Kryetari i Aleancës për Ardhmërinë e Kosovës (AAK), Ramush Haradinaj, ka thënë se shteti ligjor dhe demokracia nuk dorëzohen para strukturave të dyshimta kriminale. Haradinaj përmes një postimi në Facebook, ka thënë se mafia energjetike duhet të përballet me ligjin.

“Po i ngushtohet rrethi Mafisë Energjetike. Veprimet e fundit të drejtësisë në Kosovë po i japin shpresë popullit për fuqinë e ligjit mbi të gjithë. Mafia Energjetike duhet të përballet me ligjin. Shteti ligjor dhe demokracia nuk dorëzohen para strukturave të dyshimta kriminale. Po i ngushtohet rrethi”, ka thënë Haradinaj.

Guvernatori i Bankës Qendrore të Republikës së Kosovës (BQK), Ahmet Ismaili, i shoqëruar nga ekipi i tij, ka zhvilluar një takim me Përfaqësuesin e Thesarit të SHBA-së për Evropën Qendrore dhe Lindore, Mathew Haarsager. Diskutimet u përqendruan mbi gjendjen makroekonomike të Kosovës, zhvillimet e fundit në sektorin financiar dhe iniciativat e ndërmarra nga BQK-ja në përputhje me Planin e saj Strategjik 2024-2028.

Guvernatori Ismaili nënvizoi stabilitetin dhe qëndrueshmërinë e sistemit financiar, duke vënë në pah performancën e qëndrueshme të sektorit, përfshirë normën e ulët të kredive jo-performuese dhe nivelin e lartë të kapitalizimit.

Gjatë takimit, Guvernatori i BQK-së i shprehu mirënjohjen z. Haarsager për mbështetjen thelbësore të ofruar nga Departamenti i Thesarit amerikan. Ai theksoi përfitimet nga projektet e ndryshme të përkrahura nga Thesari i SHBA-së, të cilat kishin synim zhvillimin e tregut të obligacioneve qeveritare, krijimin e infrastrukturës së nevojshme të tregut dhe lehtësimin e iniciativave të tjera që avancojnë sistemin financiar të Kosovës.

Gjithashtu, u diskutuan bashkëpunimet aktuale të mbështetura nga USAID-i, të cilat kanë qëllim krijimin e një kornize dhe infrastrukture të qëndrueshme të tregut të kapitalit. Këto projekte janë jetike për promovimin e stabilitetit financiar dhe rritjes ekonomike të Kosovës, duke siguruar që sektori financiar të vazhdojë të zhvillohet në përgjigje të nevojave të tregut.

Guvernatori Ismaili ritheksoi rëndësinë e partneriteteve dhe bashkëpunimeve ndërkombëtare në nxitjen e zhvillimit ekonomik dhe rritjen e qëndrueshmërisë së sistemit financiar të Kosovës. Angazhimi me Thesarin e SHBA-së ka për synim forcimin e më tejmë të marrëdhënieve dhe promovimit të një mjedisi të qëndrueshëm financiar në të mirë të të gjithë qytetarëve të Kosovës.

Të dy palët në mbyllje të takimit rikonfirmuan zotimin për thellimin e marrëdhënieve dhe të bashkëpunimit.

Prezantimi i raportit të ekspertëve për nivelin e menaxhimit të marrëdhënies së punës të anëtarëve të Shërbimit të Jashtëm dhe zyrtarëve të Ministrisë së Punëve të Jashtme dhe Diasporës, ka shkaktuar përplasje ndërmjet pozitës dhe opozitës. VV-ja kërkoi që ky raportim të shtyhet, por opozita e kundërshtoi për shkak se pamundësohet pagesa e ekspertëve.

Ndonëse ekspertët janë propozuar nga Lëvizja Vetëvendosje, kjo e fundit sot e kundërshtoi raportin me të gjetura. Aty u tha se votimi i këtij raporti është i nevojshëm për t’i paguar ekspertët për punën që e kanë bërë.

Fillimisht, eksperti i angazhuar për këtë proces, Shkëlqim Jakupi, tha se raportin e ka dërguar në komisionin përkatës, por shtoi se është fillestar dhe i pa përfunduar.

Ai rekomandoi që të jepet hapësira kohore më e gjatë për ta përfunduar të gjithë raportin.

“Raportin e kem dërguar tash e dy muaj në komisionin përkatës. Është raport fillestar jo përfundimtar. Raporti është  i ndarë në 10 kapituj kryesor sikurse organizimi i MPJD-së, emërimet, konkurset, menaxhimi i transfereve, emërimet të këshilltarëve e të tjera. Mungojnë të gjeturat e ekspertizës, për shkak mos përfundimit të punës, mos dëgjimit të dëshmitarëve posaçërisht kohës së shkurt për të nxjerrë një ekspertizë profesionale. Rekomandimet janë që ky raport nuk ka nevojë të shqyrtohet as miratohet nga Komisioni Hetimor, ne kërkuam që si ekspert në na vazhdohet mandati që ta përfundojmë përfundimisht ekspertizën. 1202 faqe kemi pranuar material në një kohë shumë të shkurtër, ju fillimisht keni angazhuar tre ekspert e sot jam vetëm unë. Në bazë të kësaj neve do të na duhej së paku edhe një muaj kohë për ta përfunduar unë këto tre kapituj.  Nuk kemi pasur asnjë pengesë nga askujt nga Ministria por koha është e limituar. Te gjitha janë çështje të veçanta dhe analiza të veçanta”, tha Jakupi.

Deputetja e Partisë Demokratike të Kosovës, Ariana Musliu-Shoshi e sheh të arsyeshme votimin e këtij raporti.

“Do të pajtohesha nëse kjo do të ishte raportim përfundimtar, në intervistimin e dëshmitarëve e të tjera. Keni pasur një kohë shumë të shkurtër, shpresoj qe miratohet edhe lista e dëshmitarëve, vlerësoj që është vetëm një raport fillestar e kam lexuar me vëmendje dhe është në rregull”, u shpreh ajo.

Kryetarja e këtij komisioni, Time Kadrijaj kërkoi që ky komision të votohet për shkak të mundit që kanë bërë ekspertët.

“Në mënyrë jetike ta votojmë këtë raport për punën që kanë bërë. Ky raport është që me pagu ekspertë për angazhimin që e kanë bërë, nuk po shoh arsye për ta shtyre këtë”, ka thënë Kadrijaj.

Ndërsa deputeti i partisë në pushtet, Gazmend Gjyshinca, kërkoi që kjo mbledhje të shtyhet për të hënën.

“Po pajtohem që duhet paguar puna që është bërë, në anën tjetër vetëm sot ndodhet prezantimi nga eksperti, na duhet kohë për ta analizuar e të shohim çfarë është e zeza mbi te bardhën. Dhe e dyta prej grupit tonë mungojnë edhe tre, katër vetë tjerë. Nëse të hënën bëhet mbledhja kemi kohë për te parë se çka është shkruar dhe për ta votuar”, u shpreh Gjyshinca.

Nga viti i ardhshëm, rrugët e Kryeqytetit do të kenë korsi të veçantë vetëm për autobusë të Trafikut Urban. Kështu u tha në diskutimin e mbajtur organizata INDEP në kuadër të Javës së Zhvillimit të Qëndrueshëm të Kosovës (KSDË) 2024.

Diskutimet u fokusuan në nevojën për një zgjidhje të qëndrueshme për lëvizshmërinë e qytetarëve me një transport inovativ dhe me miqësor për mjedisin.

Gent Sejdiu, menaxher i projektit për reformën e transportit publik urban të komunës së Prishtinës, ka thënë se komuna ka hartuar Planin e Mobilitetit të Qëndrueshëm Urban të Prishtinës,  i cili parasheh reformat për këtë çështje.

Ai ka thënë se qeverisja ka bërë reforma në transportin publik, ku me këtë rast ka folur edhe për ndryshimet që priten që të bëhen nga viti i ardhëm, duke shtuar se nga viti 2025 disa rrugë në kryeqytet do të përdoren vetëm nga autobusët.

“Aktivitet që kemi mbajtur kanë qenë të koncentrua në tri fokuse: shfrytëzimi i transportit publik, lëvizja e lirë dhe çiklizmi. Në fokus kemi pasur vetëdijesim e qytetarëve, në fokus kanë qenë fëmijët. Ideja është që ne si fokus të përgjithshëm në nivel kombëtar të bëjmë sa më shumë investim tek fëmijët që të kuptojnë se pse duhet ta përdorin transportin publik, biçikletat. Qeverisja e re ka ndryshuar konceptin, ka bërë projekte për lëvizshmëri të qëndrueshme. Kemi bërë reforma në transportin publik, ku janë të përfshirë operatorët publik dhe privat. Biletat ditore nga 1 janari do të bëhet edhe për operatorët privat. Do të jetë edhe integrimi i biletave, që do të jenë ditore, javore e mujore që do të përdoren nga të gjitha operatorët, tjetra është digjitalizimi që do të jenë të monitoruar, digjitalizimi i biletave. Nga viti i ardhshme disa rrugë do të jenë të qasshëm vetëm për autobus”, ka thënë ai.

Edon Xharra nga ‘Raiffeisen Leasing’, ka thënë se nga viti 2022 kanë financuar 52 vetura elektrike të kompanite e Taxi në vend kështu duke kontribuar në mjedis të qëndrueshëm.

“Që nga viti 2022 kemi financuar mjaft projekte që kanë kontribuar në mjedis të qëndrueshëm. Që nga viti 2022 kemi financuar 52 vetura elektrike. Kemi financuar Taxi Tesla por edhe të tjera. Ka qenë një zhvillim mjaftë i mirë dhe kjo ka pësuar me financim edhe nga bankat e tjera. Gjithë industria bankare dhe jo bankare është kyçyr në këtë”, ka thënë ai.

Besmir Kokollari, nga Ministria e Mjedisit, Planifikimit Hapësinor dhe Infrastrukturës, duke folur për aktivitete dhe veprimet që kanë marr si ministri për këtë çështje, ka thënë se si qeveri kanë marr vendim që për veturat e reja të hiqet dogana dhe akciza, pasi këto pagesa janë hequr edhe për makineritë prodhuese të cilat janë më efikase.

“Qeveria për veturat e reja ka hequr doganën dhe akcizën për të zbritur emetimet e gazrave të dëmshme, gjithashtu qeveria e ka hequr doganën dhe akcizën për makineritë prodhuese të cilat janë me efikase në mbrojtjen  e mjedisit”, ka thënë ai.

Drejtori i Operativës dhe menaxheri i Transportit në “Trafikun Urban”, Mentor Isufi, ka thënë se si pikë kryesor për ta është rritja e flotës me autobus duke përfshirë edhe autobus elektrik.

“Ne kemi menduar si piken kryesore e kemi rritjen e flotës me 6 autobus elektrik. Ne kemi pak telashe për shkak se nuk kemi autobus të mjaftueshme për të ju përgjigjur kërkesave të qytetarëve. Me ardhjen e 30 autobusë kemi planifikuar edhe zgjerimin e linjave. Tjetra është vetëdijesimi i qytetarëve. Problemi kryesor në kryeqytet është se nuk ka korsi të veçantë për autobus, 50 për qind do të ulet përdorimi i veturave”, ka thënë ai.

Java e Zhvillimit të Qëndrueshëm të Kosovës (KSDË) 2024 aspiron të krijojë strategji dhe zgjidhje gjithëpërfshirëse që adresojnë natyrën e shumanshme të zhvillimit të qëndrueshëm, duke nxitur përparim domethënës në mbrojtjen dhe menaxhimin e burimeve natyrore të Kosovës për gjeneratat aktuale dhe të ardhshme.