Lajmet

DITARI 18 mars 1999: Delegacioni i Kosovës nënshkroi Marrëveshjen e Rambujesë për statusin kalimtar të Kosovës

Published

3 months ago

on

Lajmi kryesor i datës 18 mars 1999 sjell njoftimin se delegacioni i Kosovës ka nënshkruar në Paris “Marrëveshjen e Rambujesë për statusin kalimtar të Kosovës”

Lajmi kishte këtë përmbajtje:

“Sonte në orën 18:30, Delegacioni i Republikës së Kosovës, me një ceremoni rasti, ka nënshkruar në Paris Marrëveshjen për statusin kalimtar trevjeçar për Kosovën, të arritur me ndërmjetësuesit ndërkombëtarë në Rambuje të Francës më 23 shkurt të këtij viti.

Këtë Marrëveshje në prani të ndërmjetësuesve ndërkombëtarë Kritofer Hill, Volfgang Petriç dhe Boris Majorski e nënshkruan Kryetari i Republikës së Kosovës Ibrahim Rugova, Hashim Thaçi, Rexhep Qosja dhe Veton Surroi”.

 

Këtij lajmi i bëri jehonë e gjithë bota. Po afrohej dita për sulmet e paralajmëruara në NATO-s kundër Serbisë.

Për ta pasqyruar gjendjen e asaj dite, po sjellim disa nga lajmet kryesore, si nga zhvillimet në terren ashtu edhe nga zhvillimet politike.

Lajmet më poshtë janë renditur sipas kronologjisë së publikimit, gjatë ditës:

 

Ora 11:00:

Sërish të shtëna drejt fshatrave të Mitrovicës e Vushtrrisë

Ragip Bajrami vdiq në një spital të Beogradit

Plaçkiten shtëpitë e boshatisura të shqiptarëve në fshatrat e Vushtrrisë

Verifikuesit të gatshëm për t’u larguar në rast të mossuksesit të bisedimeve paqësore për Kosovën

Raportuesi special i OKB-së Jizhi Dinstbir situatën në Kosovë e vlerësoi si shumë të keqe

Reagimet e partive opozitare serbe lidhur me konferencën për Kosovën në Paris

 

 

Lajm i plotë: Plaçkiten shtëpitë e boshatisura të shqiptarëve në fshatrat e Vushtrrisë

Kamionë të shumtë me targa civile janë vërejtur ditëve të fundit duke bartur gjësende të plaçkitura nga shtëpitë e braktisura shqiptare në fshatrat e Vushtrrisë që janë sulmuar ditëve të fundit nga forcat serbe.

KI i Degës së LDK-së në Vushtrri njofton gjithashtu se në fshatrat rrëzë Qyqavicës po mbretëron gjendje shumë e rëndë, ndërsa gjatë natës së shkuar të shtëna të kohëpaskohshme jkanë dëgjuar në fshatin Beçuk.

 

Lajm i plotë: Verifikuesit të gatshëm për t’u larguar në rast të mossuksesit të bisedimeve paqësore për Kosovën

Misioni verifikues i Kosovës po e kryen punën normalisht, por ai është i gatshëm për t’u larguar në rast të mossuksesit të bisedimeve paqësore për Kosovën në Paris. Zëdhënësi i këtij misionoi Volter Ebenberger tha se verifikuesit janë të gatshëm ta braktisin Kosovën nëse kjo është e domosdoshme. Misioni gjendet në shkallën e parë të gatishmërisë, që do të thotë se çdo verifikator në shtëpi e ka të gatshëm bagazhin e rëndë 15 kg. Shkalla e tretë parasheh që të gjithë verifikatorët të vijnë në vendin e punës me bagazh, të gatshëm për evakuim.

Ebenbergeri tha se ka qenë e paraparë që në terren të jenë 2000 verifikatorë, dhe se tani aktualisht ka 1381. Një diplomat i huaj deklaroi në Prishtinë se në qoftë se arrihet marrëveshja dhe në Kosovë vijnë forcat ndërkombëtare, anëtarët e Misionit Verifikues do të integroheshin në këto forca për shkak të përvojës dhe të njohjes së terrenit.

 

 

Ora 12:00:

Dita e katërt e konferencës në Paris – pa program të përcaktuar

U granatuan katër fshatra të Llapit

Në Sibofc të Obiliqit forcat serbe plagosën një shqiptar

Obiliq: Në fshatin Hamidi forcat serbe kidnapuan vëllezërit Krasniqi

Policia serbe keqtrajtoi një civil shqiptar

 

Lajm i plotë: Dita e katërt e konferencës në Paris – pa program të përcaktuar

Paris, Prishtinë, 18 mars (QIK) – Delegacioni ynë hyri sot dikund rreth orës nëntë në ndërtesën e konferencës për Kosovën pa ndonjë program të veçantë për ditën e sotme, të katërtën që kur konferenca e Rambujesë i vazhdoi punimet në Paris.

Delegacioni i Kosovës do të takohet me negociatorët ndërkombëtarë, pasdite edhe me bashkëkryetarët e konferenës, ministrat e jashtëm britanikë e francezë, Robin Kuk dhe Yber Vedrin.

Anëtarë të delegacionit tonë kanë veneruar se sot është dita e dyzet që kur është hyrë në këtë proces intensiv negociator me fillimin e konferencës së Rambujesë. “Të gjitha mjetet dhe mënyrat diplomatike janë shpenzuar. Koha tani është për veprime konkrete ushtarake”, ka thënë një anëtar, duke aluduar në zotimet e Perëndimit, në radhë të parë të NATO-s, për sulme ndaj caqeve serbe në rast të vazhdimit të agresionit në Kosovë dhe mospajtimit me planin paqësor të Rambujesë.

Delegacioni i Kosovës shpalli të hënën se do të nënshkruante marrëveshjen e përkohshme për Kosovën të negociuar në Rambuje, më 23 shkurt.

Nëse do të ketë nënshkrim të dokumentit nga kosovarët – serbët nuk e kanë ndërmend ta bëjnë këtë gjë – ai do të ndodhë qoftë sot pasdite, kur të vijnë ministrat, qoftë nesër paradite, thonë burime të afërta me konferencën.

Departamenti amerikan i Shtetit tha të mërkurën se do të ftonte anëtarë të delegacionit negociator të Kosovës në bisedat në Paris për një vizitë në Uashington.

Sekretarja e Shtetit Ollbrajt dërgoi zëdhënësin e Departamentit Xheimz Rubin në Paris për ta bërë ftesën për vizitë, theksoi CNN.

Ollbrajt kërkoi nga Rubini që të takohet me udhëheqësin e delegacionit negociator të Kosovës, Hashim Thaçin, dhe “t’i bëjë në emër të saj një ftesë që anëtarë të delegacionit të shqiptarëve të Kosovës të udhëtojnë në Uashington, gjë që presim të ndodhë në fund të këtij raundi të bisedave në Paris”, tha zëvendësi i zëdhënësit të Departamentit të Shtetit, Xheimz Foulli të mërkurën.

“Ne duam të zhvillojmë marrëdhënie të mira me ta (UÇK-në), ndërsa transformohen në një organizatë me orientim politik në një Kosovë që jeton në paqe, simbas dispozitave të marrëveshjes së përkohshme”, deklaroi Foulli.

 

 

 

Ora 13:30:

Pritet që delegacioni i Kosovës ta nënshkruajë marrëveshjen sot pasdite

Intervistë e Kryetarit të Republikës së Kosovës Ibrahim Rugova dhënë radios “Evropa e lirë”

Suharekë: Një trup pa jetë u gjet në malin Biraç

U gjetën edhe dy të vrarë në Malësinë e Kaçanikut

Nëntë pjesëtarë të vrarë të UÇK-së u varrosën dje në Pagarushë të Malishevës

Një konvoj i forcave serbe shkoi drejt Mihaliqit të Vushtrrisë

Vushtrri: Policia serbe keqtrajtoi fizikisht 3 civilë shqiptarë

Vetura e një shqiptari me targa të armatës jugosllave

Presidenti Meidani falënderon angazhimet e SHBA-ve dhe Francës për Kosovën

Georgijevski: Në Maqedoni gjenden rreth 12.000 ushtarë të NATO-s

Në Gjakovë u varros Yll Morina, pjesëtar i UÇK-së

Në Bradash u bë varrimi i Hazbi Veliut

Nuk dihet për fatin e Enver Osmanit nga Lajthishta e Obiliqit i arrestuar nga policia serbe

 

Lajm i plotë: Pritet që delegacioni i Kosovës ta nënshkruajë marrëveshjen sot pasdite

Delegacioni i Kosovës në Paris po vazhdon kontaktet me negociatorët dhe me institucionet që do të merren me implementimin e marrëveshjes për Kosovën.

Merret vesh se mbrëmë delegacioni i Kosovës pati përsëri takim me përfaqësuesit e NATO-s, por edhe një takim me negociatorët ndërkombëtarë. Ndërkohë, delegacioni i Kosovës ka marrë një ftesë që të vizitojë nesër selinë e NATO-s në Bruksel.

Një pjesë e delegacionit të Kosovës, siç konfirmohet sot, ka marrë ftesë që të vizitojë SHBA-të dhe se takimet me zyrtarë të lartë amerikanë pritet të bëhen nga dita e hënë.

Po ashtu pritet që në orët e mbrëmjes delegacioni i Kosovës ta nënshkruajë marrëveshjen, në prani të përfaqësuesve të SHBA-ve, Unionit Evropian dhe Rusisë.

Pala serbe vazhdon të jetë jokooperative, duke refuzuar jo vetëm nënshkrimin e marrëveshjes, por duke injoruar atë në tërësi.

Njoftohet se konferenca në Paris mund të përfundojë punimet gjatë mbrëmjes.

 

Lajm i plotë: Suharekë: Një trup pa jetë u gjet në malin Biraç

Një trup pa jetë u gjet sot, në orët e mëngjesit, në malin Biraq, pranë rrugës Suharekë-Duhël, njofton Komisioni për Informim i Degës së LDK-së në Suharekë.

Në vendin ku u gjet trupi pa jetë ka dalë organet policore serbe dhe ekipi i Misionit Verifikues të OSBE-së. Identiteti i viktimës, e cila është gjinisë mashkullore, me moshë rreth 35 vjeç, mbetet ende i panjohur.

I njëjti burim bën të ditur se banorët e fshatrave Grejkoc e Korishë kanë filluar sot të kthehen në shtëpitë e veta. Dje ata ishin të detyruar të largoheshin, për shkak të sulmeve të forcave serb në këto fshatra.

 

Lajm i plotë: Nëntë pjesëtarë të vrarë të UÇK-së u varrosën dje në Pagarushë të Malishevës

Në fshatin Pagarushë të Malishevës, dje në orët e vona të pasdites u bë varrimi i nëntë pjesëtarëve të UÇK-së, të vrarë gjatë luftimeve në fund të javës së kaluar në fshatin Jeshkovë të Prizrenit.

Varrimi u bë në praninë e mijëra banorëve të fshatrave të Prizrenit, Suharekës e Malishevës, si dhe të shumë eprorëve e ushtarëve të UÇK-së.

Për herë të fundit nga dëshmorët u ndanë ushtarakët e UÇK-së, Sadik Halit Jaha e Ramadan Basha.

 

Lajm i plotë: Në Gjakovë u varros Yll Morina, pjesëtar i UÇK-së

Ora 14:30:

Hollësi rreth ndërhyrjes së djeshme të forcave serbe në Babaj Bokës

Një predhë ra në oborrin e një shtëpie në qendër të Gjakovës

Të shtëna në fshatin Bellacerkë

Tash tri ditë nuk dihet asgjë për fatin e 4 të rinjve shqiptarë nga Peja

Në Radavc policia serbe arrestoi 2 shqiptar – nuk dihet për fatin e një shqiptari nga Raushiqi

Vushtrri: Luftime të ashpra në Zhilivodë – forcat serbe po ua vënë zjarrin shtëpive shqiptare

Pejë: Një shqiptar u dënua me 3 vjet burg

Edhe më tej prani e madhe e forcave serbe në Han të Elezit e rrethinë

Gjilan: Ripozicionime të forcave serbe

 

Lajm i plotë: Tash tri ditë nuk dihet asgjë për fatin e 4 të rinjve shqiptarë nga Peja

Pejë, 18 mars (QIK) – Që nga 15 marsi i këtij viti, ende nuk dihet asgjë për fatin e 4 nxënësve shqiptarë të Shkollës së Mesme Ekonomike në Pejë, njofton NKDMLDNJ në Pejë.

Nuk dihet asgjë për fatin e Dëfrim R. Tiganit (1983), Astrit M. Drenit (1983), Ylli M. Krasniqit (1983) dhe Artan C. Berishës (1983) që të gjithë nga Peja.

Dyshohet se katër nxënësit shqiptarë janë kidnapuar nga persona të panjohur.

 

 

Ora 16:30:

Mbrëmë në Peran të Podujevës u gjetën dy kufoma

Forcat serbe kanë bombarduar sot malin Zmiq të Mitrovicës

Forcat serbe rrethuan sot fshatin Radavc të Pejës dhe demoluan disa shtëpi shqiptare

Policia financiare serbe ka konfiskuar gjithë tirazhin e “Gazetës së Re Shqiptare”

Policia serbe po i keqtrajton banorët e fshatrave të Mitrovicës

Forcat serbe pasi demoluan shtëpinë e Nysret Shehut në Doganaj të Ferizajit e morën atë në polici

Misionarët e OSBE-së vizituan sot Degën e LDK-së në Ferizaj

Forcat serbe kanë liruar 80 shqiptarë të fshatit Laç të Kaçanikut por nuk dihet për fatin e Qamil Abazit

Gjykata serbe në Prishtinë dënoi me dy vjet burg Nazmi Halilin nga fshati Dremjak i Ferizajt

Gjykata serbe e Pejës dënoi me 3 vjet burg Ibër Gërgocin nga Kosuriqi

Ende nuk dihet asgjë për fatin e e katër nxënësve shqiptarë të Pejës

Gjendje pak më e qetë në Korishë të Prizrenit

Policia serbe nuk po i lejon familjet shqiptare të marrin as kufomat e të afërmve të tyre

Policia serbe arreston dhe kidnapon shqiptarët e fshatrave të Vushtrrisë

 

Lajm i plotë: Mbrëmë në Peran të Podujevës u gjetën dy kufoma

Mbrëmë në fshatin Peran të Podujevës janë gjetur dy kufoma, njofton KI i Degës së LDK-së në Podujevë.

I njëjti burim bën të ditur se kufomat janë të prishura nga koha, ndërsa pritet që identifikimi i tyre të bëhet sot në bashkëpunim me vëzhguesit e Misionit të OSBE-së.

 

Lajm i plotë: Forcat serbe kanë liruar 80 shqiptarë të fshatit Laç të Kaçanikut por nuk dihet për fatin e Qamil Abazit

Familja e Qamil Abazit (1965) nga fshati Laç i Kaçanikut, ka njoftuar se dje është marrë nga policia serbe Qamil Abazi së bashku me 80 persona të tjerë të cilët më vonë janë liruar, por nuk dihet asgjë për fatin e Qamilit. Njoftohet se ai deri të premten ka qenë në qendrën e sigurimit serb të Ferizajt dhe se atë ditë është dërguar në burgun e Prishtinës.

 

####

 

Data 18 mars ishte me plot zhvillime edhe njw vit mw herwt, nw vitin 1998. Le tw shohim cilat ishin  zhvillimet kryesore tw kwsaj dite:

18 mars 1998

 

Ora 11:45:

 

Lajmet kryesore:

Protesta gjithëpopullore në Kosovë

Në Kamenicë policia ka bllokuar rrugët për të ndalur protestën

Policia ndaloi hyrjen e qytetarëve në Vushtrri

Konferencë për shtyp e Komisionit Republikan të Zgjedhjeve

Këshilli Koordinues i Kuvendeve të Komunave të Kosovës i përkrah zgjedhjet e 22 marsit

Një delegacion nga Gjakova bisedoi në Zyrën Amerikane në Prishtinë me Nikollas Hillin

Demaçi priti deputetin e Parlamentit turk Ahmet Prishtina

Në vend për haxh – 4000 DM ia dedikuan banorëve të Drenicës

Lidhja Hungarezëve të Vojvodinës tërhoqi përfaqësuesin e saj nga delegacioni serb

 

 

Ora 12:30:

 Lajmet kryesore:

Me votën e tij, elektorati shqiptar do ta bëjë më të realizueshme pavarësinë e Kosovës

Në Gjakovë u mbajt protestë e fuqishme gjithëpopullore

Anan dhe Kinkel dënojnë dhunën serbe në Kosovë

Mejdani: “Zgjedhjet në Kosovë janë shprehje e vullnetit të popullit”

 

Ora 13:45:

 

Lajm i plotë: Në Pejë u vra Qerim Ukë Muriqi

 

Në protestat gjithëpopullore në Pejë, policia serbe shtiu në protestues dhe vrau Qerim Ukë Muriqin (50) nga Peja.

  1. Muriqi u vra në rrugën e Hekurudhës në Pejë me ç’rast u plagosën edhe protestues të tjerë emrat e të cilëve tash për tash nuk dihen.

 

Lajmet e tjera:

Mbi 100 mijë pjesëmarrës protestuan sot në Prishtinë

Gelbard arriti në Prishtinë

Protestë e grave shqiptare në Nju Jork

Përballë Llaushës u vendosën dy autoblinda

Emisioni i lajmeve nga Kosova në RTSH bën fushatë kundër zgjedhjeve

Jelcini i shkroi Milosheviqit rreth Kosovës

Konferenca islamike bën thirrje për dialog me ndërmjetësim ndërkombëtar

Policia ia plaçkiti një qytetari 260 DM

 

Ora 14:45:

Pejë: Një i vrarë, disa të plagosur dhe shumë të rrahur

 

Në protestat gjithëpopullore në Pejë, policia serbe shtiu në protestues dhe vrau Qerim Ukë Muriqin (50) nga Peja.

  1. Muriqi u vra në rrugën e Hekurudhës në Pejë me ç’rast u plagosën edhe protestues të tjerë emrat e të cilëve tash për tash nuk dihen, thuhet në raportin për protestën e sotme në Pejë.

Në vazhdim të njoftimit të KI të Degës së LDK-së në Pejë për rrjedhën e protestës thuhet:

Përkundër masave të rrepta të policisë serbe, sot në Pejë u organizuan protesta të shqiptarëve në të cilat muarën pjesë afro 70.000 veta, nga të gjitha fshatrat e komunës.

Manifestimi kryesor u mbajt në pjesën afër Hamam Xhamisë. Ndër pankarta të shumta që mbanin mbanin në duar protestuasit dominonin: “Liri, demokraci”, “Nuk jemi terroristë”, “Drenicë jemi me ju” e të tjera, ndërsa në brohoritje i jepej përkrahje e fuqishme politikës paqësore të kryetarit të Republikës së Kosovës, dr. Ibrahim Rugovës, dhe ftoheshin për unitet të gjitha subjektet politike të Kosovës.

Që në orët e hershme të mëngjesit, në hyrje të qytetit, në të gjitha rrugët që vijnë nga fshatrat ishin stacionuar forca të mëdha të policisë serbe, të cilat me dhunë zbritnin udhëtarët nga automjetet dhe i urdhëronin që të ktheheshin mbrapa. Me këtë rast në shumë vendstacionime të policisë u rrah një numër i madh i qytetarëve, pa dallim moshe e gjinie.

Megjithatë, rreth orës 10,00, në sheshin afër Hamam Xhamisë, u grumbullua numër i madh qytetarësh. Rreth orës 10,30 aty arritën forca të shtuara policore dhe filluan të rrahin dhe të ndjekin turmën në drejtim të tregut të gjelbërt.

Gjatë intervenimit të policisë në pjesë të ndryshme të qytetit u rrahën shumë qytetarë shqiptarë.

Deri tani arritëm të sigurojmë vetëm emrat e disa prej tyre:

Cufe Lajqi (22) nga Brezheniku, Selim Nezir Gjuraj (59) nga Radavci, Zenun Brahim Shala (56) nga Fusha e Pejës, Mentor Morina (30) nga Loxha, Halil Sylë Shala (41) nga Drelaj, Vesel Ibish Kurbogaj dhe Skender Ibish Kurbogaj nga lagja Dardania, Behadin Mehmet Mahmutaj (50) nga Peja, Rrahman Mehmet Jashraj (33) nga Peja, Shaqir Beqë Mujaj (54) nga Peja, Bekë Rrustem Demaj (48) nga Tërsteniku dhe Ali Krasniqi (40) nga Bërzheniku.

Numri i të rrahurve nga polcia është shumë më i madh.

 

Ora 16:00:

 Lajm i plotë: Pejë: U plagosën pesë protestues shqiptarë

Gjatë protestës së sotme në Pejë, siç njoftuam më herët, policia serbe vrau Qerim Muriqin. Po nga të shtënat e policisë, u plagosën Sadri Adem Beqiri (58) nga Lutogllava, Mejreme Ismet Avdiaj (18) nga Pogragja e Klinës, Rexhep Shkreli (48) nga Treboviqi, Faton Avdi Muriqi (19) nga Peja dhe Bekim Isa Muriqi (23) nga Peja.

 

Lajmet e tjera:

Sot u protestua edhe në qendrat tjera të Kosovës

Rreth dy mijë serbë protestuan në Prishtinë

Unioni Evropian do të emërojë përfaqësuesin e vet special për bisedimet Kosovë – Serbi

Tallbot: “Nëse Millosheviqi deri në fund të javës nuk e tërheq policinë nga Kosova do të pasojnë sanksione të reja”

Konferenca islamike bën thirrje për dialog me nërmjetësim ndërkombëtar

 

Ora 18:00:

Lajmet kryesore:

Kryetari Rugova priti Robert Gelbardin

Deklarata e Robert Gelbardit dhe e kryetarit Rugova

Mitrovicë: Lëvizje të policisë dhe keqtrajtim të qytetarëve

Policia konfiskoi një sasi të barnave të Kryqit të Kuq të Kosovës

 

Related Topics:
Continue Reading

Lajmet

KQZ përmbyll numërimin e votave 100%

Published

1 hour ago

on

June 8, 2026

By

Komisioni Qendror i Zgjedhjeve (KQZ) ka përfunduar plotësisht procesin e numërimit të votave për rezultatet preliminare të zgjedhjeve të parakohshme parlamentare të Kosovës të vitit 2026. Sipas të dhënave zyrtare të përditësuara nga platforma e KQZ-së, procesi është përmbyllur me sukses duke numëruar saktësisht 2,498 nga 2,498 vendvotime, që përfaqëson 100% të kutive të votimit në tërë vendin.

Nga ky numërim total, Lëvizja Vetëvendosje (LVV) ka dalë forca e parë politike duke siguruar 42,91% të votave, apo 299,152 vota në total. Në vendin e dytë renditet Partia Demokratike e Kosovës (PDK) e cila ka grumbulluar 21,12% të votave (147,220 vota), ndërsa e treta mbetet Lidhja Demokratike e Kosovës (LDK) me 17,58% të votave (122,575 vota). Sa i përket subjekteve të tjera, Aleanca për Ardhmërinë e Kosovës (AAK) ka siguruar 7,16% të votave (49,917 vota), ndërsa Lista Serbe ka marrë 6,18% (43,071 vota).

Në këto zgjedhje të drejtën e votës e kanë shfrytëzuar gjithsej 726,071 qytetarë, duke shënuar një pjesëmarrje të përgjithshme prej 37,05% të votuesve të regjistruar. Megjithatë, këto rezultate mbeten ende preliminare, pasi sipas procedurave ligjore ato pritet të plotësohen edhe me numërimin e votave me postë nga diaspora, votave të personave me nevoja të veçanta, si dhe pas shqyrtimit të ankesave eventuale përpara se KQZ-ja të bëjë certifikimin përfundimtar të rezultatit zgjedhor.

Continue Reading

Lajmet

Arsi Bako fiton “Festivalin e Pranverës” me këngën “Humb”

Published

1 hour ago

on

June 8, 2026

By

Arsi Bako është shpallur fituese e këtij edicioni të “Festivalit të Pranverës”, duke triumfuar me këngën “Humb” pas një gare të fortë mes finalistëve.

Sipas sistemit të votimit, 60% e pikëve janë dhënë nga juria profesionale dhe 40% nga votimi digjital. Arsi Bako grumbulloi gjithsej 260 pikë, duke siguruar vendin e parë dhe kualifikimin automatik në Festivalin e Këngës në RTSH në fund të vitit.

Në vendin e dytë u rendit Herva Novaku me këngën “Zemër në dy hap” me 242 pikë, ndërsa vendin e tretë e zuri Jet me këngën “Në derë do t’i qaj” me 174 pikë.

Edicioni i rikthyer i festivalit u mbajt në Teatrin e Operas dhe Baletit, duke sjellë një mbrëmje të mbushur me emocione, konkurrencë dhe nostalgji për muzikën shqiptare.

Në skenë performuan edhe emra të njohur të muzikës shqiptare si Aleksandër Gjoka, Frederik Ndoci, Irma Libohova, Rovena Dilo, Eneda Tarifa, Jonida Maliqi, Dashnor Diko, Adhurim Demiri dhe Renis Gjoka, të cilët interpretuan disa nga hitet e tyre.

Mbrëmja u drejtua nga moderatorët Bleona Qereti dhe Nik Xhelilaj, ndërsa organizatorët kanë paralajmëruar se festivali pritet të rikthehet sërish edhe vitin e ardhshëm.

Continue Reading

Lajmet

Ditari: Lajmet kryesore që shënuan datën 8 qershor 1993-1998?

Published

2 hours ago

on

June 8, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Universiteti i Prishtinës

 8 qershor 1993

“Le Monde”: Programi i Uashingtonit rrezikon të shpërthejë konflikti në Kosovë

Historiani serb dr.Ivan Gjuriqi, i cili para shumë muajve iku nga Beogradi dhe u vendos në Paris, boton një vështrim në gazetën “Le Mond” lidhur me planin Vens-Oven dhe vendimin e pesëshes në Uashington përkitazi me Bosnjë-Hercegovinën dhe Kosovën.

“Vendimi i Uashingtonit, thotë Gjuriqi, në vend që të qetësojë, nuk do të bëj gjë tjetër veçse do ta acarojë konfliktin në Bosnjë-Hercegovinë”.

Lidhur me Kosovën, dr.Ivan Gjuriqi shkruan:”Milosheviqi, pasi vendosi në Kosovë një gjendje të jashtëzakonshme, të shoqëruar me një represion sistematik, preferoi ruajtjen e një status-quoje në këtë krahinë ish-autonome.Ndryshe nga sa pretendohej, lufta nuk përputhej me interesat e tij. Nga ana tjetër, pikërisht atje ai sfidoi të vetmën fantazëm kombëtare, gjithmonë në fuqi, të serbëve të Serbisë, përderisa ajo nuk i është përgjigjur dëshirës së tyre për riserbizimin e Kosovës. Pikërisht tani, me ndarjen e kartave nga Uashingtoni, ne rrezikojmë të shohim atje një konflikt të vertetë me të gjitha pasojat ndërkombëtare”, thotë dr.Ivan Gjuriqi, në gazetën “Le monde”.

 

8 qershor 1994

Konkurs i Universitetit të Prishtinës për pranimin e 5.875 studentëve të rinj

Sot gazeta “Bujku”, boton konkursin e Universitetit të Prishtinës, për regjistrimin e studentëve të rinj për vitin e parë të studimeve për vitin shkollor 1994-95.

Në vitin e parë të studimeve, në vitin shkollor 1994-95, Universiteti i Prishtinës do të regjistrojë 5.875 studentë, nga të cilët 4.317 të rregulltë dhe 1.558 me korrespodencë. Në fakultete do të regjistrohen 4.060 studentë, nga të cilët 3.012 të rregulltë dhe 1.048 me korrespodencë, ndërkaq në shkolla të larta të Kosovës, do të regjistrohen 1.815 studentë prej të cilëve 1.305 të rregulltë e 510 me korrespodencë.

Fakultetet dhe shkollat e larta të Universitetit të Prishtinës, në të gjitha degët mund të regjistrojnë studentë, shtetas të huaj numri i të cilëve mund të jetë deri në 5 për qind nga numri i studentëve të fakultetit, përkatësisht shkollës së lartë.

Në konkurs, jipen edhe kushtet e përbashkëta dhe ato të veçanta për secilin fakultet apo shkollë të lartë, bashkë më numrin konkret të studentëve të rinj.

 

8 qershor 1995

Në Gjilan 17 vjet burg për 16 shqiptarët e akuzuar

Serbët e instaluar në Gjykatën e Qarkut në Gjilan shpallën sot aktgjykimin e procesit të montuar politik ndaj 28 personave, shumica ish-policë të Kosovës si edhe disa funksionarëve politikë lokalë.

Këta, si edhe shumë ish-policë të tjerë anë mbanë Kosovës u nxorrën në procese të montuara politike nën akuzë të rrejshme se gjoja kanë formuar Ministrinë e Punëve të Brendshme të Republikës së Kosovës.

Në procesin në Gjilan, 16 ish-policë u dënuan në kohëzgjatje 17 vjet burg.

Siç dihet 8 të akuzuar ishin në arrati, Shyqeri Salihu ishte liruar para pak ditësh, ndërsa Asllan Bislimi, Xhemajl Rrustemi e Baki Qerimi u liruan sot nga akuza.

Enver Ramizi u dënua me 3 vjet burg, Esat Marovci me 2.5 vjet, Halit Rexhepi e Sinan Rexhepi me 1.5 vjet burg, me 1 nga 1 vit burg u dënuan: Mujadin Keka, Isuf Zuka, Ymer Rrudhani, Ruzhdi Lipovica e Halil Kqiku. Me nga 6 muaj u dënuan: Fazli Berisha, Hasan Mahmutim Muhamet Maksuti, Isak Hërtica, Isa Thaçi e Enver Tahiri, ndërsa Vebi Ramadani u dënua me 6 muaj burg me kusht për një vit.

Njoftohet se të gjithë të akuzuarit u liruan nga paraburgimi, derisa vendimi të bëhet i plotfuqishëm.

Siç dihet në procesin e montuar politik kundër ish-policëve të Kosovës janë akuzuar 160 ish-policë të Kosovës.

Ata janë arrestuar gjatë nëntorit të vitit të kaluar dhe janë torturuar në mënyrën më të egër nga policët serbë me qëllim të nxjerrjes së deklaratave të rrejshme.

Propoganda serbe ka trumbetuar se policia serbe gjoja ka zbuluar Ministrinë e Brendshme të Republikës së Kosovës, ndërsa arrestimin e ish-policëve të Kosovës, politika serbe e ka cilësuar si një sukses të saj në fushatën e rrënimit të institucioneve kosovare.

Kundër torturimit të ish-policëve të Kosovës kanë reaguar shumë asociacione e institucione ndërkombëtare, duke përfshirë edhe proetstat publike të AI-së.

Gjatë muajit të kaluar në dy procese të montuara në Pejë 16 ish-policë të Kosovës u dënuan 59 vjet burg.

Pas atij procesi, filluan proceset e montuara në Gjilan, në Prizren dhe në Prishtinë.

Në të gjitha këto procese nuk është dëshmuar me asnjë provë aktpadia serbe.

Të akuzuarit si edhe dëshmitarët kanë hedhur poshtë aktakuzën në tërësi si të rrejshme.

Subjektet shqiptare në Kosovë i kanë cilësuar këto procese si përpjekje të Serbisë për asgjësimin e subjekteve politike dhe të organizatave shqiptare.

Ndërsa procesi i montuar në Prishtinë është konsideruar si një provokim i hapur për shkak të masovitetit të tij dhe mbajtjes në sallën solemne të ndërtesës së Parlamentit të Kosovës.

 

8 qershor 1997

U themelua Shoqata e Afaristëve të Kosovës

Sot në Prishtinë u mbajt mbledhja e Kuvendit Themelues të Shoqatës së Afaristëve të Kosovës (SHAK). Në mbledhje merrnin pjesë delegatët për këtë kuvend nga të gjitha komunat e Kosovës, pastaj Naip Zeka, anëtar i Kryesisë së LDK-së, dr. Nuri Bashota, kryetar i Shoqatës së Ekonomistëve të Kosovës dhe mysafirë të shumtë.

Kuvendi zgjodhi kryetar të SHAK-ut Fatmir Rexhepin, afarist dhe veprimtar i shquar nga Gjilani.

Më parë janë formuar degët e shoqatës së afaristëve nëpër rajonet dhe disa komuna të Kosovës.

Në statutin e SHAK-ut dhe diskutimet e shumta u theksua nevoja e formimit të këtij asociacioni. Planifikohet që përmes tij të krijohen mundësi të integrimit të afaristëve të Kosovës dhe të mbrojtjes së interesave të tyre.

 

8 qershor 1998

Në mëngjes nisi granatimi i fshatrave të Rekës së Keqe e të Deçanit

Forcat serbe kanë nisur që nga ora 5 e mëngjesit një sulm me granata kundër fshatrave të Rekës së Keqe, në brezin kufitar me Shqipërinë, njofton KI i Degës së LDK-së në Gjakovë.

Në njoftim thuhet se granatimet po dëgjohen edhe nga drejtimi i fshatrave të Deçanit.

 

Gjakovë: Vazhdojnë sulmet në brezin kufitar – shkolla e Morinës e rrënuar për tokë

Sot që nga orët e hershme të mëngjesit forcat ushtarako-policore serbe kanë sulmuar fshatrat e Rekës së Keqe të brezit kufitar Kosovë-Shqipëri. Që nga fshati Nec, Smolicë, Popoc, Ponoshec, Morinë, Brovinë, Stubëll, e të tjera, artileria e rëndë ushtarake po sulmon e përcjellë edhe me helikopterë ushtarakë, njofton KI i Degës së LDK-së në Gjakovë.

Në njoftim thuhet se fronti më i ashpër i luftës është në Morinë dhe Smolicë. Detonimet e armëve të rënda që nga mëngjesi po dëgjohen edhe në qytetin e Gjakovës

Forcat serbe po sulmojnë nga pozicionet e tyre në kodrën e Çabratit, në Babaj Bokës dhe në Kodrën e Pllanikut dhe pozicione të tjera lëvizëse.

Njoftimet nga terreni bëjnë të ditur se forcat e rezistencës iu kanë kundërvënë me vendosmëri këtij sulmi dhe i kanë sjellë mjaft dëme si në njerëz ashtu edhe në armatim forcave ushtarake dhe paramilitare serbe. Sot më tepër se kurrë kjo rezistencë bëhet me qëllim të mbrojtjes së popullatës së pambrojtur e cila ka vendosur të mbetet në shtëpitë dhe pronat e veta dhe të mos zhvendoset në Shqipëri dhe në drejtim të Gjakovës.

Dëshmitarë kanë thënë se ndërtesa e shkollës fillore në fshatin Morinë është rrafshuar me tokë.

Njoftohet gjithashtu se që nga dita e djeshme është rrethuar nga forcat policore serbe edhe fshati Dujakë.

Forcat serbe janë vendosur edhe në ndërtesën e shkollës fillore “Fan Noli” në Dujakë dhe po qëllojnë me snajperë në drejtim të këtij fshati dhe fshatarave tjera përreth.

 

Gjakovë: Sulme me granata dhe helikopterë

Gjendje dramatike sundon sot në fshatrat e brezit kufitar Smolicë, Popoc, Stubëll, Berjah, Brovinë, Mulliq e Morinë. Fshatrat po sulmohen me granata dhe me helikopterë. Disa fshatra po digjen flakë.

Sulmi ka filluar herët në mëngjes, ndërsa për viktima e të plagosur nuk dihet ende.

 

Në Carrabreg të Epërm gjashtë të vrarë e 15 të plagosur

Osman Cacaj i tha sot pasdreke QIK-ut se tepër ngadalë po zbulohen pasojat e operacioneve serbe ditëve të fundit në Deçan e rrethinë.

Ai tha se në Carrabreg i Epërm u konstatua sot se janë vrarë:

Hamdi Jakup Dautaj, Murat Selim Dautaj, Ajshe Rexhe Loshi, Idriz Bardh Lataj, Sadik Sylë Lataj e Sylejman Ukë Zekaj.

  1. Cacaj tha se druhet për shumë të vrarë e të plagosur të tjerë, sidomos në fshatrat Drenoc, Pobërxhë, Carrabreg i Epërm, Lloçan e Hulaj. Dëshmitarët që janë larguar të fundit nga shtëpitë e këtyre fshatrave kanë rrëfyer për sulme të tmerrshme të forcave serbe.

Në këto fshatra nuk ka mundur të hyjë ende askush.

  1. Cacaj tha se pos gjashtë të vrarëve në Carrabregun e Epërm, sot u mor vesh se janë plagosur gjatë ditëve të kaluara 15 shqiptarë: Isuf Tahiraj, Ramë Tahiraj, Ahmet Loshaj, Haxhi Loshaj, Driton Balaj, Sadik Gjonaj, Ajshe Rreh Dobraj, Ajshe Nezir Dobraj, Ajmane Dobraj, fëmijët Jeton Ali Dobraj e Mone Ali Dobraj, Rrustem M. Zekaj, Arsim Q. Dautaj, Hatmane Loshaj, Dyke Dautaj, Xhejrane Gani Loshaj (3), Ilir Gani Loshaj (6), Sevdije Dautaj, Arlinda M. Dobraj e Dinë Balaj.

Kurse në Deçan janë plagosur Nagip M. Cacaj, Mustafë C. Kuqi, Zejnie Kuqi. Islam Cacaj, Ismet Kuqi, Mehmet Osaj, Lush Demukaj, Imer R. Ibërhysaj, Rexhë Osaj, Gani Osaj, Halit Cacaj dhe Bekë I. Demukaj.

Gjendja të plagosurve është shumë e vështirë.

Në mëngjes sot ka pasur të shtëna. Në qytet shihen dhe në Strellc shiheshin në orën 16:00 dy shtëpi duke u kallur.

  1. Cacaj tha se me sa di Dega e LDK-së në Deçan, në këtë qytet dhe në rrethinë deri më tash nuk ka ka arritur asnjë ndihmë.

Continue Reading

Lajmet

Tentim vrasje në Klinë, arrestohet i dyshuari

Published

2 hours ago

on

June 8, 2026

By

Në Klinë, sipas raportit policor është raportuar për një rast të tentim vrasjes gjatë ditës së djeshme.

Sipas Policisë së Kosovës, i dyshuari me veturën e tij dyshohet se ka goditur një motoçikletë në të cilën ndodheshin dy persona.

Si pasojë e incidentit, të dy personat në motoçikletë kanë pësuar lëndime trupore dhe u është ofruar ndihma mjekësore.

I dyshuari është arrestuar nga Policia e Kosovës dhe pas intervistimit, me vendim të Prokurorit të Shtetit është ndaluar për 48 orë.

Rasti është iniciuar dhe hetimet janë duke vazhduar me urdhër të prokurorit kujdestar.

Continue Reading

Të kërkuara