Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

1 tetor 1993

Serbia po ndjek penalisht 67 shqiptarë të Kosovës

Në një informatë të hollësishme të Këshillit për Mbrojtjen e të Drejtave dhe të Lirive të Njeriut në Prishtinë, që e boton gazeta e sotme “Bujku”, thuhet se në dy muajt e fundit autoritetet serbe kanë ndërmarrë një fushatë të gjerë arrestimesh të shqiptarëve në Kosovë. Sipas informatave që posedon KMDLNJ, deri më tash u paraburgosën ose po ndiqen 67 persona.

Më 27 korrik 1993, thuhet në këtë informatë, “në Kosovë ka filluar edhe një fushatë tjetër arrestimesh të shqiptarëve, kryesisht veprimtarë të partive politike, ish-të burgosur politikë dhe-ish eprorë ushtarakë, me motive e prapavi politike, siç janë edhe kualifikimet që u bëhen veprave për të cilat ngarkohen ata”.

Sipas avokatëve Bajram Kelmendi, Fazli Balaj, Adem Bajri, Hazër Susuri, Aziz Rexha, Haxhi Kelmendi, Halil Kelmendi, Xhafer Maliqi dhe Destan Rukiqi, këtë fushatë e karakterizon edhe përdorimi i dhunës fizike e psikike, me qëllim detyrimi që të pranojnë fajet për të cilat ngarkohen, si dhe shkeljet flagrante të procedurës penale.

Në këtë informatë të KMDLNJ-së, thuhet se të gjithë këta të pandehur ndiqen për vepra penale dhe se pos qëllimit për frikësimin e shqiptarëve dhe shkaktimin e pasigurisë kolektive të tyre, me synim të spastrimit të qetë etnik të Kosovës dhe të serbizimit të saj, kjo fushatë ka për objektiv krijimin e bindjes para opinionit serb dhe të atij ndërkombëtar se shqiptarët janë ata që duan problemin e Kosovës ta zgjidhin me luftë e jo me mjete paqësore demokratike.

Këshilli për Mbrojtjen e të Drejtave dhe të Lirive të Njeriut në Prishtinë, thuhet në këtë informatë, i ka bërë me dije faktorët ndërkombtarë, si dhe përgjegjësit në Jugosllavinë e vetëshpallur mbi këtë fushatë dhe për keqtrajtimin e pashembullt të shqiptarëve të arrestuar. Po ashtu thuhet se një letër e këtij këshilli, siç është informuar opinioni, ka hyrë edhe në procedurën e shqyrtimit në Kuvendin e Kombeve të Bashkuara, që po mbahet këto ditë në Nju-Jork.

1 tetor 1994

Represioni në Kosovë

Vushtrri: – Më 24 shtator, policia serbe shkoi për ta kërkuar në shtëpinë e vet Sinan Begun në fshatin Kurillovë, me pretekst se ai nuk i ishte përgjigjur thirrjes së policisë për t’u paraqitur në stacion.

Policia u parashtroi pyetje njerëzve lidhur me Enver Begun, kryetar i Nëndegës së LDK-së në Kurillovë. Policët i thanë Sinan Begut që t’i thotë Enverit se nëse nuk heq dorë nga aktiviteti politik, “do ta vrasim”.

Më 28 shtator, një inspektor dhe një polic serb ishin në lokalin e Kurtan Berishës në fshatin Smrekonicë, nga i cili kërkuan para në valutë devizore.

Më pas inspektori dhe polici së bashku me Kurtanin shkuan në shtëpinë e tij dhe e bastisën, me ç’rast djalit të Kurtan Berishës ia plaçkitën 20 marka gjermane.

Më 26 shtator, policia e postkomandës së Prilluzhës, kërkoi në shtëpinë e tij Sheremet Saraçin në fshatin Bivolak. Kjo është hera e katërt që Sheremeti thirret në polici.

Më 26 shtator, nga shefi i stacionit të policisë në Vushtrri, Vuçina Janiçijeviq u mor në pyetje Tahir Tahiri, kryetar i Aktivit të LDK-së në fshatin Stanoc i Poshtëm i Vushtrrisë.

Tahir Tahiri u mor në pyetje rreth gjashtë orë dhe u pyet rreth aktivitetit politik dhe Këshillit për Financim.

Më 29 shtator rreth orës 12:00, një patrullë e policisë serbe ishte në shtëpinë e Islam Rexhës në fshatin Sllatinë. Nga ai policia mori një pushkë.

Më pas policët, me pretekst të kërkimit të armëve, shkuan edhe në shtëpitë e Ramë Jonuzit dhe në atë të Aziz Beqirit. Njoftohet se Aziz Beqiri u rrah në prani të anëtarëve të familjes, ndërsa më pas u dërgua në polici.

Prizren: – Pardje, policia serbe nën pretekst të dorëzimit të armëve morën në pyetje Hamdi Gashin dhe Destan Shalën nga Skënderaji i Ulët i Prizrenit. Destan Shala u keqtrajtua fizikisht në stacionin e policisë në Prizren, ndërsa ata u liruan me kusht që të paraqiten sërish në stacionin e policisë.

Viti: – Gjatë javës së kaluar policia nga Hamdush Hyseni kërkoi një revole dhe e urdhëruan atë që ta blejë, në rast se nuk e ka.

Më 26 shtator rreth orës 10:00, inspektorët serbë morën Musa Abdylin, ish-kryetar i Nëndegës së LDK-së në Beguncë të Vitisë. Musa Abdyli në lokalet e stacionit të policisë në Viti u mbajt rreth 11 orë. Ai tash është kryetar i SHB “Nënë Tereza” në Viti. Policët kërkuan nga ai që të tërhiqet nga aktiviteti i tij.

Gjakovë: – Më 24 shtator, nën pretekst të armëve policia serbe mori në pyetje Ramush, Azem, Agim, Sali dhe Haki Hoxhën nga Cërmjani i Gjakovës. Ata u pyetën edhe rreth aksionit “Të ndihmojmë shkollën shqipe” dhe për aktivitetin e LDK-së.

Më 23 shtator, policia nën pretekst të kërkimit të armëve mori Muhamet Osmanin nga Dobroshi i Gjakovës. Ai u mbajt në stacionin e policisë në Gjakovë rreth 24 orë.

Ndërkaq më 24 shtator, në të njëjtin fshat, policia kërkoi Iber H.Rexhën, por ai nuk gjendej në shtëpi.

Prishtinë: – Më 22 shtator, rreth orës 11, derisa ishte duke mbajtë orën e mësimit, u mor në pyetje Ilmi Osmani, arsimtar i shkollës fillore “Nexhmi Mustafa” në Besi të Prishtinës. Pretekst i kësaj ndërhyrjeje të policisë në këtë mënyrë ishte kërkimi i armës nga ky arsimtar.

Mitrovicë: – Më 28 shtator, policia serbe nën pretekst të kërkimit të armëve shkoi në shtëpinë e Shasivar Çelës në fshatin Rashan të Mitrovicës, nga i cili kërkoi që të dorëzojë një pushkë. Policia urdhëroi Shasivarin që të paraqitet së bashku me djalin e tij, Xhafer Çelën në stacionin e policisë në Mitrovicë.

Të njëjtit policë shkuan edhe në shtëpinë e Nexhmedin Çelës, të cilit ia lanë thirrjen që të paraqitet në stacionin e policisë në Mitrovicë.

1 tetor 1995

Plaçkitje të mëdha të tregtarëve shqiptarë në Mitorvicë

Pas bllokimit djeshëm të tregut të plaçkave dhe të pemëve e perimeve në Mitrovicë, inspektorët serbë të tregut që ndihmoheshin nga policët, u plaçkitën sasi shumë të mëdha të mallrave të ndryshme. Gjarë këtij aksioni tregtarëve dhe bujqve shqiptarë iu konfiskuan veshmbathje me vlerë rreth 70.000 DEM, perime të ndryshme që kapin shumën prej 10.000 DEM si dhe mobilje, lëndë e materiale të tjera të ndërtimtarisë vlera e të cilave është shumë e madhe. Asnjërit nga të dëmtuarit nuk iu lëshua kurrfarë dëshmie për mallin e konfiskuar.

Nënkëshilli për Mbrojtjen e të Drejtave dhe Lirive të Njeriut në Mitrovicë njofton se inspektorët serbë të tregut që kishin ardhur nga Prishtina dhe nga qytete të ndryshme të Serbisë, gjobitën e plaçkitën edhe shumë pronarë të dyqaneve private. Me nga 600 dinarë u gjobitën edhe disa pronarë që i mbyllën dyqanet nga frika se do të plaçkiten e do te gjobiten me shuma të mëdha.

Nga Mitrovica njoftohet po ashtu se dje policia serbe konfiskoi 8 traktorë me zhavor të destinuar për treg. Policia i detyroi pronarët që zhavorin ta dërgojnë në ndërmarrjen “Betonierka”.

1 tetor 1997

Protesta paqësore u pengua nga ndërhyrja e forcave okupuese serbe

Rreth 50 000 studentë e qytetarë u mblodhën sot në orën 10. 30 në lagjen “Velania” të Prishtinës për të protestuar kundër okupimit të shkollave e të lokaleve universitare të Kosovës. Mirëpo protestën nuk e lejoi të zhvillohej policia serbe, e cila ishte e armatosur me të gjitha llojet e armëve e pajisjeve për sulm.

Vala e studentëve, të veshur në pjesën e sipërme të trupit me rroba të bardha, drejt vendnisjes së protestave në Velani, nisi që para orës 9. Studentë të disa fakulteteve, si ata të Fakultetit të Mjekësisë, FSHMN-së etj. erdhën të organizuar dhe të shoqëruar nga profesorët e tyre.
Me organizimin e kujdestarëve studentë, që mbanin shirita të kuq në duar, radhitja e studentëve sipas fakulteteve u bë për një kohë shumë të shkurtë.

Duhet theksuar se policia që më herët ishte stacionuar në të gjitha rrugët që çojnë në këtë lagje dhe legjitimonte e ndalonte studentët dhe qytetarët tjerë. Studentë të ardhur nga qytete të tjera të Kosovës, si nga Podujeva etj. , thanë se policia i kishte detyruar të zbrisnin nga autobusët në hyrje të Prishtinës dhe deri te vendi i protestave ata kishin arritur të vinin vetëm duke kaluar periferisë së qytetit.

Numri i gazetarëve që kishin dalë për të përcjellë protestën ishte tejet i madh, në mesin e tyre kishte një numër të madh të gazetarëve të mediave të huaja, që kishin ardhur nergut në Kosovë për të përcjellë protestat e studentëve.

Driton Lajçi, nënkryetar i UPS të UP- së, duke u përgjegjur në pyetjen e një gazetari për karakterin e protestave, i tregoi atij përmbajtjen e parullave, krejtësisht të karakterit joviolent, dhe u shpreh se protestat do të vazhdojnë deri në realizimin e kërkesave, respektivisht deri në lirimin e objekteve universitare.

Në lokacionin ku u mblodhën studentët ishin prezentë gjithashtu një numër i diplomatëve të huaj, si Riçard Hëkëbi, drejtor i Zyrës Amerikane në Prishtinë, Nikollas Hill, sekretar i dytë i Ambasadës Amerikanë në Beograd, Xhulian Bretuajt, sekretar i dytë i Ambasadës së Britanisë së Madhe në Beograd, Jonas Uajs, sekretar i parë i Ambasadës suedeze etj.
Deri në orën 10. 30 kur kolona u nis në marshutën e caktuar më parë, numri i studentëve, duke llogaritur këtu edhe numrin e madh të qytetarëve që kishin dalë në përkrahje të tyre, arriti në mbi 50. 000 veta.

Në ballë të kolonës, që ishte e pajisur me pankarta të shkruara në gjuhën shqipe dhe në gjuhën angleze, ishte rektori i Universitetit të Prishtinës, prof. dr. Ejup Statovci, që shoqërohej nga prorektori prof. dr. Ahmet Geca dhe Bujar Dugolli, kryetar i UPS të UP, Muhamet Mavraj, kryetar i Kuvendit të UPS të UP, Driton Lajçi, nënkryetar e Albin Kurti, anëtar i Kryesisë, si dhe udhëheqës të tjerë të këtij unioni. Në protestë merrnin pjesë bashk me studentët edhe mësimdhënësit e tyre.
Derisa zgjati rreshtimi i studentëve, herë pas here u dëgjuan duartrokitje të studentëve, ndërsa pas nisjes kolona ishte e qetë.

Forcat e policisë, që qëndronin në daljen në rrugën për Tauk Bashçe, pas nisjes së kolonës vendosën menjëherë autoblindën dhe autocisternën në rrugë kordonin policor. Kordone policore u vendosën edhe në të gjitha rrugët anësore për rreth kësaj hapësire. Kolona e studentëve, në krye me rektorin Statovci, eci në qetësi derisa u afrua disa metra pranë kordonit policor dhe aty u ndal.

Pas disa minutash, mbi hapësirën ku ishin studentët filluan të fluturojnë helikopterët e policisë, të cilët vëzhgonin situatën.

Policët, që fillimisht ishin në numër më të paktë, dhe kolona e studentëve qëndruan ballë për ballë gjatë tërë kohës, deri në intervenimin policor. Ndërkohë, veç policëve që ishin në gjendje gatishmërie për intervenim, mjaft aktivë ishin edhe një xhirues dhe një fotograf që fotografonin pandërprerë, të hipur mbi autoblindë.

Një pjesë e gazetarëve, që ishin në fillim të turmës, u penguan të fotografonin në afërsi të kordonit dhe më pas u lejuan nga policia të dilnin prapa kordonit. Por, pas disa minutash, policia i largoi ata fare larg nga turma.

Në orën 11,00 policia iu drejtua me megafon protestuesve dhe kërkoi prej tyre që të shpërndaheshin, duke e quajtur demonstratën të paligjshme. Policia u dha afat protestuesve 30 min. që të shpërndaheshin vetë. Mirëpo hapësira e lagjes mbushej vazhdimisht me protestues. Në orën 11, 30 policia u kërcënua edhe njëherë se do të intervenonte, duke dhënë afat 15 minuta. Pas kërcënimeve, forcat e mëdha të policisë intervenuan në orën 11,50 me bomba lotësjellëse dhe duke përdorur dhunën masive fizike kundër protestuesve. Pasi policia kishte krijuar një gjendje rrethimi, shumë protestues tentuan të largoheshin në drejtim kah “Varret e çifutëve” dhe drejtime të tjera, mirëpo ata goditeshin nga forcat e policisë që gjendeshin në të gjitha anët. Mbi hapësirë fluturonin edhe dy helikopterë të policisë. Gjatë ndërhyrjes, policia arrestoi rektorin prof. dr. Ejup Statovci dhe bashkëpunëtorët e tij si edhe kryetarin e UPS të UP-së Bujar Dugollin dhe disa bashkëpunëtorë të tij. Merret vesh se ata në polici janë keqtrajtuar rëndë dhe më vonë janë liruar. Z. Dugolli ka pësuar lëndime trupore dhe është detyruar të kërkojë ndihmën e mjekut. Lëndime trupore ka pësuar edhe nënkryetari i UPS të UP-së Driton Lajçi.

Policia rrahu dhe arrestoi edhe shumë qytetarë të tjerë. Ky intervenim brutal i shpërndarjes zgjati rreth një orë, ndërsa shumë studentë e qytetarë u strehuan nëpër shtëpitë e kësaj lagjeje. Policia hodhi gaz lotësjellës edhe nëpër ballkonet e shtëpive të lagjes “Taslixhe”. Dhjetëra protestues të lënduar rëndë e lehtë kërkuan ndihmë në klinikat private të mjekëve shqiptarë. Forca serbe intervenuan edhe në pjesë të tjera të Prishtinës. Qysh prej mëngjesit grupe të shumta policësh të ardhur nga Serbia e Mali i Zi ishin stacionuar pranë të gjitha objekteve publike të Prishtinës, nëpër udhëkryqet kryesore, pranë ndërtesave të fakulteteve e Qendrës së Studentëve që mbahen të okupuara, pastaj pranë çerdheve të fëmijëve, gjithashtu të okupuara, lokaleve shkollore prej nga janë dëbuar shqiptarët, pranë bankave, e tjerë. Nëpër rrugët kah pritej të kalonte marshuta e protestës, kishin dalë edhe dhjetëra mijëra qytetarë për të protestuar kundër pushtimit të objekteve shkollore dhe për të kërkuar lirimin e tyre.
Intervenime të policisë pati edhe në Gjilan, Mitrovicë, Pejë, Ferizaj, Gjakovë dhe Prizren ku u zhvilluan protesta të studentëve e qytetarëve.

1 tetor 1998

Suharekë: Në Vraniq u gjetën edhe 5 shqiptarë të ekzekutuar nga forcat serbe

Sot në fshatin Vraniq, janë gjetur trupat e pajetë edhe të 5 shqiptarëve të ekzekutuar nga paramilitarët serbë, bën të ditur KI i Degës së LDK-së në Suharekë.

Njoftohet se në këtë fshat janë gjetur trupat e ekzekutuar të Burim Hamdi Elshanit e Milaim Bajram Bugarit (20) nga Suhareka, Hafir Elshanit (35) nga Sllapuzhani, trupi i të cilit u gjet i masakruar, Rasim K. Kolgecit (15) nga Vraniqi dhe të Hazir Bajraktarit nga Budakova.

I njëjti burim bën të ditur se i ekzekutuari i parë Burim Elshani para se të ekzekutohej është ndarë nga civilët tjerë shqiptarë dhe është dërguar në mal, ku paramilitarët serbë e kanë ekzekutuar pasi ia kanë veshur uniformën ushtarake për ta paraqitur atë se kinse ka qenë pjesëtar i UÇK-së.

Në komunën e Suharekës dyshohet edhe për viktimat të tjera shqiptare të shkaktuara nga forcat e ushtrisë, policisë dhe të paramilitarëve serbë.

Në Gllarevë të Klinës edhe 5 shqiptarë të vrarë dhe 2 të plagosur

Ahmet Alush Pantina e Hysen Rifat Pantina nga Gllareva e Klinës u gjetën dje të vrarë në fshatin e tyre.

KI i Degës së LDK-së në Malishevë njofton se ata janë vrarë gjatë ofnesivës së fundit të forcave serbe në këtë fshat.

I njëjti burim bën të ditur se forcat serbe në këtë fshat kanë vrarë edhe tre shqiptarë të tjerë, por emrat e tyre deri tash nuk janë bërë të ditur.

Bëhet e ditur se forcat serbe në këtë fshat kanë plagosur edhe Ymer Hamëz Veselajn e Rexhë Balajn, që të dy nga Gllareva.

Vushtrri: Në Oshlan edhe 2 shqiptarë të vrarë nga forcat serbe

Dje në Oshlan, u gjetën trupat e pajetë edhe të dy shqiptarëve të vrarë nga forcat serbe, njofton KI i Degës së LDK-së në Vushtrri.

Njoftohet se në këtë fshat u gjet trupi i pajetë i Arsim Isë Ibrahimit (14) dhe i Musa Shaban Sheremetit (60) nga i njëjti fshat.

Njoftohet se trupi i viktimës së fundit ishte i karbonuar, pasi ishte vështirë të identifikohej.

Të përkujtojmë se vetëm në fshatin Oshlan, forcat serbe deri tash kanë ekzekutuar 19 shqiptarë, ndërsa dyshohet se numri i të vrarëve në këtë komunë nga forcat serbe është shumë i madh.

Gllogoc: Para ndërtesës së Kuvendit të instaluar serb 3 kufoma të paidentifikuara

Dje rreth orës 10:00, para ndërtesës së Kuvendit të instaluar serb në Gllogoc janë parë 3 kufoma të mbuluara, të cilat ruheshin vazhdimisht nga policia serbe, i tha sot QIK-ut një shqiptar nga Zabeli i Ulët, i cili për shkaqe sigurie deshi të mbetej anonim.

I njëjti burim thekson se identiteti i 3 kufomave nuk dihej, ndërsa në stacionin e policisë serbe në Gllogoc, po mbahen në arrest edhe shumë civilë shqiptarë, të cilët po torturohen brutalisht.

(Ora 18:30).

Së paku 167 shqiptarë të vrarë nga data 22 shtator

Prishtinë, 1 tetor (QIK) – Prej 22 shtatorit, kur filloi sulmi kundër fshatrave të Drenicës rreth bjeshkës së Qyqavicës, në mes komunave Skënderaj, Gllogoc, Vushtrri, Mitrovicë e Obiliq, janë vrarë së paku 167 shqiptarë. Një shumicë prej tyre janë masakruar në mënyrën më mizore.

Më posht po e japim listën e hartuar sipas njoftimeve që janë transmetuar në QIK prej datës 22 shtator.

Janë vrarë:

Sheremet Bajrush Sheremeti (42), Rrahim Mehmeti (60) Hajrullah Gjaka (63), Bislim Kamber Brahimi (32), Nysret Abdurrahim Ferati (60), Adem Tafil Azemi (38), Sali Adem Sejdiu (26), Selim Jashar Sagaqi (65), Faton Syla (15), Bahtie Gashi, Behxhet Islam Karaxha e Skënder Fetah Karaxha nga Çikatova e Vjetër, Bashkim Abdullah Krasniqi, Hajzer Hajdari, dhëndërr i Hajzerit, Bajram Beqir Krasniqi, Bajram Bajrami (40) e Qamil Bajrami (20) vëllezër, Hysni (23) e Elhami (15) Shabani vëllezër, Naim Musliu (34), Fejzullah Ramadani (23), Naim Salihu (25), Lulzim Gashi, Sadullah Selman Dibrani (47) dhe nipi i tij Avni Jetullah Dibrani (20, Fitore Klinaku (12) Shyqyri Krasniqi, i biri i Beqir Morinës nga Gllobari, Murat Muharrem Haliti (33), Fatmir Hajrush Ahmeti (22), Hajrush Qamil Ahmeti (55), Daut Fazli Avdiu (56), Milazim Sinan Behrami (rreth 75 vjeç), Shyqyri Islam Islami (57), bashkëshortja e tij, Fatimja (51), Selvete Avdi Islami (21), Agim Ademi, bashkëshortja e Mursel Shabanit, Mustafë Shuti, Milazim Mani me të ëmën Kadën, Sheremet Bajrushi, Shasivar Isa Ademi (51), Fatmir Shasivar Ademi (17), Burim Ramadan Ademi (17), Gani Fazli Ademi (16), Bajram Bejtullah Sahiti (33), Agim Selim Ademi (28), Hetem Rizah Halili (45), Bujar Hetem Halili (16), Bekim Miftar Halili (22), Nazmi Veli Halili (25) e Nexhat Kadri Halili (17) nga Galica, Sejdi Kabashi (22) nga Polaci, Haradin Islam Lahu (43) nga Galica, Enver Kastrati (40) nga Polluzha, Hasime Shabani (50) nga Galica, Mexhid Hamit Bislimi (33), Xhavit Haradin Bislimi (40), Driton Shaban Brahimi (22) nga Prekazi i Epërm, Kadri Miftar Mehmeti (22), Adem Lushtaku nga Prekazi i Epërm, Enver Halit Ferati (42) nga Lubaveci, Muhamet Rrahman Idrizi (53) nga Beqiqi, Feriz Rrustem Shala (43) nga Ujmiri, Murat Muharrem Haliti (33), Hajrush Qamil Ahmeti (55) dhe djali i tij Fatmir Ahmeti (22), Daut Fazli Avdiu (56), Fetije Bislim Bislimi (32), Sylejman Rrustem Kafexholli (70), Kujtim Kerlani (44), Ramadan Islam Muleta (1954), Besim Rexhep Muleta (1975), Bashkim Tahir Muleta (1971), Lutfi Hyseni (65), Selatin Hyseni (28), Halit Hyseni (40), Hamit Hyseni (41), Idriz Mehmeti (83) nga Oshlani, Hysen Murati nga Balinci, Hazir Qerim Avdyli, Rifat Myftar Fejza nga Dobrasheci, Bajram Beqir Krasniqi e Behram Hazir Morina nga fshati Gllobar; Rrustem Fetah Karaxha (u gjet i masakruar në bunar) nga Çikatova e Vjetër; Shyqri Hajdin Krasniqi, Muhamet Krasniqi, Bashkim Avdullah Krasniqi, Myftar Shaban Kurrumeli, Xhevat Sheqir Berisha, Hafize Jetullah Llugani (e sëmurë mentale), Hamit Lladrofci, Fehmi Lladrovci dhe Xhevahire Krasniqi – Lladrovci (bashkëshorte e Fehmiut), të gjithë nga fshati Gllanasellë; Brahim Ajet Avdulli (i masakruar në fytyrë), Hajdar Ismaili, Selim Myftari e Hamit Zymberi, nga Likoshani, Bahtie Gashi nga Vërbovci e Sefer Tafaleci (i therrur me thikë) nga Vërbovci, Mehmet Azem Saliuku e dr. Lec Bislim Uka (i masakruar) nga Gradica, Hajzer Hajdari nga Abria e Epërme, Haxhi Ahmet Krasniqi nga Zhilivoda dhe nëna e Sabri Saraçit nga Bivolaku, Adem Sali Deliu (33), Hava Imer Deliu (65), Jeton Imer Deliu (10), Hamide Sali Deliu (60), Valmir Adem Deliu (1 vjet e gjysmë), Luljeta Imer Deliu (25), shtatzënë, Lumnije Imer Deliu (30), Mihane Imer Deliu (25), Donjeta Hajriz Deliu (4), Gentiana Hajriz Deliu (7), Zahide Hajriz Deliu (27), Fazli Deliu (90), Ali Deli Deliu (63), i prerë në fyt me thikë, Pajazit Rrustem Deliu (65), Zeqir Jonuz Deliu (44) që të gjithë nga Abria e Epërme, Mustafë Fejza, Rifat Fejza, Hazir Avdyli e Hasan Maloku nga Dobrosheci, Sadri Muçolli, një shqiptar me mbiemrin Tluna, Ahmet Alush Pantina (19) nga Gllareva e Klinës dhe Hasan Beqë Morina (22) nga Vllashki Drenoci i Malishevës, Dervish Cen Maloku (60), Sejdi Bali Gashi (60), Deli Bali Gashi, Zenel Morina (30), Fitim Sadri Elshani (22), Vehbi Ejup Hoxha (48), Faik Aziz Braiqi (16), Fahredin Sejdë Braiqi, Sabit Metë Buzllaku (62), Fejzë Brahim Braiqi (45), Afrim Ramadan Braiqi (30), Zymer Ali Buzhala (rreth 55 vjeç), Murat Kurtish Kokollari (55), Adem Imer Buzhala (rreth 58 vjeç), që të tre nga Budakova, Bajram Durmish Bytyçi (1969), Mehaz Mjekiqi, Xhemshir Ademaj (35) nga Petrova, dr. Shpëtim Robaj, Habib Deliu, Driton Hysenaj (14), Haki Liman Krasniqi (1967), Shefqet Haki Krasniqi (1965), Skënder Hydë Krasniqi (1970, Ali Metë Krasniqi (1818, i cili u gjet i djegur në shtëpinë e tij në Negroc të Gllogocit), Mehdi Sylë Morina (1953) nga Gjergjica e Malishevës, Ilaz Maliq Javori (1953) nga Llazica e Malishevës, Bashkim Tahir Muleta (27) nga Korrotica e Gllogocit, Burim Hamdi Elshani e Milaim Bajram Bugari (20) nga Suhareka, Hafir Elshani (35) nga Sllapuzhani, Rasim K. Kolgeci (15) nga Vraniqi, Hazir Bajraktari nga Budakova, Hysen Rifat Pantina, Arsim Isë Ibrahimi (14) e Musa Shaban Sheremeti (60), Xhevdet Deriqi (38), i sëmurë psikik, Rrustem Hysenaj (80) e Mehmet Xhemajlaj (70), të tre nga Obria e Epërme dhe Sami M. Bakiu.

Në foto: Mitrovica

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

30 shtator 1993

Në kazermën ushtarake të Vushtrrisë u dëgjuan të shtëna gjatë natës

Komisioni për Informim i LDK-së së Vushtrrisë njofton se mbrëmë pas mesnate rreth orës 0.25 minuta, në kazermën ushtarake të këtij qyteti, në të cilën vijojnë mësimin edhe kadetët e shkollës së mesme të policisë, u dëgjuan të shtëna automatikësh dhe klithma, nga të cilat qytetarët shqiptarë që banojnë afër kësaj kazerme dolën nga shtëpitë e tyre të shqetësuar për të parë se ç’po ndodhte.

Qytetarët hetuan se afër depos së kazermës ishin të shtrirë dy veta, por nuk patën mundësi të dinë se a ishin të plagosur a të vrarë, si dhe a ishin ushtarë apo policë. Ndërkohë, siç njoftojnë dëshmitarët, dy personave të shtrirë u erdhi ndihma për bartje dhe me këtë rast sërish u shti me automatik në dy personat që ofruan ndihmë.

Qytetarët dëshmuan se rafalet e automatikëve vazhduan edhe më tej me ndërprerje të kohëpaskohshme. Përveç shtirjeve me automatik, thuhet se u dëgjuan edhe krisma pushkësh e revolesh.

30 shtator 1994

Nëna Terezë arriti dje në Shqipëri

Nëna Tereze arriti dje në Shqipëri dhe u takua me presidentin e Republikës së Shqipërisë dr. Sali Berisha.

Bamirësja shqiptare, fituese e Çmimit Nobel për Paqe ka qenë herën e fundit në Shqipëri në prill të vitit 1993 gjatë vizitës së Papa Gjon Palit II në Shqipëri.

Kjo vizitë lidhet me përpjekjet e Nënës Terezë për të ndihmuar Shqipërinë me rastin e shpërthimit të epidemisë së kolerës.

30 shtator 1995

“Le Mond”: Në Kosovë mbretëron aparteidi

Në Prishtinë, rreth 200 policë të nacionalitetit shqiptar, u nxorën para gjyqit me motiv se ata janë fajtorë ngase punuan rreth organizimit të policisë paralele. Atyre iu mohua e drejta që t’i mbrojnë gjykatësit shqiptarë, shkruan gazeta “Le Mond”.

Ky është vetëm njëri nga episodet që zbulon gjuhën e dyfishtë me të cilën shërbehet regjimi i Beogradit.

Shqiptarët, 85 për qind të popullatës në Kosovë, janë privuar nga të drejtat themelore, po ato të cilat serbët i kërkojnë për vëllezërit e tyre nga Bosnjë-Hercegovina dhe Kroacia. Autonomia e Kosovës e garantuar me Kushtetutën e vitit 1974, thjeshtë u pezullua. Arsimi tërësisht ka kaluar në duar të serbëve, ndërsa numri i shqiptarëve të larguar nga puna sa vjen e rritet, në mënyrë që kësisoj t’i largojnë nga të gjitha postet përgjegjëse.

Derisa Beogradi gëzon shumë privilegje kur është fjala për statusin e Bosnjë-Hercegovinës, në Kosovë asgjë e re, refuzohet çfarëdo diskutimi serioz në emër të parimit të mospërzierjes në punët e brendshme.

Është e qartë se koncepti ynë i së drejtës është larg atij “ballkanik”. Parimi i respektimit të kufijve të brendshëm të Jugosllavisë së dikurshme, që e shtron diplomacia jonë kur është fjala për Kroacinë dhe shtetin boshnjak, na ndalon të pëkrahim kërkesën për pavarësinë e Kosovës, ndonëse për atë ide angazhohen, njëzëri që të gjithë shqiptarët.

Në anën tjetër, asnjë serb kurrë nuk do të pranojë që Kosova, “djep i ortodoksizmit serb”, të shkëputet nga Serbia. Urtia kërkon të mos tundet faculeta e kuqe para hundës së popullit, i cili tashmë shumë herë ka dëshmuar iracionalitetin e tij.

Por, po ky koncept i së drejtës na obligon të merremi me atë që më nuk janë “punë të brendshme”, por fakte që vështirësojnë procesin e paqes dhe rrezikojnë të drejtat e njeriut.

Shkelja e të drejtave të njeriut krijon situata konfliktuoze të gatshme për shpërthim. Është i madh rreziku nga rebelimi në Kosovë, që do të mund të ketë jehonë edhe në Maqedoni e Shqipëri.

Pos kësaj, hapja e Serbisë ndaj Kosovës do të ishte dëshmi se në Beograd diç qenësore po ndryshon. Kjo njëkohësisht do t’i bindte evropianët se heqja përfundimtare e sanksioneve është mbështetur mbi baza të mirëfillta. Thënë sinqerisht, është vështirë të merret me mend normalizimi i plotë i marrëdhënieve ndërmjet Serbisë dhe Bashkësisë Evropiane, përderisa në Kosovë mbretëron regjimi i aparteidit, shkruan gazeta “Le Mond”, sipas transmetimit të gazetës “Bujku”.

30 shtator 1997

Nga Kragujevci në Kosovë janë sjellë 10 tonë gaz lotsjellës

Ditëve të fundit nga Kragujevci në Kosovë është sjellë një sasi e konsiderueshme e gazit lotsjellës, njofton gazeta e Beogradit “Blic”, duke u mbështetur në burimet e afërta me policinë. Burimet e kësaj gazete ndryshojnë në deklaratat e tyre për sasinë e gazit: një palë thotë se në Kosovë janë sjellë madje 10 tonë dhe se kjo lidhet me demonstratat e paralajmëruara në Prishtinë, ndërsa burimi tjetër pohon se fjala është për dërgimin e rregullt të disa mijëra paqetave të gazit lotsjellës në Kosovë, që do t’i shpërndahet stacioneve të policisë.

30 shtator 1998

Suharekë: Katër të vrarë në Budakovë, një në Mushtisht

Sot, në fshatin Budakovë u gjetën trupat e pajetë dhe të masakruar nga forcat serbe të Zymer Ali Buzhalës (rreth 55 vjeç), Murat Kurtish Kokollarit (55), Adem Imer Buzhalës (rreth 58 vjeç), që të tre nga Budakova, si dhe trupi i pajetë i një personi tjetër ende të paidentifikuar, njofton KI i Degës së LDK-së në Suharekë.

Trupat e pajetë të katër shqiptarëve të vrarë janë të masakruar dhe ata ende nuk janë varrosur.

I njëjti burim bë të ditur se në fshatin Budakovë është plagosur rëndë Sokol Bislim Buzhala (rreth 39 vjeç).

Po ashtu bëhet e ditur se dje në Mushtisht është vrarë edhe i riu Bajram Durmish Bytyçi (1969), ndërsa është plagosur Bedri Milazim Halitjaha (1982), që të dy nga Mushtishti.

Dyshohet se në fshatrat e Suharekës numri i të vrarëve dhe i të plagosurve shqiptarë është më i madh.

Kryesia e Degës së LDK-së në Suharekë apelon te organizatat ndërkombëtare humanitare që të ndihmojnë në evitmin e masakrave të tjera të mundshme, për shkak se në malet e komunës së Suharekës ende po qëndrojnë shumë civilë shqiptarë, që kanë drojë nga ndonjë masakër të mundshëm, por edhe ndihma në ushqime, ilaçe e gjësende të tjera.

Ferizaj: Dyshohet se në Jezerc ka shumë civilë shqiptarë të vrarë e të plagosur

Mbrëmë rreth orës 18:00, forcat serbe kanë ndërprerë granatimin e fshatit Jezerc, ndërsa vetëm nga fshati Nerodime e Epërme janë tërhequr mbi 90 tanksa të ushtrisë serbe njofton KI i Degës së LDK-së në Ferizaj.

Bëhet e ditur se gjatë tërheqjes, forcat e ushtrisë dhe të policisë serbe kanë hyrë në shumë shtëpi shqiptare në fshatin Pleshinë dhe kanë keqtrajtuar shumë banorë shqiptarë të këtij fshati, si dhe kanë demoluar shumë shtëpi të tyre.

Edhe gjatë ditës së sotme, po vazhdon djegia e shtëpive shqiptare në fshatrat Nerodime e Epërme dhe Nerodime e Poshtme.

I njëjti burim bën të ditur se dyshohet që në fshatin Jezerc nga forcat serbe janë vrarë e plagosur disa civilë shqiptarë, por depërtimi i aktivistëve të LDK-së në këtë fshat tash për tash i pamundur, pasi forcat serbe këtë fshat edhe më tej po e mbajnë në rrethim të plotë.

Dje dhe sot në qytetin e Ferizajt, kanë arritur edhe shumë civilë shqiptarë, kryesisht gra e fëmijë për t’u strehuar në këtë qytet.

Obri: Nga shpërthimi i minës, vdiq dr. Shpëtim Robaj

Dr. Shpëtim Robaj, anesteziolog dhe mësimdhënës i Fakultetit të Mjekësisë në UP vdiq sot nga plagët e marra nga shpërthimi i një mine derisa po udhëtonte me veturë me kolegët e tij dr. Ilir Tolajn, Lindita Bunjakun dhe një zyrtare të Zyrës në Prishtinë të Kryqit të Kuq Ndërkombëtar.

Nga Likoci u njoftua paradite se një veturë e Komitetit Ndërkombëtar të Kryqit të Kuq kishte shkelur në mëngjes në një minë të vendosur në rrugë në mes të fshatrave Obri e Epërme dhe Likofc.

Përfaqësuesi për shtyp i KNKK në Prishtinë tha se aksident ndodhi rreth orës 9,30 kur njëra nga veturat e kësaj organizate shkeli në një mjet shpërthyes.

Katër personat që ishin në veturë kishin marrë lëndime. Zëdhënësi i KNKK-së tha se nuk mund të konfirmonte për shkallën e lëndimeve por atyre u është dhënë ndihmë e menjëhershme nga personeli i automjetit tjetër që nuk ishte prekur nga shpërthimi.

Konvoji ishte në rrugë për t’iu ofruar ndihmë popullatës në këtë pjesë të Kosovës, tha zëdhënësi.

Më vonë u mor vesh se të lënduarit ishin dr. Robaj e dr. Tolaj dhe Lindita Bunjaku e një zyrtare e KKN.

Lajmin e zi për vdekjen e dr. Robajt e konfirmoi Beatris Veber, përgjegjëse e Zyrës së KKN, e cila gjendej pranë të plagosurve të tjerë në spital.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 29 shtator 1993

Klaus Kinkel: Gjermania angazhohet për vendosjen e trupave të NATO-s në Kosovë

Ministri gjerman i Punëve të Jashtme, Klaus Kinkel, këto ditë i deklaroi gazetës “Frankfurter Algemaine” se delegacioni gjerman në Sesionin e 48-të të Asamblesë së Përgjithshme të OKB-së, do të angazhohet për zgjerimin e NATO-s me anëtarë të rinj nga Evropa Lindore, si dhe për vendosjen e forcave të NATO-s në Kosovë me qëllim të evitimit të luftës.

Sipas Kinkelit, pas përfundimit të marrëveshjes së Gjenevës për aspektet e ndarjes së Bosnjës, si hap i madh për vendosjen e paqes në rajon, një konferencë e ngjashme duhet të organizohet për Kosovën dhe për Maqedoninë. Për realizimin e këtij plani, siç shkruan “Frankfurter Allgemaine”, Kinkeli ka arritur të përfitojë mbështetjen e evroperëndimorëve, por edhe jo plotësisht atë të amerikanëve.

29 shtator 1994

Prani e madhe kërcënuese e forcave serbe në Podujevë

Në qendër të Podujevës dhe në rrethinë e saj, sidomos në zonën kufitare Kosovë – Serbi, policia dhe ushtria serbe bashkë me një numër civilësh po demonstrojnë sot forcën e tyre.

Në orën 11:00, forcat e policisë filluan ushtrimin e pushtimit të godinës së administratës komunale, e cila gjendet në qendër të Podujevës.

Njoftohet se disa aksione të milicisë serbe po zhvillohen edhe në ndërtesat e banimit, gjoja me qëllim të kapjes së terroristëve.

Ndërsa nga drithniku i Podujevës, ngrehina dominante në qytet, që gjendet nja pesëqind metra larg qendrës në lindje të Podujevës dhe ku janë vendosur që nga dita e pardjeshme rreth 150 ushtarakë serbë, sot po shtihet me murtaja shkollore.

Komisioni për Informim i Degës së LDK-së në Podujevë njoftoi se gjatë ditës së djeshme u bënë stërvitje ushtarake në fshatrat Përpellac, deri në orën 22:00 dhe në Dumnicë, deri në orën 19:00.

Në Dumnicë forcat ushtarake serbe janë vendosur në lokalin e vjetër të shkollës fillore.

Gjatë ditës së djeshme mbi Podujevë dhe rrethinë ka pasur edhe fluturime të aeroplanëve dhe helikopterëve ushtarakë.

Dje pas dite në nga Prishtina në drejtim të Podujevës shkuan shumë tankse.

Disa dëshmitarë thanë se edhe sot në mëngjes nga Prishtina në drejtim të Podujevës shkuan mjete të motorizuara të ushtrisë serbe.

Podujeva me rrethinë ka qenë vitin e fundit në shënjestër të represionit serb. Me pretekst të kërkimit të armëve janë bastisur mbi 1.000 familje, ndërsa numri i shqiptarëve të keqtrajtuar e të rrahur është edhe më i madh. Një numër i madh shqiptarësh janë arrestuar e dënuar, kurse disa prej tyre janë vrarë gjatë aksioneve të policisë serbe.

Javëve të fundit është shtuar represioni kundër udhëheqësve lokalë shqiptarë,  sidomos kundër funksionarëve të LDK-së dhe gazetarëve.

Dega e LDK-së vlerëson se gjendja në komunën e Podujevës është tensionuar edhe më shumë sot nga prania e jashtëzakonisht e madhe e forcave serbe.

Prania e forcave serbe është shtuar edhe në komunën e Prishtinës.

Sot rreth orës 11 filluan të shtënat me armë në afërsi të lagjes “Dragodani”, në pjesën perëndimore të Prishtinës. Banorët e shqetësuar të kësaj lagjeje thonë se po shtihet me armë të llojllojshme. Prania dhe lëvizjet e mëdha të ushtrisë përfshijnë sot territorin prej kazermës ushtarake në rrugën Prishtinë – Mitrovicë e deri te varrezat e qytetit të Prishtinës.

Si në Podujevë, ashtu edhe në Prishtinë zyrtarët e mediumet serbe nuk kanë paralajmëruar dhe nuk kanë dhënë kurrëfarë njoftimi për shkakun e kësaj pranie të shtuar të forcave serbe dhe të daljes së ushtrisë nga kazermat ushtarake.

29 shtator 1995

Ndërhyrje e policisë në lokalet e lidhjes së arsimtarëve shqiptarë “Naim Frashëri” në Prishtinë

Dy inspektorë të sigurimit serb ndërhynë sot në lokalet e lidhjes së arsimtarëve shqiptarë “Naim Frashëri” në Prishtinë.

Ata hynë në zyrë në orën dhjetë dhe qëndruan deri në 12:15.

Ata kërkuan kryetarin e LASH-it Rexhep Osmanin dhe Zijadin Gashin, anëtar i Kryesisë së LASH-it dhe kryetar i Këshillit të Arsimit të komunës së Prishtinës.

Inspektorët bastisën të gjitha zyrat e LASH-it dhe morën materiale të ndryshme. Inspektorët nuk lanë dëshmi për materialin që e morën.

Inspektorët legjitimuan punëtorët në zyrë dhe ata që shkuan në zyrë me punë të ndryshme.

Një grup arsimtarësh nga shkolla fillore “Rilindja” të fshatit Çifllak i komunës së Rahovecit ishin në Prishtinë, respektivisht në LASH “Naim Frashëri” për t’u konsultuar me zotin Rexhep Osmani për disa çështje të punës në shkollë, mirëpo në lokalin e LASH-it ata gjetën punëtorët e sigurimit serb.

Arsimtarët thanë se u morëm në pyetje për shkaqet e ardhjes së tyre në LASH.

Arsimtarëve Halit Sahitajt, Tahir Thaçit, Sokol Bajraktarit dhe Hasan Thaçit iu morën letërnjoftimet.

Arsimtarët u pyetën për një orë e gjysmë se për çfarë shkaku kishin ardhur në Prishtinë, kend e kërkonin, kur mbahet mbledhja, në cilën shkollë punojnë, cili është drejtor i shkollës, nga përse shkolla quhet “Rilindja”, çka u duhet Rexhep Osmani, tjerë.

Arsimtarët nga fhati Çiflak i thanë QIK-ut se ishin parë edhe arsimtarë të tjerë nga shkolla fillore “Rilindja” e Keçekollës, zotërit Hamiti, Idrizi, pas disa minutave erdhën edhe disa tjerë nga Gjakova, Lipjani dhe Dragashi.

Sjelljet e organit të sigurimit serbë nuk ishin të natyrës brutale, përveç të disa provokacioneve të vogla.

29 shtator 1997

Njoftim i DPA për gjendjen në Kosovë

Agjencia DPA njofton se udhëheqësi politik i shqiptarëve të Kosovës, dr. Ibrahim Rugova është shprehur kundër demonstratave të caktuara të studentëve.

Në njoftim thuhet:

“Neve nuk na nevojiten demonstratat nëpër qytete, që të vijë deri te keqësimi i gjendjes në Kosovë”, tha dr. Rugova të premten në kryeqytetin e Kosovës në Prishtinë, siç njofton agjencia e lajmeve e Beogradit “Beta”.

Unioni i Studentëve shqiptarë ishte kërcënuar më parë në organizimin e demonstratave më 1 tetor dhe marrjen me dhunë të objekteve shkollore dhe universitare.

“Ne do të ndërmarrim të gjitha masat, që të mos ndërpritet iniciativa ndërkombëtare për zgjidhjen e problemit të Kosovës”, tha dr. Rugova.

Ai theksoi se bota e jashtme po bën presion mbi Beogradin, në mënyrë që të realizohet Marrëveshja për normalizimin e arsimit në gjuhën shqipe në Kosovë.

Rugova shprehu shpresën, se së shpejti do të vijë deri te një dialog në midis serbëve dhe shqiptarëve lidhur me këtë çështje. Përfaqësues të ambasadave të jashtme në Beograd, vërtetuan faktin në Beograd se po qëndrojnë në lidhje të vazhdueshme me Beogradin dhe Prishtinën, në mënyrë që të pengohen konfliktet e mundshme.

Nxënësit dhe studentët shqiptarë protestojnë në mënyrë paqësore që prej ditësh në Prishtinë, kundër sistemit arsimor serb. Në shëtitjet e çdo mbrëmshme në rrugën kryesore, të enjten kanë marrë pjesë disa mijëra njerëz.

Me këtë protestë, ata duan të arrijnë kthimin në objektet shkollore dhe normalizimin e arsimit. Marrëveshjen e patën nënshkruar në shtatorin e vitit të kaluar, kryetari i atëhershëm serb, Millosheviq dhe Rugova.

Policia serbe deri më tash i lejoi protestat. Gazeta qeveritare “Politika” (Beograd), lajmëroi të premten “masa të caktuara” kundër “këtyre protestave”. Kështu, policia serbe, zonën për këmbësorë, e cila ekziston që prej vitesh, nga e enjtja e ka hapur përsëri për trafik, kështu që protestuesit mund t’i shfrytëzojnë vetëm trotuaret.

Më 1989, Beogradi ia ka hequr krahinës së banuar me 90 për qind shqiptarë autonominë dhe që atëherë qeverisë me ligje të veçanta dhe prani të madhe të policisë.

Nxënësit shqiptarë e bojkotojnë që prej gjashtë vitesh arsimin serb dhe kanë ndërtuar një sistem paralel shkollor të panjohur nga Beogradi. Ky mësim zhvillohet në banesa private, përderisa shkollat vijohen vetëm prej fëmijëve serbë, njoftonte DPA.

29 shtator 1998

Granatohen fshatrat e Shtimes dhe Jezerci i Ferizajt

Prishtinë, 29 shtator (QIK) – Forcat serbe kanë vazhduar edhe sot granatimin e fshatrave të Shtimes dhe Jezercit të Ferizajt.

KI i Degës së LDK-së në Shtime njofton se forcat serbe po përdorin artilerinë e rëndë në përpjekje për të depërtuar në Grykën e Devetakut, ndërkohë që po granatohen edhe fshatrat Topillë, Llanishtë, Petrovë e Mollopolc të Shtimes, si dhe fshati Jezerc i Ferizajt, që ndodhet afër këtyre fshatrave. Thuhet se sulmi i sotëm është i intensitetit më të madh deri tash. Në drejtim të këtyre fshatrave granatime ka pasur edhe gjatë natës.

Nga fshatrat e sulmuara sot po del tym e flakë. Tym del sidomos nga Petrova, një nga fshatrat më të ndërtuara të kësaj komune, gjysma e të cilit u dogj në fund të gushtit, ndërsa shtëpitë e mbetura po digjen tash.

Njoftohet se rreth 700 banorë, kryesisht gra, fëmijë e pleq, kanë mbetur nën rrethimin e forcave serbe dhe nën qiellin e hapur.

Për shkak të ripërtëritjes së sulmeve serbe, mësimi u ndërpre në shkollën fillore në Reçak dhe në shkollën e mesme në Shtime, ndërkohë që në shkollën fillore “Emin Duraku” në Shtime mësimi u mbajt edhe sot, ndonëse në afërsi të shkollës janë vendosur forca serbe.

Tre të vrarë gjatë sulmit serb në Plloçicë të Malishevës

Gjatë sulmit të forcave serbe në fshatin Plloçicë të Malishevës janë djegur të gjitha shtëpitë dhe janë vrarë së paku tre shqiptarë.

KI i Degës së LDK-së në Malishevë njofton se janë vrarë Dervish Cen Maloku (60), Sejdi Bali Gashi (60) dhe Deli Bali Gashi. Dyshohet se ka edhe të tjerë të vrarë.

Bëhet me dije se popullata e larguar nga ky fshat është strehuar në malet e Gollubovcit, ndërsa disa banorë që forcat serbe i zunë në fshat, kryesisht pleq, por edhe disa të rinj, u ngarkuan në kaminë të forcave serbe dhe deri tash nuk ka informa cione ku janë dërguar.

Gllogoc: Në Krojkovë u gjetën trupat e 7 shqiptarëve të vrarë e të masakruar

Sot në Krojkovë të Gllogocit, u gjetën trupat e 7 shqiptarëve të vrarë e të masakruar nga forcat paramilitare serbe, ndërsa në të njëjtin fshat janë plagosur edhe 4 shqiptarë të tjerë.

Xhemë Binaku, aktivist i NKMDLNJ-së në Gllogoc njofton se në këtë fshat janë vrarë e masakruar, Fitim Sadri Elshani (22), Vehbi Ejup Hoxha (48), Faik Aziz Braiqi (16), Fahredin Sejdë Braiqi, Sabit Metë Buzllaku (62), Fejzë Brahim Braiqi (45) dhe Afrim Ramadan Braiqi (30).

Në fshatin Krojkovë, dyshohet se nga forcat serbe është vrarë edhe Metë Elshani.

I njëjti burim bën të ditur se në këtë fshat janë plagosur, Naser Imer Shala, Lindita Ramadan Podrimçaku, Besnik Aziz Braiqi dhe Abedin Fejzë Braiqi. Ky i fundit është arrestuar nga forcat serbe dhe ende po mbahet në arrest.

Ndërkaq në fshatin Shtrubullovë, bëhet e ditur se forcat serbe kanë zënë rob 28 civilë shqiptarë, për fatin e të cilëve ende nuk dihet asgjë.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

28 shtator 1993

Iu vu dryni konviktit në nxënësve në Prishtinë

Gazeta “Bujku” njofton sot se konviktit të nxënësve në Prishtinë, iu vu dryni.

Sallah Ademi, drejtor i konviktit “Miladin Popoviq”, deklaroi se autoritetet e instaluara serbe në komunën e Prishtinës, po bëjnë përgatitje për meremetimin e konviktit dhe vendosjen e nxënësve serbë në të. Më 30 gusht 1991, konvikti ishte planifikuar për refugjatët serbë, por pasi për ata gjetën zgjidhje më të mira, ai vendim nuk u zbatua. Z. Ademi tha se 300 nxënës shqiptarë kanë paraqitur kërkesë për t’u vendosur në këtë konvikt. Mirëpo, në fillim të tetorit, ai do të jetë i gatshëm vetëm për serbët.

Një konvikt tjetër për shkollat e mesme, përballë Fakultetit Juridik, disa vite më parë është shndërruar në stacion të policisë.

28 shtator 1994

Policia serbe pengon mësimin shqip në Ferizaj

Policia e Ferizajt ka sforcuar trysnitë mbi shkollën shqipe. Në dy rastet policët morën rolin e inspektorëve të arsimit dhe u futën edhe në orët e mësimit. Më 21 shtator, derisa po mbante në oborrin e shkollës “Gjon Serreçi” orën e edukatës fizike, policët arrestuan Fahri Jasharin, të cilin pastaj në stacionin policor e kërcënuan me thikë rreth një orë, duke i thënë që herave të tjera për çdo dalje në oborr duhet të kërkojë leje nga policia.

Edhe të premten, më 23 shtator, rreth orës 14, tre policë hynë në një mësonjëtore të një punkti privat të shkollës së mesme ekonomike “Faik Konica”, në rrugën “Pleshina” dhe legjitimuan arsimtarët Xhevat Aliu dhe Rexhep Shabani, dhe provokuan nxënësit e një klase të maturantëve njëzet minuta. Arsimtarët Xhevat Aliu e Rexhep Shabani, të premten u morën në pyetje edhe në stacionin policor të Ferizajt.

Të enjten pas bastisjes së shtëpisë, ku konfiskuan 2 libreza partiake të LDK-së dhe dëftesa të Këshillit për Financim, ndonëse kërkonin deviza e armë, 12 orë u mbajt në polici arsimtari i gjuhës shqipe Rizah Nebihu. Në polici ai u mbajt me kllapa dhe u keqtrajtua fizikisht, bëjnë të ditur burimet informative të LDK-së e të KMDLNJ-së, njofton gazeta e sotme “Bujku”.

28 shtator 1995

Në Panairin Ndërkombëtar të 47-të të Librit në Frankfurt prezentohet edhe libri shqip

Në Panairin Ndërkombëtar të Librit, i cili do të mbahet në Frankfurt prej 11-16 tetor, do të prezentohet edhe libri shqip që botohet në Kosovë, njofton “Bujku”.

Redaksia e botimeve të Rilindjes do të prezantojë veprat e Faik Konicës, Sabri Hamitit, Jusuf Buxhovit, etj, ndërkaq Shtëpia botuese “Buzuku”, do të prezentojë veprat e Robert Elsit, Bashkim Shehut, Kasëm Trebeshinës, Martin Camajt, Zef Skiroit, Elena Kadaresë dhe të autorëve të tjerë.

Në këtë panair do të prezentohet edhe shtëpia botuese “Dukagjini” i Pejës me librat e Fehmi Aganit, All Gorit, Gani Bobit, Rexhep Ismajlit, Ali Podrimjes, Hivzi Islamit etj.

Ky është rast i mirë që botuesit tanë t’i prezentojnë veprat e tyre në këtë panair, i cili konsiderohet ndër më të mëdhenjët në botë.

28 shtator 1997

Ndërhyrje e sërishme e policisë serbe në shëtitoren e Mitrovicës

Prej orës 20 e deri në orën 21 forca të mëdha të policisë serbe legjitimuan, rrahën e arrestuan shumë drejtorë të shkollave, mësimdhënësi, studentë, nxënës e qytetarë që gjendeshin në shëtitore apo jashtë saj.

Komisioni për Informim i Degës së LDK-së në Mitrovicë njofton se pasi u legjitimua, u rrah në praninë e mijëra qytetarëve Latif Hajrizi (40), drejtor i shkollës fillore “Nonda Bulka” në Mitrovicë. Ai i dërgua në polici ku u mbajt rreth një orë dhe u pyet lidhur me shkaqet e daljes së tij në shëtitore. Sipas deklaratës së tij në stacionin e policisë ishin dërguar shumë qytetarë të Mitrovicës.

Kjo është mbrëmja e tretë prej kur policia serbe ndërhynë brutalisht kundër qytetarëve në shëtitjet plotësuese në këtë qytet.

Më 25 shtator u morën në polici së paku 100 qytetarë, ndërsa një mbrëmje më vonë u keqtrajtuan edhe dhjetarë qytetarë, mësimdhënës, drejtorë shkollash dhe studentë e nxënës.

Që nga data 24 shtator, administrata okupuese serbe në Mitrovicë ka ndërprerë plotësisht ndriçimin në shëtitore.

28 shtator 1998

Në Abri të Epërme të Gllogocit u gjetën së paku 15 të vrarë e të masakruar

Pas tërheqjes së policisë në Obria e Epërme, ekipet e nënkëshillit të KMDLNj-së në Gllogoc dolën në terren dhe gjetën shumë të vrarë, të masakruar e të plagosur.

Sipas njoftimeve të këtij nënkëshilli, në lagjen Deliu në Obri Epërme janë gjetur të masakruar 8 veta: Adem Sali Deliu (33), Hava Imer Deliu (65), Jeton Imer Deliu (10), Hamide Sali Deliu (60), Valmir Adem Deliu (1 vjet e gjysmë), Luljeta Imer Deliu (25), shtatzënë, Lumnije Imer Deliu (30) dhe Mihane Imer Deliu (25), të gjithë të familjes së Ymer Deliut. Ata janë gjetur rreth një kilometër larg shtëpisë së tyre.

Po në këtë lagje, në shtëpinë e Hajriz Deliut janë gjetur të vrarë: Donjeta Hajriz Deliu (4), Gentiana Hajriz Deliu (7), Zahide Hajriz Deliu (27). Fazli Deliu (90) është gjetur i djegur në shtëpinë e tij.

Të vrarë e të masakruar janë edhe Ali Deli Deliu (63), i prerë në fyt me thikë, Pajazit Rrustem Deliu (65) dhe Zeqir Jonuz Deliu (44).

I njëjti burim bën të ditur se një foshnje njëmuajshe e gjysmë u gjet e gjallë në gjirin e nënës së saj, Diturie Imer Deliut, e mbuluar me gjakun e saj.

Deri tash nuk dihet për fatin e Hysen Deliut (53), Maliqe Deliut (80) e Hajriz Deliut (35)

Në Gollubofc e Pllaçicë mbrëmë u varrosën 17 shqiptarë të vrarë

Nënkëshilli i KMDLNJ-së në Skënderajt ka njoftuar se mbrëmë në fshatin Gollubofc janë varrosur 10 shqiptarë të vrarë gjatë ofensivës së fundit të forcave serbe.

I njëjti burim bën me dije se shtatë të tjerë të vrarë u varrosën në Pllaçicë, ndërsa trupat e tre të vrarëve qëndrojnë ende të pavarrosur te çeshmja e Vuçakut, si dhe dy të tjerë në malet e Vuçakut.

Njoftohet se policia ka plaçkitur në Vuçak të gjithë arin nga gratë dhe të hollat që kanë gjetur tek të zhvendosurit.