Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

20 tetor 1993

Policia serbe sërish pengoi mësimin në Mitrovicë

Sot, në Mitrovicë, policia serbe katër herë ndërpreu mësimin në punktet 1 dhe 2 të gjimnazit “Frang bardhi”. Inspektorët serbë, të cilët më vonë kërkuan përforcime të policisë, fyen nxënësit dhe mësimdhënësit në baza kombëtare, si dhe i detyruan që menjëherë të ndërprejnë procesin mësimor.

Merret vesh se policët gjenden ende në lokalet e këtyre punkteve, si dhe rrahën nxënësin, Shenoll Muharremin.

20 tetor 1994

Ushtria serbe u vendos në afërsi të Gllogovcit

Më 17 tetor rreth orës 15:00, një njësit i ushtrisë serbe i përbërë prej 3 tanksash, 4 kamionësh dhe 3 llandroverësh, u vendos në malin afër lagjes së Berishajve në Duhanoll të Gllogovcit, njofton Komisioni për Informim i Degës së LDK-së në Gllogovc.

 20 tetor 1995

 Nëna u mor në polici në vend të djalit

Në shtëpinë e Bekim Ilazit nga Gjilani, me pretekst të kërkimit të armëve, më 13 tetor shkoi policia serbe dhe pasi ai nuk gjendej në shtëpi, mori nënën e tij, Salihen (52).

Kjo nënë u dërgua në stacionin e policisë dhe u mor në pyetje

për një revole të cilën policët e kërkojnë prej djalit të saj, njofton KI i Degës së LDK-së në Gjilan.

Ajo pas disa orësh u lirua nga policia me kusht që të nesërmen në polici të paraqitet Bekimi.

Bekim Ilazi u paraqit të nesërmen në polici dhe u keqtrajtua për rreth një orë.

20 tetor 1998

Në Lybeqevë të Prizrenit, nga 220 shtëpi, vetëm 12 nuk janë rrënuar

Gjatë ofensivës së fundit të forcave të ushtrisë dhe policisë serbe në rajonin e Vërrinit, këto forca kanë vrarë 48 shqiptarë, si dhe kanë shkatërruar disa fshatra të kësaj ane.

Rami Shala, mësimdhënës nga fshati Lybeqevë i tha KI të Degës së LDK-së në Prizren se nga 500 nxënësit e dikurshëm shqiptarë në SHF “Mic Sokoli” të këtij fshati kanë mbetur vetëm 45 sish, të cilët janë kthyer në 12 shtëpi të parrënuara nga forcat serbe, të vetmet nga gjithsej 220 sosh. Për 45 nxënësit shqiptarë, që janë kryesisht të ciklit të ulët, është improvizuar një dhomë mësimi.

Foto: Drenasi (ish-Gllogoci)

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

19 tetor 1993

Policia serbe për një vit keqtrajtoi disa mijëra shqiptarë

Në një takim që patën dje përfaqësuesit e KMDLNJ-së në Prishtinë me Stefani Grant dhe Tatjana Termaçiç, përfaqësuese e Qendrës së OKB-së për të Drejta të Njeriut, me seli në Gjenevë, u prezantuan të dhëna mbi represionin serb në Kosovë.

Kështu, sipas të dhënave jo të plota që posedon KMDLNJ, gjatë periudhës gusht 92 – gusht 93 u shënuan 5.607 raste të ndryshme të trajtimit policor të shqiptarëve, u arrestuan 1.396, u rrahën 804, u dënuan me burg 161, kurse u keqtrajtuan 432 veprimtarë të partive politike e të shoqatave që tubojnë shqiptarët.

Po ashtu KMDLNJ informoi mysafirët se vetëm gjatë dy muajve të fundit të këtij viti (gusht – shtator), në forma të ndryshme nga policia serbe u trajtuan 1.224 veta, 334 u arrestuan, 94 u ftuan në polici, kurse 148 shqiptarë u rrahën.

19 tetor 1994

Edhe dy të rinj u dërguan me dhunë në ushtrinë serbe

Këto ditë policia ushtarake serbe, solli në kazermën ushtarake serbe në Mitrovicë, Petrit Morinën nga fshati Loxhë i Pejës.

Ai u mbajt tri ditë në kazermë dhe më 11 tetor të këtij viti u dërgua në Gjyqin ushtarak në Nish, njofton Komisioni për Informim i Degës së LDK-së në Mitrovicë.

Vlenë të theksohet se për dërgimin me dhunë në Gjyqin ushtarak në Nish, Komisioni për Informim i Degës së LDK-së në Mitrovicë u njoftua përmes dy shokëve të Petrit Morinës, të cilëve ai ua kishte dhënë një letër që t’ia dërgojnë familjes së tij në Logjë.

Ndërkaq, Komisioni për Informim i Degës së LDK-së në Lipjan, njofton se policia serbe arrestoi të riun Mehmet Hasani nga Gllogovci i Lipjanit dhe e dërgoi me dhunë në ushtrinë serbe në Beograd.

Bëhet me dije se Mehmeti kohë më parë ka shërbyer 13 muaj gjatë kohës së luftës në Vukovar.

19 tetor 1995

Plaçkitje e policisë në tregun e Podujevës

Në vargun e aksioneve të policisë serbe për plaçkitjen e mallit dhe parave nga tregtarët shqiptarë që u ndërmorrën nëpër disa qytete të Kosovës, më 14 tetor u ndërmor një aksion plaçkitjeje edhe në tregun e pemëve dhe perimeve në Podujevë.

KI i Degës së LDK-së në Podujevë njofton se në këtë aksion nga tregtarët shqiptarë u plaçkit një sasi e konsiderueshme e mallit.

20 tetor 1997

Prizren: Gjatë dy mbrëmjeve policia serbe ka keqtrajtuar mbi 20 shqiptarë

Mbrëmë dhe parmbrëmë, pas lëvizjes së qytetarëve shqiptarë në korzon e Prizrenit, policia serbe ka keqtrajtuar mbi 20 qytetarë shqiptarë, njofton KI i Degës së LDK-së në Prizren.

Njoftohet se parmbrëmë, me të filluar shëtitja, policia serbe mori udhëheqjen e Këshillit Organizativ të UPS të Shkollës së Lartë “Xhevdet Doda” në Prizren, të cilët u dërguan në stacionin e policisë. Ata u liruan nën kërcënimin që t’i ndërprejnë protestat.

Njoftohet se fizikisht janë keqtrajtuar Feim Hoti, Shpëtim e Afrim Bytyçi, Ilir Balaj, Selami Mamaj, Bujar Basha, kryetari i Degës së FR të LDK-së në Prizren, Besim Kollari e të tjerë.

Mbrëmë janë legjitimuar dhe janë marrë në të ashtuquajturën bisedë informative edhe Hysen Krapi e Isa Morina, profesorë të Shkollës së Mesme Ekonomike, të cilët janë kërcënuar nga policët, ndërsa disa të rinjëve policia ua ka marrë letërnjoftimet dhe i ka urdhëruar që të paraqiten në polici.

Këshilli Organizativ i UPS të SHLP “Xhevdet Doda” i deklaroi Komisionit për Informim të Degës së LDK-së në Prizren se fton qytetarët që t’i vazhdojnë shëtitjet në “Shadërvan” në të njëjtën kohë, por në formë të shëtisë së lirë.

19 tetor 1998

Policia gjermane ua shpëtoi jetën 75 refugjatëve shqiptarë

Gazeta e djeshme gjermane “Main-Echo”, njofton se në mëngjesin e pardjeshëm, në njësinë federale të Bavarisë arriti të lirojë 75 refugjatë shqiptarë, të cilët ishin nënshtruar rrezikut akut të jetës, njofton “Bujku” i sotëm.

Shoferi dhe një anëtar tjetër i grupit të kontrabandistëve, me njerëz kishin mbyllur rimorkion e hermetizuar të kamionetës, që kishte një sipërfaqe prej vetëm tetë metrash katrore, 75 refugjatë shqiptarë. Në mesin e refugjatëve gjendeshin 61 burra, nëntë gra dhe pesë fëmijë. Nga pasojat e mbylljes së rimorkios, shumë udhëtarë kishin filluar të tregojnë shenja të alivanosjes nga kushtet e hipoksisë si pasojë e mbylljes hermetike të rimorkios së furgonit. Autoritetet policore theksuan se pak para orës 6:00 të mëngjesit, në lokalitetin Tirschentreuth, gjatë një kontrolli rutinor të automjeteve, rastisën kamionetën me udhëtarët e rrezikuar. Nëntëmbëdhjetë udhëtarë me simptomatologji me manifeste të alivanosjes, u dërguan menjëherë për trajtim në spitalin e këtij qyteti.

Sipas informatave të zëdhënësit të Presidiumit Policor të Reggensburgut, u arrit që një kontrabandist të arrestohet, ndërsa shoferi i kamionit iku në drejtim të panjohur. Ditëve të fundit, për shkak të ekspandimit akut të numrit të refugjatëve nga Kosova, është trefishuar kontrolli policor i zonave perikufitare të Gjermanisë.

Foto: Mitrovica

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

18 tetor 1993 

Në Universitetin e Prishtinës ende ka vende të lira

Edhe pas përfundimit të afatit të dytë të regjistrimit të studentëve në Universitetin e Prishtinës, ende ka vende të lira në Fakultetin Filozofik, Fakultetin Filologjik, Fakultetin e Shkencave Matematiko-Natyrore, Fakultetin e Bujqësisë, Fakultetin e Ndërtimtarisë dhe të Arkitekturës, Fakultetin e Makinerisë, Fakultetin Xehetaro-Metalurgjik në Mitrovicë dhe në të gjitha shkollat e larta.

Në njoftimin e gazetës “Bujku” thuhet se ka mundësi që të regjistrohen edhe ata maturantë që nuk ishin regjistruar në dy vitet e mëparme.

Kandidatët e interesuar për regjistrim mund të paraqiten brenda kësaj jave në fakultetet dhe shkollat e larta, ku ende kanë mbetur vende të lira.

18 tetor 1994

Në Skënderaj të rinjve po u shpërndahen thirrje për ushtri

Në komunën e Skënderajt ditëve të fundit, ashtu si në komunat tjera të Kosovës, autoritetet ushtarake serbe po u shpërndajnë thirrje për ushtrinë serbe të rinjëve shqiptarë, të lindur më 1977.

Mirëpo thirrje për të shkuar në ushtrinë serbe këto ditë mori edhe Shkëlzen Muçaj (1972) nga Skënderaj, i cili ka dezertuar nga radhët e ushtrisë ish-jugosllave.

18 tetor 1995

Mbi 700 kolonë serbë në Mitrovicë

Në nja dhjetë punkte të Mitrovicës tashmë janë vendosur më se 700 kolonë serbë nga Kroacia.

I ashtuquajturi shtab komunal për strehimin e kolonëve thuhet se po bën “përpjekje për t’u siguruar atyre kushtet më të domosdoshme për jetë”.

Në Mitrovicë tashmë janë punësuar 230 kolonë, shumica e tyre në repartet e “Trepçës”, prej nga para disa vjetësh u dëbuan punëtorët shqiptarë. Sipas shtypit serb në shkollat e Mitrovicës janë regjistruar 90 fëmijë të kolonëve serbë, kurse në katër shkollat e mesme të saj mësimet i ndjekin 45 nxënës të kolonëve.

18 tetor 1997

Në burgun e Beogradit vdiq Jonuz Zeneli nga Ballabani i Prishtinës

Jonuz Zeneli (55) nga Ballabani i Prishtinës, baba i gjashtë fëmijëve, vdiq dje në spitalin e burgut të Beogradit, ku ishte dërguar për shërim për shkak të gjendjes tepër të rëndë shëndetësore, si pasojë e torturave të ushtruara ndaj tij në organet hetimore serbe në Prishtinë.

Për vdekjen e tij familja ishte njoftuar nga policia serbe. Pas marrjes së lejes nga organet serbe, pjesëtarë të kësaj familje kanë shkuar për ta marrë kufomën e të ndjerit në Beograd.

Jonuz Zeneli ishte burgosur më 30 prill të këtij viti në Prishtinë, nën akuzën për kryerjen e veprave të “terrorizmit” dhe gjatë procedurës hetimore ishte keqtrajtuar rëndë me qëllim të nxjerrjes së dëshmive vetakuzuese.

Në një gjendje të rëndë shëndetësore, ai u dërgua dhe u mbajt tri javë në burgun e Lipjanit, ku gjendja e tij shëndetësore nuk u përmirësua fare. Pas kërkesës së familjes që të lejohej mjekimi i tij në ndonjë spital, para një muaji, organet e këtij burgu e dërguan z. Zeneli në spitalin e burgut të Beogradit, ku vdiq dje.

Një i afërm i familjes, që e kishte vizituar para tri ditësh në këtë burg, tha se gjendja shëndetësore e Jonuzit ishte mjaft e rëndë. Ai tha se Jonuzi nuk kishte pasur asnjëherë probleme shëndetësore.

Më 27 korrik të këtij viti gjykata e instaluar serbe në Prishtinë ngriti aktakuzën kundër 21 shqiptarëve të akuzuar për kryerjen e veprave terroriste, në mesin e të cilëve ishte edhe Jonuz Zeneli.

Prej janarit të këtij viti kur filloi aksioni i arrestimeve e hetimeve kundër shqiptarëve me pretekst se kanë bërë vepra terroriste, Jonuz Zeneli është viktima e tretë e dhunës policore. Më parë, në procedurën hetimore në Prishtinë, më 23 shkurt qe mbytur me torturë Besnik Restelica (30) nga Podujeva. Ndërsa pardje, në rrethana të pasqaruara, policia serbe vrau në Kliçinë Adrian Krasniqin (25) nga Vranoci i Pejës, i cili në këtë aktakuzë llogaritej si i arratisur dhe atij do t’i bëhej gjyq në mungesë.

Mbytja me torturë e B. Restelicës ishte një element presioni ndaj të akuzuarve të tjerë gjatë procedurës hetimore. Ndërsa vrasja e A. Krasniqit dhe mbytja e J. Zenelit janë një element i ri presioni ndaj të akuzuarve që do të nxirren së shpejti para gjyqit.

Procesi i paralajmëruar kundër këtij grupi për 27 tetor të këtij muaji është procesi i tretë i montuar gjyqësor që do të organizohet këtë vit kundër shqiptarëve. Në dy procese të tilla, për 35 shqiptarë, gjykata e instaluar serbe në Prishtinë ka shqiptuar 371 vjet burg.

18 tetor 1998

Në morgun e spitalit të Gjakovës gjendet trupi i një të riu

Njoftohet se mbrëmë policia serbe solli në morgun e spitalit të Gjakovës, trupin e pajetë të një të riu shqiptar, (rreth moshës 22 vjeçare), që supozohet të jetë nga fshati Krelan i Gjakovës. Tash për tash identiteti i tij nuk dihet. Supozohet se ka edhe të plagosur të cilët nuk janë nën mbikëqyrjen mjekësore.

KI i LDK në Gjakovë njofton se ushtria dhe policia serbe po ua vë flakën edhe atyre pak shtëpive që kanë mbetur pa u shkatërruar në trevën e Rekës së Keqe, si në Ponoshec, Molliq, Brovinë, Smolicë etj.

Përndryshe në komunën e Gjakovës vazhdon të përkeqësohet gjendja e të zhvendosurve për shkak të mungesës së ushqimeve, veshmbathjeve e ilaçeve. Ato pak ndihma që kanë arritur deri më tash nuk i përmbushin as për së afërmi nevojat e mëdha të afro 60 mijë banorëve të zhvendosur në këtë komunë.

Foto: Universiteti i Prishtinës

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-199

17 tetor 1994

Në komunën e Ferizajt gjatë nëntë muajve të fundit u morën në polici 935 qytetarë

Gjatë nëntë muajve të fundit të këtij viti, në komunën e Ferizajt policia serbe në forma të ndryshme mori në pyetje dhe i keqtrajtoi 935 qytetarë shqiptarë, njofton Komisioni për Informim i Degës së LDK-së në Ferizaj.

Në pyetje u morën gjithësej 365 veta, kryesisht aktivistë të LDK-së, me pretekste të ndryshme u arrestuan 298 qytetarë shqiptarë, ndërsa u keqtrajtuan fizikisht 272 sish.

Me pretekst të kërkimit të armëve bastisi 165 shtëpi. Përveç 13 kryetarëve të nëndegëve të LDK-së në Ferizaj, në pyetje u morën edhe rreth 300 aktivistë të LDK-së.

Policia serbe ka ushtruar presion edhe ndaj aktivistëve të Këshillit komunal për financim të Ferizajt, punëtorëve të arsimit etj.

Shkollës së Zaskokut i është hequr emri “Naim Frashëri” dhe është përdhosur busti, janë thyer lokalet e shkollës fillore “Jeronim De Rada”, ndërsa në pyetje janë marrë shumë përgjegjës komunal të arsimit, arsimtarë dhe pronarë të shtëpive që janë shndërruar në shkolla.

Sipas analizës së KI 90 për qind të bastisjeve në komunën e Ferizajt janë bërë me pretekst të kërkimit të armëve. Dëshmitarët dhe viktimat e këtyre bastisjeve tregojnë për veprime brutale e të egra të forcave serbe. Në fshatin Mirash, për shembull, torturës dhe rrahjeve i janë nënshtruar 40 për qind e kryefamiljarëve. Disa prej tyre janë rrahur në postkomandën e Babushit. Aksionet me pretekst të kërkimit të armëve në qytet dhe në fshatrat Nerodime, Mirash, Kosinë, Mirosalë, Tankosiq, Slivovë e Burrnik, ishin të shpeshta veçanërisht gjatë muajve maj e qershor.

Policia serbe gjatë nëntë muajve të fundit, nuk i kurseu as fëmijët. Më 27 korrik të këtij viti, policia serbe vrau pa kurrfarë shkaku edhe fëmijën 6 vjeçar, Fidan Brestovcin nga Prishtina dhe plagosi dy prindërit e tij. Gjatë kësaj periudhe policia plagosi të riun Ajvaz Ferati. I plagosur, ai u torturua në stacionin e policisë në Ferizaj.

Gjatë jë ndërhyrje të policisë serbe në fshatin Zaskok, ku i ishin shkulur një serbi disa fidane, u rrahën dhe u kërcënuan mbi 30 fshatarë, në mesin e të cilëve edhe disa fëmijë të moshës 5 – 8 vjeçare.

Serbët e instaluar në gjykatat e Ferizajt dhe të Prishtinës dënuan disa shqiptarë të komunës së Ferizajt, duke përfshirë funksionarë lokalë të partive politike, veprimtarë të KMDLNJ-së si dhe deputetë.

Bajrush Xhemajli, kryetar i Degës së KMDLNJ-së dhe deputet në Parlamentin e Republikës së Kosovës, u dënua me 5 vjet burg, Adem Salihaj, kryetar i Degës së LDK-së dhe deputet i Parlamentit të Republikës së Kosovës, u dënua me 6 vjet burg; veprimtarët Ismail Mehmeti e Sylejman Hasani u dënuan me nga 5 vjet burg; për vepra penale janë dënuar edhe Sanie Aliu dhe Luan Heta.

Në shkurt të këtij viti serbët e instaluar në gjykatën për kundërvajtje të Ferizajt dënuan me nga 30 ditë burg pesë funksionarë e veprimtarë ferizajas: Xhabir Morina, nënkryetar i Degës së LDK-së, Hyrë Emini, kryetare e FR të LDK-së, Sylejman Bytyçi, kryetar i Degës së FISH-it, Elmi Reçica, veprimtar i KMDLNJ-së dhe Rexhep Ismani, kryetar i Klubit të artistëve figurativë “Zef Kolombi” dhe më 5 tetor janë dërguar në vuajtjen e dënimit. Këta veprimtarë u dënuan për shkak se kishin marrë pjesë në manifestimin kulturor “Flaka e janarit ’94”.

Në aksionin e organeve ushtarake e policore serbe për dërgimin me dhunë të të rinjve shqiptarë në ushtrinë serbe katër të rinj shqiptarë janë dërguar në ushtri.

Nga banesat janë dëbuar katër familje shqiptare.

Nga puna janë pezulluar 150 punëtorë shqiptarë.

Sasia e mallit dhe shuma e parave të plaçkitura nga shqiptarët arrin vlerën e disa qindra mijëra markave gjermane, thuhet në informatën e Komisionit për Informim të LDK-së dhe të Degës së KMDLNJ-së në Ferizaj.

17 tetor 1995

Dhuna e përditshme në Kosovë

Malishevë: – Më 11 tetor, policia për të satën herë ishte në shtëpinë e veteranit të arsimit, Abdyl Krasniqit në fshatin Drenoc. Prej tij policët kërkojnë të dorëzojë një pushkë automatike. Me këtë rast, ata i lanë ftesën djalit të tij, Betimit që të paraqitet në polici.

Skënderaj: – Më 5 tetor, një patrullë policore e postkomandës së Runikut mori në shtëpinë e tij Fatmir Sahitin nga Kopiliqi i Ulët dhe me pretekst të kërkimit të armëve e keqtrajtoi atë rëndë fizikisht. Ai u urdhërua që në polici të paraqitet sërish më 14 tetor.

Më 13 tetor, me të njëjtin pretekst, u mor dhe u keqtrajtua në polici Feriz Selimi.

Më 15 tetor, po me pretekst të armës, u mor dhe u keqtrajtua rëndë fizikisht në polici vëllai i Ferizit, Bislimi.

Bëhet me dije se me të njëjtin pretekst policia kërkon edhe Ramiz Selimin (15).

Ditë më parë, në vendkalimin kufitar Hani i Elezit, policia i mori pasaportën Fatmir Gecit nga LLausha e Skënderajt. Ai është anëtar i kryesisë së FR të Degës së LDK-së në Skënderaj.

Policia serbe në Skënderaj, me pretekst të kërkimit të armëve, keqtrajtoi Haxhi Bejtën nga Prekazi i Epërm.

Për shkak të lëndimeve që pësoi nga rrahja në polici, z. Beka u detyrua të kërkonte ndihmë mjekësore.

Për shkak të urdhërit të policisë, Haxhiu u paraqit edhe dje në polici. Policët i thanë atij se duhet gjithsesi të dorëzojë armët që i kërkohen dhe e urdhëruan që në polici të paraqitet sërish sot.

Para pak ditësh, duke u kthyer nga Holanda për në atdhe, në Prishtinë policia serbe arrestoi Shaban Zyhranin nga Llausha e Skënderajit, profesor i gjuhës angleze.

Ai u mbajt në polici tërë natën dhe u keqtrajtua fizikisht.

Zoti Zyhrani u lirua të nesërmen, mirëpo sigurimi serb ka kërkuar prej tij të paraqitet sërish në sigurimin shtetëror në Mitzvicë. Ai iu përgjigj këtij urdhëri. Në sigurimin serb ai u kërcënua dhe u keqtrajtua sërish.

Shaban Zyhrani është pyetur për punën dhe veprimtarinë e shqiptarëve në Holandë.

Ai është urdhëruar që në polici të paraqitet sërish më 27 tetor.

Viti: – Më 14 tetor, në ora 10:30, një patrullë e stacionit të policisë të Kllokotit, shkojnë në shtëpinë e Hamdush Hysenit nga fshati Ramajan, i cili punon në ambulancën humanitare “Nëna Terze” si teknik medicinal.

Pasi që Hamdushi nuk gjendej në shtëpi, policët ia lënë ftesën që të paraqitet të hënën në orë 8:00 në stacionin e policisë në Kllokot. Hamdushi paraqitet në kohën e caktuar, por pas pritjes mëse dy orë, atij i thonë se nuk ka ardhur inspektori nga Gjilani i cili duhet ta marrë në pyetje dhe e lirojnë duke i thënë se biseda e paraparë shtyhet për më vonë, pa ia caktuar ditën dhe kohën.

Podujevë: Të premtën në mesditë tre policsë serbë shqetësuan disa familje në lagjen Malokajt në fshatin Bradash.

Me pretekst se gjoja po kërkonin Eset Malokun, i cili punon përkohësisht në Zvicër, tre policë serbë hynë në oborrin e shtëpisë së Avni Malokut, kryetar i Nëndegës së LDK-së dhe drejtor i shkollës në Bradash, pastaj në oborrin e Tasim Malokut, anëtar i Kryesisë së Aktivit të LDK-së dhe në oborrin e Bajram Malokut.

Aktivistët e LDK-së në këtë fshat u pyetën për anëtarët e familjeve të tyre.

Me pretekst të kërkimit të armëve, policia serbe ishte në fshatin Kokorovicë, dhe atë në shtëpitë e Hashim Xhemajlit, Hamit Xhemajlit, ku morën një revole dhe në shtëpitë e Enver Shabanit e Shaban Zeqirit.

Enver Shabani e Hamit Xhemajli u urdhëruan që të paraqiten në pilici.

Më 13 tetor, policia kërkoi armë nga Bajram Islami nga Podujeva.

Vushtrri: – Sipas urdhëresës, dje në stacionin e policisë në Vushtrri u paraqit Murat Përçuku nga fshati Ceceli. Policët kërkuan prej tij informata për djalin e tij Bedriun, i cili tash tri vjet ndodhet në Gjermani. Ata i thanë Muratit se djali i tij duhet të paraqitet gjithsesi në polici, pasi ai është “politikisht i papërshtatshëm”.

Më 13 dhe 16 tetor, në stacionin e poicisë në Vushtrri, me pretekst të kërkimit të armëve, u morën Brahim dhe Rrahim Hasani nga fshati Ropicë.

17 tetor 1997

Ndërhyrje e forcave serbe në fshatin Rastavicë të Deçanit

Prishtinë, 17 tetor (QIK)

Forca të mëdha të policisë serbe kanë rrethuar sot herët në mëngjes fshatin Rastavicë të Deçanit, me pretekst se pas mesnatës, është sulmuar vendbanimi i kolonëve me prejardhej sllave të ardhur nga Shqipëria.

Komisioni për Informim i Degës së LDK-së në Deçan njofton për shumë shtëpi të basrisura e shqiptarë të keqtrajtuar e të arrestuar.

U bastis shtëpia e dr. Bajram Kadriajt, kryetar i aktivit të LDK-së, pastaj shtëpitë e Brahim, Mustafë e Xheladin Kadriajt, shtëpia e Isuf Selmanajt, drejtor i shkollës fillore “Minatorët e Trepçës”, familjet e Smajl Selmanajt e Mon Selmanajt, nënkryetar i aktivit të LDK-së.

Me këtë rast në polici u morën Mustafë Kadriaj, bashk me djalin Shkumbinin, pastaj Mustafë Xh. Kadriaj, Isuf Selmanaj, Brahim Kadriaj, Mon dhe Smajl Selmanaj, si dhe 4 mjeshtër që ishin duke punuar në shtëpinë e Xheladin Kadriajt.

Gjatë këtij aksioni policia ka rrahur nëpër rrugët e fshatit Baballoq Sami Gjocajn e Valdet Matajn.

Dega e LDK-së në Deçan njofton se aksioni i forcave serbe po vazhdon.

Ky është aksioni i tretë ndëshkues i ndërmarrë nga forcat serbe gjatë katër ditëve të fundit në rajonin e Duakgjinit, me pretekst të sulmeve të pasqaruara ndaj dy stacioneve të policisë serbe në Qollopek e në Kliçinë të Pejës.

Gjatë aksioneve ndërshkuese në fshatrat Bardhaniq e Zhabel të Gjakovës dhe në fshatrat Kliçinë, Leshan, Llabjan, Zahaç e Gllaviçicë janë keqtrajtuar në mënyrën më mizore qindra shqiptarë dhe janë bastisur dhjetëra shtëpi.

17 tetor 1998

Katër të vrarë nga minat në zonën kufitare të Kosovës me Shqipërinë

Katër shqiptarë humbën dje jetën në përpjekje për të kaluar kufirin dhe për t’u strehuar në Shqipëri. Grupi i refugjatëve shkeli në një fushë të minur shumë pranë vijës së kufirit në zonën e Hasit. Tre u vranë në vend ndërsa i katërti vdiq nga plagët në territorin e Shqipërisë, njoftoi sot “Zëri i Amerikës”. Në këtë njoftim thuhej se Hamzë Ukaj nga Damjani, para se të ndërronte jetë, kishte treguar se çfarë kishte ndodhur. Ai tha se grupi që po kërkonte të hynte në Shqipëri pas shpërthimit të minës është tërhequr duke u fshehur, ndërsa tre të vrarë mund të jenë marrë nga serbët.

Foto: Ferizaj