Lajmet

Ditari: Çfarë ngjarjesh shënuan datën 12 maj 1993-1998?

Published

6 months ago

on

Lajmet e datës 12 maj pasqyrojnë jetën reale në Kosovë, në këtë periudhë shumë të rëndë. Nga represioni  përditshëm në fillimvitet e nëntëdhjeta deri te lufta e vitit 1998

 (Në foto: Emisari amerikan Riçard Hollbruk)

Lajmet kryesore të datës 12 maj 1993:

Kryetari Rugova priti anëtarët e Misionit të KSBE-së;

Klintoni planifikon dërgimin e trupave në Maqedoni;

Në Prishtinë u mbajt Mitingu i Poezisë;

Konferencë për shtyp e Bashkimit të Sindikatave të Pavarura të Kosovës;

Përfaqësuesi i Komitetit Ndërkombëtar të Kryqit të Kuq vizitoi KMDLNJ;

Lëvizje të ushtrisë serbe në Sllatinë të Madhe dhe në Ferizaj;

Në Prishtinë u formua shoqata “Mjekët e Kosovës për Paqe”;

“Jedinstvo” shkruan rreth trakteve të LKÇK-së;

“Le Soir”: Në Kosovë dy qëndrime që nuk përputhen dhe që nuk dëgjohen fare;

“The Financial Times”: Beogradi i lodhur qëndron prapa Milosheviqit.

 

12 maj 1994:

Presidenti Berisha: Jemi për dialog ndërmjet Prishtinës e Beogradit;

Manovra të ushtrisë serbe në Kosovë;

Përfaqësuesit e disa partive dhe të KMLDNJ-së pritën diplomatin grek;

“Borba”: Dr. Agani nuk beson se do të ndalohet puna e LDK-së;

  1. Cimerman: Nëse vazhdon represioni, do të rishqyrtohet politika amerikane rreth Kosovës;

Xhinë Kirkpatrik: Millosheviqi nuk ndalet pa u ndeshur me forcën;

Kongresmenët amerikanë dënojnë dhunën serbe në Kosovë;

Në vitin e ardhshëm akademik 5.871 studentë në Universitetin e Prishtinës;

Ekonomistët e Kosovës rreth shkatërrimit të ekonomisë nga Serbia;

Kosovës i arritën vaksinat BCG;

Në Kosovë shumë të sëmurë nga zgjeba;

Bakteriet e salmonelës rrezikojnë foshnjet e posalindura në Prishtinë;

Represioni serb në Kosovë;

Mediumet serbe: Surroi kundërshton Rugovën;

Prishtina – Flamurtari 1:2;

“Shkëndija” gjysmëfinaliste për Kupën e Republikës së Kosovës në futboll.

 

Lajm i plotë:

Ushtari Shaban Bajrami nga Kapiti i Medvegjës ishte vrarë me dy plumba në gojë

Këshilli për Informim i Degës së PVD-së në Medvegjë na e dha këto ditë një njoftim lidhur me vrasjen e Shaban Bajramit nga fshati Kapit i Medvegjës dhe situatën e rëndë të popullatës shqiptare para kësaj vrasjeje, e sidomos pas saj.

Ky njoftim nxjerr në shesh disa të dhëna që përjashtojnë mundësinë që Shaban Bajrami të ketë qenë vrasës i dy ushtarakëve serbë. Njoftimi poashtu hedh poshtë mundësinë që Shaban Bajrami të jetë “likuiduar” në zabelin e fshatit Ratare të Smederevska Pallankës, siç njoftonin organet ushtarake serbe.

Duke u mbështetur në deklaratat e anëtarëve të familjes KI PVD bën me dije se Shaban Bajrami ishte vrarë me dy plumba në gojë! Këtë e dëshmoi babai i të ndjerit që e kishte parë kufomën e të birit, kur kishte shkuar për ta marrë në Beograd të shtunën e kaluar.

Nga fshati Kapit bëhet poashtu me dije se Shaban Bajrami kishte qëndruar në një pushim të shkurtër me leje në shtëpi vetëm një javë para se të kumtohej lajmi për kinse vrasjen e dy ushtarakëve serbë në Mlladenovc.

Anëtarët e familjes thanë se ai nuk ishte ankuar në asnjë rast në ushtarët serbë, ndërsa nuk kishte folur mirë për eprorët ushtarakë.

Ky këshill njofton poashtu se Shaban Bajrami ishte dërguar me dhunë në ushtrinë serbe në Jakovë para katër muajsh, e pastaj në Mlladenovc. “Policia erdhi dhe e mori me dhunë në shtëpi dhe e dërgoi në ushtri. Familja dhe ai vetë ishin të befasuar, pasi sipas një vendimi të komisionit mjekësor për rekrutim, ai nuk do të dërgohej në ushtri edhe dy vjet”, thuhet në njoftim.

Familja e të ndjerit dhe fshati Kapit iu nënshtrua një represioni të egër të forcave serbe, pasi u dha lajmi për kinse krimin në Mlladenovc.

Fshati u rrethua, ndërsa babai e vëllezërit, Ruzhdiu dhe Arifi janë rrahur në shtëpinë e tyre. Të dy vellëzërit janë marrë në stacionin të policisë edhe gjatë ditëve të ardhshme. Ata u rrahën me pretekst se e dinin ku gjendej, ose nën akuzë se edhe ata janë “kriminelë” si vëllai i tyre.

Rrethimi i fshatit u hoq vetëm pasi u dha lajmi se Shaban Bajrami ishte vrarë.

Shpenzimet për arkivol dhe transport, në një shumë 1.200 DM i pagoi familja e të ndjerit.

Kjo vrasje dhe presioni i fortë i forcave serbe lidhur me të pasojnë represionin e filluar nga marsi i këtij viti kundër fshatrave shqiptare në komunën e Medvegjës, ku shqiptarët përbëjnë rreth 40 për qind të popullsisë.

Për shkak të kushteve të vështira dhe të represionit të vazhdueshëm serb, prej viteve 60 e deri më tash nga kjo komunë janë shpërngulur një shumicë e popullsisë shqiptare.

Gjatë marsit e prillit, si në Kosovë, filloi aksioni i torturimit të njerëzve, nën pretekst të mbajtjes së armës pa leje. Janë keqtrajtuar deri më tash rreth 30 familje. Nën këtë pretekst, në gjysmën e prillit, është bastisur edhe familja e Shaban Bajramit.

Për shkak të këtyre aksioneve, e sidomos pas vrasjes së inskenuar të Shaban Bajramit, të dhjetë fshatrat shqiptare të Medvegjës: Kapiti, Tupalla, Svirca, Gërbaci, (etnikisht të pastra) dhe Llapashtica, Gjylekari, Dediqi, Sijarina, Ramabaja dhe Starabaja( në të cilat jetojnë edhe serbë) gjenden ngjitas me fshatrat shqiptare të komunës së Kamenicës në Kosovë, janë të shqetësuara edhe më shumë pas vrasjes së Shaban Bajramit.

Nga fshati Kapit edhe tre të rinj janë dërguar me dhunë në ushtri, ndërsa nga fshatrat tjera nja 20, thuhet në mes të tjerash në njoftimin e KI të Degës së PVD-së në Medvegjë.

Dëshmitarët që duan të mbesin anonim i thanë QIK-ut se jeta në këto fshatra është shumë e rëndë. Banorët njoftohen për zhvillimet në mesin e tyre, si edhe në Kosovë e në botën shqiptare vetëm përmes Radio Tiranës e “Zërit të Amerikës”. Edhe vrasja e Shaban Bajramit ishte një dëshmi se kjo pjesë është ngapak e harrruar, thonë ata dhe e vërtetojnë këtë me faktin se as fshatin, as komunën, e as familjen Bajrami nuk e vizitoi qoftë një gazetar shqiptar.

 

Më 12 maj 1995, lajmet kryesore ishin: Konferencë për gazetarë e Kryetarit të Republikës së Kosovës, dr. Ibrahim Rugova; Kryeministri Bukoshi u prit nga Hans Van Den Bruk; Kryetari i KMDLNJ-së priti diplomatin anglez Dejvid Ostin; Të gjithë të akuzuarit në Gjilan mohojnë akuzën serbe;  Pushteti serb uzurpon lokalet e SHF “F. Greiçevci” në Shipol të Mitrovicës; I riu Avni Sahiti u dërgua me dhunë në ushtrinë serbe; Në Gjakovë gjatë një muaji u bastisën 21 familje; Rektori Statovci priti një delegacion grek; Përfaqësuesja e “Helsinki Citizen Assembly” në KMDLNJ; Reagim i kryesisë së PLK-së kundër marrjes në polici të Gjergj Dedajt; Më 18 maj mbahet takimi i përfaqësuesve të “Avioimpeksit” me familjet e viktimave të aksidentit ajror të Ohrit; Në Pejë inspeksioni serb i tregut mbylli 16 objekte.

 

Dhuna e përditshme në Kosovë

Hani i Elezit:– Më 4 maj, në stacionin e policisë në Kaçanik u mor në pyetje Qamush Krasniqi nga fshati Paldenicë nga i cili policia kërkoi që të dorëzojë një revole. Meqë ai nuk kishte çka të dorëzonte, policia atë e urdhëroi që të paraqitet sërish të nesërmen në polici, së bashku me vëllaun e tij Afet Krasniqin. Nga të dy vllezërit, policia kërkoi që të dorëzojnë një pushkë dhe një revole. Ata u urdhëruan që të paraqiten në polici më 8 maj së bashku me vëllezërit Shefket, Hysni dhe Enver Krasniqi.

Vëllezërit Krasniqi u paqitën të hënën në polici, ndërsa inspektorët serbë nga ata kërkonin që të pranojnë se kanë armë dhe kinse armët i ka marrë nga LDK-ja.

Junik: – Më 10 maj, një ekspeditë e policisë serbe bastisi 8 familje në Junik. Njoftohet se policia bastisi familjen e Ramë Krrekut dhe i morën djemtë e tij Salih dhe Ismet Krrekun, të cilët u keqtrajtuan fizikisht. Policia mori edhe Sherif e Ramiz Gaxherrin, të cilët gjithashtu u keqtrajtuan. Njoftohet se janë bastisur edhe shtëpitë e Qamil, Ismet, Çaush, Beqë dhe Muharrem Gaxherrit. Bëhet me dije se është bastisur edhe shtëpia e Xhafer Krasniqit nga Juniku.

Kamenicë: – Më 9 maj, inspektorët e sigurimit serbë në Gjilan morën në pyetje Hevzi Kekën, nënkryetar i Kuvendit komunal në Kamenicë. Rreth katër orë sa u mbajt në polici, Hevziu u pyet rreth veprimtarisë së Kuvendit komunal, ndërsa merret vesh se ai edhe është keqtrajtuar rëndë. Ai u lirua me kusht që të paraqitet sërish në polici.

Po këtë ditë, policia serbe në Gjilan mori në pyetje Latif Ismailin, anëtarë i Kryesisë së Qeverisë komunale në Kamenicë. Ai u mor në pyetje rreth 11 orë dhe u keqtrajtua fizikisht.

Sot thirrje për t’u paraqitur në polici mori edhe Ismet Hoda, drejtor i shkollës fillore “Abdullah Krashnica” në Koretin të Kamenicës. Shkaku i kësaj thirrje tash për tash nuk dihet.

Më 10 maj, policia serbe e Kamenicës mori në vendin e tij të punës Sefedin Vranjën, veprimtar i KKF-së në Kamenicë. Ai në pyetje u mor rreth 4 orë, si dhe u keqtrajtua fizikisht nga inspektorët e sigurimit serb Momçillo Trajkoviq dhe Goran Stamenkoviq. Njoftohet se Sefedin Vranja është urdhëruar që të parqitet edhe dje në stacionin e policisë. Pas paraqitjes së tij në polici, atij i thanë që të paraqitet sërish në orën 8:00.

Mitrovicë:- Më 11 maj, dy policë shkuan në shtëpinë e Beqir Kajtazit në fshatin Shipol dhe kërkuan djalin e tij Burimin (1970), ish- punëtor i SPB-së, i cili aktualisht gjindet në Danimarkë. Burimin, i cili ka punuar dy vjet si polici, policët serbe e patën ndalur në rrugë në qendër të Mitrovicës, ia patën shkyer letërnjoftimin dhe e patën rrahur. Më vonë policia atë e kërkoi disa herë në shtëpi dhe ai për këtë arsye u detyrua ta braktisë Kosovën.

Njoftohet se policia disa herë ka shkuar në këtë shtëpi dhe ka kërkuar nga familja e Burimit që ta thërrasin atë që të kthehet sepse duhet patjetër të shkojë në shërbimin ushtarak.

Podujevë: – Më 10 maj, policia nën pretekst të kërkimit të armëve ishte në shtëpitë e Idriz Cakiqit dhe Ismail Ismailit në Podujevë. Meqë ata nuk kishin armë, policia i urdhëroi që të paraqiten në stacionin e policisë në Podujevë.

Prishtinë: – Më 10 maj rreth orës 6:00 të mëngjesit, policia serbe bastisi shtëpinë e Ramadan Hajrullahut në rr. “Durmitori” në Prishtinë. Policia gjatë bastisjes, kërkonte djemtë e Ramadanit, Rahim e Arsim Hajrullahut, të cilët tash një kohë punojnë në botën e jashtme. Gjatë bastisjes policia u soll me vandalizëm.

Suharekë: – Më 9 maj, në “bisedë informative” u mor Hava M. Bytyçi nga Suhareka. Në polici ajo u pyet për vëllanë e saj Murat Bytyçin, i cili ka dy vjet që ndodhet në arrati, për të cilin anëtarët e familjes nuk e dinë gjë për të.

Sipas urdhëresës, në polici, më 10 maj, u paraqit Avdi Ibrahimi nga Suhareka. Nuk ka njoftime për pretekstin e marrjes së tij në polici.

Viti: – Më 11 maj, policia, në orët e hershme të mëngjesit, me pretekst të kërkimit të armëve, bastisi shtëpitë e Mejdi Fazliut, Hasan Limanit, Nezir e Abdullah Hazirit dhe Beqir e Abedin Halilit në Tërpezë të Vitisë. Pasi gjatë bastisjes nuk gjetën asgjë, policët ua lanë atyre ftesat që të paraqiten në stacionin e policisë në Viti.

(Kronika e dhunës u sajua në bazë të njoftimeve të KI të degëve të LDK-së)

 

Lajmet e 12 majit 1998 janë gjithsesi të rënda.

Lajmi I mëngjesit është ky:

Policia serbe vrau së paku dy shqiptarë në Lagjen e Muhaxherëve në Prishtinë

Gjatë një rrethimi që i bënë kuartit Lagja e Muhaxherëve në Prishtinë sot herët në mëngjes forcat serbe, policia vrau në oborrin e shtëpisë së vet Isuf Hajdarin, rreth 55 vjeç. Ai u qëllua pas orës 04:00 në momentin kur ishte nisur për të shkuar në punë. Trupin e tij e ka marrë policia.

Njoftohet se në këtë lagje është vrarë edhe një person rreth 30 vjeç, jo i kësaj lagjeje. Komisioni për Informim i Aktivit të LDK-së në këtë lagje njofton për shumë të burgosur. Mes tjerësh është arrestuar në shtëpinë e vet Jahir Gashi me të dy djemt, Fatmirin dhe Farukun. Dr. Zekeria Cana, veprimtar i të drejtave të njeriut tha se janë arrestuar edhe tre studentë nga Drenica me emrat Ilir, Agron dhe Naim. Ai tha se është arrestuar edhe Ilir Tahir Januzi.

Forcat e mëdha serbe e kanë mbajtur nën shtetrrethim këtë lagje prej orës 03:30 deri në orën 10:00.

Disa banorë të këtij kuarti i thanë QIK-ut se herët në mëngjes në këtë lagje ka pasur të shtëna me armë dhe aksione të policisë serbe. Thuhet se janë arrestuar shumë studentë, që banojnë në këtë lagje me qira.

Burimet serbe deri më tash nuk kanë njoftuar për pretekstin e këtij aksioni të forcave serbe.

 

Lajmet e tjera:

Hollbruk e Gelbard arritën në Prishtinë

Deklarata për gazetarë të Kryetarit Rugova dhe emisarit Hollbruk

Isuf Hajdari u vra nga policia serbe në oborrin e vet (shtesë e lajmit të parë)

Dy studentë nga Verboci i Gllogocit janë arrestuar në Prishtinë

Forcat serbe po shtijnë drejt Ratkocit të Rahovecit

Jetë e paralizuar në Deçan – mbrëmë dhe gjatë natës pati të shtëna drejt Baballoqit

Në Deçan arritën ndihmat e para në ilaçe

Vazhdon gjendja e rëndë në komunën e Gjakovës

Ende nuk dihet për fatin e dr. Hafir Shalës

Në shumë shkolla të Gllogocit nuk mbahet mësimi

Avni Binaku, i kthyer nga Gjermania, mbahet në burg

Dje pati të shtëna të policisë në banorët e Kijevës që punonin në ara

Xhejms Rubin: Hollbruk e Gelbard bëjnë përpjekje për të zgjidhur konfliktin e Kosovës

  1. Solana: “NATO-ja nuk përjashton asnjë opcion për zgjidhjen e çështjes së Kosovës”

Bashkimi Evropiano-Perëndimor zgjidhjen e krizës në Kosovë ia lë NATO-s

Edhe 12 shtete evropiane përkrahin ngrirjen e fondeve jugosllave

Folke Rye: NATO do ta shqurtojë seriozisht ndalimin e fluturimit të avionëve mbi Kosovën

Ministri grek i Mbrojtjes tha se kriza e Kosovës është më e rrezikshme se ajo në Bosnjë

  1. Vestendorp: Trupat e NATO-s nga Bosnja mund të vendosen në Kosovë

Këshilli Republikan i Protestave fton të gjitha grupet që të marrin pjes në protesta

Në manifestimin protestues në Prishtinë morën pjesë mijëra qytetarë shqiptarë

Për shkak të pjesëmarrjes në protesta u mor në polici

Në udhëkryqin e fshatit Shipitullë policia po i legjitimon kalimtarët

Kaçanik: Policia serbe keqtrajtoi rëndë një të ri shqiptar

Edhe mbrëmë forcat serbe shtinë drejt fshatit Llapushnik

Në Sllatinë dje shtinë eprorët dhe policët për të penguar dezertimin e ushtarëve

Svetozar Maroviq: “Të rinjtë nga Mali i Zi nuk duhet të vdesin në Kosovë”

Në Ankara u themelua Komisioni i Informimit për Kosovën

Policia keqtrajtoi në Llabjan një qytetar nga Podujeva

Sinan Arif Bashota: “Përkrah çfarëdo veprimi që është në interes të popullit shqiptar”

 

Lajmet e orës 20:00:

Së paku dy shqiptarë të vrarë e katër të plagosur gjatë sulmit serb në fshatrat e Rahovecit

Elmi Binak Morina (50) nga Vranjaka dhe Melaim Isa Krasniqi (31) prej fshatit Postosellë u vranë sot gjatë sulmit të forcave serbe në fshatrat Vranjakë, Pustosellë, Ratkofc dhe Bratotinë të Rahovecit. Komisioni për Informim i LDK-së në Rahovec njoftoi se janë plagosur edhe katër shqiptarë, dy nga fshati Ratkofc dhe dy nga fshati Drenoc. Nuk janë njoftuar ende emrat e tyre. Druhet se numri i të vrarëve dhe i të plagosurve është më i madh.

Në orën 19:00 sulmi kundër fshatrave Ratkofc, Vranjakë e Bratotinë po vazhdonte. Këto fshatra po gjuhen me granata nga Kramoviku i Gjakovës, ku është një postbllok policor, dhe nga fshati Malësi e Vogël. Popullsinë e ka përfshirë paniku, ndërsa shumë fshatra janë boshatisur.

Sulmi i sotëm masiv serb flloi në orën 9:30. Për shkak të bllokadës së plotë të pjesës së sulmuar, nuk dihet me saktësi preteksti i sulmit. Aktivistët e Degës së LDK-së në Rahovec kanë informacione se sulmin e shkaktuan serbët e fshatit Bratotin, të cilët kishin sulmuar fshatarët shqiptarë të fshatit Vranjak, e pastaj kishin kërkuar edhe ndihmën e policisë. Supozohet se shqiptarët e vrarë e të plagosur janë viktima të civilëve serbë.

Fshatrat e sulmuara gjenden rreth 15 kilometra larg Rahovecit. Rruga për në këto fshatra ndahet nga rruga Rahovec – Gjakovë, te Ura e Shejtë, afër Xërxës.

Burimet serbe njoftuan në mbrëmje se në Ratkoc ka ndodhur një sulm i armatosur i shqiptarëve kundër policëve serbë. Sipas këtyre burimeve, një polic është vrarë, kurse dy të tjerë janë plagosur.

Gjatë një sulmi sot herët në Prishtinë, policia serbe vrau në oborrin e shtëpisë së tij Isuf Hajdinin dhe supozohet të ketë vrarë edhe një shqiptar tjetër.

Politika serbe ka kremtuar sot me shumë pompë përvjetorin e sigurimit serb, duke vënë në plan të parë aksionet e policisë serbe në Kosovë.

Grupi i Kontaktit dhe shumë organizata të tjera botërore kanë kërkuar që ekspertët ndërkombëtarë të hetojnë masakrat serbe në Kosovë, sidomos gjatë muajve të fundit.

 

Lajmet e tjera:

U granatua një shtëpi në Leshan të Pejës – një i plagosur rëndë;

Persona të panjohur shtinë me armë në shtëpinë e sekretarit të Degës së LDK-së në Pejë;

Keqtrajtim, me pretekst se ka vënë 4 bomba në autobus;

Një shqiptar u arrestua dhe disa të tjerë u keqtrajtuan në kuartin “Qafa” në Prishtinë;

Dyfishim i policëve serbë në Gjilan;

Gjilan: Për shkak të pjesëmarrjes në protesta një i ri u dënua me 40 ditë burg;

Mijëra pjesëmarrës në manifestimet protestuese në Gjilan e Prizren;

Prizren: Në drejtim të Gorozhupit shkoi një konvoj ushtarak serb;

Serbët bartin pajisjet e dokumentacionin nga fakultetet teknike;

Liderë të UE-së dëshirojnë që NATO dhe SHBA-të ta zgjidhin krizën në Kosovë;

Përmasa të gjera të dhunës kundër qytetarëve në Pejë e rrethinë;

Lëvizje të shtuara të policisë në Istog e rrethinë;

“Evropa e lirë”: Shumica e serbëve e malazezëve deklarohen se nuk do të shkojnë të luftojnë në Kosovë;

BBC: Kosova po kthehet në një kortezh të gjatë funerali;

Futbollistët shqiptarë në Belgjikë organizuan një turne për Kosovën.

Related Topics:
Continue Reading

Lajmet

Ditari: Lajmet kryesore që shënuan datën 14 nëntor 1992-1998?

Published

33 minutes ago

on

November 14, 2026

By

 14 nëntor 1992

 Dr.Ibrahim Rugova nuk pranoi të takohet me kryeministrin e Serbisë

Lidhur me propozimin se kryetari i Qeverisë serbe z. Bozhoviq dëshiron të takohet me zotëri Rugovën me rastin e vizitës së tij në Prizren më 17 nëntor dhe në kuadër të bisedave me përfaqësuesit e partive politike, shoqatave dhe asociacioneve “të cilat veprojnë në territorin e Kosovës e Metohisë”, e ku do të bisedohej për realizimin “e të drejtave të minoriteteve”, kam nderin t’ua bëj me dije se problemi i shqiptarëve në Kosovë nuk mund të zgjidhet me biseda të rastit dhe pa praninë e institucioneve ndërkombëtare (siç është vendosur në Konferencën për ishJugosllavinë në Londër), e aq më pak në kuadër të të “drejtave minoritare”.

Shpresojmë se trajtimi i çështjeve të këtilla të rënda të problemit të Kosovës në të ardhmen do të fillojnë të zgjidhen me dialog serioz, për çka kemi qenë gjithnjë të gatshëm, thuhet në përgjigjen e shefit të kabinetit të kryetarit të Republikës së Kosovës dr.Ibrahim Rugova, lidhur me ftesën e palës serbe për takimin me kryeministrin e Serbisë.

 

 14 nëntor 1994

Ish-presidenti Bush vizitoi Shqipërinë

Dje në Shqipëri në një vizitë private qëndroi ish-presidenti i SHBA-ve, Xhorxh Bush me bashkëshorten Barbara, dhe me këtë rast presidenti i Republikës së Shqipërisë dr.Sali Berisha i bëri atij pritje madhështore në aeroportin e Rinasit.

Në pritjen që i bëri në presidencën e Republikës së Shqipërisë, dr.Sali Berisha i tha ish-presidentit amerikan Xhorxh Bush se pas presidentit Vilson ju jeni miku më i madh dhe i shquar i shqiptarëve. Shqiptarët u janë mirënjohës juve dhe administratës suaj për ndihmën që dhatë për çlirimin e tyre nga diktatura, si dhe për vendosjen e demokracisë.

Presidenti Berisha me këtë rast po ashtu i tha ish-presidentit amerikan se qëndrimi juaj dhe tërheqja e vijës së kuqe prej jush rreth Kosovës ka pasur një rëndësi decidive në dekurajimin e agresorit.

Presidenti i Republikës së Shqipërisë e dekoroi ish-presidentin amerikan Bush me Urdhrin e Artë të Skënderbeut.

Duke u falënderuar për këtë nderim të madh, ish-presidenti amerikan Xhorxh Bush tha se kjo është për mua një suprizë e madhe dhe jam shumë mirënjohës që sot më jepet kjo dekoratë nga një person, i cili është i lidhur me angazhimet për liri e demokraci, siç është presidenti Juaj. Jam mirënjohës jo vetëm atij por gjithë popullit të Shqipërisë që tani synon lirinë, e ndjen se ç’është demokracia dhe punon jetën e tij.

Në ceremoninë e dekorimit të ish-presidentit të SHBA-ve Xhorxh Bush mori pjesë edhe z.Adem Demaçi, kryetar i Këshllit për Mbrojtjen e të Drejtave dhe të Lirive të Njeriut me seli në Prishtinë. Presidenti Berisha i tha Bushit se Adem Demaçi ka vuajtur nëpër burgje të ish-Jugsollavisë mëse 28 vjet dhe ai me të drejtë konsiderohet simbol i rezistencës kombëtare të shqiptarëve të Kosovës.

Gjatë qëndrimit në Shqipëri Xhorxh Bush ishte për një vizitë të shkurtër në Kështjellën e Krujës, kurse dje pasdite ai u largua nga Shqipëria.

 

14 nëntor 1995

 “Tages Anzeiger”: Refugjatët serbë kanë frikë nga dërgimi në Kosovë

Gazeta e Cyrihut “Tages Anzeiger” botoi ditë më parë një artikull rreth gjendjes së refugjatëve serbë të ikur nga Kroacia, të cilët janë vendosur në Nova Pazovë të Serbisë.

Pasi përshkruan kushtet e rënda në të clat jetojnë këta refugjatë, autori i këtij shkrimi paraqet opinionet e tyre lidhur me pozitën aktuale dhe perspektivën e tyre. Shumë nga këta refugjatë ankohen për kushtet e këqija të jetës dhe shprehin dyshimin se po manipulohet me mjetet që ndahen për ta. Në ndërkohë, në kryqin e kuq serb mohojnë të gjitha këto dhe fajin ia lënë bashkësisë ndërkombëtare, e cila gjoja pa jep pak ndihma për refugjatët.

Përgjegjesit e këtij institucioni sikur harrojnë se fajtorë për fatkeqësinë dhe ikjen e këtyre njerëzve nuk është bashkësia ndërkombëtare, por pikërisht pushteti aktual në Serbi, i cili i nxiti serbët e Kroacisë në luftë dhe tash ata i trajton si mysafirë të paftuar.

Në vazhdim të këtij shkrimi theksohet gjithashtu se nuk janë raste të rralla kur refugjatët e aftë për luftë mobilizohen dhe dërgohen me dhunë në Sllavoninë Lindore.

Krahas zemërimit dhe zhgënjimit, në qendrën e refugjatëve në Nova Pazovë mbretëron edhe frika. Refugjatët kanë frikë se do t’i dërgojnë në Kosovë, ku, pas shuarjes së autonomisë nga ana e Millosheviqit, shqiptarët nuk kanë disponim të mirë ndaj serbëve, thuhet në vazhdim të artikullit.

Se në çfarë gjendje janë sjellë refugjatët serbë, të cilët, filimthi kujtuan se në Serbi do të priten si “hyjnorë”, tregon më së miri fakti se një numër i tyre tashmë janë deklaruar se dëshirojnë të kthehen në vendlindje. Vetëm pranë Komitetit të Helsinkit deri tash janë paraqitur mbi 10.000 persona që dëshirojnë të kthehen përsëri prapa.

Gazeta “Tages-Anzeiger” citon në fund një grua nga Knini e cila thotë:” Ndoshta, megjithatë, do të ishte më mirë të kthehemi sërish te Tugjmani”.

 

 14 nëntor 1996

Ekonomistët gjermanë kërkuan hapjen e përfaqësisë së Unionit Evropian në Kosovë

Në një takim të ekonomistëve serbë me kolegët e tyre gjermanë, përfaqësuesit e gjermanë prekën edhe çështjen e Kosovës, shkruan “Nasha borba”.

“Zgjidhja e çështjes së Kosovës, respektimi i të drejtave të njeriut dhe të drejtat e pakicave, marrja e përgjegjësive ndërkombëtare dhe politika e brendshme makroekonomike për Gjermaninë do të jenë tregues se a do të hyjë në një bashkëpunim serioz me Serbinë e Malin e Zi”, u tha në këtë takim.

Siç deklaroi dr. Albreht fon ser Dejeden, kryeshef i Referatit për Evropën e Mesme dhe Lindore të Ministrisë së Punëve të Jashtme të Gjermanisë, nga Beogradi do të kërkohet hapja e përfaqësisë së Unionit Evropian në Kosovë dhe kthimi i refugjatëve.

Gazeta shkruan se në kontakt me njerëzit nga Instituti Gjerman për Evropën Lindore dhe për bashkëpunim ndërkombëtar në Këln mysafirit nga Serbia iu bë me dije për lidhjen e Palës me Kosovën. Atë që merr “republika srpska” në Bosnjë e Hercegovinë do të marrë Kosova në “RFJ”.

 

14 nëntor 1997

Gjakovë: Provokatori i mesnatës – udhëheqës i operativës nga Peja!

Prishtinë, 14 nëntor (QIK)

Më 6 nëntor rreth orës 23:40, në shtëpinë e Prek Mark Kocës (36) në fshatin Bishtazhin të Gjakovës kishin shkuar persona të maskuar, të cilët pa u prezentuar se kush janë, filluan ta provokojnë atë, njofton KI i Degës së LDK-së në Gjakovë.

Preka kërkoi nga ata që të largoheshin, por ata këtë nuk e bënin.

Pas një ore, në vendin e ngjarjes arrijnë forca policore (rreth 30 policë), të cilët i thanë se ishin në “grupin e parë”!

Pas bisedave dhe kërkimit të armës, ata u larguan dhe e thirrën Prekën me dy vëllezërit e tij të paraqiten në polici.

Sipas pohimve të Prekës, personi i cili deklaroi vetë se kishte qenë herën e parë i maskuar (ishte në rroba civile), dhe që ia vuri tytën e automatikut, sapo doli në derë i tha Prekës: “Pse deshe të na vrasësh”? Ky person ishte udhëheqësi i operativës nga Peja Bato Bullatoviq.

 

 14 nëntor 1998

Malishevë: Prani e madhe e forcave serbe – keqtrajtime të qytetarëve shqiptarë

Në komunën e Malishevës, as ka shenja përmirësimi të situatës, as siguri si pasojë e koncentrimit të madh të forcave të policisë e paramilitarëve serbë në qytezën e Malishevës, pastaj në fshatrat Carrallukë, Smonicë, Tërpezë, Llazicë, Balinc e Mleçan, njofton KI i Degës së LDK-së në Malishevë.

Derisa para dy ditësh defilimet e shpeshta të policisë serbe nga Malisheva për në Rahovec e anasjelltas dhe nga Malisheva në drejtim të Suharekës shoqëroheshin nga vëzhguesit ndërkombëtarë, tashmë policia nuk përcillet dhe kështu asaj po i lihen duart e lira që të shtojë dhunën kundër civilëve shqiptarë në këtë komunë.

Rasti i para pak ditëve kur në afërsi të Malishevës forcat serbe plagosën 4 shqiptarë dhe ai pardje, kur në oborrin e tij në fshatin Mleçan u vra Xhafer Sefë Gashi (50) dhe u plagos rëndë Rexhep Shala, është sinjal i mjaftueshëm për bashkësinë ndërkombëtare se gjendja e këtillë nuk mund të tolerohet dhe njerëzit nuk kanë kurrfarë sigurie për kthim në vatrat e tyre.

Njoftohet se si pasojë e kësaj gjendjeje, procesi mësimor ende nuk ka filluar në disa lokalitete si Kijevë, Llazicë, Bubavec, Dragobil, Carrallukë e Malishevë.

Edhe gjatë dy ditëve të fundit, policia serbe ka keqtrajtuar dhjetëra qytetarë shqiptarë në këtë komunë, siç ndodhi me Agim Berishën (22) nga Gurbardhi dhe me disa shqiptarë të tjerë.

 

 

Continue Reading

Aktualitet

Katastrofa e Çernobilit dhe censura sovjetike: kur radioaktiviteti zbuloi krizën e informacionit në Bashkimin Sovjetik

Published

2 hours ago

on

November 14, 2026

By

Ngjarja tregoi se një shtet mund të kontrollonte gazetat, radion dhe televizionin, por nuk mund të kontrollonte realitetin fizik. Retë radioaktive që u përhapën mbi Evropë do ta detyronin Kremlinin të pranonte një katastrofë që fillimisht ishte përpjekur ta fshihte

 Më 26 prill 1986, në orën 01:23 të mëngjesit, ndodhi një shpërthim katastrofik në reaktorin numër katër të Centralit Bërthamor të Çernobilit, pranë qytetit Pripjat në Ukrainën e atëhershme sovjetike. Ajo që fillimisht dukej si një aksident industrial do të shndërrohej shpejt në katastrofën më të madhe bërthamore në histori. Mirëpo, përveç pasojave mjedisore dhe njerëzore, Çernobili u bë edhe një simbol i dështimit të sistemit sovjetik të informimit, censurës shtetërore dhe propagandës komuniste.

Ngjarja tregoi se një shtet mund të kontrollonte gazetat, radion dhe televizionin, por nuk mund të kontrollonte realitetin fizik. Retë radioaktive që u përhapën mbi Evropë do ta detyronin Kremlinin të pranonte një katastrofë që fillimisht ishte përpjekur ta fshihte.

 

Shpërthimi dhe heshtja zyrtare

Pas shpërthimit të reaktorit, autoritetet lokale dhe qendrore sovjetike u përballën me një situatë të paprecedentë. Sasi të mëdha materialesh radioaktive u hodhën në atmosferë, ndërsa zjarrfikësit, teknikët dhe banorët e zonës nuk kishin informacion të plotë për rrezikun që po i kërcënonte.

Megjithatë, reagimi i parë i aparatit shtetëror nuk ishte informimi i publikut, por ruajtja e sekretit. Në traditën e sistemit sovjetik, katastrofat konsideroheshin çështje që mund të dëmtonin prestigjin e shtetit socialist dhe për këtë arsye duhej të minimizoheshin ose të fshiheshin.

Banorët e qytetit Pripjat, i cili ndodhej vetëm disa kilometra larg centralit, vazhduan jetën normale për më shumë se 36 orë pas shpërthimit. Fëmijët luanin nëpër parqe, njerëzit shëtisnin në rrugë, ndërsa nivelet e radioaktivitetit po rriteshin në mënyrë alarmante.

Evakuimi filloi vetëm pasditen e 27 prillit. Edhe atëherë, banorëve u tha se do të largoheshin vetëm për disa ditë dhe se mund të ktheheshin shpejt në shtëpitë e tyre. Në realitet, shumica nuk do të ktheheshin kurrë më.

 

Bota e mëson aksidentin nga Suedia

Ajo që e bëri të pamundur fshehjen e katastrofës ishte natyra e vetë radioaktivitetit. Mëngjesin e 28 prillit 1986, punonjësit e centralit bërthamor Forsmark në Suedi zbuluan nivele të pazakonta radioaktiviteti në rrobat dhe këpucët e tyre. Fillimisht u dyshua për një rrjedhje në centralin suedez, por kontrollet treguan se burimi ishte jashtë vendit.

Ekspertët suedezë analizuan drejtimin e erërave dhe arritën në përfundimin se ndotja vinte nga territori sovjetik. Qeveria suedeze kërkoi zyrtarisht shpjegime nga Moska.

Vetëm pasi presioni ndërkombëtar u bë i pashmangshëm, agjencia sovjetike e lajmeve TASS publikoi një deklaratë të shkurtër ku pranohej se kishte ndodhur një aksident në centralin e Çernobilit. Njoftimi përmbante shumë pak detaje dhe përpiqej ta minimizonte seriozitetin e situatës.

Në këtë mënyrë, miliona qytetarë sovjetikë dhe evropianë mësuan për katastrofën jo nga mediat sovjetike, por nga qeveritë dhe mediat perëndimore.

 

Harta e shpërndarjes së reve të tymit, pas shpërthimit në Çernobil…

Më Rusia nuk mundi ta fshihte ngjarjen.

 

Propaganda kundër realitetit

Në ditët dhe javët pas aksidentit, televizioni dhe gazetat sovjetike vazhduan të jepnin informacione të kufizuara. Raportimet theksonin “kontrollin e situatës” dhe përpjekjet heroike të ekipeve të shpëtimit, ndërsa shmangnin diskutimin e plotë të rreziqeve.

Në të njëjtën kohë, stacionet ndërkombëtare si BBC, Deutsche Welle, Voice of America dhe Radio Free Europe raportonin vazhdimisht mbi zhvillimet. Shumë qytetarë sovjetikë i dëgjonin këto transmetime për të marrë informacion që nuk e gjenin në mediat vendore.

Kjo krijoi një hendek të madh besueshmërie. Për herë të parë, një numër i madh qytetarësh kuptuan se informacioni i ofruar nga shteti ishte jo vetëm i paplotë, por në disa raste edhe mashtrues.

Një prej problemeve kryesore ishte se mediat zyrtare nuk kishin traditë të gazetarisë investigative. Gazetarët nuk ishin mësuar të sfidonin institucionet ose të kërkonin transparencë nga pushteti. Për dekada me radhë, funksioni kryesor i medias kishte qenë të mbështeste politikat e partisë dhe jo të kontrollonte veprimet e qeverisë.

 

Pasojat për njerëzit

Mijëra “likuidatorë”, siç u quajtën punëtorët dhe ushtarët që morën pjesë në pastrimin e zonës, u ekspozuan ndaj niveleve të larta të rrezatimit. Shumë prej tyre zhvilluan më vonë sëmundje të rënda.

Qindra mijëra njerëz u detyruan të zhvendoseshin nga zonat e ndotura. Fshatra të tëra u braktisën përgjithmonë, ndërsa zona përreth centralit u shndërrua në një territor të izoluar.

Për vite me radhë, autoritetet sovjetike publikuan të dhëna të kufizuara mbi numrin e viktimave dhe pasojat afatgjata. Kjo vetëm sa forcoi perceptimin se shteti po përpiqej të fshehte të vërtetën.

 

Çernobili dhe Glasnost-i

Kur ndodhi aksidenti, Bashkimi Sovjetik drejtohej nga Mikhail Gorbaçovi, i cili kishte filluar programet e reformave të njohura si Perestroika (ristrukturim) dhe Glasnost (hapje dhe transparencë).

Fillimisht, edhe udhëheqja sovjetike reagoi sipas modeleve tradicionale të fshehtësisë. Megjithatë, pasojat e Çernobilit e bindën Gorbaçovin se sistemi nuk mund të vazhdonte të funksiononte me të njëjtin nivel kontrolli mbi informacionin.

Vite më vonë, vetë Gorbaçovi do të deklaronte se Çernobili kishte qenë një nga faktorët që kontribuoi në transformimin e Bashkimit Sovjetik. Sipas tij, katastrofa tregoi dobësitë e thella të burokracisë, kulturës së sekretit dhe mungesës së transparencës.

Pas vitit 1986, mediat sovjetike filluan gradualisht të trajtonin tema që më parë konsideroheshin tabu. Gazetat filluan të publikonin materiale mbi korrupsionin, problemet ekonomike dhe gabimet e administratës shtetërore. Për herë të parë pas shumë dekadash, kritika publike ndaj institucioneve u bë pjesë e debatit publik.

 

Një pikë kthese në historinë e medias

Historianët e medias e konsiderojnë Çernobilin si një nga momentet më domethënëse në historinë e komunikimit në shekullin XX. Aksidenti tregoi kufijtë e censurës në një epokë ku informacioni mund të kalonte përtej kufijve shtetërorë.

Regjimi sovjetik kishte kontroll absolut mbi gazetat, radion dhe televizionin brenda vendit, por nuk mund të kontrollonte stacionet matëse në Suedi, raportimet e mediave ndërkombëtare apo rrjedhjen e informacionit jashtë kufijve të tij. Për herë të parë, miliona qytetarë panë qartë kontrastin midis propagandës zyrtare dhe realitetit.

Në këtë kuptim, Çernobili nuk ishte vetëm një katastrofë bërthamore. Ai ishte edhe një katastrofë e sistemit sovjetik të informacionit. Ngjarja ekspozoi dobësinë e një modeli mediatik të ndërtuar mbi censurën dhe sekretin shtetëror dhe dëshmoi se, në momente krizash të mëdha, e vërteta është shumë më e vështirë të kontrollohet sesa vetë lajmet. Për këtë arsye, Çernobili mbetet një nga shembujt më të fuqishëm në historinë e medias për mënyrën se si mungesa e transparencës mund ta thellojë një katastrofë dhe të minojë besimin e qytetarëve ndaj institucioneve të shtetit.

Continue Reading

Vendi

United Hospital fuqizon shërbimet e kardiologjisë me Dr. Banush Gashin, specialist me 40 vjet përvojë në mjekësi

Published

16 hours ago

on

November 13, 2026

By

Prishtinë – Përvoja shumëvjeçare, ekspertiza në trajtimin e sëmundjeve të zemrës dhe njohuritë e avancuara në fushën e aritmologjisë tashmë janë pjesë e ekipit të United Hospital. Institucioni shëndetësor njofton se në ekipin e tij mjekësor është bashkuar Dr. Banush Gashi, internist, kardiolog dhe aritmolog, me një karrierë 40-vjeçare në mjekësi dhe 24 vjet përvojë në Qendrën Klinike Universitare të Kosovës (QKUK).

United Hospital vazhdon të zgjerojë kapacitetet e veta profesionale, duke sjellë për pacientët ekspertizë të specializuar në diagnostikimin dhe trajtimin e sëmundjeve kardiovaskulare.

Bashkimit të Dr. Banush Gashit me ekipin mjekësor të këtij institucioni i jepet rëndësi e veçantë, duke marrë parasysh përvojën e tij të gjatë në mjekësinë interne, kardiologji dhe veçanërisht në aritmologji – fushë e specializuar që merret me diagnostikimin dhe trajtimin e çrregullimeve të ritmit të zemrës.

Gjatë karrierës së tij profesionale, Dr. Gashi ka realizuar mbi 400 procedura në fushën e aritmologjisë dhe implantimit të pajisjeve kardiake. Përvoja e tij është plotësuar edhe përmes pjesëmarrjes në kongrese, trajnime dhe aktivitete profesionale ndërkombëtare në qendra të njohura evropiane, përfshirë Londrën, Parisin, Romën, Barcelonën dhe Vjenën.

Shërbime të avancuara për diagnostikimin dhe trajtimin e zemrës

Me angazhimin e Dr. Gashit, pacientët e United Hospital do të kenë qasje në një gamë të gjerë ekzaminimesh diagnostikuese dhe procedurash specialistike kardiologjike.

Shërbimet përfshijnë:

Diagnostikimin kardiologjik: Ekokardiografi, testin e stresit dhe monitorimin Holter 24–72 orë për vlerësimin e aktivitetit dhe ritmit të zemrës.

Trajtimin e çrregullimeve të ritmit: Implantimin e stimuluesve kardiakë (Pacemaker DDD dhe CRT), si dhe kontrollin dhe ndërrimin e baterive të pajisjeve PM/ICD.

Procedurat specialistike: Perikardiocentezën dhe kardioversionin, sipas indikacioneve mjekësore.

Këto shërbime kanë rëndësi të veçantë për diagnostikimin në kohë, përcjelljen klinike dhe trajtimin e pacientëve me sëmundje të ndryshme kardiovaskulare.

Përvoja dhe përkushtimi në shërbim të shëndetit të zemrës

Sëmundjet kardiovaskulare kërkojnë vlerësim të kujdesshëm, diagnostikim të saktë dhe trajtim të individualizuar. Për këtë arsye, prania e specialistëve me përvojë të gjatë profesionale përbën një element të rëndësishëm në ofrimin e kujdesit shëndetësor cilësor.

United Hospital, përmes zgjerimit të ekipit specialistik, synon të ofrojë shërbime bashkëkohore kardiologjike, duke vënë në dispozicion të pacientëve përvojën profesionale dhe teknologjinë diagnostikuese e terapeutike.

 

Kontakti për termine dhe informata:

UNITED HOSPITAL

046 60 70 70

M2, Prishtinë–Ferizaj, km 7, Prishtinë

United Hospital – ekspertizë profesionale dhe kujdes i specializuar për shëndetin e zemrës./rajonipress/

Continue Reading

Vendi

Hyn në fuqi Ligji për Byronë e konfiskimit të pasurisë së pajustifikueshme

Published

20 hours ago

on

November 13, 2026

By

Presidentja Justina Shiroka-Pula ka dekretuar Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme, i cili ishte miratuar në Kuvendin e Kosovës dy javë më parë.

Lajmin e ka bërë të ditur kryetarja e Kuvendit, Albulena Haxhiu, e cila ka njoftuar se gjatë ditës e ka pranuar nga Presidenca dekretin për shpalljen e ligjit.

Haxhiu ka thënë se me dekretimin e tij, ligji po hyn në fazën e zbatimit, duke theksuar se Kuvendi do ta përcjellë nga afër procesin e themelimit të Byrosë.

“Për secilin që ushtron funksion publik, është e qartë se çdo pasuri duhet të ketë burim të ligjshëm dhe të dokumentuar. Kuvendi do ta përcjellë nga afër ngritjen e Byrosë. Qytetarët do ta matin këtë ligj me rezultatet që do të japë”, ka shkruar Haxhiu.

Miratimi i ligjit në Kuvend ishte kundërshtuar nga deputetët e opozitës, të cilët kishin ngritur shqetësime lidhur me zbatueshmërinë e tij.

Nga 24 amendamentet e propozuara për këtë ligj, 12 ishin paraqitur nga opozita, ndërsa deputetët e partisë në pushtet kishin mbështetur vetëm njërin prej tyre.

/A.K/

Continue Reading

Të kërkuara