Prokuroria Themelore në Prishtinë, përmes një aksioni të suksesshëm të Njësitit për Krime Ekonomike dhe Korrupsion, ka arrestuar sot katër persona të dyshuar për përfshirje në vepra penale të ryshfetit dhe falsifikimit.

Nga operacioni, i realizuar në bashkëpunim me Policinë e Kosovës, është arrestuar një ekzaminere të patentë shoferëve në Ministrin e Mjedisit, Planifikimit Hapësinor dhe Infrastrukturës me inicialet V.L., si dhe tre persona të tjerë, I.M., A.B. dhe Z.B., drejtues të dy auto-shkollave në Prishtinë.

Gjatë zbatimit të masave të veçanta hetimore, të dyshuarit I.M. i janë gjetur dhe sekuestruar 800 euro ryshfet, të cilat rrodhën nga fondi i simuluar i Policisë së Kosovës.

Hetuesit kanë bastisur objektet e auto-shkollave “A” dhe “I”, ku kanë siguruar prova materiale relevante dhe kanë sekuestruar telefonat mobilë të të pandehurve kryesorë.

“Të pandehurit I.M. i janë gjetur dhe sekuestruar 800 euro ryshfet të përdorura nga fondi i Policisë së Kosovës, ndërsa në zbatim të Urdhër kontrollit të lëshuar nga Gjykata Themelore në Prishtinë, është realizuar kontrolli në dy auto shkollat e cekura më lartë ku janë siguruar provat e nevojshme materiale, ndërsa të pandehurve I.M dhe V.L, u janë sekuestruar telefonat e tyre mobil”, thuhet në njoftimin e Prokurisë.

Katër të dyshuarit janë ndaluar për 48 orë me vendim të Prokurorit të Shtetit, i cili brenda afatit ligjor do të kërkojë caktimin e masës së sigurisë në Gjykatë.

Përzgjedhësi i Kombëtares së Kosovës, Franco Foda, së bashku me menaxherin e përfaqësueses, Bajram Shala, kanë konfirmuar se janë në monitorim dhe bisedime me tre talente që po shkëlqejnë në ligat evropiane: Erblin Osmanin, Brajan Grudën dhe Lorent Tolajn.

Edhe pse “Dardanët” janë vetëm pak ditë larg përballjes vendimtare ndaj Sllovakisë në kuadër të play-off-it për Kupën e Botës, vëmendja e opinionit është kthyer edhe nga afrimet e mundshme. Një prej emrave më të diskutuar është ai i 16-vjeçarit Erblin Osmani, i cili bëri bujë me debutimin e tij te Bayern Munich në Bundesliga.

Menaxheri i Kombëtares, Bajram Shala, konfirmoi se Federata tashmë ka hedhur hapat e parë drejt talentit të ri. “Drejtori Muharrem Sahiti ka pasur kontakte direkte me familjarët e Erblin Osmanit”, deklaroi Shala, duke lënë të kuptohet se bisedimet janë në proces.

Në anën tjetër, trajneri Franco Foda u tregua më i matur sa i përket dyshes Brajan Gruda dhe Lorent Tolaj. Ndonëse pranoi se i njeh mirë cilësitë e tyre, ai theksoi se prioriteti i tij mbetet skuadra aktuale para sfidës jetike.

“Janë emra shumë interesantë dhe cilësorë të cilët i njoh. Megjithatë, fokusi im total është te lojtarët që kam aktualisht në grumbullim. Për emra të tjerë mund të përgjigjem vetëm pas ndeshjes”, u shpreh Foda.

Kosova do të kërkojë biletën për finalen e play-off-it këtë të enjte, në duelin që nis nga ora 21:00 kundër Sllovakisë, ndeshje kjo që konsiderohet si një nga më të rëndësishmet e viteve të fundit. /Telegrafi/

Kryeministri i Mbretërisë së Bashkuar, Keir Starmer, dhe presidenti i SHBA-së, Donald Trump, kanë folur në telefon mbrëmjen e kaluar, ka raportuar të hënën BBC.

Një zëdhënës i Downing Street ka deklaruar: “Udhëheqësit diskutuan situatën aktuale në Lindjen e Mesme, dhe në veçanti, nevojën për të rihapur Ngushticën e Hormuzit për të rifilluar transportin global”.

“Ata ranë dakord që rihapja e Ngushticës së Hormuzit është thelbësore për të siguruar stabilitetin në tregun global të energjisë”, ka shtuar ai.  “Ata ranë dakord të flasin përsëri së shpejti”.

Kryeministri më vonë do të drejtojë një takim “Cobra” me shefen e financave, Rachel Reeves, guvernatorin e Bankës së Anglisë, Andrew Bailey, dhe të tjerë, mbi ndikimin ekonomik të luftës.

Trump i ka dhënë të shtunën Iranit afat prej 48 orësh për të rihapur Ngushticën e Hormuzit – ose, tha ai, SHBA-ja do të “shkatërrojë” termocentralet iraniane, “duke filluar së pari me më të madhin”.

Ndërkohë, Forcat e Mbrojtjes së Izraelit (IDF) thonë se presin të përballen me “disa javë të tjera luftimesh” kundër Iranit dhe “Hezbollahut”. /BBC/

Një incident që ka rezultuar me lëndime trupore është regjistruar në komunën e Leposaviqit. sipas raportit zyrtar 24-orësh të Policisë së Kosovës.

Ngjarja ka ndodhur rreth orës 19:00, pas një konflikti verbal mes dy personave.

“Viktima burrë kosovar ka pranuar tretman mjekësor në spitalin e Mitrovicës Veri, pasi që i njëjti dyshohet se pas një mosmarrëveshje është sulmuar fizikisht nga i dyshuari mashkull kosovar”, sipas raportit të policisë.

Menjëherë pas raportimit të rastit, njësitë policore kanë shoqëruar personat e përfshirë për intervistim.

Pas ekzaminimit të rrethanave dhe konsultimit me organet e drejtësisë, rasti ka kaluar në fazë hetimore të rregullt.

Sipas policisë, “palët janë intervistuar dhe me vendim të prokurorit janë liruar në procedurë të rregullt”. Rasti po trajtohet nga autoritetet kompetente si “Lëndim i lehtë trupor”.