Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

20 korrik 1995

Katër të vdekur nga moti i lig në Prizren

Katër vetë humbën dje pasdreke jetën për shkak të motit të lig që përfshiu Prizrenin me rrethinë.

Në fshatin Lubeçevë të Prizrenit vërshoi përroi i fshatit, i cili mori me vete vëllezërit Ridvan e Resul Ponika i pari 9, ndërsa i dyti 7 vjeçar, si dhe nipin e tyre Arben Shalën (7) nga Billusha, i cili ishte mysafir. Ata humbën jetën derisa po ktheheshin nga fusha për në shtëpi.

Ndërsa dje në mëngjes, humbi jetën Tahir M. Berisha (24), baba i dy fëmijëve. Tahiri ra viktimë e elektroshokut nga përçuesit e dëmtuar të rrjetit elektrik në afërsi të furrës së qytetit.

Për shkak të të reshurave, u vëshuan disa shtëpi, rrugët e qytetit u mbuluan me rërë, ndërsa në disa vende u dëmtua edhe asfalti e kalldërmi, pastaj rrjeti elektrik e telefonik, si dhe u shkktuan dëme të konsiderueshme në bujqësi.

Rrugët sot ishin të mbushura me rërë e vende-vende pati edhe shpërthime të ujërave nga kanalizimi.

 20 korrik 1998

Gjendje dramatike në Rahovec

Sot në Rahovec mbretëron një gjendje dramatike. Dëshmitarët okularë pohojnë se forcat serbe po granatojnë pa ndërprerë pjesë të tëra të qytetit. Shumë ndërtesa janë rrënuar e janë përfshirë në flakën e zjarrit, ndërsa banorët po lëvizin në drejtim të zonave më të qeta, në mënyrë që t’u shpëtojnë masakrave që u kërcënohen. Një burim i Komisionit për Informim të Degës së LDK-së në Prizren, i cilia ka arritur të depërtojë vetëm 1 kilometër larg Rahovecit, ka takuar shumë gra e fëmijë që kishin braktisur shtëpitë e tyre dhe ishin nisur në drejtim të fshatrave që nuk janë përfshirë në luftime.

Alisa Berisha (15) dhe Vileta Krasniqi (30), të cilat ishin nisur në drejtim të Prizrenit kanë pohuar se në Rahovec po luftohet pa ndërprerë qe 48 orë. Në qytet dëgjohen shpërthime të fuqishme dhe të shtëna të pandërprera. Deri tani janë rrënuar së paku 30 shtëpi, ndërsa shumica e banorëve të qytetit janë evakuuar.

Ato kanë treguar se në grupin e grave e fëmijëve që ishin nisur në drejtim të Prozrenit kishin qrenë edhe disa burra. Në mesin e tyre ishte edhe babai i Alisës, Ymer Berisha dhe Sherif Malisa nga Studençnai, të cilët ishin arrestuar nga policët serbë në postbllokun e vendosur në fshatin Landovicë.

Gjendje dramatike mbretëron edhe në fshatin Bellacerkë. Në këtë fshat, i cili dje ishte në shënjestër të armëve të rënda të forcave serbe, nuk mund të hyjë askush, por besohet se shumë banorë të tij janë vrarë e masakruar.

Një dëshmitar okular ka deklaruar se në fshat kanë mbetur trupat pa jetë të Ibrahim Popajt dhe bashkëshortes së tij, Azizes, të dy mbi 72 vjeçarë. Dyshohet se janë vrarë edhe bashkëshortet e Ismail Popajt dhe Halim Popajt.

Dëshmitarët okularë pohojnë se forcat serbe kanë marrë peng disa shqiptarë nga ky fshat. Beqir Kollari ka njoftuar se forcat serbe kanë marrë peg të afërmit e tij: Isuf, Ismet, Mejdi e Beqir Kollarin, katër vëllezërit Bekeri, Masar Ejupi, Agim Canzibaj, Mustafë Kasapi, profesori me emrin Behxhet dhe një shqiptar nga Prizreni, i paidentifikuar. Sipas dëshmitarëve ata janë marrë peng nga forcat paramilitare që i udhëheq Arkani.

Kryesia e Degës së LDK-së në Prizren bën apel që të mundësohet nxjerrja e kufomave nga fshati Bellacerkë.

Vazhdon sulmi serb në Rahovec – dyshohet se ka shumë të vrarë

Qyteti i Rahovecit është në flakë në luftën e ashpër midis forcave shqiptare dhe forcave serbe.

Forcat serbe po e sulmojnë Rahovecin nga të gjitha anët, me tanke, topa, raketa e me armë e makineri tjetër lufte.

Burimet nga Rahoveci bëjnë me dije se forcat serbe po terrorizojnë e masakrojnë popullatën civile shqiptare. Korrespondenti i “Rilindjes” nga Rahoveci i ka thënë korrespondentit të ATSH në Prishtinë se kishte parë me sytë e tij se si forcat serbe e vranë me plumba dum-dum një grua shqiptare shtatzënë, Hatixhe Hundozin (38).

E ndodhur para sulmeve e masakrave serbe, popullata shqiptare po largohet nga Rahoveci. Njoftohet se më se 20. 000 veta kanë shkuar në drejtim të Malishevës. Të ikurit thonë se në Rahovec e rrethinë ka shumë të vrarë, të masakruar e të plagosur.

Ndërkohë njoftohet se forcat serbe kanë hyrë në disa lagje të qytetit, ku kanë marrë qytetarët shqiptarë dhe i kanë lidhur nëpër shtylla të rrjetit elektrik e të telefonit, në mënyrë që të shërbejnë si mbrojtje nga sulmet e forcave të rezistencës.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Enver Maloku

 19 korrik 1993

Ndjekje e shqiptarëve nga fshatrat e Leposaviqit

Policia serbe, filloi një aksion dhune e presioni mbi shqiptarët e tri fshatrave etnike shqiptare: Bistricë e Shalës, Koshtovë e Vllahisë dhe Çabër të komunës së Leposaviqit.

Më 15 korrik, 100 policë serbë rrethuan fshatrat Koshtovë e Vllahisë dhe Bistricë e Shalës në orën 03 të mëngjesit. Deri në orën 13,00 policia bastisi 53 shtëpi (22 shtëpi në Bistricë e 31 në Koshtovë). Bastisjet u bënë nën pretekst të kërkimit të armëve dhe nën akuzë se gjoja dikush nga këto dy fshatra e ka vrarë një gjuetar serb, që ishte gjetur i vdekur në shkurt të vitit 1992.

Ndërsa sot u bastisën edhe pesë familje shqiptare në fshatin Çabër.

Komisioni i Degës së LDK-së për Informim, njofton se gjatë ekspeditës më 15 korrik, shumë persona janë lënduar rëndë nga rrahjet. Disa prej tyre kanë kërkuar ndihmën mjekësore në Mitrovicë, e shumë të tjerë po shërohen në shtëpitë e tyre. Njoftohet se janë rrahur së paku këta persona: Zeqir Hetemi, Beshir Hetemi, Nazif Musliu, Hamit, Bahri e Basri Imeri, Hajriz Aliu, Ukshin Hajdari, Behxhet e Agron Hetemi, Eset Zahiti, Halit, Sami, Abit, Afrim e Ilmi Imeri, Zenel e Rushit Aliu, Driton Hetemi, Shefki Musliu, Hamide Mustafa dhe Nezir Aliu, të gjithë nga Bistrica e Shalës, ndërsa në Koshtovë të Vllahisë u rrahën: Hasan Hasani, Islam Asllani, Avdi e Bekë Bekteshi, Bashki Fetahu, Behram Asllani, Ahmet Musa, Shukrie Asllani, Hasan e Rrustem Bekteshi, Sokol Fetahu, Naim Murseli, Zahir e Hazir Bekteshi, Ukshin Fetahu dhe Rifat Hasani.

Gjatë bastisjeve, policët u thanë shqiptarëve: “Ikni në Shqipëri, ose do t’u vrasim të gjithëve”!

Fshatrat shqiptare: Koshtovë e Vllahisë, Bistricë e Shalës dhe Çabër, bëjnë pjesë në komunën e Leposaviqit, ku shumica e popullsisë është serbe, mirëpo fshatrat nga drejtimi i Mitrovicës lidhen me fshatra shqiptare.

Përpos aksioneve të policisë serbe, patrullimit nëpër fshatra, të kontrollit të rreptë nëpër rrugët që shpiejnë në këto fshatra, njoftohet se në fshatin Komenicë që banohet me serbë dhe që gjendet përballë fshatit Koshtovë e Vllahisë, grupe serbësh po mblidhen e po lëvizin në drejtim të Koshtovës, duke shtënë me armë.

Nga fshati Çabër, njoftohet se shumë fshatarë i kanë larguar fëmijët, gratë e pleqt nga fshati, nga frika se mund të pasojnë aksione të forcave serbe kundër shqiptarëve.

19 korrik 1994

Nesër fillon një proces i ri i montuar politik në Prishtinë

Për nesër në orën dhjetë serbët e istaluar në Gjykatën e Qarkut në Prishtinë kanë paralajmëruar fillimin e një procesi të ri politik kundër:

Fehmi Lestranit (1973) nga fshati Baicë e Gllogovcit, Shkëlzen Bajramit (1973) nga Korretica e Ulët e Gllogovcit, Nexhmedin Sadriut (1963) nga Davidoci i Shtimjes, Luan Hetës (1971) nga Varoshi i Ferizajit, Beqir Mulecit (1956) nga Tërsteniku i Gllogovcit, Hysni Francës (1972) nga Tërsteniku i Gllogocvcit dhe Bajram Gallopenit (1972) nga Dobërçani i Lipjanit.

Këta persona janë arrestuar gjatë shkurtit, marsit dhe prillit të këtij viti, nën akuzën e rrejshme se gjoja kanë stërvitur ushtarakisht në një kazermë ushtarake të Shqipërisë.

Njëri prej mbrojtësve, Fazli Balaj, tha se këta persona, shumica prej tyre të rinj, akuzohen rrejshëm se:”Gjatë gjysmës së dytë të vitit 1992 dhe gjatë vitit 1993, në Republikën e Shqipërisë, bashk me persona të tjerë kanë përgatitur dhe ndërmarrë veprime me qëllim të ushtrimit që me përdorimin e forcës të shkëpusin krahinën e Kosovës dhe pjesë të tjera të territorit të RF të Jugosllavisë të banuara me shqiptarë dhe të formojnë shtet të veçantë ose që ato t’ia bashkojnë Shqipërisë… ashtu që me iniciativën dhe në organizimin e qeverisë ilegale të Republikës së Kosovës, të kreysuar nga Bujar Bukoshi. pastaj nga Ali Aliu, Mehmet Kraja dhe Zymber Berisha – përfaqësues në Përfaqësinë e Republikës së Kosovës në Tiranë, kanë marrë pjesë në ushtrime për kundërspiunazh në Laç, kanë bërë ushtrime shumëmuajshe nën udhëheqjen e oficerëve të Shqipërisë në kazermën Labinot Fushë afër Elbasanit…prandaj kanë bërë veprën penale rrezikimi i tërësisë territoriale, nga neni 116, paragrafi 1 që ndëshkohet sipas nenit 138 të LP të Jugosllavisë”.

Pra, siç shihet kjo është një akuzë e stërpërsëritur e serbëve të instaluar në prokuroritë e gjykatat e Kosovës.

Mbrojtësit e këtyre shtatë të akuzuarëve gjatë muajve të kaluar kanë njoftuar opinionin për torturat që i kanë bërë inspektorët e sigurimit serb ndaj këtyre shqiptarëve, me qëllim të nxjerrjes prej tyre të deklaratave të rrejshme që do të provonin aktakuzën e parapërgatitur.

Mbrojtësit dhe anëtarët e familjeve të të arrestuarëve kanë njoftuar shumë herë deri më tash se këta të rinj ishin gjendur në Shqipëri duke ikur nga fati i luftës në ish-republikat jugosllave, ose duke ikur nga rekrutimi në ushtrinë serbe, e edhe në rrugë për në vendet e perëndimit për të siguruar kafshatën e bukës.

Pas bredhjeve nëpër Shqipëri, disa prej tyre ishin strehuar përkohësisht në kamp, ndërsa më vonë u kthyen në Kosovë, pasi nuk mundën të udhëtonin nëpër vendet e perëndimit.

Pas kthimit në Kosovë, ata u arrestuan dhe u torturuan një kohë të gjatë.

19 korrik 1995

Agjencitë e huaja rreth procesit të montuar politik kundër 72 ish-policëve të Kosovës

Shqiptimit të dënimeve në procesin e montuar politik kundër 72 ish-policëve shqiptarë të Kosovës, rëndësi të veçantë i kushtuan edhe agjencitë e huaja të lajmeve.

Kështu, agjencia gjermane DPA, lidhur me këtë proces të montuar politik, në raportin e saj thekson: “Të hënën, gjykata serbe dënoi 72 ish-policë shqiptarë me 230 vjet burg. Të dënuarit janë akuzuar për përpjekje të formimit të Ministrisë së Punëve të Brendshme në Kosovën e sunduar nga serbët”. DPA më tej thekson se “me rrënimin e autonomisë së Kosovës nga ana e Millosheviqit, Beogradi në Kosovë sundon me ligje të jashtëzakonshme dhe me forca të shtuara policore e ushtarake.

Ndërkaq, agjencia amerikane e lajmeve, lidhur me procesin e montuar politik dhe dënimin e 72 ish-policëve njofton se “në vitin 1991 u larguan nga puna 3.500 policë shqiptarë dhe se ndaj shqiptarëve po udhëhiqet një politikë e ndjekjes dhe represionit të përditshëm”.

Agjencia franceze AFP, në raportin e saj lidhur me gjykimin e ish-policëve shqiptarë, thekson se “11 policët që janë arratisur, gjyqi serb i dënoi me burg në mungesë”. Duke iu referuar të dhënave të KMDLNJ-së, AFP shton se gjatë pesë vjetëve të fundit, nga gjyqet serbe janë dënuar qindra shqiptarë nën akuzën për veprimtari seperatiste dhe në këtë mënyrë qeveria serbe që nga viti 1989, është duke shtypur lëvizjen për pavarësi të Kosovës”, përfundon AFP raportin e saj.

Rëndësi të veçantë këtij procesi të montuar politik i kushtoi edhe agjencia angleze “Rojter”, e cila në raportin e saj thekson se “ish-policët shqiptarë kanë formuar organizatën e tyre sindikale, por nuk kanë formuar kurrfarë njësiti policor, ndërsa ish-policët shqiptarë u janë nënshtruar torturave gjatë procesit të hetimeve”.

19 korrik 1997

Ambasada Amerikane i quan jobindëse faktet në gjykimin e Prishtinës

Ambasada amerikane në Beograd lëshoi dje këtë kumtesë për shtyp, në të cilën thuhet: “Ambasada amerikane ka përcjellur gjykimin e grupit të 15 shqiptarëve të Kosovës të akuzuar për aksionet terroriste, i cili përfundoi më 11 korrik në Prishitnë. Gjatë këtij gjykimi u vunë re shumë parregullsi: duket se gjykata serbe nuk respektoi procedurën e saj gjyqësore, faktet nuk ishin bindëse, të akuzuarve iu pamundësua të kenë kontakte me avokatët. Neve më së shumti na shqetëson thënia se në fazat që i paraprinë gjykimit, të akuzuarit përjetuan torturë dhe se këto thënie gjyqi nuk i shqyrtoi me kujdes.

Qeverinë amerikane edhe më tutje e shqetëson problemi i terrorizimit, si dhe kërcënimi që ai e paraqet për zgjidhjen e çështjes së Kosovës. Pajitmi në Kosovë mund të arrihet vetëm në bazë të respektimit të plotë të të drejtave të njeriut. Standardet e gyjqit janë pjesë e këtyre të drejtave dhe ne i bëjmë thirrje pushtetit serb që t’i respektojë deri në maksimum standardet e të drejtave të njeriut, në mënyrë që të cysë procesin e pajtimit – thuhet në kumtesën e Ambasadës amerikane në Beograd.

19 korrik 1998

Përpjekje për atentat kundër përgjegjësit të Qendrës për Informim të Kosovës

Mbrëmë në orën 21:00 u bë një tentim atentati kundër shefit të Qendrës për Informim të Kosovës (QIK), Enver Malokut. Atentatori, pa thënë asnjë fjalë, shtiu me revole dhe shkrehu një plumb në drejtim të z. Maloku derisa ky po hynte në banesën e tij në Kodër të Diellit në Prishtinë, mirëpo për fat të mirë, plumbi nuk e qëlloi.

1. Maloku tha se derisa po ecte drejt hyrjes së banesës kishte parë tek po zbrisnin shkallëve të korridorit nga katet e epërme dy persona, njëri prej të cilëve tentoi të bënte atentat. Kur arriti në hyrje të banesës, atentatori shtiu me revole në drejtim të z. Maloku, i cili po zbriste shkallëve drejt banesës së vet që gjendet në pozicion përdhes të ndërtesës. Z. Maloku tha se atentatori shtiu me armën e maskuar në një thes apo qese ngjyrë të bardhë.

Mirëpo, edhepse distanca ishte vetëm dy metra, për fat të mirë plumbi huqi cakun, pasi qëlloi grilën e hekurt të parmakut të shkallëve.

Atentatori u bë gati të shtinte edhe një herë, por reagimi me fjalë i z. Maloku, rrethanat që instiktivisht mund t’i jenë dukur atentatorit të disfavorshme për të vazhduar me krimin, apo diç krejt e tretë e pashpjegueshme, mund të kenë bërë që atentatori të largohet nga blloku i banesave dhe të ikën në drejtim të panjohur.

1. Maloku tha se në vendin ku u tentua të bëhej atentati, u gjet gëzhoja e plumbit 7,65 mm. Një gjurmë e plumbit ka mbetur në shufrën e parmakut dhe në murin e betontë të shkallëve.
2. Maloku tha se atentatori kishte trup mesatar. Në pjesën e epërme kishte të veshur një bluzë të gjerë ngjyrë të mbyllur. Në kokë kishte një kapelë.

Krisma e revoles u dëgjua në banesë dhe në ndërtesat përreth, duke shkaktuar shqetësim në mesin e banorëve.

Në këtë pjesë të Bregut të Diellit janë kryer deri më tash disa krime serbe, duke përfshirë edhe vrasjen kriminale të studentit Armend Daci. Duket se atentatori kishte planifikuar ta kryente krimin në hyrje të banesës me qëllim të tmerrimit të familjes Maloku dhe rrethinës.

Një dëshmitar tha se kishte parë më herët së paku dy persona që e mbanin nën vëzhgim dhe nën kontroll pjesën përreth banesës ku u tentua të bëhej atentati. Njëri prej tyre ishte serb.

Dy rë vrarë në Budakovë të Suharekës

Mbrëmë dhe parmbrëmë forcat serbe granatuan fshatrat Budakovë e Krushicë të Suharekës.

KI i Degës së LDK-së në Suharekë njofton se parmbrëmë, gjatë granatimit të fshatit Budakovë, rreth orës 23 u vra vajza 12- vjeçe Raza Reshat Palushi, e cila u qëllua në oborrin e shtëpisë së saj.

Ndërsa mbrëmë, forcat serbe granatuan fshatin Krushicë dhe lagjet e Hoxhëve dhe të Buzhalëve në Budakovë, me ç’rast u vra Bujar Jahir Buzhala (19).

Sot që nga orët e paradites ka të shtëna të shumta nga snajperistët serbë.

Dihet për tre shqiptarë të vrarë në Rahovec

Në Rahovec janë vrarë së paku tre qytetarë shqiptarë, njofton KI i Degës së LDK-së në Malishevë, duke cituar burime të sigurta nga Rahoveci.

Është vrarë Ibrahim Cena, i cili edhe është varrosur, dhe dy qytetarë të tjerë emrat e të cilëve nuk dihen.

Në fshatin Vërshec është vrarë djali 17 vjeçar i Habib Vuniqit

Për shkak të bllokimit të plotë të fshatit Vërshevc të Lipjanit nga forca të mëdha të ushtrisë dhe policisë serbe në edicionin e tretë të QIK-ut duke u mbështetur në një dëshmitar të asaj ane kemi publikuar se dje nga granatimet serbe është vrarë një djalosh 16 vjeçar i familjes Dulahu dhe është plagosur babai i tij.

Mirëpo, në një informacion tjetër që morëm më vonë nga Komisioni për Informim i Degës së LDK-së në Lipjan nuk verifikohej lajmi se është vrarë ndonjë anëtar i familjes Dulahu, por megjithatë thuhej se nga granatimet e forcave serbe është dëmtuar rëndë shitorja e Muharrem Dulahut.

Në të vërtetë Komisioni për Informim i kësaj dege njofton se nga granatimet e djeshme në fshatin Vërshec është vrarë djali 17 vjeçar i Habib Vuniqit dhe dyshohet të jetë plagosur rëndë edhe një vajzë. Po ky njoftim mbështetet në dëshmitë e disa banorëve të Vërshecit të cilët kanë arritur të depërtojnë disi në Lipjan, ndonëse edhe ata nuk kanë mundur t’i thonë emrat e plotë të të vrarit dhe të vajzës së plagosur.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Luftë nëpër rrugë – Rahoveci sot

 18 korrik 1994

Një grup serbësh rrahën më 14 korrik së paku 15 shqiptarë në Fushë të Kosovës 

Kryesia e Nëndegës së LDK-së në Fushë Kosovë njoftoi sot se më 14 korrik, pak pas orës 20;15 disa persona civilë serbë, pa kurrëfarë shkasi rrahën sëpaku 15 shqiptarë që po shetisnin në atë kohë.

Njoftohet se rrahja zgjati rreth 30 min. ndërsa ajo u organizua dhe u ekzekutua nga disa policë serbë që në ato momente ishin pa uniformë.

Njëri prej të rrahurve, i riu Rrahim Tërholli (1975) nga Fushë Kosova i dërgua në spital, por mjekët serbë nuk i dhanë ndihmë.

Nëndega e LDK-së në Fushë të Kosovës ka identifikuar deri më tash këta të rrahur: Ramadan Blakçori (1976), Rrahim Tërholli (1975), Ismet Pireva (1973), Afrim Ismaili (1973), Ahmet Zogiani (1951), Feride Zogiani (1956), Zojë Osmani (1973), Feti Osmani (1954), Drita Osmani (1969), Zija Selimi (1975), Rabije Osmani (1958), Ismet Avdiu (1955), Nazmie Avdiu (1932), Fatmir Avdiu (1971), Hamdi Lahu (1969), që të gjithë nga Fushë Kosova.

Dy orë më vonë policia serbe doli në vendin ku u rrahën shqiptarët dhe nisi fushatën e arrestimeve të të gjithë atyre që njëherë ishin rrahur nga policët e civilët serbë.

Afrim Ismajli dhe Ismet Pireva u mbajtën në polici deri në orën 03:00. Policia u tha atyre se shqiptarët e rrahur kishin dalur në rrugë gjojë për të kremtuar mbajtjen e suksesshme të Kuvendit II zgjedhor të LDK-së. Ata treguan se gjatë marrjes në pyetje ishin ofenduar nga policët serbë.

Dëshmitarët thonë se Nazmije Avdiu (1932), derisa po qëndronte para shtëpisë së saj, u rrah nga njëfarë Milovanoviqi i mbathur me çizme ushtarake.

Sipas disa dëshmitarëve, si akterë kryesor në këtë rahje ishin Dragan Radulloviq, Pera Millovanoviq – polic me rroba civile, Dragan Llakusheviq, Marko kovaqeviq – i punësuar në postën e Fushë Kosovës, Radulle Radojqiq, e tjerë.

Vlen të përkujtohet në fund se jo shumë larg vendit ku u rrahën këta shqiptarë, po mbahej Kuvendi II zgjedhor i LDK-së.

18 korrik 1995

Dhuna e përditshme në Kosovë

Gllogoc: – Më 17 korrik, sipas thirrjes së policisë u paraqit Rifat Bilalli, arsimtar nga Tërsteniku i Gllogocit. Gjatë kohës sa ai u mbajt në polici, u pyet rreth aktivitetit të tij politik në LDK. Njoftohet se ai është keqtrajtuar fizikisht në stacionin e policisë në Gllogoc, ndërsa u lirua me porosinë e policisë se do të thirret sërish.

Vushtrri: – Më 1 korrik, policia me pretekst të kërkimit të armëve, ishte në shtëpinë e Niman Sadikut (61) në rr. “Sh.Galica” në Vushtrri

Skënderaj: – Më 7 korrik, policia serbe e postkomandës së Runikut, me pretekst të kërkimit të armëve mori në shtëpinë e tyre Musli dhe Shaban Latifin nga Kllodernica e Skënderajt. Ata janë keqtrajtuar rëndë dhe janë urdhëruar që të paraqiten sërish në polici më 10 korrik.

Më 16 korrik, polcia serbe ishte në fshatin Brojë dhe nga disa fshatarë kërkoi që t’ua tregojnë shtëpinë e Hashim Thaçit mësimdhënës i historisë. Njoftohet se policia njërin nga fshatarët e keqtrajtoi fizikisht pse nuk diti t’ua tregojë shtëpinë e tij, ndërsa bëhet me dije se Hashim Thaçi tash një kohë jeton në Perëndim.

Më 11 korrik, tre policë serbë, në autobusin që qarkullonte në relacionin Skënderaj-Banjë, morën Naser Zekajn (1969). Ai me pretekst të kërkimit të armës u dërgua në postkomandën e policisë në Runik ku u mbajt rreth 3 orë dhe u keqtrajtua rëndë. Ai është urdhëruar që edhe sot të paraqitet në polici. Njoftohet se Naser Zekaj ka pësuar lëndime trupore.

Prizren: – Komisioni për Informim i Nëndegës së LDK-së në Dushanovë, njofton se policia serbe me pretekst të kërkimit të armëve nga 14 korriku bastisi dhjetë familje shqiptare.

Më 15 korrik, policia bastisi shëpitë e Azem e Skënder Çollakut, Rexhep Ndrecajt dhe Latif Morinës, ndërsa në pyetje për të njëjtin pretekst u mor Faik Çollaku, Ramiz Bytyçi dhe Bahti Hoxha. Po këtë ditë në shtëpinë e tij u mor edhe Mehdi Balaj nga Prizreni. Atij iu la thirrja që të paraqitet sërish sot në polici.

Ndërkaq dje në organet e policisë është keqtrajtuar rëndë Osman Hodaj nga Gjonaj i Prizrenit. Ai është marrë në orët e mbrëmjes me të njejtin pretekst, ndërsa ende nuk është liruar.

 18 korrik 1997

Policia serbe pengon korrje-shirjet në Panorc të Malishevës

Pardje, në fshatin Panorc, njëfar Ceroviçi, zëvendëskomandant i policisë serbe në Rahovec, iu kërcënua autokombajnerit Sheremet Ibrahimi, që t’i ndërprejë korrje-shirjet, pasi ai nuk ka marrë lejen nga organet e instaluara serbe në Rahovec, njofton KI i Degës së LDK-së në Malishevë.

Ibrahimi u urdhërua që të paraqitet sot në stacionin e policisë serbe në Rahovec.

18 korrik 1998

Mbrëmë dhe sot luftë nëpër rrugët e Rahovecit

Dje në orën 17:30, forcat serbe provokuan një konflikt masiv në qytetin e Rahovecit. Në këtë kohë është gjetur një kufomë e paidentifikuar te vendi i quajtur Rrasat, në hyrje të Rahovecit te udhëkryqi për në Malishevë. Një patrullë e policisë, duke shkuar në drejtim të vendit ku ishte parë kufoma, provokoi njerëzit duke shtënë me armë. Krismat e armëve dhe shkëmbimi i zjarrit është përhapur në krejt qytetin dhe ka zgjatur deri në orën 23:00. Mbrëmë në orën 21:00 është ndërprerë rryma elektrike.

Banorët e Rahovecit i thanë QIK-ut se sot në mëngjes përsëri ka të shtëna të shumta me armë në pjesë të ndryshme të qytetit, ndërsa njerëzit janë strehuar nëpër bodrume.

Dëshmitarët e përshkruajnë gjendjen në këtë qytet si gjendje lufte nëpër rrugë. Deri më tash nuk ka të dhëna për të vrarë e të plagosur.

Komuna e Rahovecit ka rreth 60. 000 banorë, ndërsa 92% e popullsisë janë shqiptarë. Vetë qyteti ka 20 000 banorë. Shqiptarët përbëjnë mbi 80% të popullsisë së tij.

Në Zym të Opojës u vra Hashim Ejupi

Gjatë sulmit të mbrëmshëm serb mbi fshatin Zym të Opojës u vra i riu Hashim Halit Ejupi (19) nga ky fshat.

Ai u qëllua për vdekje nga forcat ushtarake serbe, derisa po qëndronte në ballkonin e shtëpisë së tij, rreth orës 22. 30.

KI i Degës së LDK-së në Dragash njofton se gjatë sulmit që zgjati rreth dy orë me predha u qëlluan dhe u dëmtuan shumë shtëpi.

Pas sulmit, gjatë orëve të natës, banorët e fshatit Zym u larguan nga shtëpitë e tyre dhe u vendosën në fshatra të tjera.

Fsahati vazhdon të mbahet në rrethim të plotë nga forcat serbe, të cilat janë vendosur edhe në varreza, ku kanë hapur llogore.

Për këtë shkak, tash për tash nuk dihet ku e kur do të bëhet varrimi i djaloshit të vrarë.

Në tërë rrethin e Opojës, ku ditëve të fundit janë stacionuar forca të mëdha policoro-ushtarake, është mjaft e rëndë.

Gjendje dramatike në kufirin Shqipëri – Kosovë, së paku 30 shqiptarë u plagosën nga granatat serbe që ranë në territorin e Shqipërisë

Ministria e punëve të brendshme e Shqipërisë ka njoftuar se prej orës 02 pas mesnatës deri sot në mesditë disa granata të shkrepura nga forcat serbe kanë rënë në territorin e Shqipërisë, duke plagosur 19 vetë. Në njoftim nuk saktësohet se a bëhet fjalë për refugjatë nga Kosova. Të plagosurit janë bartur me helikopter në Tiranë.

Ndërsa Përfaqësia e Republikës së Kosovës në Tiranë, duke iu referuar burimeve të spitalit në Bajram Curr, tha se janë plagosur së paku 30 shqiptarë. Disa njoftime, të peverifikuara, flasin për një numër edhe më të madh të të plagosurve.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Gostivari

 17 korrik 1995

Ish-policët e Kosovës u dënuan në Prishtinë me 230 vjet e gjysmë burg

Gjykatësit e instaluar serbë në Gjykatën e Qarkut në Prishtinë e përfunduan sot procesin e madh të montuar politik kubndër ish-policëve të Kosovës duke u shqiptuar atyre dënime të rënda me shumë vite burg.

Me aktgjykimin e shpallur nga kryetari i trupit gjykues serb Dragolub Zdravkoviq sot në orën 13:00 në sallën solemne të ndërtesës së Kuvendit të pushtuar të Kosovës, u shqiptuan mbi 206 vite burg.

Me këtë aktgjykim u dënuan:

Avdi Mehmedoviqi 7,6 muaj, Jonuz Tërstena 8, (ndodhet në arrati), Sherif Krasniqi 6,6 (në arrati), Sheremet Ahmeti 6,6, Hajrullah Tërnava 6,6 (në arrati), Fadil Krasniqi 6,6 (në arrati), Blerim Olloni 6, Hizer Ahmeti 3, Ejup Kamerolli 3, Murat Sahiti 2, Afrim Karaxha 1,6, Hakif Latifi 2, Ramadan Ferizi 1,6, Hilmi Sylejmani 2, Arsim Mehmeti 2, Bajram Munishi 1,6, Destan Thaçi 5,6, Vesel Rexhepi 3, Idriz Jashari 3, Hasan Abdyli 1,6, Bejtullah Alidema 2, Haki Mehmeti (u lirua nga aktakuza), Fadil Hyseni 6, Bajram Jakaj (procedura është veçuar për shkak të gjendjes së rëndë shëndetësore), Fadil Berisha 1,6, Izet Ymeri 2,6, Isak Aliu 3, Enver Hakiu 1,6, Sylejman Berisha 1, Ramiz Hoxha 3, Fekir Tahiri 2,6 (në arrati), Reshat Maliqi 6, Adem Dylahu 5 (në arrati), Rexhep Kamenica 5 (në arrati), Kemajl Aliu 3, Bajram Berisha 3,6, Izet Azizi 5 (në arrati), Tahir Çaka, 4, Sali Bruti 3,6, Fahredin Mehmeti 2, Ilaz Gashi 1,6, Sejdi Ademi 1,6, Agim Gashi 1,6, Aqif Berisha 1,6, Muhamet Hajdari 1,6, Qazim Omura 1,6, Rexhep Aziri 1,6, Sejfullah Sahatçiu 6, Faton Zhubi 3, Fleurat Macula 3, Bedri Juniku 2, Lah Lahu 3 (në arrati), Shaban Hajredini 3 (në arrati), Shefqet Beqaj 6, Xhafit Osmani 3, Xhafer Sahatqiu 2,6, Muhamet Nimani 3, Remzi Tetrica 3,6, Zekë Bekaj 2,6, Tahir Bezhani 2, Bibë Biblekaj 2,6, Zenel Rama 1,6, Selim Çitaku 4, Zejnullah Shala 4, Enver Maxhuni 3, Afrim Olloni (u lirua nga aktakuza), Bedri Tahiri 6 (në arrati), Jonuz Loshaj 6, Hamid Peci 3, Abdyl Doroci 4, Shefqet Budakova 3 dhe Shahin Behrami 1,6 muaj.

Prej 72 të akuzuarëve, 11 ishin në arrati, ndërsa kundër Bajram Jakajt u veçua procedura gjyqësore për shkak të gjendjes së rëndë shëndetësore, ndërsa dy vetë u liruan nga aktakuza.

Me vendimin e trupit gjykues serb në paraburgim mbetën 9 ish-policë të Kosovës: Avdi Mehmedoviqi, Sheremet Ahmeti, Blerim Olloni, Destan Thaçi, Fadil Hyseni, Reshat Maliqi, Sejfulla Sahatçiu, Shefqet Beçaj dhe Jonuz Loshaj, ndërsa 49 ish-policë të Kosovës u liruan nga paraburgimi deri në vendimin e plotëfuqishëm të instancave më të larta gjyqësore serbe.

Siç dihet procesi i montuar politik në Prishtinë filloi më 29 maj të këtij viti.

Qindra ish-policë të Kosovës u arrestuan prej nëntorit të vitit të kaluar, nën akuzë se gjoja kanë formuar Ministrinë e Punëve të Brendshme të Republikës së Kosovës.

Për disa muaj, ata janë torturuar me qëllim që prej tyre të nxirren deklarata të rrejshme.

Për torturimin e ish-policëve të Kosovës janë njoftuar dhe kanë reaguar edhe shumë asociacione ndërkombëtare.

Në proceset e deritashme të montuara politike në Pejë, Gjilan, Prizren e Prishtinë, ish-policët e Kosovës hodhën poshtë aktakuzën serbe dhe rrëfyen në hollësi për torturimin e egër e sistematik që u është bërë gjatë mbajtjes nën hetuesi e paraburgim. Disa prej ish-policëve të Kosovës rrëfyen se kishin vepruar vetëm si sindikalistë.

Në proceset në Pejë e Gjilan, ish-policët e Kosovës janë dënuar me shumë vite burg.

Regjimi serb vlerëson se me shqiptimin e dënimeve të rënda mund të argumentohet gjoja fajësia e ish-policëve të Kosovës.

Pala shqiptare vlerëson se me arrestimet, torturimin dhe dënimet e rënda, regjimi serb synon të fikësojë shqiptarët, të dëmtojë deri në shkatërrim organizatat sindikale e politike shqiptare dhe të testojë qëndrimin e bashkësisë ndërkombëtare ndaj veprimeve të regjimit serb dhe ndaj politikës së udhëheqjes së Kosovës.

 17 korrik 1997

Policia maqedonase arreston e rrëmben shqiptarët

Pas ngjarjeve tragjike në Gostivar, dje në Gostivar sikur vërehej një gjallëri më e madhe nëpër rrugë. Policia është tërhequr në periferi, ndonjë autoblindë është postuar në afërsi të gjimnazit, kurse patrullat policore nuk bëjnë legjitimim rigoroz të qytetarëve. Kuvendi i komunës ka filluar të punojë, zyrtarët e njësive rajonale të ministrive janë të pranishëm, por Këshilli Komunal nuk punon nga shkaku se mungon kryetari, Rufi Osmani, i cili siç dihet, është në paraburgim në burgun “Shuto-Orizare” të Shkupit. Objekti i Kuvendit po riparohet pas demolimit nga forcat policore, kurse para objektit nuk ka ndonjë sforcim të pozitave policore, thuhet në fillim të raportit të “Bujkut”.

Siç merret vesh nga avokati i kryetarit Rufi Osmani, Nexhat Mehmeti, i cili dje ka kontaktuar me të parabrugosruin, organet e sigurimit kryesisht nuk e kanë maltretuar kryetarin e Gostivarit dhe ai dje është takuar edhe me bashkëshorten e tij, kur komunikimi në gjunën shqipe është bërë nëpërmjet përkthimit.

Në spitalin e Gostivarit ka ngelur një numër i vogël pacientësh që shërohen nga lëndimet, kurse merret vesh që i lënduari rëndë, shtetasi i Shqipërisë, quhet Astrit Loçi.

Parmbrëmë në Tetovë sërish u vërejtën përforcime të pjesëtarëve të njësive speciale policore në të gjitha hyrjet për në qytet, në udhëkryet më kryesore, si dhe para disa objektve më të rëndësishme shtetërore. Kthimi i këtyre forcave policore i befasoi qytearët e këtushëm, për shkak se nuk shihnin ndonjë pretekst për këtë. Mirëpo, çdo gjë ishte e qartë kur u mor njoftimi për arrestimin e pesë aktivistëve dhe funksionarëve të PDSH-së dhe të Rinisë Demokratike nga organet e sigurimit të Njësive rajonale të MPB-së, dy prej të cilëve u dërguan në drejtim të panjohur.

Përderisa para objektit të KK të Tetovës dje u hoq edhe flamuri i shtetit maqedonas, në komunën e Bogovinës, nja dhjetë kilometra larg Tetovës, edhe më tej para objektit të kësaj komune po valon flamuri shqiptar dhe atë nuk do ta heqë asnjë shqiptar. Flamuri shqiptar, sipas informacioneve të deritashme, po valon edhe para objektit të komunës së Tearcës.

Në shënjestër të policisë maqedonase janë veprimtarët e PDSH-së, të cilët rrëmbehen nga rruga ose arrestohen nga shtëpitë e tyre pa asnjë vërtetim për fletarrestim.

Pas i paraqitën sipas ftesave për të ashtuquajturat biseda informative në policinë e Tetovës, në arrest po mbahen sekretari i Degës së PDSH-së në Tetovë Zeqeria Rexhepi, nënkryetari i Rinisë Demokratike të PDSH Arsim Sinani, kryetari i nëndegës së PDSH-së në Reçicë të Vogël Servet Ceka, anëtari i Kuvendit Qendror të Rinisë Demokratike Arben Isaku dhe veprimtari i Rinisë Demokratike, Gazmend Etemi, thuhet ndër të tjera në raportin e “Bujkut”.

 17 korrik 1998

Ferizaj: Policia serbe vra parmbrëmë Nazmi Ukësmajlin

Parmbrëmë rreth 1, në vendin e quajtur Bashkimi i lumenjve në hyrje të fshatit Jezerc policia serbe vrau Nazmi Xhemshir Ukësmajlin (30) nga Jezerci.

KI i Degës së LDK-së në Ferizaj njofton se ai u vra në momentin kur u afrua pranë një barrikade të vendosur nga policia serbe.