Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Ish-rektori i UP, dr. Ejup Statovci

 29 qershor 1993

Shtypi gjerman rreth diskriminimit racial në Kosovë

Agjencia gjermane DPA, sot në një raport nga Prishtina, njofton për ashpërsimin e masave kundër shqiptarëve në Kosovë. Kjo agjenci, njofton se dënimi i autotransportuesve shqiptarë, kryesisht bëhet për shkak të synimit të regjimit serb për të penguar furnizimin me mallëra për nevojat jetësore të shqiptarëve, të cilët janë të rrezikuar në çdo pikëpamje. Kosova, e cila banohet kryesisht nga shqiptarët, po sundohet përmes dhunës policore dhe ushtarake serbe që nga rrënimi i autonomisë së saj. Në punë të kolonizimit të Kosovës dhe me qëllim të ndërrimit të strukturës së saj etnike, është angazhuar edhe kisha ortodokse serbe, e cila stimulon natalitetin serb në Kosovë.

Gazeta e njohur “Frankfurter Allgemeine”, po ashtu shkruan se janë shpikur forma të ndrushme të plaçkitjes së shqiptarëve, siç është rasti me tarifën e veçantë doganore, sipas së cilës pronarët shqiptarë të kamionëve dënohen me nga 500 marka gjermane.

29 qershor 1994

Forcat serbe ndërhynë në Universitetin e Prishtinës dhe morën në pyetje drejtuesit e tij

Forcat serbe ndërhynë dje rreth orës 11:30 në Rektoratin e Universitetit të Prishtines, ndërprenë mbledhjen e Senatit të UP-së dhe morën në polici për rreth tri orë rektorin Statovci, kryetarin e Senatit të UP-së dr. Fadil Berishën dhe sekretarin e UP-së Destan Halimin.

Siç njofton sot Rektorati i UP-së, kur ndërhynë forcat serbe, në Rektorat po mbahej mbledhja e Senatit të UP-së.

Mbledhja kishte në rend të ditës shpalljen e zgjedhjeve në Universitet për rektor, për anëtarë të Senatit, për dekanë nëpër fakultete dhe për drejtorë në shollat e larta, në bazë të Dekretligjit mbi shkollimin e lartë, të aprovuar Qnga Qeveria e Republikës së Kosovës më 22 qershor 1994 dhe që ka hyrë në fuqi të njëjtën ditë.

Forcat serbe legjitimuan pjesëmarrësit e mbledhjes dhe bastisën lokalet e Rektoratit, morën dokumentacionin dhe kopjet e Dekretligjit mbi shkollimin e lartë që ishin bërë gati për t’iu shpërndarë fakulteteve dhe shkollave të larta, si edhe materiale të tjera.

Policia dërgoi në stacion rektorin Statovci, kryetarin e Senatit dr. Fadil Berishën dhe sekretarin e UP-së Destan Halimin.

Këta u mbajtën dhe u morën në pyetje prej dy deri në tri orë.

Policisë i interesonte puna përfundimtare rreth Dekretligjit mbi shkollimin e lartë, për aprovimin e tij nga Qeveria e Kosovës dhe për mënyrën e komunikimit me Qeverinë dhe personat që e bëjnë këtë. Policia interesohej edhe për bazën juridike të Dekretligjit e për zbatimin e tij, për atë se përse bëhen dhe si bëhen tash zgjedhjet në UP dhe me çka dallohen këto zgjedhje me ato të mëparshmet.

Drejtuesit e UP-së u pyetën edhe për qëllimin e mbledhjes së Senatit të UP-së dhe për punën e këtij senati tash.

Pas marrjes në pyetje ata u liruan, por rektori Statovci u paraqit sot në polici në orën 8:00 në bazë të urdhërit që iu dha dje.

Rektori u mor në pyetje rreth një orë për çështjet që ishte marrë në pyetje edhe ditën e djeshme.

Në kumtesën e Rektoratit të UP-së të shpallur sot thuhet se qëllimi i ndërhyrjes së djeshme ishte pengimi i punës së UP-së dhe frikësimi i mësimdhënësve e studentëve.

Universiteti i Prishtinës, thuhet në kumtesë, si edhe deri më tash do ta vazhdojë punën e vet me vendosmëri dhe me bazë të re, të krijuar me nxjerrjen e Dekretligjit mbi shkollimin e lartë.

Ndërhyrja e djeshme e forcave serbe kundër UP-së është e dyta gjatë këtij muaji. Në fillim të qershorit policia serbe ndërhyri kundër mbledhjes së Kuvendit të UP-së që po mbahej në Medresenë “Alaudin” të Prishtinës, me ç’rast kishte arrestuar rektorin dhe disa drejtues të lartë të UP-së.

29 qershor 1995

Në Podujevë vazhdon aksioni për kërkimin e armëve

Gjatë kësaj jave në Podujevë, policia serbe me pretekst të kërkimit të armëve ishte në shtëpinë e Kadri Hakiqit, Ramadan Osmanit të cilët në stacionin e policisë në Podujevë u maltretuan fizikisht si dhe në shtëpinë e Salih Salihut, Nazmi Podvoricës e Riza Fazliut. Gjithashtu në fshatin Bradash poicia kërkoi edhe Rexhep Hotin, i cili ditë më parë ishte maltretuar fizikisht.

Në Bajçinë policia ishte në shtëpinë e Bejtush Muçollit ku kërkuan të birin e tij Hasanin, si dhe në shtëpinë e Naip Muçollit. Preteksti ishte kërkimi i armëve, njofton Komisioni për Informim i Degës së LDK-së në Podujevë.

Ndërsa dje në Sfeçël policia serbe kontrolloi shtëpinë e Hetem Ajetit. Pasi që Hetemi nuk ishte në shtëpi policia iu la fleturdhëresën që të lajmërohet të nesërmen. E njëjta ekspeditë e policisë ishte sot në ora 8:00 të mëngjesit për të kërkuar sërish Hetemin, mirëpo pasi nuk ishte në shtëpi, policia bëri demolimin e orendive shtëpiake.

29 qershor 1998

Një burrë e një fëmijë të vrarë dhe tre fëmijë tjerë të plagosur në Drenoc të Klinës

Shaip Krasniqi (30) dhe Betim Xhevdet Fejza (12) janë vrarë mbrëmë në fshatin Drenoc të Klinës, ndërsa Fidan Rasim Agushi (12), Arben Hamzë Fejza (17) dhe Labinot Ismet Fejza (10) janë plagosur gjatë sulmit të policisë e të civilëve serbë që filloi në orën 20:00. Sulmi i furishëm në këtë fshat përskaj rrugës Prishtinë – Pejë zgjati rreth një orë. Thuhet se janë rrëmbyer Qaush Haxhi Fazlia (38) dhe Skënder Imer Ademi (51).

Fshatarët bënë një rezistencë të fuqishme me mjetet që i kishin.

Fshati vazhdon të mbahet ende në rrethim. Dega e LDK-së në Klinë tërheq vërejtjen për rrezikun nga një masakër i fshatit, pasi në të gjenden fëmijë, gra e pleq.

Lismir: Behar Gojnovci vdiq, Hajrullah Konjuhi në gjendje të rëndë

Behar Gojnovci (8) nga Lismiri, i cili u plagos sot në mëngjes nga forcat serbe që sulmuan fshatin, vdiq disa orë më vonë, në pamundësi të ofrimit të ndihmës mjekësore, për shkak se fshati mbahet në rrethim të plotë nga forcat serbe.

Njoftohet se është plagosur edhe Hajrullah Konjuhi (56) nga ky fshat, i cili gjithashtu është në gjendje të rëdnë, për shkak se atij nuk ka mundësi t’i afrohet ndihmë mjekësore.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Zëdhënësi i dr. Rugovës, Xhemail Mustafa

 27 qershor 1994

Represioni në Kosovë

Ferizaj: – Më 14 qershor, rreth orës 22:00, në kafenenë “Paris” në Ferizaj, derisa ishin duke qëndruar Myrtë Shehu, Basri Topalli dhe Sami Omuri, në lokalet e kësaj kafeneje hyri polici serb Zllatko nga Zaskoku, i njohur për dhunë kundër shqiptarëve dhe kërkoi nga Sami Omuri dhe Basri Topalli që t’i dërgoi me automjet deri në kafenenë “Mani”. Meqë personat e lartëshënuar nuk kishin automjet, ndërsa Myrtë Shehu atij i thotë se i mungon benzina, polici Zllatko e urdhëroi me dhunë që ta dërgoi në kafenenë “Mani”. Më pas nga kafeneja e lartpërmendur, polici Zllatko doli së bashku me tre shokë të tij dhe e urdhëruan me dhunë Myrtë Shehun që t’i dërgoi në fshatin Firajë.

Polici dhe tre shokët e tij në fshatin Firajë shkuan në shtëpinë e Gafurr Xhaferit nën pretekst se ia kanë borxh 2.300 DM. Gjatë kësaj kohe fshatarët e Firajës u grumbulluan para automjetit, si dhe njoftuan organet e policisë së Shtërpcës. Pas ardhjes së policisë së lartëshënuar, polici Zllatko i thotë Myrtë Shehut se duhet patjetër të deklarosh se nuk kemi ardhur për borxh, por për të kërkuar armë. Në stacionin e policisë në Shtërpcë, polici Zllatko deklaroi para kolegëve të tij se kinse njërit nga bashkëpunëtorit e tij Gafurr Xhaferi ia ka borxh 2.300 DM.

Pasi Myrtë Shehu lirohet, polici Zllatko i kërcënohet atij se nëse nuk deklaron se atje ishim për armë e jo për borxh do të kesh pasoja, njofton Kryesia e Aktivit III të LDK-së së Nëndegës së Gremes së Ferizajt.

Më 23 dhe 24 qershor, inspektorët serbë morën në pyetje dr.Asllan Bajramin, kryetar i Kryqit të Kuq të Ferizajt, për shkak të një letre, e cila ditë më parë nëpërmes postës i kishte arritur nga Partia Transnacionale Radikale nga Sofja e Bullgarisë, në të cilën bëhej fjalë rreth Gjyqit ndërkombëtar dhe kriminelëve të luftës së Jugosllavisë së vetëshpallur.

Më 24 qershor, rreth orës 13:00, inspektorët serbë ndërhynë tek shitësit e cigareve dhe rrahën rëndë Hasim Rifatin nga Ferizaj, i cili mori lëndime të rënda trupore.

Më 20 qershor, rreth orës 14:00, nën pretekst të kërkimit të armëve, policia mori Rrahman Ramadanin në fshatin Kosinë të Ferizajt, i cili u dërgua në postkomandën e Nerodimes. Bëhet me dije se Rrahman Ramadani u rrah rëndë, ndaj të cilit u përdor edhe elektroshoku. Rrahman Ramadani u lirua me kusht që të paraqitet sërish në polici.

Skënderaj: – Më 24 qershor rreth orës 22, një ekspeditë e policisë, nën pretekst të kërkimit të armëve arrestoi në shtëpinë e tij Nezir Nebihun nga fshati Vojnikë i Skënderajt. Së bashku me Nezirin, polici e mori me vete edhe bashkëshorten e tij, e cila në polici u mbajt deri të nesërmen në orën 9 të mëngjesit.

Nezir Nebihu po mbahet ende në arrest, ndërsa këtë bastisje e bëri policia serbe e Klinës.

Gllogovc: – Më 23 qershor, rreth orës 23:00, policia bastisi shtëpinë e Ismail Bytyçit në Arllat të Gllogovcit.Gjatë bastisjes policia u soll brutalisht, me ç’rast në prani të anëtarëve të familjes rrahu djemtë e Ismailit, Shefqet e Xhevdet Bytyçin, të cilët edhe i morën me vete në stacionin e policisë në Gllogovc dhe i mbajtën deri rreth orës 23:00.

Të lartëshënuarit u morën sërish të nesërmen në polici, nën pretekst se prindi i tyre ka bërë një faj. Policia të lartëshënuarit i liroi me kusht që Shefqet Bytyçi të lajmërohet sërish të nesërmen në polici.

Deçan: – Sot rreth orës 7 të mëngjesit, policia serbe hyri në shtëpinë e Haxhi Përgjegjajt nga Lumbardhi i Deçanit, të cilin policia e rrahu në prani të anëtarëve të familjes. Pas bastisjes policia mori me vete Haxhi Përgjegjajn, i cili pas një orë qëndrimi u lirua me kusht që të paraqitet sërish.

27 qershor 1995

U arrestua gazetari Ramadan Muçolli

Sot, rreth orës 9:00, në Prishtinë, u arrestua gazetari Ramadan Muçolli. Anëtarët e familjes thanë se tre policë me rroba civile ia bastisën banesën, ku ai jeton me qira, dhe e arrestuan.

Bashkëshortja e Ramadanit tregoi se policët u interesuan gjatë bastisjes për punën e tij si gazetar. Ajo tha se policët kërkonin shënime gazetareske dhe kaseta të magnetofonit. Pas bastisjes, atij iu mor kasetofoni dhe pasaporta.

Ramadan Muçolli ishte gazetar dhe redaktor në Radio Prishtinë. Pas pushtimit të RTVP-së, ai punonte si gazetar i lirë dhe ka bashkëpunuar me radiostacione e gazeta shqipe. Ramadan Muçolli, si edhe shumë gazetarë të tjerë shqiptarë, ka qenë në shenjestër të policisë serbe.

Ai një herë u mbajt disa orë në stacionin e policisë në Ferizaj, ndërsa gjatë aksionit të forcave serbe të pushtimit të ndërtesës së Institutit Albanologjik vitin e kaluar, bashkë me punëtorët shkencorë, ishte keqtrajtuar edhe zoti Muçolli.

Ramadan Muçolli, deri në mbylljen e këtij Informatori, në orën 15:00, nuk është liruar.

Lidhja e Gazetarëve të Kosovës (LGK) sot i njoftoi asociacionet ndërkombëtare lidhur me këtë arrestim.

LGK kërkoi lirimin e menjëhershëm të Ramadan Muçollit dhe ndërprerjen e shtypjes serbe ndaj gazetarëve shqiptarë në Kosovë.

27 qershor 1997

Xh. Mustafa: Ardhja e Millosheviqit – si e çdo ardhacaku antishqiptar

Këshilltari për informim i kryetarit Rugova, Xhemail Mustafa, në një deklaratë dhënë “Bujkut”, e cilësoi ardhjen e pardjshme të kryetarit serb në Kosovë, si ardhje të çdo ardhacaku tjetër antishqiptar dhe si një provokim të rëndë për popullin e Kosovës, veçmas për shqiptarët.

– Arsyet e ardhjes së Millosheviqit në Kosovë padyshim duhet kërkuar në përpjekjet e tij për ta ringjallur nacionalizmin më ekstrem serb pikërisht nëpërmjet Kosovës dhe për t’ia zgjatur kështu edhe për një mandat eventual jetën regjimit të tij antishqiptar e antidemokratik. I vetëdijshëm se serbët e Kosovës dhe jo vetëm ata, tashmë i ka bërë viktimë të një politike të dështuar, Millosheviqi po përpiqet që me ta të manipulojë mbase për herë të fundit. Ai nuk e ka guximin e as moralin e njeriut e të politikanit që me serbët e Kosovës, me viktimat e regjimit të tij, të ballafaqohet në Beograd, aty ku po protestojnë e po bëjnë grevë urie me javë për mashtrimet që ua bëri pikërisht Millosheviqi dhe regjimi i tij gjatë kësaj dekade. Në vend që me ta të përballet e t’u japë llogari atje ku e kanë vendin edhe ata, edhe vetë Millosheviqi, kryetari serb, po përpiqet që serbëve në Kosovë t’u çojë sinjale dhe t’u japë kurajo për mashtrimet, për keqpërdorimet dhe për dështimet e reja që po ua përgatit përmes fjalimeve boshe nëpër qytete të Kosovës dhe nëpërmjet zgjedhjeve të ardhshme. Mashtrimin më të madh që u përpoq t’ua bëjë serbëve sot në Prishtinë Millosheviqi ishte premtimi se regjimi i tij nuk do të përkulet para presioneve ndërkombëtare për Kosovës. Premtime të këtilla ai u jepte me bollëk edhe serbëve në Kroaci e në Bosnjë, kurse fatin dhe fatkeqësinë e tyre e dinë të gjithë, besojmë edhe serbët e Kosovës.

Por, me ardhjen e tij në Kosovë, Millosheviqi jo vetëm që i bën një provokim të rëndë popullit të Kosovës, por me vetë aktin e pranisë këtu, shqiptarëve u çon indirekt disa sinjale po aq të rënda. Ai don që para popullit të Kosovës të demonstrojë jo forcën politike, sepse për shqiptarët ai është politikan i një shteti të huaj, por forcën fizike, brutalitetin e aparatit të tij represiv, që po vepron tash disa vjet në Kosovë kundër shqiptarëve. Nuk di a është momenti të thuhet, por me praninë e tij në Kosovë, Millosheviqi paradoksalisht ua tërheq vërejtjen të gjithë atyre politikanëve dhe njërëzve tanë publik, të cilët po e dëmtojnë unitetin politik në Kosovë, rendin që e kemi krijuar, bashkëpunimin mes institucioneve dhe mirëkuptimin mes forcave politike e shqiptarëve përgjithësisht, qoftë me mospunën e tyre, qoftë me prirjen për ngatërresa e për konfrontime rrënuese brendashqiptare. Për të gjithë shqiptarët bashkarisht, për rezistencën paqësore për pavarësinë e Kosovës, ndërkaq, ardhja e kryetarit serb në Prishtinë dhe në disa qytete të tjera të Kosovës është edhe një sinjal se për lirinë dhe për pavarësinë e Kosovës, veç deklarimeve radikale verbale, kërkohet punë shumë më e madhe dhe veprime konkrete.

Le të përkujtojmë me këtë rast se Millosheviqi në Prishtinë ishte edhe para tetë vjetësh, në kohën e grevës së minatorëve në Stan-tërg, të histerisë antishqiptare, të rrënimit me dhunë të mëvetësisë së atëhershme politike e shtetërore të Kosovës dhe të ngritjes së tij në krye të regjimit serb. Ardhja e tij e tashme në Prishtinë, ndërkaq, shënon fillimin e rënies së këtij regjimi diktatorial, të paktën në Kosovë dhe për shqiptarët. Këtë krizë dhe rënie të pashmangshme Millosheviqi e paralajmëroi indirekt sot në Prishtinë, tek ua shpjegoi serbëve presionin e madh rreth çështjes së Kosovës nga bashkësia ndërkombëtare, tha në fund të deklaratës së tij z. Mustafa.

27 qershor 1998

Forca të mëdha ushtarake në Sllatinë të Madhe

Në Sllatinë të Madhe të Fushë Kosovës sot në mëngjes u stacionuan forca të mëdha të ushtrisë serbe.

KI i Degës së LDK-së në Fushë Kosovë njofton se rreth orës 5 mbi këtë fshat fluturoi një aeroplan i forcave serbe ndërsa më vonë erdhi një konvoj i madh i forcave serbe i cili u vendos në pishat e Sllatinës së Madhe, ndërsa fshati pothuaj në tërësi është i rrethuar nga këto forca.

Konvoji përbëhej prej më shumë se 100 mjete motorike, prej të cilave 58 tankse, 30 kamionë me ushtar si dhe një numër i autoblindave ushtarake. Konvoji kishte me vete edhe ura të improvizuara dhe eskavatorë.

Një pjesë e mjeteve luftarake të ushtrisë i ka kthyer tytat në drejtim të fshatit Bardh i Madh, ku gjendet mihja sipërfaqësore, e cila nga fillimi i kësaj jave kontrollohet nga forcat e UÇK-së.

Njoftohet se mbrëmë rreth orës 18, derisa sa kalonin disa kamionë ushatarakë në drejtim të pishave të Sllatinës, 6 ushtarë malazezë ikën nga kamionët. Edhe pse oficerët shtinë me revole në drejtim të tyre, ushtarët ikën në drejtim të panjohur.

Gjendje e rëndë është edhe në vetë qytezën e Fushë Kosovës. Në mëngjes pizgauerët e policisë serbe morën në rrugë vullnetarët serbë, të cilët para dy ditësh janë veshur me uniforma të policisë, dhe i dërgoi në drejtim të Drenicës.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Takimi Rugova-Hollbruk

 26 qershor 1993

Policia serbe vazhdon me arrestimin e arsimtarëve shqiptarë

Edhe gjatë ditës së djeshme, policia serbe vazhdoi me bastisjet dhe arrestimet e disa drejtorëve dhe arsimtarëve shqiptarë në Kosovë. Kështu dje, rreth orës 5 të mëngjesit, një ekspeditë e policisë serbe e përbërë prej 15 vetash, me qëllim të kërkimit të vulave të shkollës dhe dëftesave të nxënësve, bastisën shtëpinë e Kadrush Nezirit në Viti. Policët serbë gjatë bastisjes, thyen dhe demoluan të gjitha orenditë e shtëpisë. Gjatë bastisjes, policët serbë konfiskuan dy ditarë pune për nxënës të arsimtares Hana Neziri, bashkëshorte e Kadrushit, si dhe disa numra të revistave që botohen në Kosovë. Policia serbe e mori me vete Kadrushin në organet e sigurimit, me ç’rast u interesuan për vulat e shkollës dhe dëftesat e nxënësve.

Pas qëndrimit katër orësh në organet e policisë, Kadrush Neziri u lirua.

Po ashtu dje, rreth orës 8 të mëngjesit, organet e policisë serbe në Prizren, ftuan në të ashtuquajturën bisedë informative, Ridvan Hoxhajn, drejtor i Shkollës fillore “Dëshmorët e Zhurit” në Zhur. Inspektorët serbë u interesuan lidhur me shpërndarjen e dëftesave, aktivitetin e të drejtorëve të shkollave shqipe në këtë komunë, pastaj rreth Këshillit pë finacim në Zhur, për LASH “Naim Frashëri” në Prizren etj.

Pas “bisedës informative”, Ridvan Hoxhaj u lirua.

Dje po ashtu në orët e hershme të mëngjesit, policia serbe arrestoi edhe Shaban Myrtajn, drejtor i Shkollës së mesme “Arbëria” në Gjilan. Merret vesh se gjatë kohës së arrestimit të Shaban Myrtajt, policia konfiskoi vulën e shkollës, librat amzë të nxënësve, 241 ditarë pune, 232 dëftesa, 15 libra, si dhe një dëftesë të të ardhurave personale të profesorëve.

Ndaj Shaban Myrtajt, policia serbe përdori edhe dhunën.

26 qershor 1995

Fushatë e gjerë e dhunës me pretekst të kërkimit të armëve në Mitrovicë e rrethinë

Njoftimet e Komisionit për Informim të Degës së LDK-së në Mitrovicë, bëjnë me dije se, sipas urdhërit, në stacionin e policisë në Stantërg, më 19 qershor, u paraqit Musli B. Ibishi nga Tërstena e Mitrovicës. Me këtë rast, me pretekst se duhet të dorëzojë një revole, ai u keqtrajtua rëndë fizikisht, ndërsa më 21 qershor, kur sipas urdhërit, në polici u paraqitën edhe djemtë e tij, Rrahmani e Nimani, policët rrahën deri në alivanosje Nimanin. Pas dy orësh ata u liruan, por me kusht që në polici të paraqiten sot dhe gjithsesi me vete të sjellin revolen e cila kërkohet prej tyre.

Me pretekst se duhet të dorëzojnë armët që i kërkohen, më 20 qershor, policët bastisën shtëpinë e Beqir L. Mehajt në lagjen “Ura e gjakut” në Mitrovicë, me ç’rast me vete morën dy djemtë e tij Rrahmanin dhe Sabriun. Policia i keqtrajtoi ata rëndë fizikisht gjatë rrugës deri në stacionin e policisë dhe në stacion, ku Rrahmani u mbajt disa orë lidhur për një kalorifer.

Më shumë se 20 policë, rrethuan dhe bastisën shtëpinë e Bashkim J. Hazirit, në lagjen “Ura e gjakut” në Mitrovicë, më 22 qershor, me preteskt të kërkimit të një pushkëmitralozi. Meqë nuk gjetën armën që kërkonin e as armë tjerët, policët me vete morën Bashkimin, vëllaun e tij Naimin dhe djalin e axhës së tij Muratin, të cilët në polici u mbajtën më shumë se tetë orë. Me këtë rast, Bashkim Haziri u keqtrajtua fizikisht dhe u urdhërua që në polici të paraqitet sot në orën 8:00.

Pasi edhe më parë kishin shkuar në shtëpitë e Shaban e Sahit Xhemajlit në fshatin Vërnicë për të kërkuar armë, policët shkuan në shtëpinë e Shabanit edhe më 23 qershor dhe e urdhëruan atë që ta paraqitet në polici më 24 qershor.

Pasi më 22 qershor, policët ia bastisën shëpinë dhe e rrahën brutalisht, më 24 qershor sipas thirrjes së lënë, në polici u paraqit Muharrem R. Hajdini (58) nga lagja “Tavnik” e Mitrovicës. Edhe pse është në gjendje të rëndë shëndetësore dhe më parë mjekët nuk e kishin pranuar në spitalin e Mitrovicës dhe po mjekohej në shtëpi, ai u detyrua të paraqitet në polici, ku prej tij kërkojnë të dorëzojë një revole, një autotmobil të tipit “Golf”, të cilin gjoja e paska sjell djali i tij nga Gjermania dhe kasetën e dasmës së djalit të tij nga viti 1989. Pasi u tregoi policëve plagët e pashëruara, ai u lirua më kusht që në polici të paraqitet më 28 qershor dhe të dorëzojë gjithsesi gjërat që nga ai kërkohen.

Në shtëpinë e Xhevat Jusufit, kryetar i Nëndegës së LDK-së në Bare, më 23 qershor policët e kërkuan, për arsye tash për tash të panjohura, vëllaun e tij Abdyl Jusufin.

Iliaz Rexhës, mësimdhënës në SHME “Hasan Prishtina” në Mitrovicë, i cili për shkak të mbajtjes së mësimit në punktin privat, në tetor të vitit të kaluar, qe dënuar më 10 ditë burg, dënim ky të cilin shkalla e dytë ia kishte kthyer në dënim në të holla, me lartësi prej 200 dinarësh, pas ankesës së shtruar në këtë vendim, këtyre ditëve mori vendimin, sipas të cilit rtefuzohet ankesa e tij dhe ai detyrohet të paguaj 200 dinarë gjobë.

26 qershor 1997

Gjykata Kushtetuese e Maqedonisë ndaloi përdorimin e flamurit shqiptar edhe në Tetovë

Gjykata Kushtetuese e Maqedonisë dje vendosi për heqjen e përkohshme nga përdorimi të flamujve të nacionaliteteve, përkatësisht atij shqiptar nga Kuvendi i Komunës së Tetovës.

Në arsyetim thuhet se kjo iniciativë e kësaj gjykate është ngritë nga Partia Demokratike Maqedonase dhe Qeveria e Maqedonisë. Kjo gjykatë për vendimin e Komunës së Tetovës për përdorimin e flamurit shqiptar thotë se është në kundërshtim me Kushtetutën e Maqedonisë. Pritet që ky vendim sot t’u dërgohet kompetentëve të Komunës së Tetovës.

Qeveria maqedonase kohë më parë ka hartuar dy ligje për përdorimin e flamujve. Fjala është për Ligjin për përdorimin e flamurit shtetëror dhe ligjin për përdorimin e flamujve të nacionaliteteve për të cilët do të debatojë Parlamenti i Maqedonisë në mbledhjen e ardhshme.

26 qershor 1998

Kryetari Rugova bisedoi me ambasadorin Hollbruk

Kryetari i Republikës së Kosovës, Ibrahim Rugova bisedoi sot në Prishtinë me ambasadorin e SHBA-ve pranë OKB-së, Riçard Hollbruk dhe bashëpunëtorët.

Në takim ishin të pranishëm edhe Kristofer Hill, ambasadori i SHBA-ve në Shkup dhe ndërmjetësues në bisedimet mes Prishtinës e Beogradit, si dhe shefi i Misionit të SHBA-ve në Beograd, Riçard Majls.

Në takimin u bisedua për zhvillimet më të reja në Kosovë dhe për mundësitë e ndërmarrjes së hapave konkretë për krijimin e klimës së përshatatshme për vendosjen sa më të shpejt të negociatave mes Prishtinës e Beogradit. Situata në Kosovë u vlerësua tepër e rëndë dhe u kërkuan veprime të menjëhershme e konkrete me qëllim të shtendosjes së gjendjes e të evitimit të shkallëzimit të mëtejshëm të dhunës e të konflikteve dhe të parandalimit të spastrimit etnik të Kosovës.

Në këtë takim merrnin pjesë edhe anëtarët e ekipit negociator me Beogradin, dr. Fehmi Agani, Veton Surroi dhe Blerim Shala.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Në ndërtesën e Institutit Albanologjik u vendos një fakultet e galeri serbe

 25 qershor 1993

Vazhdon represioni i policisë serbe kundër shkollës shqipe në Kosovë

Në vazhdën e represionit të policisë serbe kundër shkollës shqipe në Kosovë, në shkollat fillore të komunës së Shtimes, policia plaçkiti vulat dhe dëftesat e nxënësve.

Në Shkollën fillore “Emin Duraku”, policia mori 37 dëftesa të nënshkruara dhe të vulosura, në kohën kur drejtori i kësaj shkolle, Ragip Eseti ishte në të ashtuquajturën bisedë informative. Po ashtu në Shkollën fillore “Lasgush Poradeci” të fshatit Muzeqinë, policia serbe konfiskoi vulat, kurse nga drejtori, Avni Fejzullahu, kërkoi dëftesat e paregjistruara dhe të pavulosura. Policët shkuan edhe në Shkollën fillore “Bajram Curri” në fshatin Petrovë, si dhe në shkollën “Abdullah Shabani” në fshatin Caralevë, por meqë shkollat ishin të mbyllura, policia u kthue.

Policia serbe dje ishte edhe në Shkollën fillore “Konstandin Kristoforidhi” në fshatin Balaj të Ferizajt dhe arrestoi drejtorin, Fehmi Kashtanjevën, pedagogun e shkollës, Shaban Rexhepin, kryetarin e pleqësisë, Sami Sadikun dhe shërbëtorin, Kadri Aliun, me ç’rast policia serbe plaçkiti dokumentacionin. Gjatë kësaj ndërhyrjeje, policia shtiu me armë në ajër dhe shqetësoi banorët e fshatit Balaj.

U bastis edhe Shkolla fillore “Halit Ibishi” e fshatit Cërnillë dhe bashkë me dokumentacionin në polici u dërgua edhe drejtori, Enver Grainca dhe sekretarja, Mirvete Tahiri-Grainca. Ndërkohë kjo e fundit u lirua nga policia.

Po ashtu dje paradite, policia ishte në Shkollën fillore të fshatit Gaçkë, por në saje të syqeltësisë, nuk arriti të plaçkis dokumentacionin. Policia disa herë kërkoi edhe drejtorin e shkollës “Ganimete Tërbeshi”.

25 qershor 1994

Në ndërtesën e Institutit Albanologjik u vendos një fakultet e galeri serbe

Gazetat serbe njoftojnë sot se në ndërtesën e Institutit Albanologjik të Prishtinës, u vendos dje një i ashtuquajtur Fakultet i Shkencavematematikore – natyrore të universitetit të krijuar nga pushtuesit serbë dhe se u hap një galeri e re arteve në të.

Ndërtesa e IA-së, siç dihet u mor me dhunë nga forcat serbe para më shumë se tre muajsh. Gjatë ndërhyrjes së policisë ishin goditur fizikisht shumica e shkencëtarëve dhe punëtorëve të tij.

Para më shumë se dhjetë ditëve dr. Millosh Simoviq, i instaluar si prefekt në të ashtuquajturin Qark të Kosovës, kishte urdhëruar me një shkresë që ndërtesa ë IA-së të sillej në gjendjen e mëparshme dhe që brenda tri ditëve t’i dorëzohej drejtorisë së IA-së.

Mirëpo, avokati përfaqësues i IA-së, Destan Rukiqi ka njoftuar me kohë se administrata e instaluar serbe në Kosovë nuk e përmbushte premtimin e saj.

Ndërkohë Simoviqi u shkarkua nga funksioni i prefektit.

Gazeta “Borba” citonte burime të paidentifikuara që thonin se gjoja shkarkimi i Simoviqit ishte bërë për shkak se ai e kishte dhënë urdhërin e pushtimit të ndërtesës së IA-së pa konsultuar eprorët e tij në Beograd.

Krahas komentimeve të ndryshme që nuk u demantuan, në fillim të kësaj jave propoganda serbe e dërgoi një mesazh të keq reth fatit të mëtutjeshëm të ndërtesës. Nëë një emision të televizionit serb u “zbuluan” kanalet e fshehta nëntokësore që lidhnin këtë ndërtesë me godinat e ish- Fakultetit Filozofik të UP-së.

Këtë farë zbulimi e bënte po ai gazetar që kishte zbuluar gjatë vitit të kaluar një kanal nëntokësor që gjoja lidhte Shqipërinë me Kosovën dhe për të cilin kishin kaluar nga Shqipëria në Kosovë hiq më pak se 100 000 shtetas të Shqipërisë!

Mirëpo krahas këtij mesazhi pothuaj zyrtar që u doli si i saktë, disa komantatorë serbë, për qëllime të ndryshme spkekulonin me shkresën dhe shkarkimin e të të ashtuquajturit prefekt, duke e parë këtë si në shenjë të vullnetit të mirë të Beogradit për shqiptarët në Kosovë, në prag të kinse fillimit të bisedimeve shqiptaro – serbe.

Ndërsa komentatorët shqiptarë, si edhe udhëheqja e IA-së kanë shfaqur rezerva të mëdha lidhur me realizimin e evntual të vendimit për rivendosjen e punëtorëve në institutin e tyre.

Rezerva të këtilla shfaqi në një konferencë për gazetarë edhe nënkryetari i LDK-së Fehmi Agani.

Përkundër kësaj atmosfere që u kirjua, dje, siç njoftojnë gazetat “Borba” dhe “Jedinstvo”, në një ceremini rasti, ku mori pjesë edhe i ashtuquajturi rektor Papoviq, në ndërtesën e IA- së u vendos katedra e bilogjisë dhe u hap një galeri e arteve!

Prof. dr. Zoran Karalejiq, i ashtuquajtur dekan i Fakultetit të Arteve, duke e shpallur të hapur galerinë tha se ndërtesa “përfundimisht iu mor nga dora shovenistëve shqiptarë dhe iu dha kulturës serbe, dhe se nga ajo që ishte dikur, mbeti vetëm ëndërra e keqe”, njofton “Borba”.

Ndërsa gazeta “Jedinstvo” citon edhe këtë pjesë të fjalës së tij: “Le të shërbejë ky pushtim i hapësirave të reja kulturore për të ardhur në vete dhe për ta njohur në një mënyrë të re njëri tjetrin”.

Hapja e asaj farë galerie u bë në kuadër të manifestimeve serbe për të ashtuquajturin përvjetor i Vidovdanit.

25 qershor 1997

Keqtrajtime të shqiptarëve për shkak të vizitës së presidentit serb në Prizren

Nga Prizreni njoftohet se policia serbe keqtrajtoi pronarët e dyqaneve shqiptare para arritjes së presidentit serb Millosheviq. Policia serbe u soll me vandalizëm kundër pronarëve shqiptarë të dyqaneve në këtë qytet, pasi në vitrinat e dyqaneve të tyre u vendosën me dhunë pankartat dhe fotografitë e S. Millosheviqit.

Njoftohet se sot, policia serbe ka keqtrajtuar rëndë Meriman Krasniqin (27) nga Prizreni, në dyqanin e të cilit u vendos me dhunë portreti i Millosheviqit. Pasi Merimani tentoi ta hiqte portretin e presidentit serb nga vitrina, disa civilë të sigurimit serb atë e keqtrajtuan rëndë. Me të arritur në dyqan pronari Musli Krasniqi, atë e vërshuan policët e uniformuar serbë, të cilit ia lanë thirrjen që të paraqitet sot në orën 12:00 në stacionin e policisë serbe në Prizren, ndërsa z. Krasniqi në shenjë proteste ka mbyllur dyqanin e tij.

Njoftohet se policia serbe njësoj ka vepruar edhe kundër pronarit të dyqanit “Neni” në Prizren, emrin e të cilit nuk arritëm ta mësojmë. Ai pasi kundërshtoi vënien e fotografisë së Millosheviqit, u keqtrajtua fizikisht nga një polic serb. Njoftohet se në shenjë proteste adhe ai ka mbyllur dyqanin e tij, ndërsa para dyqanit vazhdojnë të qëndrojnë katër policë serbë.

Gjendja në qytetin e Prizrenit ishte e tendosur dhe secila rrugë e qytetit e vërshuar nga policë serbë. Rrugët e qytetit në Prizren janë të zbrazura, ndërsa bina e ngritur në qendër të qytetit, para së cilës pritet të flasë Millosheviqi, po e pret një masë e vogël serbësh.

Në Prizren është ndaluar edhe tregu, pasi siç dihet e mërkura është ditë tregu në këtë qytet.

25 qershor 1998

Ushtria serbe solli në morgun e spitalit të Gjakovës trupin e pajetë të një shqiptari

Sot rreth orës 12, ushtria serbe nga drejtimi i fshatrave të Rekës së Keqe, solli trupin e pajetë të një shqiptari të cilin e vendosën në morgun e spitalit të Gjakovës.

Ende nuk ka njoftime për identitetin e tij.

Në morgun e spitalit të Gjakovës dy të vrarë

Sot rreth orës 12, ushtria serbe nga drejtimi i fshatrave të Rekës së Keqe, solli trupin e pajetë të një shqiptari të cilin e vendosën në morgun e spitalit të Gjakovës. Ende nuk ka njoftime për identitetin e tij. Po sot në këtë morg u soll edhe një shqiptar tjetër i vrarë.

Njoftimi nga Gjakova bën me dije se fjala është për dy shqiptarë nga fshatrat e Rekës së Keqe, njëri i moshës 26 vjeçe e tjetri i moshës 45 vjeçe.