Lajmet

DITARI: Çfarë lajmesh kemi lexuar në çdo 15 prill, në vitet nëntëdhjetë

Published

4 months ago

on

15 prill 1993

Lajm i plotë:

Dr.Ibrahim Rugova: Unë jam gjysmë i burgosur

Gazeta gjermane “TAZ – Berlin” më 7 prill botoi një intervistë me kryetarin dr.Ibrahim Rugova, me titull: “Unë jam gjysmë i burgosur”. Dr. Rugova prezentohet kryetar i Republikës së Kosovës. Po japim pjesë nga intervista e kryetarit Rugova dhënë gazetës gjermane.

TAZ: Zotëri Rugova, Ju jeni zgjedhur në mënyrë demokratike, por ju mungon forca e vërtetë politike?…

Rugova: Unë kam forcën politike dhe morale në Kosovë, para se gjithash në shoqërinë shqiptare, por edhe më gjerë. Ne kemi shkollat tona paralele nëpër shtëpi private, jetën tonë kulturore, edhe pse e gjithë kjo është ndjekur. Ne, gjithashtu kemi një sistem të ndihmës së ndërsjellë në mesin e shqiptarëve. Në fakt, unë nuk kam forcë ekzekutive, policia mbështet regjimin serb. Dhe ne ende nuk jemi pranuar në shkallë ndërkombëtare, por kështu ndodh kur formohen shtetet e reja.

TAZ: Regjimi serb ka ofruar që të bisedojë për heqjen e ligjeve, të cilat para katër vjetëve kanë shënuar fundin e autonomisë së Kosovës. A jeni të gatshëm të bisedoni me regjimin në Beograd. Me çfarë qëllimi?

Rugova: Ky është një trik i ri i Serbisë. Ata duhet të bëjnë diçka, sepse Kosova tani është inkuadruar në bisedimet ndërkombëtare si dhe në bisedimet në Gjenevë. Por, terrori në jetën e përditshmë vazhdon edhe më tutje, aq më tepër ai është dukshëm edhe më i ashpër. Me ofertën e tanishme serbët dëshirojnë të përfitojnë në kohë.

TAZ: Deri ku ka arritur çështja e Kosovës në bisedimet e Gjenevës?

Rugova: Ekziston rreziku që atje të zgjidhet vetëm një pjesë e problemit. Në bisedimet në Gjenevë, ku isha ftuar edhe unë, është biseduar vetëm për shëndetësi dhe shkolla, por jo edhe për statusin politik të Kosovës.

TAZ: A e konsideroni si zgjedhje të mundshme kthimin në një autonomi të gjerë në kuadër të Serbisë, siç e garantonte Kushtetuta e vitit 1974?

Rugova: Jo. Për këtë tani është tepër vonë. Ne, pas një referendumi për pavarësi, kemi dalur nga federata jugosllave. Në kuadër të Jugosllavisë së madhe autonomia do të kishte pasur ndonjë kuptim. Tani ne, faktikisht, jemi vetëm me serbët dhe fatkeqësisht kemi përvojë shumë të hidhur me të gjitha regjimet serbe.

TAZ: A është qëllimi juaj që më vonë të bashkoheni me Shqipërinë në një shtet të vetëm?

Rugova: Ne përpiqemi për një Kosovë të pavarur dhe neutrale të garantuar në nivel ndërkombëtar. Kjo e përjashton tendencën për një bashkim me Shqipërinë.

TAZ: Regjimi serb do të mund ta mbyllë pa u hamendur barakën, në të cilën gjendet selia e LDK-së dhe e presidentit dhe Juve t’ju burgos nën çfarëdo akuze. Pse nuk e bënë këtë?

Rugova: Natyrisht se regjimi serb mund ta bëjë. LDK-ja është regjistruar zyrtarisht, por ekziston në gjysmë ilegalitet. Ne nuk guxojmë të mblidhemi në mënyrë të lirë. Çdo ditë aktivistët e Lidhjes, por edhe të partive të tjera keqtrajtohen, arrestohen ose dënohen. Por, ata marrin në konsiderim opinionin ndërkombëtar. Sa më përketë mua personalisht: unë jam gjysmë i burgosur. Që më tepër se dy vjet unë nuk kam shëtitur nëpër qytet. Unë lëvizi vetëm me veturë në relacionin shtëpi – zyre dhe anasjelltas, në përcjellje të së paku një personi. Edhe atëherë shpesh m’i kërkojnë dokumentet. Ata më kanë nën kontroll të vazhdueshëm.

 

Lajme të tjera:

Policia serbe rrethoi fshatin Çeskovë të Klinës

Revista “The European English Messinger” për Kosovën dhe arsimin shqip

“Le Quotiden De Paris”: Lufta psikologjike bën kërdinë

Në Prishtinë u arrestua Besnik Zymberi

Forca të shtuara të policisë serbe në Podujevë

Në Ferizaj u rrah rëndë Rashit Bytyçi

Anëtarët e organizatës “Equilibre” qëndruan “ilegalisht” në “Jugosllavi”

 

 15 prill 1994

Lajmet kryesore:

Konferenca Ballkanike në Stamboll kërkoi të njihet vullneti i shqiptarëve të Kosovës i shprehur me Referendum

Pëllumb Kulla: Sulmi terrorist grek hyri në procedurën e shqyrtimit të KS të OKB-së

Disa vende evropiane dënuan aktin terrorist grek në Shqipëri

Deputeti Imer Bala u dënua me 12 muaj burg

Represioni në Kosovë

Akademik Mark Krasniqi: Me Serbinë mund të bisedojmë vetëm si të ndahemi

Në Junik filloi ndërtimi i vendbanimit të kolonëve serbë

U shënua 30-vjetori i ansamblit kombëtar “Shota” në Prishtinë

 

 

Lajm i plotë:

Shaip Beqiri u keqtrajtua në polici

Në banesën e tij në Prishtinë, pardje në orën 7, policia serbe mori Shaip Beqirin, shkrimtar e publicist dhe drejtor i ndërmarrjes botuese “Forumi” dhe e dërgoi në polici, ku u mbajt deri në orën 10,30.

Shaip Beqiri i tha Qendrës për Informim të Kosovës se kur u mor nga policia nuk iu njoftua asnjë pretekst.

Në Qendrën e sigurimit shtetëror serb ai u pyet kryesisht për revistën javore “Forumi” dhe u keqtrajtua fizikisht.

Policia iu kërcënua Shaipit për shkak se në shkrimet e revistës “Forumi”, ku kryeredaktor është Adem Demaçi, sipas tyre nuk respektohet shteti i Serbisë.

Shaip Beqiri u lirua, por me kërcënim se do të mbahet nën mbikëqyrje të policisë dhe se do të thirret sërish.

Shaip Beqiri më 19 mars, për shkak të një padie të një serbi – fqi i tij, u dënua me 60 ditë burg. Më 19 mars ai u dërgua menjëherë në vuajtje të dënimit dhe u mbajt deri më 31 mars, kur një instancë gjyqësore më e lartë serbe e pezulloi përkohësisht dënimin.

 

Lajme të tjera:

Refugjatëve shqiptarë me familje iu lejohet qëndrimi në Suedi

U dogj Mulliri i Haxhi Zekës

Në Maqedoni arrijnë edhe 170 ushtarët amerikanë

Fillon sezoni pranveror i Ligës republikane të Kosovës në futboll

 

 15 prill 1995

Lajm i plotë:

Presidenti Berisha priti kryetarin Rugova

Presidenti i Republikës së Shqipërisë dr. Sali Berisha priti dje në Tiranë presidentin e Republikës së Kosovës dr. Ibrahim Rugova.

Në takim u bisedua mbi zhvillimin e reformave e ecurinë e tyre në Shqipëri dhe gjendjen tejet të vështirë në Kosovë, si dhe për krizën në rajon.

Të dy presidentët vlerësuan se është e domosdoshme që problemi i Kosovës të konsiderohet si një problem thelbësor, pa zgjidhjen e drejtë të të cilit nuk do të ketë zgjidhje të krizës ballkanike.

Ata nënvizuan se zhvillimi i dialogut ndërmjet Prishtinës dhe Beogradit, në prani të një pale të tretë, është imperativ për të shmangur keqësimin e mëtejshëm të situatës.

Presidenti Berisha theksoi se do ta konsideronte një hap pozitiv heqjen e vizave të daljes për në Shqipëri nga ana e autoriteteve të Beogradit.

Gjatë bisedës presidenti Rugova shprehu vlerësime pozitive për përmirësimin e marrëdhënieve dhe klimën e mirëkuptimit që ekziston ndërmjet Shqipërisë dhe Greqisë.

Presidenti Berisha gjatë takimit vlerësoi lart përpjekjet e presidentit Rugova dhe të forcave politike të Kosovës për një zgjidhje demkoratike të problemit të Kosovës dhe theksoi se Qeveria shqiptare ka insistuar dhe do të insistojë në respektimin e lirive dhe të të drejtave njerëzore dhe kombëtare të shqiptarëve në Kosovë dhe në tërësi në ish-Jugosllavi, njoftoi Radio-Tirana.

 

Lajme të tjera:

“Bujku”: Prishtina s’e ka mbyllur dialogun

U arrestuan kryetari dhe një anëtar i Qeverisë komunale në Kamenicë

Mbahen ende në arrest së paku 19 veprimtarë politikë në Kaçanik

Një grup huliganësh shqiptarë sulmuan fizikisht drejtorin e SHM “Gjin Gazuli” në Prishtinë

Policia serbe mori sërish në pyetje gazetarin Curr Mazrekaj

Pesë mësimdhënës të SHMT “Marin Beçikemi” në Vushtrri u dënuan me burg

Dhuna e përditshme në Kosovë

Tre ushtarë serbë keqtrajtuan dy atletë nga Deçani

Breogradi i quan “absurde” përpjekjet që sanksionet të kushtëzohen me Kosovën

Dolën nga shtypi tetë ilustracione

Doli nga shtypi libri publicistik i Mehmet Krajës “Vite të humbura”

 

 

15 prill 1997

Lajm i plotë:

Vrasje e pacientit në spitalin e Shkodrës

ATSH njoftonte dje se në mesditë, në spitalin civil të qytetit të Shkodrës, persona të armatosur u futën në sallën e operacionit të repartit të kirurgjisë, duke vrarë një pacient, të cilët mjekët ishin duke i dhënë ndihmën e shpejtë. Pacienti, i cili ndodhej duke u mjekuar nga ekipi i mjekëve në sallën e operacionit, ishte plagosur më parë me armë zjarri.

Në kohën që mjekët ishin duke operuar pacientin e plagosur, në sallë futet një person me maskë dhe i armatosur, i cili qëlloi mbi të plagosurin, duke e vrarë atë.

Gjatë ditës së djeshme janë shtruar edhe pesë të plagosur të tjerë me armë zjarri, tre nga të cilët ishin fëmijë.

 

Lajme të tjera:

Përfaqësuesit e partive të Kosovës u takuan me zëvendëssekretarin e shtetit Rudolf Perina

“Le Courrier”: Të drejtat e njeriut në Kosovë janë vetëm fiksion

“Uashington Tajms” për mundësitë që Millosheviqi të vehet në listën e kriminelëve të luftës

Zyrtarët gjermanë përkrahën Maqedoninë, por u interesuan edhe për Shqipërinë dhe Kosovën

Delegacioni i Federatës Internacionale të Helsinkit vizitoi Universitetin e Tetovës

Nesër fillon festivali “Takimet poetike të Karadakut”

Në Gjakovë dy qytetarë shqiptarë po mbahen në arrest

Dhuna e përditshme në Kosovë

“Rilindja” botoi kompletin në katër vëllime të Gjergj Fishtës

Në oborrin e fabrikës “Napredak” serbët ngrejnë komplekse për t’ua shitur shqiptarëve

Plaçkitje të mëdha të duhanxhinjve

 

15 prill 1998

Edicioni i parë (15:00)

Lajmet kryesore:

Mijëra qytetarë shetitën edhe sot në rrugën “Nënë Tereze” të Prishtinës dhe në qytetet tjera

Këshilli organizativ i vlerëson lart shetitjet e qytetarëve të Kosovës

Propaganda paralajmëron një sulm të ri serb

Forcat serbe përditë gjuajnë me granata fshatrat e Skënderajt

  1. Rubin: “Nuk mund të arsyetohet me asgjë granatimi i fshatrave dhe vrasja e njerëzve të pafajshëm”

Në fshatrat e izoluara të Drenicës të parandalohen epidemitë

Serbët shpërngulen nga fshatrat e Deçanit: “Nuk ka më jetë këtu. . . ”

SHBA përkrahin një dialog politik me ndërmjetësim ndërkombëtar për Kosovën

Bejtush Maçani u keqtrajtua rëndë parmbrëmë nga policia

Nga të shtënat e policisë parmbrëmë u qëllua shtëpia e Milazim Ademit

Patrollat e policisë parakalojnë para Presidencës së Kosovës

Ndërhyrje e policisë në shtëpinë e M. Musliut në Stanofc të Ulët

Dhuna e përditshme në Kosovë

Të burgosurit në Smrekovnicë detyrohen të bëjnë punë në postblloqe të policisë

Serbët deklarojnë “suksesin” në vaksinim, kundruall neglizhencës së subjekteve të shëndetësisë shqiptare

Mbi 500 studentë e intelektualë shkodranë nënshkruan një peticion për Kosovën

Sipas Gjukanoviqit – Milosheviqi po u ofron serbëve vetëvrasje kolektive

Dëmtime në SHF “Aziz Sylejmani”

Në rrugën Prishtinë – Mitrovicë u plagos një polic serb

 

Edicioni i dytë (19:00)

Lajmet kryesore:

Kryetari Rugova priti të deleguarin e posaçëm të ministrit të jashtëm polak

Diplomatët gjermanë e austriakë në KMDLNJ

Gjatë bastisjes së shtëpisë nga policia, vdiq plaka Fatime Shigjeqi nga Planeja

Situatë e rëndë në Kodrën e Trimave

Fatmir e Gëzim Makolli u keqtrajtuan në polici pa kurrfarë preteksti

Prezencë e shtuar e forcave ushtarake në Prizren

Mbi 45 mijë qytetarë morën pjesë në protestën shetitore në Prizren

Shëtitje masovike në Ferizaj

Shëtitje protestuese në Malishevë, Suharekë e Vushtrri

Policia serbe në Vushtrri keqtrajton drejtorët dhe arsimtarët e shkollave shqipe

Foto: Gazetari- Shaip Beqiri

Related Topics:
Continue Reading

Vendi

Sveçla: Arsenal i armëve u gjet në fshatrat përreth varrezave masive në Zubin Potok

Published

4 hours ago

on

August 20, 2026

By

Ministri në detyrë i Punëve të Brendshme të Kosovës, Xhelal Sveçla, tha se një arsenal armësh, municionesh, e uniformash ushtarake u gjetën në fshatrat përreth Kalludrës së Zubin Potokut, aty “ku gjatë javëve të fundit janë zbuluar tri varreza masive” dhe ku autoritetet kanë konfirmuar se kanë identifikuar mbetjet kockore të të paktën 23 personave.

“Zbulimi i këtyre varrezave masive ka nxjerrë në pah edhe një herë dimensionin të krimeve të kryera gjatë luftës së fundit në Kosovë. Veriu i vendit tonë, përmeç se ishte skenë e krimeve të rënda ndaj civilëve, është shfrytëzuar edhe fshehjen e trupave dhe krimeve”, tha Sveçla në një konferencë për media në Mitrovicë.

Ai tha se tani armët do t’i nënshtrohen analizave për të kuptuar nëse të njëjtat janë përdorur për vrasjen e 23 personave që u gjetën në varrezat e dyshuara masive në veri apo edhe në raste të tjera.

“Armatimi që shihni sot para jush është gjetur në 12 lokacione të ndryshme. Nga sot, ai do t`i nënshtrohet ekzaminimit dhe analizave të detajuara, me qëllim të përcaktimit të origjinës, përdorimit dhe lidhjeve të mundshme me rastet e hetuar, përfshirë ekzaminimin e së paku 23 personave, por edhe rasteve të tjera kriminale”, tha Sveçla.

Sipas tij, puna e institucioneve nuk përfundon këtu, por do të vazhdojë me zbardhjen e rrethanave, me identifikimin e përgjegjësve dhe “mbi të gjitha me përpjekjet tona për të sjellë drejtësi për çdo të vrarë, të masakruar apo të zhdukur me dhunë gjatë luftës së fundit në Kosovë”./REL/A.K/

Continue Reading

Lajmet

Sveçla: Armët në veri u gjetën në 12 lokacione, do të përcaktohet përdorimi i tyre

Published

4 hours ago

on

August 20, 2026

By

Ministri në detyrë i Punëve të Brendshm eXhelal Sveçla, tha se armatimi në pjesën veriore të vendit është gjetur në 12 lokacione të ndryshme, raporton Ekonomia Online.

Në një konferencë për media nga Qendra e Njësive Speciale “Enver Zymeri” në Mitrovicë, tha se këto armë do të ekzaminohen për t’u përcaktuar përdorimi i tyre.

“Armatimi është gjetur në 12 lokacione të ndryshme. Nga sot, ai do t’i nënshtrohet ekzaminimit dhe analizave të detajuara, me qëllim të përcaktimit të origjinës, përdorimit dhe lidhjeve të mundshme me rastet e hetuara, përfshirë edhe ekzaminimin e së paku 23 personave, por edhe rasteve tjera kriminale”, tha Sveçla./A.K/

Continue Reading

Lajmet

Mjekësi, Teknologji, Sport: Eksploro Shkencën e Lëvizjes në UBT

Published

4 hours ago

on

August 20, 2026

By

Sporti sot nuk është më vetëm pasion ose garë në terren — është shkencë, teknologji, mjekësi parandaluese dhe industri me zhvillim të pandalshëm. Nëse dëshiron që pasionin tënde për lëvizjen ta shndërrosh në një karrierë elitare me standarde evropiane, Programi Bachelor në Sport dhe Shkenca e Lëvizjes në UBT është pikënisja jote ideale.

Përmes një ndërlidhje unik mes metodologjive më moderne, laboratorëve të teknologjisë së lartë dhe bashkëpunimit me ekspertë e studiues të njohur evropianë, UBT të përgatit për të qenë një profesionist lider. Ti nuk do të mësosh vetëm se si të trajnosh, por si të kuptosh në detaje fiziologjinë e organizmit të njeriut dhe si ta optimizosh çdo lëvizje.

Ky program të pajis me njohuri të thella teorike dhe praktike, nga menaxhimi i disiplinave të ndryshme sportive e deri te përdorimi i aktivitetit fizik për qëllime rehabilituese e parandaluese. Përmes teknikave të avancuara, ti do të mësosh se si ta përshtatësh ushtrimin fizik për çdo kategori — nga fëmijët dhe sportistët elitarë, e deri te individët me sfida të veçanta shëndetësore.

Inovacioni dhe teknologjia janë në zemër të studimeve të tua. Në UBT do të mësosh të përdorësh të dhënat elektronike, kërkimin shkencor dhe mjetet digjitale për të matur performancën, për të analizuar lëvizjet dhe për të hartuar programe fitnesi që sjellin rezultate maksimale e të sigurta.

Përveç anës fizike e shkencore, programi zhvillon te ti kompetenca kyçe në menaxhimin dhe marketingun sportiv. Ti do të mësosh se si të udhëheqësh projekte, të organizosh burime dhe të zgjidhësh me kreativitet e inovacion sfidat komplekse në industrinë e sportit, rekreacionit dhe kohës së lirë.

Tregu i punës ka nevojë për profesionistë të formuar sipas standardeve evropiane. Pas diplomimit në UBT, ti nuk do të jesh thjesht një i diplomuar në sport, por një specialist i kualifikuar gati për të udhëhequr në klube sportive, qendra rehabilituese, institucione shëndetësore dhe me sipërmarrje personale. E ardhmja e shkencës sportive fillon në UBT.

 

Continue Reading

Vendi

Vuçiq i kërkon NATO-s të ndalë tërheqjen e KFOR-it nga ura në Mitrovicë

Published

5 hours ago

on

August 20, 2026

By

Presidenti i Serbisë, Aleksandar Vuçiq, tha se i ka kërkuar sekretarit të përgjithshëm të NATO-s, Mark Rutte, që KFOR-i, misioni i aleancës në Kosovë, të ndalë zvogëlimin gradual të pranisë në urën kryesore mbi lumin Ibër në Mitrovicë të Veriut.

“Sapo i dërgova një letër sekretarit të përgjithshëm të NATO-s, Mark Rutte, dhe kërkova që KFOR-i, në përputhje me Rezolutën 1244 të OKB-së, të ndalë terrorin ndaj serbëve, përndjekjen dhe arrestimet e tyre, rrënimin e shtëpive, si dhe hapjen e urës mbi Ibër”, shkroi Vuçiq në Instagram më 20 gusht.

“Besoj se vlerësimi i tij do të jetë se paqja dhe stabiliteti rajonal janë të një rëndësie të madhe”, shtoi ai.

Radio Evropa e Lirë i është drejtuar NATO-s për koment lidhur me kërkesën e Vuçiqit dhe është në pritje të përgjigjes.

Mitrovica, pas luftës së vitit 1999, u nda në pjesën veriore, me shumicë serbe, dhe atë jugore, ku shumicën e përbëjnë shqiptarët. Sot ato funksionojnë si dy komuna të ndara.

Megjithatë, që nga përfundimi i luftës, KFOR-i e ka mbajtur nën mbikëqyrje urën mbi Ibër, e cila ndër vite ka qenë pikë e përplasjeve ndëretnike.

Sipas Vuçiqit, tërheqja e KFOR-it nga ura në këtë moment do të “krijonte kushte për një përballje përfundimtare me popullsinë serbe” në veri të Kosovës.

Ai tha se autoritetet në Serbi do të vazhdojnë “luftën politike me të gjitha mjetet e mundshme”, duke mos përjashtuar as mundësinë e thirrjes së një seance të posaçme të Këshillit të Sigurimit të Kombeve të Bashkuara.

Vuçiq tha gjithashtu se shefi i Shtabit të Përgjithshëm të Ushtrisë së Serbisë, Millan Mojsilloviq, ka zhvilluar një bisedë “shumë të vështirë” dhe “të keqe” me komandantin e KFOR-it, gjeneralmajor Ozkan Ulutash.

Ulutash u takua më 12 gusht edhe me përfaqësues të Listës Serbe, partisë kryesore të serbëve të Kosovës që gëzon mbështetjen e Beogradit dhe që gjithashtu kundërshton zvogëlimin e pranisë së KFOR-it në urën mbi Ibër.

Komandanti i KFOR-it tha atëherë se procesi i optimizimit të pranisë ishte nisur si rezultat i përmirësimit të situatës së sigurisë në Kosovë dhe se ai do të zhvillohej gradualisht.

Ura kryesore mbi lumin Ibër konsiderohet një nga pikat më të ndjeshme në aspektin e sigurisë në veri të Kosovës.

Misioni i NATO-s ka theksuar se vazhdon ta zbatojë mandatin e tij në përputhje me Rezolutën 1244 të Këshillit të Sigurimit të Kombeve të Bashkuara, duke kontribuar në ruajtjen e një mjedisi të sigurt dhe të lirisë së lëvizjes për të gjithë njerëzit në Kosovë.

KFOR-i ka thënë se do të vazhdojë të veprojë në mënyrë të paanshme dhe në koordinim me Policinë e Kosovës dhe EULEX-in, në përputhje me rolet përkatëse të secilit në fushën e sigurisë.

Ura kryesore mbi Ibër aktualisht është e hapur vetëm për këmbësorë. Qeveria e Kosovës kishte paralajmëruar në korrik të vitit 2024 hapjen e saj edhe për qarkullimin e automjeteve, një nismë që shkaktoi tensione dhe reagime nga bashkësia ndërkombëtare.

Ndërkohë, Qeveria e Kosovës ka ndërtuar edhe dy ura të tjera pranë urës kryesore – një për këmbësorë dhe një për automjete – me synimin për të lidhur Mitrovicën e Veriut me Mitrovicën e Jugut. /REL/

 

Continue Reading

Të kërkuara