nr.3.

Xhavit Gorçaj deri në vitin 1990, kur është dëbuar nga puna, ka punuar në Entin e Gjeodezisë në Prishtinë, ndërsa vendimin për dëbim nga banesa ia ka lëshuar Sekretariati për Urbanizëm i Prishtinës.

Por, duke mos pritur afatin e rregullt dhe duke mos i lejuar atij të drejtën e ankesës në një vendim të tillë, policët shkuan në banesën e tij dhe e urdhëruan atë që sa më parë ta lirojë banesën.

Ata e detyruan Xhavitin që t’i nxjerrë të gjitha mobiljet në koridorin e banesës, në të cilën menjëherë u vendos një familje serbe nga Fushë-Kosova.

Kështu, me vendimin arbitrar të serbëve të instaluar në sekretariatin për urbanizëm të qytetit, të cilin e zbatuan me përpikëri policët, në rrugë u hodh familja pesanëtarëshe e Xhavit Gorçajt, siç u hodhën e po hidhen vazhdimisht familjet shqiptare.

 

24 maj 1997

Përleshje në Cërrik të Elbasanit – 6 të vrarë dhe 18 të plagosur

Një grup i armatosur në qytetin e Cërrikut afër Elbasanit ka hapur zjarr dje kundër trupave speciale të Ministrisë së Brendshme, që erdhën në këtë qytet në orët e para të ditës së djeshme për të bërë të mundur lirimin e rajonit të policisë së qytetit që ishte sulmuar dhe marrë mbrëmjen e kaluar nga po ky grup i armatosur.

Si rezultat i shkëmbimit të zjarrit mësohet se janë vrarë gjashtë policë dhe 18 veta janë plagosur nga efektivi i forcave speciale. Të plagosurit u dërguan me helikopterë në spitalin e Tiranës. Në komisariatin e policisë së rrethit mësohet gjithashtu se gjatë ngjarjes është plagosur edhe vetë shefi i ri i këtij komisariati, Agron Koliqi. Mësohet se ka edhe të plagosur të tjerë.

Ndërkohë, dëshmitarë okularë në vendngjarje, ku u dogjën tërësisht 4 policë, bëjnë të ditur se personat e armatosur kanë djegur një makinë të blinduar si dhe kanë rrëmbyer një automjet tjetër të forcave speciale.

Në qytetin e Cërrikut aktualisht mbizotëron një gjendje e nderë dhe paniku. Burimet jozyrtare njoftojnë gjithashtu se grupi i armatosur ka mbajtur peng 4 persona të forcave speciale në shkëmbim të lirimit të 2 shokëve të tyre nga qyteti i Cërrikut.

Nga Elbasani dhe Cërriku u kërkuan përforcime nga armata, njofton “Bujku”.

 

 

24 maj 1998

Në Bokshiq policia vrau Shaqir Rr. Zeqirin

Shaqir Rrustem Zeqiri (26) nga Bokshiqi i Klinës, është vrarë gjatë sulmit serb në këtë fshat.

KI i Degës së LDK-së në Klinë njofton se Shaqiri ishte i sëmurë psikik dhe deri tani nuk ka njohuri për rrethanat në të cilat ai u vra.

 

Forcat serbe vazhdojnë të mbajnë të rrethuara fshatrat e Klinës

Në komunën e Klinës edhe sot gjendja është mjaft e rëndë. Fshatrat Zajm, Grabanicë, Dellovë, Bokshiq, Këpuz e Qeskovë po mbahen nën bllokadë të plotë nga forcat policore e paramilitare serbe.

KI i Degës së LDK-së në Klinë njofton se fshatrat Grabanicë, Dellove, Bokshiq e Zajm janë shëndrruar në gërmadha të vërteta, ndërkoë që flitet të ketë edhe shumë viktima të tjera në njerëz, por tash për tash nuk ka mundësi të dihet më shumë.

I njëjti burim bën me dije se dje në fshatin Rigjevë snajperistët serbë kanë shtënë gjatë gjithë ditës në shtëpitë e lagjes Veselaj.

Në fshatin Gllarevë, që është boshatisur tash disa javë për shkak të sulmeve të vazhdueshme policore së bashku me mercenarin Ramadan Bala i po këtij fshati, shumë shtëpi u demoluan dhe u plaçkitën. Nga këto shtëpi u morën të gjitha aparatet me vlerë, televizorë, frigoriferë, stufa elektrike etj.

Njoftohet se Ramadan Bala është larguar nga shtëpia e tij, e cila qe shndërruar në punkt policor dhe pas kësaj një numër i kryefamiljarëve kanë nisur të kthehen në shtëpitë e tyre.

Sipas dëshmisë së Ali Veselajt nga ky fshat, janë plaçkitur dhe demoluar shumë shtëpi të lagjeve Veselaj, Hasanaj, Pantinaj, Balaj, Haxhaj, Abazaj, Kapllanaj etj.

 

Forcat serbe granatojnë Llaushën – 8 shtëpi janë goditur

Prishtinë, 24 maj (QIK)

Forcat sebe filluan sot pas orës 17:00 granatimin e fuqishëm të fshatit Llaushë të Skënderajt.

Kryetari i Nëndegës së LDK-së në Llaushë i tha QIK-ut se forcat serbe po gjuajnë me një top dhe me armë të tjera kundër lagjeve të Gecajve, Spahiajve, Vojvodëve e lagjes së Hazirajve. Ai tha se janë qëlluar shtëpitë e Sabit Spahiut, Xhavit Spahiut, Bajram Spahiut, Ilaz Gecit, Bejtë Gecit, Muharrem Gecit, Ramë Gecit, Halil Gecit, e tjera. Predhat kanë shkaktuar djegjen e disa prej këtyre shtëpive.

Xhaviti i tha QIK-ut se veçaërisht shumë është qëlluar shtëpia e Sabitit. Mbi këtë shtëpi janë shkrepë 43 granata, tha ai.

Për shkak të rrezikut nga granatimet dhe snajperistët serbë nuk ka lëvizje të njerëzve, prandaj nuk dihet ende për pasojat tjera të këtij sulmi.

Llausha po mbahet në një gjendje të rrethimit të ashpër që nga 5 marsi i këtij viti. Prej atëherë e deri më tash, nuk ka kaluar ditë pa u sulmuar ky fshat nga topat e rëndë. Sot në orën tetë nga një granatë u dogj shtëpia e Mursel Aliçkajt.

  1. Geci tha se krahas Llaushës, sulmi sot ka përfshirë edhe fshatra të tjera përreth Skënderajt. Duke iu referuar dëshmitarëve, ai tha se po granatohet edhe lagja e Lushtakëve në Prekaz të Ulët.

Kurse anëtari i Kryesisë së Degës së LDK-së në Skënderaj Rifat Bejta i tha QIK-ut se forcat serbe po sulmojnë prej orës 17:15 edhe fshatin Krushec, rreth 2 km. larg Skënderajt. Ai tha se ky fshat po granatohet me topa të rëndë nga postblloku i policisë që gjendet në udhëkryqin Skënderaj – Llaushë – Gllogoc.

Në mbrëmje, rreth orës 19:30 sulmet u dobësuan pak.

 

Edhe sot granatohen fshatrat e Gjakovës

Prishtinë, 24 maj (QIK)

Mbi qytetin e Gjakovës sot në orët e pasditës kanë fluturuar disa helikopterë ushtarakë, kurse në kodrën e qytetit janë vendosur forca të mëdha ushtarake.

Helikopterët kanë fluturuar në drejtim të Deçanit dhe të zonës kufitare me Shqipërinë, në drejtim të fshatrave Morinë e Ponoshec të Rekës së Keqe.

Nga këto fshatra në Gjakovë ndihet jehona e shpërthimeve të granatave. Mirëpo, për shkak të bllokadës së zonës nga forcat serbe, nuk ka njoftime të tjera për pasojat e sulmit të sotëm dhe sulmeve të djeshme të ushtrisë jugosllave.

Burimet serbe njoftojnë edhe për një përleshje të forcave ushtarake serbe me grupet e armatosura shqiptare në fshatin Kosharë që gjendet mu afër kufirit me Shqipërinë, por nuk ka njoftime për të vrarë ose të plagosur.

 

Forcat serbe granatuan fshatin Cerovik

Prishtinë, 24 maj (QIK)

Prej orës 13:00 deri në orën 17:00 forcat serbe nga postblloku i Kijevës kanë sulmuar fshatin Cerovik të komunës së Klinës. Ky fshat është granatuar nga topat dhe armë të tjera. Nuk ka njoftime për të vrarë ose të plagosur.

Ceroviku gjendet bri rrugës Prishtinë – Pejë.

 

 U granatua fshati Llapushnik

Sot rreth orës 11:00 forcat serbe granatuan fshatin Llapushnik në Gllogoc. Nga shpërthimet janë dëmtuar disa shtëpi, në mes tjerash edhe shtëpia e Brahim Krasniqit.

Komisioni për Informim i Degës së LDK-së në Gllogoc njofton se prej datës 10 maj janë dëmtuar nga granatat shtëpitë e Salih Krasniqit, Ali Krasniqit, Selman Krasniqit, Ilaz Krasniqit e Halil B. Gashit.

Shumica e banorëve, me përjashtim të atyre që janë ndalur në vetëmbrojtje të shtëpive të veta, janë larguar nga fshati. Deri më tash nuk ka pasur viktima në njerëz.

Fshati Llapushnik gjendet bri rrugës Prishtinë – Pejë.

Related Topics:
Continue Reading

Lajmet

Ditari: Lajmet kryesore që shënuan datën 27 korrik 1993-1998?

Published

16 minutes ago

on

July 27, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.
 
 
Foto: “The Washington Post”
 
 
27 korrik 1993
 
“The Washington Post”: Spastrimi etnik në Kosovë do të shaktojë konflik në rajon
Shtetet e Bashkuara të Amerikës, Rusia dhe Evropa i urdhëruan vëzhguesit e të drejtave të njeriut që të lëshojnë Kosovën, shkruan gazeta e njohur amerikane “The Washington Post”.
Pasi përshkruan arsyen e vendosjes së këtyre vëzhguesve në Kosovë dhe vendimin e kryetarit serb Slobodan Millosheviq, për përzënien e tyre, gazeta konstaton se “prej dhjetëra vëzhguesve, të cilët gjendeshin në Kosovë, para një viti, tani kanë mbetur më pak se tetë, duke përfshirë edhe një amerikan”.
Tërheqja e vëzhguesve ndërkombëtarë nga Kosova gazeta “The Washington Post” e konsideron “flakareshë për politikën e kufizimit të luftës të presidentit Klinton”. Të paaftë për të ndalur luftën në Bosnjë, amerikanët thonë se prioriteti i tyre është parandalimi i përhapjes së luftës në regjionet e tjera, siç është Kosova, me ç’rast lufta mund të përfshijë maqedoninë, Greqinë, Turqinë dhe Shqipërinë dhe kështu do të shaktohej një luftë e gjerë regjionale. Administrata e Klintonit ka premtuar se në rastë të përhapjes së luftës në këtë rajon do të intervenojë me forcë, shkruan gazeta.
Një zyrtar i Stejt Departamentit Amerikan tha: “Të gjithë frikësohen se spastrimi etnik në Kosovë do të shaktojë konfliktin jashtë kufinjve të saj”.
Liderët e Kosovës, shkruan kjo gazetë, thonë se “presioni mbi popullsinë myslimane është shumë më subtil se sa vrasjet dhe dhunimet në Bosnjë. Mirëpo, kërcënimet edhe ashtu i kanë shtyer dhjetëra mijëra shqiptarë myslimanë që ta braktisin Kosovën”.
Fuqive perëndimore, si duket, u kanë mbetur shumë pak mundësi për frenimin e Serbisë. Ky vend tani më gjendet nën sanksione të ashpra ekonomike, kurse “ndërprereja e marrëdhineve diplomatike do të zvogëlonte mundësitë për vëzhgimin e krimeve”, shkruan gazeta “The Washington Post”.
 
 
27 korrik 1994
 
Represioni në Kosovë
Podujevë: – Këto ditë në fshatin Orllan, policia nën pretekst të kërkimit të armëve, bastisi shtëpitë e Rexhep dhe Jahir Rexhepit, kurse në shtëpinë e Mehmet Ademit u gjet një armë. Policia armë kërkoi edhe nga Shefki Beka, si dhe kërkuan djalin e tij i cili tash një kohë gjendet në arrati.
Njoftohet se policia kërkoi për të dorëzuar një pushkë edhe nga Mehmet Salihu, ndërsa shtëpia iu bastis edhe Halit Islamit, me ç’rast policia keqtrajtoi gruan e tij. Njoftohet se policia keqtrajtoi edhe Pajazit Islamin i cili u keqtrajtua fizikisht.
Të gjithë të lartëshënuarit u rrahën të nesërmen në postkomandën e policisë në Orllan.
Më 21 korrik, në fshatin Orllan, policia nën pretekst të kërkimit të armëve bastisi edhe shtëpinë e Hasan Hajdarit, i cili punon përkohësisht në Gjermani. Policia gjatë bastisjes ia konfiskoi pasaportën Hasanit dhe bashkëshortes së tij.
Më 22 korrik, poklicia bastisi shtëpinë e Beqir Musës, kryetar i Nëndegës së LDK-së në Orllan. Nga Beqir Musa policia kërkoi një revole. Pas bastisjes, policia mori me vete Beqir Musën, i cili në u rrah brutalisht dhe u lirua me kusht që të paraqitet sërish pardje në polici.
Më 24 korrik rreth orës 9:00, policia nën pretekst të kërkimit të armëve bastisi shtëpinë e Hasan Berishës, me ç’rast u arrestua Naser Berisha (18).
Gllogovc: – Më 23 korrik, derisa ishte duke pritur trenin në stacionin hekurudhor në Fushë-Kosovë, policia pa kurrfarë shkaku arrestoi Rrahim M.Sadikun nga Gllogovci, i cili u keqtrajtua fizikisht në stacionin e policisë në Fushë-Kosovë.
Po këtë ditë rreth orës 17:00, policia bastisi shtëpitë e Haxhi, Jakup e Jetish Morinës në fshatin Arllat të Gllogovcit. Policia gjatë bastisjes, në prani të anëtarëve të familjes rrahu Hajdin Morinën.
Më 22 korrik, policia nën pretekst të kërkimit të armëve bastisi shtëpitë e Feriz, Ramadan e Nazmi Bytyçit në fshatin Arllat.
Ferizaj: – Dje rreth orës 11:00, policia serbe arrestoi Avni Rexhepin (12) dhe nënën e tij Emine Rexhepin, të cilët u dërguan në stacionin e policisë në Ferizaj. Policia arrestoi nënë e bir, nën pretekst se Shaipi ka thyer xhamin e shkollës së okupuar “Kuvedi i Arbërit”. Njoftohet se policia keqtrajtoi rëndë dymbëdhjetë vjeçarin Avni Rexhepin.
Vushtrri: – Më 24 e 25 korrik, policia nën pretekst të kërkimit të armëve bastisi shtëpinë e Jahir dhe Ismet Malokut në Vushtrri. Meqë policia nuk gjeti asgjë nga armët e kërkuara, ata u kërcënuan se do të kthehen sërish për t’i bastisur.
Malishevë: – Pardje, rreth orës 1 pas mesnate, policia e Rahovecit pasi nuk e gjeti në shtëpinë e tij në Shkozë, arrestoi në shtëpinë e një miku të tij në Mirushë të Malishevës të riun Sylejman Bytyçin (20). Ky i ri u dërgua në stacionin e policisë në Rahovec, ndërsa më pas në Prizren.
Njoftohet se Sylejman Bytyçi u arrestua nën prtetekst të dorëzimit të armëve.
Dje, policia arrestoi Ruzhdi Kryeziun dhe Rrahman Pagarushën në Pagarushë të Rahovecit. Policia arrestoi Ruzhdi Kryeziun nën pretekst se ai merret me shitblerjen e armëve.
Më 21 korrik, në postkomandën e Kijevës u rrah rëndë plaku 72 vjeçar Xheladin Krasniqi nga Drenoci i Malishevës. Ai u lirua me kusht që të paraqitet sërish në polici.
 
 
 
27 korrik 1995
 
Xhems Moran: Kosova granatë e gatshme për të shpërthyer
Senati Amerikan vendosi dje në favor të heqjes së embargos së armëve ndaj BH-së, ndërsa zëvendësdemokrati Xhems Moran shfaqi shqetësimin e tij lidhur me gjendjen në Kosovë.
Ai në një intervistë për “Zërin e Amerikës”, shfaqi shqetësimin se lufta mund të përhapet edhe në Kosovë.
Kosova tha ai është një granatë gati për të shpërthyer. Nuk mund të vazhdojë një gjendje ku gati 95 për qind e popullsisë i nënshtrohet një shtypjeje të rreptë policore dhe sundohet nga më pak se 5 për qind e popullatës, tha ai.
Deputeti amerikan, i cili kohëve të fundit vizitoi disa vende të Ballkanit duke përfshirë Shqipërinë e Kosovën, tha se nuk ka gjasa që çështja e shqiptare në ish-Jugosllavi të zgjidhet së shpejti. Ai tha se dikatorët si Sllobodan Milosheviqi përdorin çështjet e tilla për ta ruajtur pushtetin.
Deputeti Moran tha se ka shumë të ngjarë që lufta të përhapet në jug duke përfshirë edhe disa vende ballkanike.
E vetmja arsye që lufta nuk është përhpaur në Maqedoni e në Kosovë, tha ai, se serbët kanë qenë tepër të zënë me çështjen e Bosnjës. Por, pasi ta mposhtin Bosnjën, mendoj se ata do të vazhdojnë në zonat tjera të Ballkanit me qëllim që të krijojnë Serbinë e madhe, theksoi deputeti amerikan.
Z.Moran tha gjithashtu se vetëm Kroacia mund t’ia ndalë hovin Serbisë. Ai parashikoi se Serbia e Kroacia më në fund do të hyjnë në luftë, dhe se shpreson që Gjermania do t’i vijë në ndihmë Kroacisë. Deputeti Moran tha se Serbisë duhet t’i tregohet ku e ka vendin, për asrye se synimet e saj ndaj fqinjëve janë tejet keqdashëse, njofton gazeta “Bujku”.
 
 
27 korrik 1997
Adelina Ismajli mori pjesë në spektaklin “Miss Globi” në Turqi
 
Mbrëmë Televizioni turk ATV transmetoi drejtpërdrejt spektaklin e zgjedhjes Miss Glob. Në konkurencë morën pjesë përfaqësueset e 40 vendeve të ndryshme nga bota: SHBA, Gjermania, Rusia, Britania e Madhe, Franca, Italia, Spanja, Brazili, Çekia, Sllovakia, Lituania, Estonia, Kirgizistani, Turkmenia, Maqedonia, Bosnja e Hercegovina, Malajzia, Kolumbia, Afrika e Jugut, Greqia e tjerë.
Në mesin e 40 konkurenteve ishte edhe Adelina Ismajli, ylli i muzikës shqiptare argëtuese në Kosovë dhe “Miss Kosovarja 97”. Ajo mbante shiritin “Albania”, por në vetëprezentim, e reja prishtinase theksoi se është nga Republika e Kosovës.
Miss Globi u zgjodh përfaqësuesja e Çekisë.
 
 
 
27 korrik 1998
Vazhdojnë sulmet në Bllacë e Duhël të Suharekës
Prishtinë, 27 korrik (QIK)
Në fshatrat e komunës së Suhaarekës edhe sot gjendja është shumë e rëndë. Forcat serbe, nga tridhjetë tanke kanë granatuar gjatë natës dhe sot fshatrat Bllacë e Duhël.
KI i Degës së LDK-së në Suharekë njofton se sulmit të ashpër të forcave serbe po i kundërvihen forcat mbrojtëse të UÇK-së. Nga granatimet janë djegur lagjet Bajraktari dhe Suka në Bllacë, ndërsa forcat serbe janë pozicionuar në afërsi të shkollës së fshatit.
Problem në vete në fshatrat e sulmuara dhe në fshatrat tjera paraqesin dezinformatat e shumta të njerëzve të papërgjegjësi, të cilat po ndikojnë në zhvendosjen dhe në lëvizjen e madhe të popullsisë.
U bëhet apel banorëve të këtyre fshatrave që të mos bien nën ndikimin e tyre dhe të mos i lëshojnë shtëpitë pa nevojë.
Sulme masive në Drenicë: U sulmuan fshatrat Llaushë, Klinë, Runik, Leçinë, Padalishtë, Çitak e Suhagërllë
Në komunën e Skënderajt, luftimet vazhdojnë me intensitet të shtuar. Dje gjatë gjithë ditës është granatuar me qindra granata Llausha. Forcat serbe kanë tentuar të hyjnë në fshat.
Forcat e UÇK iu kundërvunë këtij aksioni.
Gjendja e tillë vazhdon edhe sot në Llaushë. Nuk dihet të ketë viktima.
N Klinën e Poshtme, atë të Mesmen dhe në Klinën e Epërme janë vrarë nga granatimet dy gra dhe një plak: Sali Duraku dhe Azize Hajdini (Mala) (1953) nënë e 5 fëmijëve. Emri i viktimës së tretë nuk dihet. Viktimat janë varrosur dje nën breshërinë e granatimeve
Në Runik e fshatrat përreth pati mbrëmë dhe sot luftime të intenzitetit të rritur. Policia hyri në dy fshatra. Në Kotorrk dogji grunajat dhe rrëmbeu Beqir Hajrizin (62), Azem Hajrizin (35), djalin e Beqirit dhe Fidaim Hajrizin (25) djalin e Beqirit, ndërsa në fshatin Radishevë rrëmbeu Shaip Selmanin (45) dhe Nazim Ahmetit (27).
Për fatin e tyre as sot nuk dihet.
Sot po granatohet pandërprerë dhe Leçina, Padalishta, Çitaku, Suhagërlla dhe fshatrat përreth.
Forcat serbe dogjën gjithë arat me grurë që prisnin korrje-shirjen.
Në Skënderaj është gjendje e nderë. Nuk mund të hyhet as të dilet. Forcat serbe përforcohen vazhdimisht.
Nga komuna e Klinës ka lajme trishtuese. Armiku dogji vrau e plagosi çdo gjë para vetes. Siç deklaron sot Sadri Boja nga Kerrnica, forcat serbe hynë në fshatin e boshatisur dhe dogjën shtëpitë e Dr. Rexhep Bojës, Sadri Bojës, Hajriz, Brahim, Bajram, Rushit, Rrahman, Imer, Cenë të gjithë të lagjes Boja dhe Isuf Berishës, Bajram Oruçit, Zeqir Berishës, Hamdi, Ali e Nezir Doçit.
U dogj edhe shkolla fillore e fshatit dhe u lëndua Besim Boja (26).
Sot dëgjohen granatimet me armë artilerike kalibrash të ndyshëm në shumë fshatra të kësaj komune, si në Dollc, Gllarevë, Cerovikë, Stapanicë etj.
Gjakovë: Policia serbe solli në morgun e spitalit 7 trupa pa jetë
Sot rreth orës 18:00 policia serbe solli në morgun e spitalit të qytetit në Gjakovë 7 trupa pa jetë, njofton Komisioni për Informim i Degës së LDK-së në Gjakovë.
Për shkak të bllokimit të objektit të siptalit, tash për tash, është e pamundur të sigurohen të dhëna të tjera për ta.

Continue Reading

Lajmet

UBT përgatit ekspertë të Real Estate, një nga sektorët më fitimprurës të ekonomisë globale

Published

21 minutes ago

on

July 27, 2026

By

A e dinit se patundshmëria përbën klasën më të madhe të pasurisë në të gjithë rruzullin tokësor? Sipas analizës globale nga kompania prestigjioze Savills, vlera e përgjithshme e patundshmërive në botë ka arritur në shifrën marramendëse prej mbi 379.7 trilionë dollarësh. Për ta kuptuar peshën e këtij sektori, kjo industri është pothuajse katër herë më e madhe se e gjithë ekonomia globale dhe peshon dukshëm më shumë se sa i gjithë tregu i aksioneve e i bonove të marra bashkë.

E për të qenë pjesë e këtij tregu dinamik e të suksesshëm kjo mund të arrihet përmes studimeve në programin Menaxhimi i Patundshmërive dhe Infrastrukturës në UBT. Ky program akademik është projektuar për të përgatitur profesionistë të kualifikuar, të cilët luajnë një rol kyç në zhvillimin e mjedisit të ndërtuar dhe në përmirësimin e cilësisë së jetesës urbane.

Përmes mësimdhënies inovative, kërkimit shkencor me ndikim dhe menaxhimit transformues të pasurive të paluajtshme, ndërtimit e infrastrukturës, UBT u ofron studentëve platformën e nevojshme për të kontribuar në mënyrë të qëndrueshme dhe strategjike në rajon e më gjerë.

Gjatë këtij udhëtimi akademik, studentët pajisen me njohuri të thelluara mbi kornizat ligjore, financiare dhe teknike, si dhe me kompetenca praktike në vlerësimin e pasurive, planifikimin e projekteve dhe analizën e investimeve.

Programi promovon mendimin analitik, marrjen e vendimeve strategjike dhe lidershipin në projekte zhvillimore ndërdisiplinore, duke integruar teknologjitë e avancuara dhe Inteligjencën Artificiale në menaxhimin e pronave, gjithnjë mbi parimet e etikës profesionale dhe qëndrueshmërisë mjedisore.

Përmes kësaj përgatitjeje gjithëpërfshirëse, studentët aftësohen të interpretojnë rregulloret e industrisë, të drejtën kontraktuale dhe proceset e ndërmjetësimit, si dhe të analizojnë ndikimin e faktorëve demografikë e hapësinorë në tregun imobiliar.

Përveç kësaj, të diplomuarit zotërojnë teknikat moderne të vlerësimit të pronave, aplikimin e marketingut digjital dhe menaxhimin e kontratave të Partneriteteve Publike-Private, duke garantuar një analizë kritike të çdo projekti nga këndvështrimi teknik, menaxherial dhe financiar.

Bëhu pjesë e gjeneratës së re të liderëve në sektorin e patundshmërive.

Apliko tani në UBT dhe ndërto një karrierë të sigurt me ndikim të drejtpërdrejtë në zhvillimin e hapësirave tona urbane!

Continue Reading

Lajmet

Kosova nënshkruan pesë marrëveshje me Francën

Published

24 minutes ago

on

July 27, 2026

By

Kosova dhe Franca kanë nënshkruar  sot 5 marrëveshje.

Nënshkrimi është bërë gjatë vizitës së ministrit për Evropë të Francës, Benjamin Haddad, i cili është pritur në takim nga ministri në detyrë i Punëve të Jashtme dhe Diasporës, Glauk Konjufca.

Janë nënshkruar letërqëllimin për themelimin e Komunitetit kosovaro-francës për mbështetjen e organizmit të Lojërave Mesdhetare 2030, marrëveshjen administrative për mësimdhënien e gjuhës frënge në Kosovë, Marrëveshjen për ndihmë juridike të ndërsjellë në çështje penale, Marrëveshjen për ekstradimin dhe Marrëveshjen e kredisë me Agjencinë Franceze për zhvillimin e projektit për Lojërat mesdhetare. Katër marrëveshjet  e para janë nënshkruar nga Konjufca dhe Haddad, ndërkohë që e pesta është nënshkruar nga ministri në detyrë i Financave Hekuran Murati dhe ministri francez Haddad./A.K/

Continue Reading

Lajmet

Ryan Gosling bëhet pjesë e Marvel, do të luajë Ghost Rider në filmin e ri të MCU-së

Published

30 minutes ago

on

July 27, 2026

By

Aktori Ryan Gosling do t’i bashkohet Universit Kinematografik të Marvelit (MCU), ku do të interpretojë personazhin kryesor në filmin e ri “Ghost Rider”.

Lajmi u bë i ditur gjatë një prezantimi surprizë në festivalin San Diego Comic-Con, ku Gosling tha se është një rol që “ka dashur ta luajë për një kohë të gjatë”.

Filmi i ri pritet të publikohet në vitin 2028 dhe do të jetë projekti i tretë kinematografik për anti-heroin me motor. Ai vjen pas filmave “Ghost Rider” të vitit 2007 dhe “Ghost Rider: Spirit of Vengeance” të vitit 2011, ku rolin kryesor e kishte luajtur Nicolas Cage.

Regjinë e filmit do ta bëjë Shawn Levy, i cili më herët ka drejtuar edhe “Deadpool & Wolverine”. Gosling e ka cilësuar Levy si “regjisorin e vetëm” për këtë projekt.

Personazhi i Ghost Rider lidhet me Johnny Blaze, një marifetist me motor i cili fiton fuqi mbinatyrore pasi lidhet me shpirtin e hakmarrjes Zarathos.

Ndërkohë, në të njëjtin event, Marvel zbuloi edhe detaje të reja për projekte të tjera, përfshirë filmin “Avengers: Doomsday” dhe konfirmimin se “Black Panther 3” do të publikohet në vitin 2028. Ryan Reynolds gjithashtu bëri një paraqitje surprizë si Deadpool gjatë panelit të Marvelit./BBC/A.K/

Continue Reading

Të kërkuara