Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 (Foto: Politikani Karl Bild ishte mjaft i angazhuar në çështjen e Kosovës)

29 maj 1993

Adem Demaçi në ditën e gjashtë të grevës së urisë

Në Pallatin e Shtypit, Adem Demaçi sot po vazhdon ditën e gjashtë të grevës së urisë, në shenjë kundërshtimi të masave të regjimit serb për të shkatërruar shtëpinë e vetme botuese-informative në gjuhën shqipe “Rilindja”.

Merret vesh se Adem Demaçi është i paluhatshëm për të vazhduar grevën e urisë deri në plotësimin e kërkesave. Ai nuk po i merr parasyshë këshillat e mjekëve dhe është duke përdorur vetëm ujin.

Bisedat me gazetarët i kanë ndërpre. Po ashtu, merret vesh se, edhe pas 100 orëve të grevës së urisë, është i kthjelltë dhe lexon shtypin dhe përcjell mjetet e informimit.

29 maj 1995

Në Prishtinë filloi procesi i montuar politik kundër 71 ish-policëve shqiptarë të Kosovës

Sot në sallën e improvizuar për gjykim të Kuvendit të okupuar të Kosovës nga forcat serbe, gjykata e instaluar serbe e qarkut në Prishtinë filloi procesin e montuar politik kundër 71 ish-policëve shqiptarë të Kosovës, të cilët akuzohen për gjoja formimin e Ministrisë së Punëve të Brendshme të Republikës së Kosovës.

Para se të fillonte gjykimi të gjitha rrugët që shpienin në drejtim të Kuvendit të Kosovës ishin të bllokuara nga policia serbe për komunikacion. Ndërtesa e Parlamentit të Kosovës brenda dhe jashtë kontrollohej nga forca të mëdha të policisë.

Në sallën e madhe të Kuvendit ishin ulur mbi 400 pjesëmarrës, 60 të akuzuar shqiptarë, shumë përcjellës të tyre, nga tre anëtarë të familjeve, një numër i madh gazetarësh dhe 45 mbrojtës të të akuzuarve.

Edhe pse ishin në këtë farë gjykatoreje, derisa filloi gjyqi, të akuzuarit mbi një orë u mbajtën duarlidhur.

Trupi gjykues i të pestëve (të gjithë serbë), i kryesuar nga Dragolub Zdravkoviq, në fillim komunikoi se në gjykatore sot janë sjellë 60 të akuzuar, ndërsa 11 gjenden në arrati.

Siç dihet, për kinse formimin e Ministrisë së Punëve të Brendshme të Republikës së Kosovës, akuzohen: Avdija Mehmedoviqi (1953), Jonuz Tërstena (1952), i cili gjendet në arrati, Sherif Krasniqi (1939) – në arrati, Sheremet Ahmeti (1953), Hajrullah Tërrnava (1954) – në arrati, Fadil Krasniqi (1958) – në arrati, Blerim Olloni (1956), Hizri Ahmeti (1955), Ejup Kamerolli (1952), Murat Sahiti (1956), Afrim Karaxha (1954), Hakif Latifi (1954), Ramadan Ferizi (1947), Ilmi Sylejmani (1960), Arsim Mehmeti (1960), Bajram Munishi (1956), Destan Thaçi (1954), Vesel Rexhepi (1958), Idriz Jashari (1954), Hasan Avdyli (1957), Bejtullah Alidema (1943), Haki Mehmeti (1952), Fadil Hyseni (1954), Bajram Jakaj (1948), Fadil Berisha (1956), Izet Ymeri (1949), Isak Aliu (1948), Enver Hakiu (1947), Sylejman Berisha (1958), Ramiz Hoxha (1954), Fekir Tahiri (1955), Reshat Maliqi (1960), Adem Dulahu (1957), Rexhep Kamenica (1949), Kemajl Aliu (1962), Bajram Berisha (1962), Izet Azizi (1959), i cili gjendet në arrati, Tahir Çaka (1959), Sali Bruti (1944), Fahredin Mehmeti (1956), Ilaz Gashi (1954), Sejdi Ademi (1966), Agim Gashi (1956), Açif Berisha (1955), Muhamet Hajdari (1961), Qazim Omura (1950), Rexhep Haziri (1956), Sejfullah Sahatçiu (1943), Faton Zhubi (1942), Pleurat Macula (1957), Bedri Juniku (1953), Lah Lahu (1954), gjendet në arrati, Shaban Hajredini (1945) – në arrati, Shefqet Beçaj (1957), Xhavit Osmani (1944), Xhafet Sahatçiu (1947), Muhamet Nimani (1946), Remzi Tertica (1946), Zekë Beka (1948), Tahir Bezhani (1947), Bibë Biblekaj (1946), Zenel Rama (1947), Selim Çitaku (1955), Zejnullah Shala (1938), Enver Maxhuni (1949), Afrim Olloni (1957), Bedri Tahiri (1959), gjendet në arrati, Jonuz Loshaj (1950), Hamit Peci (1946), Abdyl Doroci (1945) dhe Shefqet Budakova (1957).

Gjykimi filloi me vërejtjet e mbrojtësve: Bajram Kelmendi, Xhafer Maliqi, Nekibe Kelmendi, Azem Vllasi, Fazli Balaj, Drita Hajdari e Hysni Bytyçi. Ata kërkuan shtyerjen e gjykimit, për shkak të lëshimeve procedurale, thirrjeve të vonuara për mbrojtësit dhe të akuzuarit, si dhe për shkak të shqyrtimit të shkresave të lëndës, të cilat, avokatët nuk i morën me kohë.

Pas kësaj, trupi gjykues u kërcënua se po qe se mbrojtja nuk pajtohet me fillimin e gjykimit, atëherë ky gjykim do të shtyhet për 1 shtator të këtij viti.

Kundër këtij kërcënimi të kryetarit të trupit gjykues, Dragolub Zdravkoviq, reaguan sërish mbrojtësit dhe insistuan që të respektohen kërkesat e tyre.

Ndërkohë, meqë u dhanë edhe disa propozime të tjera, ndër të cilët edhe ai që sot të lexohet aktakuza e më pastaj të vendoset për rrjedhën e gjykimit, kryetari i trupit gjykues aprovoi këtë kërkesë të mbrojtësve.

Në vazhdim u lexua aktakuza. Pas leximit të saj, trupi gjykues bëri një pauzë të shkurtër dhe pastaj kumtoi vendimin se seanca e ardhshme gjyqësore do të mbahet më 12 qershor, në orën 9.

29 maj 1997

Karl Bilt: E tërë Evropa e brengosur për Kosovën

Prishtinë, 29 maj (QIK)

Koordinatori civil i Marrëveshjes së Dejtonit, Karl Bilt, tërhoqi vërejtjen në Hagë se “strategjia afatshkurtër e tërheqjes së forcave ushtarake” nga Bosnja dhe nga tërë Evropa Lindore “ka pasur si pasojë mossuksesin e thellë politik”.

Në takimin, që u bë në Shoqatën holandeze të çështjeve ndërkombëtare, Bilt u përcaktua për politikën afatgjate të Bashkimit Evropian që ekonomikisht, por “edhe në praninë e komponentës ushtarake”, të sigurojë integrimin brendapërbrenda këtij rajoni e njëkohësisht edhe integrimin e tërë Evropës Juglindore, shkruan “Koha ditore”.

Bilti, i cili në fillim të qershorit largohet nga ky funksion, porositi se “detyrë kyçe” e pasardhësit të tij do të jetë, jo vetëm “të mbajë të mbledhur koalicionin ndërkombëtar për Bosnjën, por edhe ta përforcojë atë, duke i pasur parasysh paqartësitë e gjata për afatin e paarsyeshëm të tërheqjes së forcave ushtarake më 1998 dhe përfundimin e periudhës së konsolidimit më 1997 dhe 1998.

Ai shtoi se “të gjitha vendet e Evropës janë të brengosura për gjendjen në Kosovë dhe lëvizjen në drejtim të dhënies së një lloj autonomie për Kosovën e parashtrojnë si parakusht për përmirësimin esencial të marrëveshjeve të tyre me RF të Jugosllavisë”.

28 maj 1998

Tre të vrarë afër fshatit Bellacerkë të Rahovecit

Mbrëmë rreth orës 21:50 forcat serbe vranë në rrugë afër fshatit Bellacerkë tre shqiptarë dhe një tjetër plagosën.

Deri më tash dihet se janë vrarë Feim Gashi nga fshati Drenoc dhe Sakib Bellaqa nga fshati Pataçan, ndërsa Komisioni për Informim i Degës së LDK-së në Rahovec nuk ka mundur të njoftojë ende identitetin e të vrarit të tretë dhe të të plagosurit.

Forcat serbe kryen këtë krim të rëndë në rugën e paasfaltuar Bellacerkë – Xërxë.

Snajperistët serbë vranë plakun Tahir Rrustem Kadrijaj nga Rastavica

Njoftimet nga Deçani bëjnë të ditur se gjendja në këtë qytet dhe ne fshatrat e sulmuara nga forcat serbe edhe sot është mjaft e rëndë.

KMDLNJ njofton se mbrëmë, deri në orën 19,00, nga vendi i quajtur “Kodra e Rastavicës” forcat ushtarake serbe kanë granatuar fshatin Rastavicë, ku ka pasur dëme të konsiderueshme, ndërsa nuk ka të dhëna për viktimat eventuale. Ndërkaq, snajperistët serbë të vendosur në këtë vend kanë vrarë mbrëmë Tahir Rrustem Kadrijajn, (75) nga Rastavica.

Po ky burim njofton se edhe sot, që nga orët e hershme të mëngjesit, ka të shtëna me armë artilerike në drejtim të fshatit Baballoq, ndërsa snajperistët po shtijnë në drejtim të fshatit Llukë e Epërme që nga ora 6,00 e mengjesit. Ata shtinë sot edhe në disa vetura në fshatin Beleg, me të cilat po largoheshin fëmijët e Deçanit. Për fat të mirë në këtë sulm nuk pësoi askush.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

(Foto: Greva e urisë)

28 maj 1993

Adem Demaçi hyri në ditën e pestë të grevës së urisë

Adem Demaçi, hyri në ditën e pestë të grevës së urisë, në mbrojtje të lirisë së fjalës e të mendimit të lirë në Kosovë dhe në shenjë proteste kundër vendimit të regjimit serb për të shkatërruar institucionin e vetëm informativo-botues në gjuhën shqipe në Kosovë “Rilindja”.

Shkrimitari 57 vjeçar, Adem Demaçi mbi 28 vjet i kaloi në burgjet serbe në mbrojtje të lirive njerëzore dhe kombëtare të shqiptarëve në Kosovë.

Adem Demaçi edhe pas daljes nga burgu i tij i fundit më 1991, nuk e ndëpreu punën e tij prej intelektuali e veprimtari në mbrojtje të të drejtave dhe lirive njerëzore e kombëtare shqiptare. Ai është kryetar i Këshillit për Mbrojtjen e të Drejtave dhe të Lirive të Njeriut në Prishtinë.

Parlamenti Evropian më 1991 e nderoi me çmimin “Saharov” për paqe.

Në një deklaratë dhënë gazetës “Borba” të Beogradit Adem Demaçi shpjegoi arsyen pse ishte hedhur në grevë urie. “Unë kam vendosur të vdes. Në fakt, mua nuk më mbete asgjë tjetër përveç të vdes për fjalën e lirë të shkruar shqipe. Grevën e urisë do ta ndërpresë vetëm nëse publikisht thuhet se “Panorama” nuk ka lidhje me ne dhe nëse nuk do të na merren lokalet për punë”.

Gjestin e Adem Demaçit e përkahi edhe kryetari i Republikës së Kosovës dr.Ibrahim Rugova. Në një deklaratë dhënë gazetës “Bujku” të Prishtinës, Rugova theksoi: “Kërkojmë nga opinioni ndërkombëtar që të përkrah këtë gjest të këtij shkrimtari dhe desidenti shqiptar e po ashtu të përkrah edhe grevën e gazetarëve dhe punëtorëve të tjerë të “Rilindjes”, të cilët, së bashku me Adem Demaçin, këto ditë po e thonë JO-në e tyre kundër dhunës mbi identitetin dhe mendimin e lirë”.

Akademik Rexhep Qosja po kësaj gazete i deklaroi: “Adem Demaçi ka hyr në grevë urie duke kërkuar që të jenë të lira gazetat shqipe në Kosovë. Për shkak se iu ka trembur fjalës së lirë shqipe, ndërgjegjës së shqiptarëve, moralit shqiptar të shqiptarëve, lirisë dhe pavarësisë së popullit shqiptar, pushteti serb e ka mbajtur 28 vjet në burg Adem Demaçin. Në burgje ky pushtet ka mbajtur edhe shumë të rinjë shqiptarë”.

28 maj 1994

Klinton: Aksionet serbe kërcënim ndaj interesave të SHBA-ve

Kryetari i SHBA, Bill Klinton, siç dihet, parmbrëmë ia paraqiti Kongresit qëndrimin se sanksionet e vendosura kundër Serbisë dhe Malit të Zi do të mbesin në fuqi ende.

Agjencia serbe Tanjug vlerëson se arsyetimi me të cilin e përcolli këtë qëndrim kryetari amerikan është i rëndësishëm për shkak se me këtë vërtetohen qëllimet e administratës amerikane ndaj Serbisë dhe Malit të Zi. Për të arsyetuar zgjatjen e sanksioneve, kryetari amerikan i shpalli “aksionet dhe politikën e Jugosllavisë si kërcënim të vazhdueshëm ndaj sigurisë nacionale dhe interesave vitale ekonomike dhe të politikës së jashtme të SHBA-ve”.

Tanjugu vlerëson se pas këtij kualifikimi, i cili në zhargonin amerikan do të thotë bazë edhe për intervenim ushtarak, Klintoni e njofton Kongresin se është e domosdoshme që të mbahen në fuqi të gjitha dispozitat “e gjëra” të sanksioneve, me qëllim “të zvogëlohen mundësitë e qeverisë jugosllave për të përkrahur konfliktet civile në ish-Jugosllavi”.

Në esencë paraqitja e kryetarit amerikan Klinton në Kapitoll Hill do të thotë vazhdim i riafirmimit të linjes se sanksionet ndaj Jugosllavisë duhet të mbahen deri në kohë të pacaktuar, si njëri prej mjeteve me të cilën SHBA-të mund të realizojnë interesat e tyre në hapësirën e ish-Jugosllavisë.

Tanjugu konstaton se Entoni Lejk, këshilltar për siguri nacionale i kryetarit amerikan, i cili e redaktoi paraqitjen e kryetarit në Kongres dhe Uoren Kristofer, sekretar, ia arritën që ta bindin Klintonin për konstantën e politikës së Shtëpisë së Bardhë ndaj Bosnjës dhe të fusin në të dy teza: e para – se në Bosnjë është në vepër agresioni i serbëve dhe i Serbisë, dhe së dyti – se zgjidhja e situatës në Bosnjë nuk mund të ndikojë në regjimin e sanksioneve (për këtë posaçërisht insiston Kristoferi).

Uoren Kristofer, përkujton Tanjugu, disa herë në mbledhjet e Këshillit për Siguri Nacionale ka theksuar se nëse hiqen sanksionet, kjo do t’i bënte të pamundur administratës për të ndikuar në zhvillimet e mëtutjeshme në Kroaci, në Kosovë, në Sanxhak, Maqedoni…

Vëzhguesit në Uashington theksojnë se paraqitja e Klintonit në Kongres u bë mu në momentin kur në Francë tri palët ndërluftuese po bëjnë përpjekje, përmes Grupit të Kontaktit, për të arritur një marrëveshje paqësore, ku një prej pikave është edhe heqja e pjesërishme e sanksioneve ndaj Serbisë dhe Malit të Zi. Porosia e Klintonit për Kongresin është njëkohësisht porosi edhe për ndërmjetësuesit amerikanë lidhur me sanksionet.

28 maj 1997

Polici serb shkeli disa nxënës shqiptarë në rrethinë të Istogut

Dje, më 26 maj, rreth orës 14, në rrugën Gurrakoc – Klinë, në dalje të qendrës së Gurrakocit, ndodhi një aksident i rëndë komunikacioni, me ç’rast humbi jetën nxënësi i klasës së pestë i SHF “Martin Camaj” Rexhë Beqir Kabashi nga Gurrakoci. Me këtë rast lëndime të rënda mori edhe nxënësi Nezir Rexhë Kabashi dhe dy nxënës të tjerë të po këtij lokaliteti.

Sipas dëshmitarëve, fatkeqësinë e shkaktoi një polic serb që ishte duke e ngarë automjetin me një shpejtësi shumë të madhe, me ç’rast shkeli nxënësit që po ktheheshin nga shkolla në anën e kunëdrt të rrugës, në trotuar.

Varrimi i nxënësit të ndjerë bëhet sot.

Gurrakoc: Nxënësi dhe prindi i tij u morën sigurimin serb

Më 23 maj në oborrin e SHF “Martin Camaj” të Gurrakocit, komuna e Istogut, një nxënës shqiptar u fjalos me një nxënës serb, por ndërhyrja e arsimtarit të edukatës fizike, Malush Kabashi, bëri që zënka të mos bëhet më e madhe.

Me të marrë vesh për këtë zënkë drejtori serb thirri policët, të cilët mori arsimtarin, Malush Kabashi, nxënësin, Petrit Kajtazi dhe prindin e tij, Haki Kajtazi dhe i dërgoi në Gjykatën Komunale për kundërvajtje në Istog. Gjykatësi, pasi që i dëgjoi dëshmitë e të dy palëve dhe të dëshmitarëve, i liroi të akuzuarit, mirëpo, Nxënësi Petrit Kajtazi dhe prindi i tij Hakiu dje u morën disa orë në pyetje në sigurimin serb.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

(Foto: Zëdhënësi i Stejt Departamentit amerikan, Xhejms Rubin)

 27 maj 1993

Adem Demaçi po hyn në ditën e katërt të grevës së urisë

Në Pallatin e Shtypit në Prishtinë, Adem Demaçi, shkrimtar dhe ish i burgosur i ndërgjegjës, i cili në burgjet serbe qëndroi më shumë se 28 vjet, po vazhdon grevën e urisë në shenjë kundërshtimi të regjimit serb për të shkatërruar institucionin e vetëm informativo-botues në gjuhën shqipe në Kosovë “Rilindja”. Ai sot po hyn në ditën e katërt të grevës së urisë dhe sipas deklaratave të konziliumit të mjekëve, gjendja e tij shëndetësore tash për tash është relativisht e mirë.

Në konferencën e sotme për gazetarë të Këshillit Grevist, Adem Demaçi, iu lut gazetarëve që të ndërprejnë grevën e urisë. Njëkohësisht ai me këtë rast thirri të gjithë qytetarët që janë jashtë Pallatit të Shtypit, studentët, nxënësit dhe punëtorët, të vazhdojnë punën e tyre dhe mësimin, sepse kjo është mënyra më e mirë e përkrahjes, tha ai.

Bashkë me Adem Demaçin janë duke bërë grevë urie edhe shkrimtarë, gazetarë dhe punonjës të tjerë të “Rilindjes”.

Grevës së urisë së Adem Demaçit i janë bashkangjitur edhe Shaip Beqiri, Halil Matoshi, Milazim Krasniqi, Blerim Shala, Zenun Çelaj, Abdullah Konushevci, Ibrahim Kadriu, Arif Demolli, Vezir Ukaj, Ali Podrimja, Nehat Islami etj.

Gjestit të Adem Demaçit po i jipet një përkrahje e madhe nga shqiptarët brenda dhe jashtë Kosovës.

27 maj 1994

Në Podujevë u plagos rëndë fëmija Urim Xhevat Kopalla

Më 25 maj, rreth orës 19, në Podujevë, në rrugën e Obrançës, u plagos rëndë, me plumb në kokë, fëmija 8-vjeçar Urim Xhevat Kopalla. Ndihma e parë këtij fëmije iu dha në Podujevë dhe pastaj u dërgua në Beograd. Gjendja e tij shëndetësore vazhdon të jetë shumë e rëndë.

Ende nuk dihet se si u plagos Urim Kopalla.

Më 25 maj, rreth orës 19, nga blloku i ri i banesave i banuar kryesisht me serbë, në afërsi të shkollës fillore “Naim Frashëri” në Podujevë, u dëgjuan breshëri të shtënash nga automatikët, njofton Komisioni për Informim i Degës së LDK-së në Podujevë.

Represioni serb në Kosovë

Suharekë: – Më 25 maj rreth orës 17, katër policë serbë, nën pretekst të kërkimit të armëve, në fshatin Graiçec bastisën shtëpitë e Qerim, Sami, Gani dhe Ilmi Bokës, pastaj në lagjën Qarri po të këtij fshati bastisen shtëpitë e Mehmet e Jonuz Qarri. Policia Milazim Mehmet Qarrit ia morën veturën e markës “Askona” me regjistrim zvicran nga Greiçeci. Policia po ashtu keqtrajtoi Florim Bokën (20).

Pardje, rreth orës 17, katër policë bastisën shtëpitë e Jonuz dhe Mehmet Çarrit në fshatin Grejçec, me pretekst se kërkonin një automjet me regjistrim të huaj. Policët e morën veturën të cilën e kishte sjellë nga Zvicra Milazim Qarri. Dje Milazimi shkoi në polici për ta marrë veturën, por policët e arrestuan atë me qëllim të dërgimit të tij në ushtrinë serbe.

Skenderaj: Dje në orët e hershme të mëngjesit, policia serbe zuri dy udhëqkryqet kryesore që qonin në këtë qytet dhe bënë një kontrillim rigoroz të automjeteve të qytetarëve. Dje, po ashtu, policia mori Hajrullah Veliqin nga fshati Polac prej të cilit kërkoi për të dytën herë një pushkë të vjetër, të cilën ai nuk e ka.

Sot, rreth orës 8, tre policë serbë shkuan në shtëpinë e Mehmet Mehmetit në Klinë të Ultë. Policët kërkuan nga Mehmeti që është trajner i klubit të futbollit “Skënderaj”, që t’i dorëzojë disa rekuizita sportive. Policia ia mori Mehmetit të gjitha rekuizitat që ia gjeti në shtëpi.

Këtij ekipi të futbollit policia ia ka ndërprerë ushtrimet para disa muajsh.

Kaçanik: – Më 23 maj, në bazë të një thirrjeje që kishte marrë nga policia e Ferizajt, u rrahë Mustafë Elezi nga fshati Sllatinë. Nga ai në fillim policia kërkoi një revole, por kur u lajmërua në stacionin e policisë nga kërkohej një pushkë automatike dhe një snajper. Personi që e mori në pyetje dhe që e keqëtrajtoi quhej Sreçko Dogançiq. Gjatë mbajtjes në polici Mustafë Elezit iu shkaktuan lëndime të rëndë në bark, veshkë dhe në kokë. Sipas deklaratës së tij, shkak i gjithë kësaj, siç i kishin thënë në polici, ishte se ai ishte biri i Ukë-ballistit. Këtij iu kërcënuan se po provoi të ikë, policia do ta arrestoi djalin e tij. Para se ta lironte, policia ia dha thirrjen tjetër që ky të paraqitet në polici të nesërmën.

Mitrovicë: – Javën që shkoi një punëtor i Kosova-transit me mbiemrin Llaçkoviq, së bashku me tre policë serbë they dhe hyri me dhunë në banesën e Ismet Shefki Begut, ish-punëtor në kombinatin “Trepça”, i aktualisht gjendet në Norvegji. Në këtë banesë I. Begu jetoi 15 vjet. Fqinjët e tij thonë se që nga ajo mbrëmje në banesën e Ismetit tubohen serbë dhe bëjnë shamatë me këngë dhe të shtëna.

Më 25 maj 8 policë bastisen shtëpinë e Shefqet Bilallit, nëpunës në Bashkësinë Islame në Mitrovicë. Policët nuk treguan shkaqet e bastistjes, por u sollën me brutalitet, duke thyer dyerë dhe gjëra të tjera në shtëpinë e tij.

Po me 25 maj policia për herë të tretë kërkuan Feti Sejdullah Bekën nga fshati Kçiq i Madh. Atij para një viti iu bastis shtëpia dhe iu mor një revole me leje. Policia nga Fetiu kërkuan edhe një revole tjetër.

Viti: – Nënkëshilli i KMDLNJ në Viti informon se policët serbë, së bashku me inspektorë civil, bastisën lokalet e Këshillit komunal për finacim. Policia mori disa materiale dhe arrestoi akatarin Emrush Azizin, i cili ende po mbahet në arrest.

Obiliq: – Më 25 maj policia thirri Kadri Thaqin, anëtar i kryesisë së Degës së LDK-së në Obiliq, si dhe Esat Berishën, arsimtar i shkollës fillore “Liria” në Milloshevë. Me kërkesë që të dorëzojnë armë, ata u mbajtën në polici disa orë.

Vushtrri: – Më 22 maj, në hyrje të qytetit në Vushtrri, policia serbe arrestoi Fadil (Fetah) Gërgjaliun dhe e dërgoi në ushtrinë serbe në Nish.

 27 maj 1995

Dhuna në Kosovë

Istog: –Po me pretekst të armës, dje, në stacionin e policisë në Dubravë të Istogut, u rrah Mehmet Hysenaj.

Më 26 maj, me pretekst të kërkimit të armës, u mor në stacionin e policisë Zenel Tahiraj nga fshati Kërninë. Ai është keqtrajtuar rëndë dhe gjendja e tij shëndetësore edhe pas ndihmës së mjekut është e keqe. Nga ai është kërkuar që të paraqitet në polici edhe të hënën.

Lipjan: – Me pretekst të kërkimit të armëve, ditë më parë, policët rrahën Shyqyri Gashin nga Dobraja e Madhe e Lipjanit dhe e urdhëruan atë që të paraqitet në polici edhe të hënën.

Pejë: – Më 24 maj është marrë në pyetje Xhafer Krasniqi nga fshati Vranoc.

Me pretekst të dorëzimit të armëve, në stacionin e policisë në Kliçinë të Pejës u mor Ali Shabani nga Svërka.

Suharekë: – Dhuna kundër fshatarëve të Grejkocit, me pretekst të kërkimit të armëve, po vazhdon edhe më tutje. Kështu, dje, me këtë pretekst, në polici u morën Hysen (1946), Ismail (1950) e Florim (1970) Beqiraj dhe Maliqi Kicaj (1957).

Vushtrri: – Më 20 maj, një patrullë e policisë serbe, me pretekst të kërkimit të armëve, ishte në shtëpinë e Nezir Hasanit në fshatin Ceceli. Neziri dorëzoi një revole, ndërsa tash policët i kërkojnë armë të tjera.

Më 24 maj, me pretekst të kërkimit të armëve, në stacionin e policisë në Vushtrri, u mor Xhemajl Hajrizi nga fshati Strof.

Më 25 maj, një patrullë e policisë serbe kërkoi në shtëpinë e tij Xhevat Sylën nga Dumnica e Poshtme e Vushtrrisë dhe meqë ai nuk gjindej në shtëpi, policët morën peng djalin e tij.

Po në këtë fshat, policët morën një pushkë të vjetër në familjen e Hajriz Rexhës.

Më 26 maj, policët ishin në shtëpinë e Enver Parduzit, ku kërkuan një veturë të cilën gjoja Enverit ia paska lënë motra e tij, e cila punon në botën e jashtme.

 27 maj 1997

Zbulohen varre të reja të viktimave të gjenocidit serb në Opojë

Është i njohur gjenocidi serb mbi popullin shqiptar edhe në anën e Opojës, ku gjatë shtypjes së përgjakshme të kryengritjes antiserbe të vitit 1913, ushtria serbe masakroi disa banorë shqiptarë të kësaj ane, duke mos kursyer as gra e fëmijë.

Prof. Zekeria Cana, në bashkëpunim me arsimtarin Skënder Nebiu nga Brruti mblodhi të dhënat për viktimat e plojës së ushtrisë serbe te Livadhi i Kasës në Bresan-Blaç, ku gjendet varri i përbashkët i 18 viktimave. Ushtria serbe nuk u mjaftua vetëm me pushkatimin e burrave të zgjedhur nga çdo shtëpi, por kufomave të tyre ua vuri zjarrin.

Emrat e viktimave të skalitura në pllakën e parë janë: Abdi Xhelaludini, Haxhi Idriz Maliqi, Xhelaludin Maliqi, Maliq Xhelaludini, Rexhep Sinani, Shaban Sylejmani, Emin Halimi, Sali Musliu e Sahadat Rrustemi. Në pllakën e dytë figuron emri i Muhamet e Adem Brrutit. Të të njëjtin varr të përbashkët janë edhe eshtrat e Shaban Shabanit, Qerim Halimit, Nebih Idrizit dhe bashkëshortes së tij, pastaj të Destan Destanit, Veli Veselit dhe të Sinan Musliut.

Varri i dytë i përbashkët i viktimave të gjenocidit serb gjendet në fundin e Kodrës së Gjatë në vendin e quajtur Brijë, ku u masakruan 42 shqiptarë nga Brruti dhe 1 shqiptar i panjohur nga fshati Topojan. Deri tash janë identifikuar emrat e 28 viktimave, si të Bislim Dervishit, Bazë Rexhës, Metë Bajrës, Bisë Seronit, pastaj të Azizit, djalë i Tixhës, Behxhet Alisë, Kurt Alisë, Sahit Beqës, Kadri Bajrës, Demë Bajrës, Sylë Nurës, Hasani i biri i Zylfës, Meleq Alisë, Nurë Misinit, Fetah Azerit, Sylë Alisë, Ukë Shabanit, Islam Myrtës, Jakup Miftarit, Shaqir Isufit, Seron Halimit, Shitë Kamberit, Pajazit Xhelës, Sahit Beqës, Avdi Hasanit, Pajazit Beshirit, Mahmut Sylës dhe të Batë Makës.

Emrat e viktimave të tjera nga fshati Brrut, i cili u bë hi e pluhur nga ushtria serbe janë; Agush Mazllumi, Abaz Rexhepi, Nuhi Xhema, Mursel Kamberi, Kolë Jak Gjoni dhe Gjon Jak Gjoni (dyqanxhi në këtë fshat), Shasivari, Rizahu, Nuredini, Beqiri, Ukë Shabani, Qazim Jakupi, Ramadan Çaushi, Selman Rama, pastaj Tafil Sinani, Ismail Zeneli, së bashku me të shoqen, vajzën dhe dy djemtë, Hasan Zeneli, Zylfi Hasani, Shena, halla e Ymer Beshirit, pastaj e shoqja e Kadrisë së bashku me tre fëmijët e saj u mbyt në bunarin e Qamil Kadrisë. Bademe Agush Mazllumi gjeti vdekjen në zjarrin e shtëpisë bashkë me 4 vajzat e saja, pastaj e ëma e Tahir Sallës u dogj pranë pusit, ndërsa nëna e Ramiz Rrustemit u mbyt në pus.

Ushtria serbe i zuri në fshatin Pobreg, mbi 50 burra e djemë të Pllavës dhe i pushkatoi në Vraniq. Emrat e viktimave të identifikuara deri tash janë: Misin Lepri, Tosun Hasani, Dervish Tahiri, Ibrahim Lekaj, Mulla Shabani, Abdurrahman Shabani, Kasëm Nebihu, Mehmet Veliu, Kurtish Batia, Sherif Halimi, Kasëm, Merxhan dhe Behlul Tershnjaku.

Në Zym u vra Sadik Isufi dhe Hajrë Murati, ndërsa në Bellobrad u vra Sinan Miftari, Sejfullah Qafleshi dhe e ëma e Aziz Qafleshit, pastaj Xhemë Sadikaj, Memish Baxhaku dhe e shoqja Zylfihane me të birin Sallah Zeqirjahën, ndërsa disa gra dhe 5 fëmijë u mbytën në pus.

27 maj 1998

Përqëndrim i madh i forcave ushtarake e policore në Gllogoc

Në hapëirën e kombinatit të “Ferronikelit” në Gllogoc dje janë vendosur forca shumë të mëdha ushtarake e policore.

Ndër qytetarët e Gllogocit ëhstë përhapur frika se ky përqëndrim paralajëmron një sulm eventual kundër këtij regjioni, prandaj gjatë pasdiitës së djeshme, shumë qytetarë janë larguar nga Gllogoci.

Komisioni për Informim i Degës së LDK-së në Gllogoc njofton se de në orën 9:00, në këtë lokalitet të Kosovës janë stacionuar forca të mëdha serbe me armatim të të gjitha llojeve.

Gjatë ditës së djeshme janë vendosur mbi 1000 ushtarë e policë të maskuar serbë që kanë arritur me 5 autoblinda, 88 automjete, kamioneta, pizgauerë dhe me 14 autobusë.

Në postbllokun e policisë në Komoran, mbrëmë gjatë tërë natës janë dëgjuar të shtëna nga të gjitha anët.

27 maj 1998

Xh. Rubin: “Ne do të jemi në gjendje të mbrojmë interesat tona vitale, nëqoftëse konflikti zgjerohet”

Prishtinë, 27 maj (QIK)

“SHBA-të dëshirojnë të shohin se janë marrë masa adekuate stabilizuese për të penguar përhapjen e konfliktit në Kosovë dhe, nëse kjo gjë ndodh, ne do të jemi në gjendje t’i mbrojmë interesat tona vitale në rajon”, deklaroi dje në konferencën për gazetarë zëdhënësi i Stejt Departamentit amerikan, Xhejms Rubin.

I pyetur për shkallëzimin më të ri të dhunës në Kosovë dhe për mundësinë e dërgimit të trupave të NATO-s në kufirin me Kosovë, Rubin tha:

“Kemi marrë informacione për luftime gjatë uikendit në disa pjesë të Kosovës. Po ashtu, kemi informacione të besueshme se disa shtëpi janë djegur në një fshat. Ambasada jonë është duke hulumtuar këto të dhëna. Shkallëzimi i dhunës dëshmon se është i nevojshëm progresi në bisedimet mes Rugovës dhe Milosheviqit, të cilat janë duke vazhduar. Që nga takimi i tyre të premten e kaluar, palët janë në kontakt të përhershëm me ambasadorin Kristofer Hill, i cili është ofruar të ketë rol ndihmues në negociata. Me sa dimë palët do të takohen sërish gjatë kësaj jave, ndërsa ne do të vazhdojmë t’i trimërojmë ato që t’i qasen çështjeve kyçe. Dr. Rugova dhe këshilltarët e tij gjatë kësaj jave do të vizitojnë Uashingtonin dhe do të kenë takime me zyrtarët e lartë të administratës. Ndërsa sa i përket dërgimit të trupave të NATO-s në kufi me Kosovën dhe në rajon, dua të përsëris se ne gjithmonë kemi kërkuar që të sigurohen masa adekuate stabilizuese dhe ne do të jemi në gjendje të mbrojmë interesat tona vitale, nëqoftëse konflikti zgjerohet”.

I pyetur se a do të takohen së shpejti ministrat e Jashtëm të Grupit të Kontaktit, Rubin tha se nuk ka informacion të konfirmuar për këtë takim dhe shtoi se “dr. Rugova do të jetë këtu dhe sekretarja e Shtetit, Ollbrajt, do të bisedojë për Kosovën me homologët e saj në Luksemburg”.

Dy të vrarë të paidentifikuar qëndrojnë qe pesë ditë në Grabanicë

Nga data 22 maj, në rrugën para shtëpisë së Sali Shabanit në Grabanicë, qëndrojnë trupat e pajetë të dy të rinjëve, identiteti i të cilëve nuk dihet.

Komisioni për Informim i Degës së LDK-së në Klinë njofton se shtëpitë e këtij fshati janë djegë, kurse njerëzit janë larguar nga shtëpitë. Megjithë këtë, forcat serbe nuk lejojnë depërtimin e njerëzve në fshat as nuk lejojnë kthimin e njerëzve në tokën e vet.

Në Baballoq forcat serbe vranë pardje Ramiz Sadik Batushën

Ramiz Sadik Batusha (22) nga Baballoçi është vrarë pardje gjatë sulmit serb në këtë fshat, njoftoi sot radio “Dojçe vele”.

Fshati Baballoç, që mbahet i rrethuar e sulmohet tash më shumë se një muaj, u sulmua nga forcat e shumta serbe edhe gjatë tri ditëve të fundit, kur sulmet serbe ndaj fshatrave të Deçanit ishin të një intensiteti të lartë.

Nga sulmet pothuaj të përditshme serbe ndaj Baballoçit, në këtë fshat janë dëmtuar shumë shtëpi, por në pamundësi të depërtimit në këtë fshat, ende nuk dihen përmasat e sulmeve serbe.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

(Greva e urisë në Rilindje”, 1994)

26 maj 1993

Adem Demaçi vazhdon grevën e urisë

Adem Demaçi, prej parmbrëmë është në grevë urie në shenjë proteste kundër shkatërrimit të “Rilindjes” dhe mbylljes së të gjitha mjeteve të informimit në gjuhën shqipe në Kosovë, nga ana e pushtetit serb.

Adem Demaçi, është i burgosur i njohur i ndërgjegjës, i cili nëpër burgjet serbe i kaloi mbi 28 vjet burg. Demaçi, është shkrimtar dhe intelektual i njohur shqiptar.

Më 1991, Adem Demaçit iu dha çmimi “Saharov” i Parlamentit Evropian.

Adem Demaçi, është kryetar i Këshillit për Mbrojtjen e të Drejtave dhe Lirive të Njeriut në Prishtinë dhe kryeredaktor përgjegjës i javores politike “Zëri”.

Në një deklaratë dhënë mbrëmë “Zërit të Amerikës”, Adem Demaçi theksoi: “Këtë grevë urie po e bëj në shenjë proteste kundër regjimit militarist hegjemonist serbomadh të Beogradit. Kërkesa ime është që të na lënë rehat, që t’i nxjerrim gazetat brenda mundësive tona dhe që të mos na bëjnë pengesa. Po ashtu, me këtë grevë, dua të tërheq vërejtjen opinionit botëror që të heqë dorë nga kjo indiferencë dhe gjakftohtësi me të cilat i ndjek të gjitha këto të zeza që i bëri e po i bën regjimi militarist duke shtypur, vrarë e duke bërë pastrime etnike të popujve joserbë dhe të popujve të tjerë në hapësirat e Bllkanit”.

Në grevë urie u hodhën edhe punëtorët “Rilindjes”

Në shenjë proteste kundër pushtimit të “Rilindjes”, institucionit më të rëndësishëm kombëtar të informimit e të kulturës shqiptare në Kosovë nga pushteti serb, prej sot Adem Demaçit iu bashkuan me një grevë urie të përgjithshme selektive edhe gazetarët, shkrimtarët dhe punëtorët e tjerë të shumtë të “Rilindjes”. Me grevën e urisë punëtorët e “Rilindjes” nuk do ta rrezikojnë botimin e gazetave të pakta në gjuhën shqipe, të cilat pushteti serb, me themelimin e ndërmarrjes “Panorama” don t’i shuajë përfundimisht.

Punëtorët e “Rilindjes”, dje lëshuan një deklaratë për opinion në të cilën thuhet: “Pushteti serb me formimin e ndërmarrjes “Panorama”, me të cilën merr tërë pasurinë e ndërmarrjeve të “Rilindjes”, e shuan fjalën e lirë shqipe, ndalën veprimtarinë informative, krijimtarinë kulturore, letrare, shkencore e artistike shqiptare në Kosovë. Këtë gjenocid ndaj shqiptarëve, pushteti serb e ka filluar me zbatimin e masave të dhunshme në disa kolektiva të “Rilindjes”, të cilat i ka sjell para likuidimit, me ndalimin e gazetës së përditshme “Rilindja” më 1990″.

Me mbylljen përfundimtare të informimit në gjuhën shqipe në Kosovë dhe me shtrirjen e plotë të territ informativ, thuhet në këtë deklaratë për opinion, po e fitojnë shansën e vet, fuqitë më të errta hegjemoniste e shoviniste serbe, për të krijuar dezinformimin e papengueshëm, i cili mund të sjell pasoja të kobshme për të gjithë qytetarët e Kosovës. Në këtë mënyrë pushteti serb, është ai që dëshiron ta bartë tragjedinë e Bosnjës edhe në Kosovë dhe për këtë opinioni botëror është i informuar mirë.

Këshilli Grevist i NSHP “Rilindja”, në një konferencë për shtyp të mbajtur sot, paraqiti kërkesat e gazetarëve dhe të punonjësve të të gjitha ndërmarrjeve që veprojnë në kuadrin e saj.

Ata kërkojn që:

– të shfuqizohet Ligji për formimin e të ashtuquajturës “Panorama”,

– t’i kthehn të gjitha të drejtat që NSHP “Rilindja” i kishte para 5 korrikut të vitit 1990, kur në të u aplikuan masat e dhunshme,

– të mos pengohet shtypi i lirë dhe i pavarur,

– të kthehn në punë të gjithë punëtorët e larguar gjatë kohës së masave të dhunshme dhe

– të mos inicohet në mënyrë të njëanshme transformimi i pronës së “Rilindjes”.

Në këtë konferencë u tha se gazetarët e revistave “Bujku”, “Zëri”, “Fjala” dhe “Shkëndija” prej sot (26 maj 1993 në orën 11 janëd solidarizuar me grevën e urisë së Adem Demaçit). Me këtë grevë janë solidarizuar edhe disa shkrimtarë që punojnë në redaksinë e botimeved të “Rilindjes”, kurse në grevë të përgjithshme janë të gjithë punonjësit e kësaj shtëpie botuese informative e grafike.

Mirëpo, edhe përkundër grevës së urisë, këshilli Grevist bën me dije se pjesët më vitale të NSHP “Rilindja” do të funksionojnë.

26 maj 1994

Represioni në Kosovë

Pejë: – Pardje, derisa kishte shkuar për të marrë letërnjoftimin në Qendrën e Sigurimit serb në Pejë, policia rrahu Ibrahim Sylejmanin (1942) nga Peja. Ibrahim Sylejmani u rrah nën pretekst se kohë më parë e ka vizituar Shqipërinë, ndërsa ai nuk disponon fare me pasaport.

Bëhet me dije se Ibrahim Sylejmani mori lëndime të rënda trupore. Skënderaj: – Dje një ekspeditë e policisë së bashku me një picgauer, nën pretekst të kërkimit të armëve, bastisën shtëpinë e Hamit Salihut në Qirez të Skënderajt, i cili këto ditë është kthyr nga Gjermania ku punon tash 20 vjet.

Policia pas bastisjes kërkoi djemtë e Hamitit, Izedin dhe Sinan Salihun, të cilët gjoja i kanë ikur thirrjes për shërbim ushtarak. Policia ia mori peng pasaportën Hamit Salihut dhe e urdhëroi që sot të paraqitet në stacionin e policisë në Skënderaj.

Vushtrri: – Më 22 maj rreth orës 10.00, policia nën pretekst të kërkimit të armëve rrahu Azem Hasanin në fshatin Strofc të Vushtrrisë.

E njëjta ekspeditë ishte edhe në shtëpinë e Xhafer Aliut në fshatin Strofc, me ç’rast policia mori me vete nënën e Xhaferit, Mihame Aliun dhe Bali Aliun, të cilët u mbajtën rreth tri orë në polici. Pas bastisjes, Xhafer Alit iu la thirrja që të paraqitet më 23 maj në stacionin e policisë.

Po këtë ditë, në të njëjtin fshat, nën pretekst të kërkimit të armëve u bastisën edhe shtëpitë e Ismet dhe Nazmi Jasharit. Meqë Nazmi Jashari nuk gjendet qe dy vite në shtëpi, policia iu kërcënua bashkëshortes së tij se po qe se nuk dorëzon armën do të vijnë çdo ditë për t’i basatisur. Ismet Jashari u urdhërua që të paraqitet të nesërmen në polici.

Dje rreth orës 12.00, një ekspeditë e policisë ndërhyri në lokalet e shkollës fillore “Zenel Hajdini” në fshatin Pasomë të Vushtrrisë, të cilët kërkiuan drejtorin e kësaj shkolle, i cili nuk gjendej atu. Policët nga sekretari i kësaj shkolle kërkuan që t’i dorëzojë dëftesat e nxënësve dhe vulat e shkollës. Policët më pas demoluan dhe thyen shumë orendi, si dhe morën me vete flamurin dhe disa portrete të figurave kombëtare shqiptare.

Hani i Elezit: – Dje rreth orës 5 të mëngjesit policia nën pretekst të kërkimit të armëve bastisën shtëpitë e Latif Dernjanit, Shefqet dhe Enver Krasniqit dhe atë të Hivzi Hasatiqit në fshatin Paldenicë. Pasi në këto shtëpi nukl u gjet asgjë nga armët e kërkuara, policia mori me vete Latif Dernjanin dhe Shefqet Krasniqin.

Malishevë: – Pardje në postkomandën e policisë në Kijevë prej orës 9 deri në orën 16, është torturuar brutalisht i riu Shaip R.Bacaliu nga Kijeva nën pretekst se e ka rrahur kushërirën e tij, Rahimen, e cila kohë më parë është martuar me një polic serb nga Gjakova. Bëhet me dije se gjatë keqtrajtimit të Shaip R.Bacaliut, në stacionin e policisë mori pjesë edhe bashkëshorti i Rahimes, Milenko Periqi nga Kijeva.

Gllogovc: – Dje derisa mbahej mbledhja e Aktivit të LDK-së në fshatin Korroticë e Poshtme e Gllogovcit, në të cilën merrnin pjesë edhe Jakup Krasniqi, kryetar i Këshillit Komunal për Financim dhe anëtari i Kryesisë së Degës së LDK-së së Gllogovcit, Izet Ibrahimi dhe Tahir Zeneli, kryetar i Aktivit të LDK-së në Korroticë të Poshtme, ndërhyri policia serbe dhe i arrestoi të tre.

26 maj 1995

Vazhdon dërgimi me dhunë i të rinjve shqiptarë në ushtrinë serbe

Policia në komunën e Vushtrrisë vazhdon edhe më tutje të ndjekë të rinjtë shqiptarë për t’i dërguar ata me dhunë në ushtrinë serbe.

Kështu, më 24 maj, policët me këtë pretekst shkuan në shtëpinë e Sylejman Pajazitit në Smrekovnicë dhe kërkuan djalin e tij Ekrem Pajazitin, i cili ka dezertuar nga ish-armata jugosllave. Policia kërcënoi anëtarët e familjes se nëse Ekremi nuk paraqitet në polici do t’i arrestojnë të gjithë anëtarët tjerë të familjes së tij.

Po me këtë pretekst, u arrestua i riu Hajdar Mustafa nga Stanofci i Ulët, i cili gjithashtu ka dezertuar nga ish-ushtria jugosllave. Ai u dërgua në stacionin e policisë në Vushtrri dhe për fatin e tij të mëtejmë familja nuk ka njoftime.

26 maj 1997

Mbledhje komemorative me rastin e vdekjes së shkrimtarit Azem Shkreli

Sot, në Shoqatën e Shkrimtarëve të Kosovës në Prishtinë, u mbajt mbledhje komemorative me rastin e vdekjes së shkrimtarit Azem Shkreli, në të cilën, përveç anëtarëve të familjes Shkreli dhe miqve e dashamirëve të shumtë, mori pjesë edhe kryetari i Republikës së Kosovës, dr. Ibrahim Rugova.

Mbledhjen e hapi Milazim Krasniqi, sekretar i SHSHK-së, ndërsa fjalën e rastit e mbajti shkrimtari Ramiz Kelmendi.

“Edhe një rrufe, befasisht e sidomos padrejtësisht, një rrufe krejt e pakohë e sidomos e pavend, goditi rëndë, mu në majë, mbarë letërsinë, artin, kulturën dhe kombin shqiptar: na vdiq Azem Shkreli. Mbetëm pa një poet tonin të madh, shumë të madh, nga ata dy-tre ndër më të mëdhenjtë, mbetëm pa poetin tonë të madh, shumë të madh, me aq të veçanta, që e shquanin vetëm atë, mbetëm pa Azem Shkrelin”, tha në fillim të fjalës së tij Ramiz Kelmendi.

Në vazhdim ai tha se Azem Shkreli ka qenë “gjithmonë befasues për të mirë në ato bëma të tij aq të çmuara, tek na befasoi së pari me romanin ‘Karvani i bardhë’, kur s’ish ende as 23 vjeç, gati aq sa edhe Jeronim de Rada kur botoi veprën e parë të letërsisë sonë artistike, ‘Milosaon’, befasues me ‘Bulëzat’ dhe me ‘Engjëjt e rrugëve’, befasus me ‘E di një fjalë prej guri’ dhe ‘Nga bibla e heshtjes’, befasues me ‘Fosilet’, me ‘Varrin e qyqes’, me ‘Këngën e hutinit’, me ‘Pagëzimin e fjalës’, me ‘Natën e papagajve’, me ‘Murin e shqipeve’, befasues në mënyrë të veçantë dhe tashti më së shumti me vëllimin e tij të fundit ‘Lirikë me shi’, përplot perla poetike dhe versionin e ri të romanit ‘Karvani i bardhë’. . . “.

Më tutje ai tha se Azem Shkreli la pa kryer romanin e vet të vetëm “Trilogji” dhe la në dorëshkrim edhe vëllimin e vet të fundit me titull shumë sinjifikativ: “Zogj dhe gurë”.

Në mbyllje të fjalës së tij Kelmendi tha se “kur vdiste kush, Azemi pyeste gjithmonë: ‘a ka vdekur shumë, a ka vdekur pak?’ Letërsia shqiptare, kultura shqiptare, kombi shqiptar sot ka një vdekje shumë të madhe: na vdiq Azem Shkreli!

Lavdi i qoftë, prandaj, për gjithçka bëri dhe gjithçka la pas dhe borxh ia paçim për jetë të jetëve”, tha në fjalën e tij shkrimtari Ramiz Kelmendi.

Mbledhje komemorative kushtuar Azem Shkrelit u mbajt edhe në Pejë, ku morën pjesë përfaqësuesit e pushtetit lokal e të partive politike si dhe shumë miq, dashamirë e bashkëvendësish të shkrimtarit të ndjerë. Këtë mbledhje e hapi Aver Husaj, kryetar i Kuvenbdit të Komunës, ndërsa për figurën e Azem Shkrelit foli Hajdar Mekaj, kryetar i Shoqatës së Intelektualëve të Pejës. Kujtime për të ndjerin evokuan miqët e tij, Nimon Alimusaj dhe Adem Hajdaraj.

26 maj 1998

Mbrëmë në Lubeniq të Pejës u masakruan dhe u ekzekutuan para anëtarëve të familjeve së paku 8 shqiptarë

Forcat serbe – policia dhe ushtria, organizuan gjatë ditës së djeshme një prej masakrimeve më të tmerrshme kundër popullsisë civile shqiptare. Gjatë ditës djeshme janë masakruar: Zeqë Hamza (68), Brahim Hamza (64), Dërvish Hamza (51), Ymer Hamza (53), Gani Hamza (25), Rifat Hamza (24), Bashkim Hamza (23), Hysen Hamza (40) dhe Haxhi Mehmet Goga (22) nga Deçani, i cili ishte mysafir në familjen Hamza, njofton Komisioni për Informim i Degës së LDK-së dhe NKMDLNJ në Pejë. Ndërkaq forcat serbe plagosën shtatë qytetarë shqiptarë dhe keqtrajtuan në mënyra të ndryshme shumë të tjerë.

Pas masakrës së djeshme, banorët janë larguar nga Lybeniqi, Raushiqi dhe të fshatrat përreth. Një pjesë e tyre arritën në Pejë. Në Pejë janë vendosur rreth 7 mijë vetë të ikur nga rajonet e rrezikuara.

Rrëfim tronditës i babait që iu ekzekutua para syve një djalë, ndërsa dy të tjerë dhe nipi shpëtuan

Dëshmitarët flasin për një ekspeditë të tmerrshme të forcave serbe. Mehmet Goga (Cacaj), kishte shkuar në Lubeniq nga Deçani. Në një deklaratë për QIK-un ai e përshkroi se si forcat serbe i nxorrën tre djemtë e tij Haxhiun, Ardeshirin dhe Mujën dhe nipin Gëzim Shaban Huskajn për t’i pushkatuar. Në vend djali Haxhiu, ndërsa për fat të mirë tre të tjerët shpëtuan.

Ja se e përshkroi në një deklaratë për QIK-un një pjesë të aksionit të forcave serbe Mehmet Goga (Cacaj):

“Në fshatin Lubeniq jam strehuar me 12 anëtarë të familjes. Kah ora 13:15 ushtria filloi të shkrepë granata. Pas një kohe në fshat erdhën shumë policë me autobusë e me pizgaurë. Policia e ushtria e rrethuan fshatin e Lubeniqit, e pastaj pjesëtarët e forcave serbe hynë nëpër shtëpi dhe vranë e masakruar njerëzit. Burrat i nxorën jashtë dhe i pushkatuan në në prani të anëtarëve të tjerë të familjeve”.

“Pjesëtarët e forcave serbe m’i morën edhe tre djemtë e mi dhe një nip. I nxorën nga shtëpia dhe i mbështetën për muri. Pasi i mbështetën për muri u larguan dhe shtinë në drejtim të tyre me rafale me qëllim që t’i pushkatojnë. Krahas rafaleve, pashë se si të katërt djemtë që ishin në këmbë ranë për toke. Kujtova se i vranë që të katërtit. U kacafyta me ta. Policët ishin të bindur se e kryen punën e vet, prandaj ata dolën nga oborri. U afrova afër djemve që qëndronin të shtrirë. Djali i parë posa u afrova më tha: ‘Babë jam gjallë’! Edhe i dyti djalë, Muja, më tha: ‘Babë jam gjallë’. Edhe i treti tha se është gjallë. Ndërsa i katërti u mundua të thoshte se është gjallë, por ai u kthye në shpinë dhe dha shpirt – ai kishte katër plagë të rënda në zemër”, rrëfen me dhembje e tmerr z. Goga.

Ai i tha QIK-ut se në Lubeniq janë bërë masakra që s’mund të përshkruhen. “I kanë dhënë flakën shtëpive dhe i kanë bërë rrafsh me tokë. Kanë vrarë e plagosur shumë njerëz. Ata që i kanë shpëtuar masakrës në fshat dhe që kanë marrë ikën, janë qëlluar me rafale armësh, derisa ngjiteshin shpatit mbi fshatin Lubeniq.

Kam frikë se shumë prej tyre janë vrarë e plagosur”, tha z. Goga duke shtuar se fshati ka mbetur i zbrazët.

Ai tha se pas masakrimit të Lubeniqit forcat serbe shkuan në drejtim të Strellcit.

Në fund të deklaratës së tij z. Goga shtoi: “Atyre që ranë – lavdi u qoftë! Dhashtë zoti e ardhtë liria shpejt se për të po japim jetën për ta trashëguar emrin që na e kanë lënë stërgjyshërit”, tha Mehmet Goga (Cacaj).

Dje dhe sot në fshatrat e Deçanit tre të vrarë e katër të plagosur

Sot rreth orës 9:00 në qendër të Deçanit, u vra në oborrin e shtëpisë së tij Nexhat Sadri Yberhysaj, i moshës 27 vjeçare. Ky i ri u vra nga snajperistët serbë.

Ndërsa dje në fshatin Rastavicë është vrarë Zojë Selmanaj (Kuçi) e moshës 70 vjeçare.

Në Strellc të Epërm është vrarë Ismet Ukaj (22), ndërsa është plagosur Bedri Hasanmetaj.

Në Voksh janë plagosur rëndë Agim Hasan Hadërgjonaj (26), Muhamet Maxhun Hadërgjoinaj (28) dhe Bashkim Demë Mazrekaj (30)

U vra para shtëpisë së vet në Pejë Sadri Komoni

Në Pejë mbrëmë rreth orës 24,00 u vra Sadri Komoni, 65 vjeçar, duke hyrë në shtëpinë e tij që ndodhet në rrugën e kombinatit të këpucëve.

Sipas dëshmitarëve, në Sadriun kanë shtënë persona nga një veturë “Lladë” me ngjyrë të kuqe. Sadriu në atë kohë ishte duke u kthyer nga fqiu i tij.